AM730

全部專欄 , 依話直說

依話直說 - 依雯

西甲提早開波有望

2010-09-16

早前同朋友飯局，佢哋都係標準足球迷，大部分賽事都會欣賞，每逢周末更加係連睇10小時。不過作為一個作息定時嘅打工仔，要捱至深宵，真係少啲精力都唔得。所以佢哋都覺得，如果西甲可以提早開賽就最好不過了。朋友嘅願望，真係有機會實現喇，因為早前20支西甲球隊的主席曾經聚首，相談提早開賽嘅可行性。據西班牙傳媒透露，大部分球會都贊成呢個方案，認為於當地下午開賽，可以增加海外嘅轉播收入。不過仲有一關要過，就係西班牙球迷，因為佢哋已經習慣晚上入場觀看賽事，所以要公開徵詢佢哋嘅意見，最終至可成事。據悉，西甲今次嘅建議，係針對亞洲市場，特別係中國球迷。若果一切順利，次循環賽事就可以實行。

朗尼嫖妓新聞沒完沒了

2010-09-14

名人做錯事，自然會受到傳媒大肆報道及批評，好似朗尼咁，佢背妻做出越軌行為咁，多得媒體廣泛報道，令到呢件原本只係家事，依家演變成球壇大事。幸而朗尼早前為英格蘭國家隊上陣時，表現未受負面醜聞影響，不但取得入球，更獲領隊卡比路大讚專業。朗尼嫖妓呢單新聞真係沒完沒了，由佢太太歌蓮有意提出離婚，到近日態度軟化，再到兩名妓女公開道歉，真係睇到厭。日前，輪到皇馬教練摩連奴發言，話好希望可以同朗尼合作。因為今次事件，朗尼嘅身價可能有少少回落，但如果皇馬真係出價收購，而朗尼又真係想離開英超出國搵食的話，相信首先問准嘅，唔係費爵爺，而係歌蓮。

賓施馬難留皇馬

2010-09-09

皇家馬德里嘅前鋒線可謂人才濟濟，除咗有C朗、希古恩同卡卡，今季仲有阿根廷翼鋒迪馬利亞加盟，恐怕賓施馬又要成日坐喺後備席喇！賓施馬喺去年7月以3,500萬歐元由里昂轉投皇馬，可惜上季大部分時間都只係擔任希古恩嘅後備，由於佢嘅上陣機會寥寥可數，結果無緣入選法國出戰南非世界盃大軍。依家輪到摩連奴接掌皇馬，聽聞亦都唔多滿意佢嘅表現，恐怕佢大有機會喺冬季球員轉會市場重開時被賣走。據悉，曼聯同利物浦兩支英超球隊，仲有意甲嘅祖雲達斯都對賓施馬感興趣，尤其是紅魔主帥費爵爺，一直都好欣賞呢位法國射手，只不過之前唔夠皇馬爭。睇番近期紅魔嘅攻力，的確比車仔同兵工廠遜色，朗尼又受召妓醜聞困擾，睇怕真係有必要加強攻力。

希臘新貴連尼斯

2010-09-07

曼聯銳意年輕化，費爵爺今夏先後收購基斯史摩寧、查維亞靴南迪斯及碧比，最近又睇中同樣二十出頭、目前効力希臘彭拿典奈高斯嘅連尼斯。連尼斯係一名創造型中場，曾經喺南非世界盃中為希臘國家隊披甲，佢亦係國家隊及彭拿典奈高斯最年輕嘅入球紀錄保持者。佢喺07年榮登希臘聯賽最佳新秀及入選最佳11人，更協助國家隊勇奪U19歐青賽亞軍，而佢就當選最有價值球員。年紀輕輕已經有咁多威水史，難怪連尼斯會成為曼聯、皇馬同AC嘅收購目標啦！

