AM730

全部專欄 , 依話直說

依話直說 - 依雯

紅魔場外場內都出事

2016-05-12

英國球迷一向狂熱，今次韋斯咸班球迷就直頭失控！韋斯咸喺烏普頓公園球場上演埋最後一場主場比賽之後，就會移師奧林匹克球場，所以班韋斯咸球迷異常激動，猛向客隊曼聯隊巴扔嘢，完場後仲拆走觀眾席嘅凳當紀念品。結果紅魔喺比賽前35分鐘先抵達球場，好彩球證開恩，延後45分鐘至開賽，等紅魔球員有時間熱身。最終曼聯輸2比3，冇咗高大嘅「爆炸頭」費蘭尼制空，頭槌輸晒，最終全失3分！失分後，曼聯要爭前四踢下屆歐聯有好大困難，因為只要曼城下場和波，就算曼聯下場全取3分都係冇行。

華迪搞足球學校發掘人才

2016-05-11

占美華迪已經成為球壇響噹噹嘅名字，然而成功非僥倖，呢位李城射手嘅奮鬥之路，實在值得年輕一代學習。作為過來人，佢明白職業系統訓練對球員嘅重要性，所以開辦足球學校V9，發掘非聯賽入面有潛質嘅球員。華迪由効力第七級別非聯賽業餘球隊開始，力爭上游，終於等到29歲搖身一變成為英超冠軍球員，目前以24個聯賽入球射手榜次席，仍有望成為神射手；佢亦好大機會入選英格蘭國家隊，今夏出戰歐國盃。佢細個嗰陣曾經因為生得太細粒，被球會放棄，好彩佢冇放棄自己，繼續努力，踢非聯賽球隊反而重拾踢波嘅樂趣。V9招生目標年齡由17至33歲，第一期有42個名額。嘩，估唔到三字頭都收呀！

迪基亞成C朗翻版？

2016-05-05

西班牙門將迪基亞連續3季當選曼聯年度最佳球員，係球會史上第一人，得獎之數同C朗睇齊，後衛史摩寧就獲隊友選為年度最佳球員。史摩寧今季唔再「屎波」，而「異心」迪基亞又再展示身價，今季32場聯賽，有14場力保不失。大家都知迪基亞之前心繫皇馬，即使轉會風波最終得以平息，但球迷個心總會有條刺。曼聯就話前事不提，仲開出高過皇馬嘅人工挽留佢，據講條件係皇馬嘅一倍。其實迪基亞嘅情況同C朗當年過檔皇馬有啲相似，C朗最終聽費爵爺話，留多一年，之後以更高價出售，幫曼聯賺多咗錢又踢多一年，可以話皆大歡喜。唔知迪基亞踢埋今季又拎埋獎之後，會唔會變咗C朗翻版呢？

古老石山雲加

2016-05-03

今季阿仙奴球迷怒火旺盛，主場對諾域治一仗，大量球迷喺球場高舉橫額又喝倒采，好直接咁寫明叫雲加走人。「槍迷」一直期待嘅英超冠軍又再擦身而過，面對四大皆空，實在忍無可忍。兵工廠今季其實大有機會奪得英超冠軍，因為雙曼唔爭氣，但熱刺突然殺出重圍，更加估唔到李斯特城會居首。不過，球迷最深深不忿嘅係古老石山領隊雲加一成不變，寄語一句「是時候要改變」，但雲加回應：「用語虛無飄渺，講咗等於冇講」，形容部分「槍迷」好似受外部勢力操控，又指部分傳媒同球評家扮晒判官，只想借題發揮引人關注，最後更寄語傳媒要發放多啲正能量。一個領隊嘅魅力在於創造，創造成績更加係首要，一路以不變應萬變，又點會進步？

餓波C朗最可怕

2016-04-28

有C朗缺陣嘅皇馬同曼城互交白卷，話晒入到歐聯4強，首回合踢得保守啲在所難免。施丹賽前話C朗同賓施馬兩大傷兵趕得切上陣，但最後C朗連後備都冇份，只能乖乖哋做觀眾。冇咗佢嘅皇馬，改由九十後盧卡斯華斯基斯搭賓施馬同加里夫巴利，當然由兩個大佬B擔大旗啦！但巴利5射0中目標，賓施馬1射都係0中目標，盧卡斯則未能起到腳射門。雖然如此，皇馬總共13次射門有3次中龍，相比曼城只得4射1中，已經佔盡上風。至於C朗，佢今季踢10場歐聯已射入16球，神射手幾乎已成囊中物。所以唔排除佢下仗會好似之前8強次回合咁，對禾夫斯堡發威大演帽子戲法，餓波嘅C朗好可怕㗎！

馬列斯的勵志故事

2016-04-26

又一球壇勵志故事——馬列斯以大熱姿態獲得英格蘭球員先生殊榮。話明係大熱，咁又點勵志法呀？馬列斯係繼1997年紐卡素嘅舒利亞之後，首位獲得此殊榮嘅非英超傳統大球會球員，禮拜日李斯特城大炒史雲斯4蛋，馬列斯就先拔頭籌取得士哥，依家李斯特城以8分優勢穩站英超榜首(執筆時未知熱刺主場對西布朗賽果)，首座英超冠軍幾乎捧到喇！邊個會估到，上年同期馬列斯只不過喺後備席上坐冷板凳，2014年加盟嘅轉會費只係40萬英鎊……佢小時候每日都走到街頭踢波，甚至練波練到忘記食飯，搞到皮黃骨瘦，等到19歲至有機會入足球學校。足球場上，從來都唔會一步登頂，成功係以無盡汗水換來的。

C朗密斟過PSG？

2016-04-21

C朗同巴黎聖日耳門(PSG)可能好事近！C朗喺歐聯8強次回合神勇地演出帽子戲法，帶領皇馬殺入4強，比賽完本應要好好休息，但C朗就急急腳飛咗去巴黎，有乜事令佢咁心急呢？原來佢去巴黎係同PSG主席艾加拉費密斟，其實今次已經係第五度見面。據報只要C朗應承過檔，年薪1,200萬歐元嘅合約就會奉上，並會正式向皇馬提出收購。由於今夏伊巴謙莫域、卡雲尼等將會離隊，PSG要積極填補空缺，除咗C朗之外，亦相中德國國腳馬高列奧斯，但係佢哋就算出到5,000萬歐元，都未必打動到多蒙特放人，皆因多仔自身難保，陣中主力好似奧巴美揚、根度簡等相繼俾人撬緊，列奧斯梗係要攬實先啦！

中國商人吼住AC

2016-04-19

國家主席習近平一聲令下，中國足球大搞，目標係2萬間足球學校，令國足可以躋身世界列強。依家不時都聽到中超球會以天價收購球星，亦有中國商人收購世界級球會嘅消息傳出。之前有傳中國萬達集團想入主AC米蘭，但已經否認咗，今次就傳有另一中國商人要買起AC。邊個咁把炮？原來係百度掌門人李彥宏，佢低調、帥氣而且鮮有喺公開場合露面，仲話一係唔出手，一出手就要求100%股份全部買晒。咁有信心巨額投資，當然係有晒計劃點大搞啦！除咗錢之外，更重要嘅係面子，許勝不許敗。新帥布洛治上任後，AC終於迎來近6輪賽事嘅首勝，作客小勝森多利亞1比0，大家都讚布洛治令球隊精神番晒。

曼城可創歐聯神話

2016-04-14

英超有李斯特城嘅灰姑娘童話，唔知曼城又可唔可喺歐聯創造神話呢？「藍月亮」兩回合總計以3比2將巴黎聖日耳門淘汰出局，球會史上首度躋身歐聯4強，由於兩隊實力旗鼓相當，所以都贏得幾險下，阿古路主射12碼宴客，要去到76分鐘至出現奇雲迪布尼嘅奠勝一球。曼城今次能夠走得更遠，其中一個原因係抽到支好籤、走到條好線。之前幾季，佢哋都喺死亡之組，即使出到線又馬上遇到巴塞呢啲勁旅。今次係一個鼓舞，亦係一次累積經驗嘅好機會，對上一次有英超球隊殺入歐聯4強，已經係2013至14球季嘅車路士。車仔喺2011至12年捧起歐聯冠軍獎盃，都係之前不被睇好，當年決賽同拜仁1比1打成平手，最後憑互射12碼險勝，真係冇嘢係冇可能㗎！

紅魔冇火冇個性

2016-04-12

前紅魔球星拿尼開腔，話覺得依家隊曼聯同費格遜在位時大不同，相信普遍球迷都有同感。佢仲話雲高爾當班球員係細路，成日喝住晒，要人跟住既有模式去踢。足球係要憑感覺同直覺去踢先得，講求瞬間嘅當機立斷同反應；太著重規範，就好似困咗喺個框框入面咁。其實拿尼効力曼聯8年期間贏過多項錦標，亦冇犯乜嘢過失，但都係同雲佩斯、「小豆」等一樣被雲高爾清洗。取而代之嘅，係一個又一個欠缺經驗嘅新丁，改革唔係壞事，但都要顧全大局。大清洗之後嘅曼聯，少咗象徵性人物，少咗一團火，學拿尼所形容，失去個性。雖然拿尼對雲高爾表示失望，但依然希望他朝一日有機會重返英超。