羅賓奴希比轉換新環境

2010-09-02

轉會市場又係時候收爐，通常喺最後關頭，總會有人出手，相信今次最令人驚喜嘅，就係曼城前鋒羅賓奴加盟AC米蘭。呢位巴西國家隊主力同AC簽下4年合約，估計轉會費約1,500萬歐元。羅賓奴喺曼城唔受重用，上季中更被借到巴甲嘅山度士，今次佢去到AC，拍住朗拿甸奴、柏圖同伊巴謙莫域喺前線搵食，希望會有一番作為啦！另外，巴塞宣布希比被外借到伯明翰1年，其實呢位白俄羅斯國腳喺過去嘅球季已被借到史特加，可惜佢整季都冇入過波，表現唔理想。因為希比嘅人工唔低，而且好難賣得佢走，於是巴塞教練哥迪奧拿將佢繼續借俾其他球隊。其實好多宗轉會交易，都好似希比咁，係球隊為咗清除瘀血而促成。另一種情況，就係利物浦嘅馬斯真蘭奴咁，因球員個人意願而要求離隊，呢位阿根廷國腳早前不惜罷踢都要轉投巴塞，依家終於如願，希望佢喺新環境會生生性性踢好波啦！

皇馬傷兵問題未解決

2010-08-31

皇家馬德里喺聯賽展開前，已經要面對傷兵滿營嘅問題，卡卡、艾比奧爾、加雷、比比、加高同馬哈馬度迪亞拉等均列入傷兵名單，所以主帥摩連奴對球隊喺聯賽首仗作客馬略卡只能悶和0比0表示失望，但表明唔會怪責球員。今仗開賽僅兩分鐘，C朗被對方後衛辛達路斯鏟中右邊足踝，當時見佢個樣好痛苦，擔心連佢都傷埋就大件事，幸而佢最後都堅持踢落去，雖然冇波入，但呢份精神的確值得加許。另外，狄亞拉喺完場後亦發現拉傷右腳，兩人需要作進一步檢查同治療，希望無大礙啦！皇馬嘅傷兵人數已達8名，當中包括主力同王牌球員，嚟緊又有球員要為國家隊作賽，打後喺聯賽及歐聯，要面對奧沙辛拿同阿積士，摩帥唯有減少操練，讓球員得到更多休息機會。希望可以快啲睇到皇馬以最強陣容出擊啦！

熱身賽事與願違

2010-08-26

皇馬日前喺第32屆班拿貝盃比賽中，擊敗烏拉圭球隊彭拿路，第29次贏得冠軍。佢哋喺所有季前熱身賽，都立於不敗之地，希望佢哋可以一鼓作氣，喺聯賽接連報捷。可惜，佢哋喺對彭拿路嘅賽事中再有球員受傷，下半場以後備身份入替嘅加高，上陣僅8分鐘，就因為同對方球員相撞受傷，需要提早離場，要由迪馬利亞頂上。經隊醫初步檢驗後，加高證實左膝內側韌帶扭傷，需要作進一步詳細檢查，恐怕未能趕得及喺首輪聯場上陣。對於再有球員受傷，教練摩連奴話冇時間去唔開心，因為球隊有6位新球員加盟，需要時間磨合，加上開季賽程好艱巨，根本冇時間再去埋怨，言下之意，即係唯有頂硬上。其實熱身賽係一個好好嘅實戰機會，能夠俾班球員寓賽於操，可惜球員接連受傷，打亂教練部署，可謂事與願違。

伊巴何去何從

2010-08-24

伊巴謙莫域會唔會離開巴塞，已經談論多時，但係暫時始終未有落實嘅方案。佢喺巴塞經過一個球季之後，表現明顯較之前喺意大利時失色，可能真係適應唔到。正所謂勉強冇幸福，所以之前有傳佢會過檔AC米蘭，只係對方財政麻麻，未能話買就買。反正哥迪奧拿有新寵韋拿，佢直頭當伊巴透明都得，鋒線排陣上，絕對可以唔需要用到佢。有傳媒披露，AC雖然俾唔起高昂嘅轉會費，不過願意用波里路作交換，只要伊巴肯讓步減人工就有得傾，但係又輪到伊巴經理人又唔肯點頭，所以認真複雜。跟住又有消息傳出，話如果伊巴真係去得成AC，巴塞將會加碼1,000萬歐元，希望阿仙奴會放走費比加斯。只要轉會市場一日未關門大吉，啲轉會傳聞都好難講係真定係假！

<
1
...
37
38
39
40
41

/136

新聞搜尋



	至

C觀點