干地上車有暗湧

2016-04-07

車路士宣布同意大利國家隊主帥干地簽約3年，呢位「藍戰士」史上第五位意籍領隊，年薪將達650萬英鎊，如果贏到歐聯仲可額外收多500萬鎊獎金。對比其他英超領隊，呢個待遇排第四，頭三位係阿仙奴主帥雲加(830萬鎊)、曼聯教頭雲高爾(730萬鎊)同利物浦領隊高洛普(700萬鎊)。干地係紅褲子出身，當年効力祖雲達斯贏過唔少冠軍，到佢執教祖記，球隊就獲得意甲三連霸，佢亦3度當選最佳教練。表面上，干地「上車」係喜訊，但佢曾經喺2012年牽涉打假波醜聞，家陣案件要開審，雖則佢再三呼冤，但都有可能要坐監。其實干地同摩連奴風格有啲似，都係好重視球員紀律，係咪真係同藍戰士夾到？難講矣！

施丹防守戰術奏效

2016-04-05

西班牙國家打吡，皇馬作客2比1反勝巴塞，贏波要歸功於主帥施丹嘅防守戰術，神通廣大嘅西班牙傳媒就搵到4頁紙嘅戰術攻略，仲登埋出嚟，從中可以睇到施丹點樣重點防守巴塞，例如美斯喺中場攞波，就要睇實蘇亞雷斯點樣走動。就防守戰術去睇，基本上沿用番之前賓尼迪斯嗰套，最大分別係前場球員、「BBC」三叉戟同樣積極參與防守，效果已經有明顯差別。除咗主帥之外，今場亮點係成架坦克車咁嘅卡斯米路，佢攔截出色，大大減低皇馬後防壓力。點都好，就算下半場曾落後0比1，追平之後又踢少個，皇馬喺施丹指揮下，踢逆境波反而表現更好，皇馬13年期間換帥13次，相信施丹唔使玩音樂椅啩？

摩連奴列定入魔清單？

2016-03-31

摩連奴到底會入魔定入廠呢？盛傳摩帥今夏會接掌紅魔，有西班牙傳媒仲話佢連「購物清單」都準備好，當中包括拿玻里前鋒希古恩、皇馬中場占士洛迪古斯同埋祖雲達斯射手艾華路莫拉達。摩帥曾經喺皇馬與同希古恩合作過，曼聯亦喺去年夏天就已經相中希古恩，但因標價5,800萬英鎊而卻步。相對嚟講，占士嘅收購機會大啲，反正佢喺皇馬日子過得唔係好愉快，或者可以同皇馬和平分手呢。另一邊廂，有傳阿仙奴中場奧斯爾話雲加唔走的話，佢就離隊，向球會施壓要摩帥接手。曼聯遲遲未認定摩帥，令兵工廠有機會介入，最後未知摩帥情歸何處，不過以佢好勝嘅性格嚟睇，相信都係冧紅魔多啲嘅！

麵包與愛情

2016-03-29

瑞典天王伊巴謙莫域今季約滿聖日耳門之後唔會續約，去向大受關注，曾經喺瑞超、荷甲、意甲、西甲同法甲留下腳毛嘅佢，到底下一站會去邊呢？伊巴親證收到英超球會嘅邀請，仲比喻轉會就好似一段婚姻咁，需要認真評估，雙方要有同樣意願，而且都對呢段婚姻有渴求——似乎暗示對方要再出多啲誠意至得。有消息指中國球會「誠意」更大，出到年薪7,500萬歐元向佢招手，即係美斯人工嘅3倍！目前美斯係世界上薪酬最高足球員，2,600萬歐元已經好離地，估唔到有中國球會出到呢個價羅致伊巴。麵包同愛情都重要，伊巴最終會點揀呢？

迪米捷利斯累街坊

2016-03-24

比利時恐襲令人心寒，但襲擊有時真係防不勝防。不過，最難應付嘅其實係自己友——講緊嘅係曼城中堅迪米捷利斯。喺曼市打吡戰，佢唔單止俾紅魔新星拉舒福特輕易推過兼失波，之後又喺禁區內魯莽攔截對方，幾乎被罰12碼。出洋相都算喇，最致命嘅犯錯係交出一記醫院波，俾安東尼馬迪爾有機會上前搶，門將赫特急忙解圍之下觸傷右腳，要休養1個月。其實35歲老將迪米捷利斯明顯狀態大不如前，但曼城正受傷兵潮困擾，領隊柏歷連尼唯有起用佢同文加拉握守中路。兩周後就要應付歐聯8強首回合作客巴黎聖日耳門，依家連史達寧都傷埋，令本來頭都大埋嘅柏帥更加頭痛。PSG方面就講到明，唯一驚嘅只有耶耶托尼，其實面對弱陣，已經著數晒啦！

<
1
...
3
4
5
6
7
...
41
>

/136

新聞搜尋



	至

C觀點