AM730

全部專欄 , 依話直說

依話直說 - 依雯

赫特之死穴

2016-09-01

赫特喺上周中嘅歐聯附加賽，終於等到哥帥俾機會佢正選上陣，但亦相信係最後一次。比賽中途，好多球迷都企起身齊齊為佢高歌，話晒喺曼城10年，真係好黯然，但哥帥就係唔鍾意用佢，仲簽入哥迪奧巴禾，擺明要趕佢走。哥帥一向嘅風格，都認為門將都要識得運用皮球，多利用短傳，但赫特就鍾意大大力斬個波出去，職業生涯中只有兩次傳球成功率達100%；相比哥帥之前麾下嘅域陀華迪斯同紐亞，都分別係聯賽傳球成功率最高嘅門將。除此之外，赫特一直都改唔到一個弱點，就係成日失波都係自己左下方，作為頂級鋼門，咁明顯嘅漏洞係唔可以接受。每個人都有進步空間，加油吧！

蛻變成更強更好

2016-08-30

終於正式公布我嚟緊11月打拳賽嘅詳情同對手喇！我點解會參加今次Energy Fight？係咁嘅，我之前喺電視台主持K1格鬥節目而認識咗向柏榮師傅，我一直都想拜世界級拳王為師，但又的唔起心肝，向師傅就提議我參加比賽，藉著明確嘅目標，令學習更有效率，自己亦有感年紀唔輕，正所謂無悔青春，同今次比賽口號「Never Stop Change」一樣，希望蛻變成更強更好嘅自己。今次比賽係淘汰制，對手都係又高又靚嘅藝人同model，要又打得又睇得，真係要落唔少苦功。另外，仲有全港人士都可以報名參加、香港首個以排名賽制爭奪香港拳王金腰帶嘅賽事。心動不如行動，一齊身體力行啦！

侯城難敵強勢紅魔

2016-08-25

升班馬侯城喺開咧戰主場2比1爆冷擊敗李斯特城，前鋒組合艾保靴南迪斯同迪奧文迪喺禁區內使出「雙人倒掛金勾」，好似足球小將咁堅而成為焦點。侯城實力上輸在起跑線，但係仍然交出令人喜出望外嘅成績，現時兩戰全勝位列第三。不過，球隊傷兵問題嚴重，現時健康嘅一隊球員除咗門將之外只有14人，仲要冇增兵，領隊布魯士又走埋，暫時由前曼聯助教費倫出任看守領隊。侯城周末會同曼聯上演首場「前列大戰」，面對強勢增援嘅紅魔，侯城實在難以招架。伊巴謙莫域兩仗轟入3球，破世界紀錄收購嘅保羅普巴表現出色，艾歷拜利同戴利白蘭特亦守得愈來愈穩陣。雖然侯城一眾升班功臣嘅努力有目共睹，不過今仗對手嘅重磅收購太厲害。

祝淺野拓磨好運

2016-08-23

阿仙奴增兵動作一向唔大，今夏只有兩簽。其中一簽係7月時由廣島三箭簽入日本國腳前鋒淺野拓磨，佢被視為日本最有前途的新星之一，更有「日本蘇亞雷斯」之稱。雲加大讚淺野非常有天份，睇嚟雲加都係一貫咁有耐性，唔想簽即食球員，而係繼續俾佢慢慢燉、慢慢炆。果然「如佢所願」，淺野申請工作證被拒，今季都係踢唔到，唯有安排外借，希望可以搵到德甲或者法甲球會俾佢落戶住先啦！21歲仔嘅淺野表示，收到兵工廠邀請嗰陣都O晒咀，坦言就算被外借，都會加盟兵工廠，似乎有晒心理準備。阿仙奴過去都簽過稻本潤一同宮市亮兩位日本球員，不過都未受雲加重用，睇吓淺野又有冇機會突破啦！

朗尼想續約需證明自己

2016-08-18

有消息指曼聯唔打算同朗尼續約……住啫！其實朗尼同曼聯份約去到2019年夏天，依家就講續約會唔會早咗啲呀？朗尼効力曼聯12年，係現役球員中効力最長嘅球員，佢最近一次續約係2014年2月，簽咗5年半。30歲嘅朗尼上季狀態下滑而遭受批評，但摩連奴依然視佢為前鋒材料，結果佢喺今季首場英超作客般尼茅夫即刻有士哥，踢番一個啱嘅位的確生猛晒。佢口硬話唔需要證明俾任何人睇，但球會方面就未必係咁認為，事關唔能夠用實力證明值30萬英鎊周薪嘅話，都幾難換到一紙新合約。英超競爭愈嚟愈激烈，大家都要出盡全力爭標，球員更加要表現出身價先可以留低，老大哥都係咁話！

伊巴係處子戰入球王

2016-08-16

英超開鑼喇！焦點唔多唔少落咗喺幾位名教頭們身上，摩連奴同哥迪奧拿都冇令人失望，齊齊全取3分。曼聯喺未夫添嘅情況底下，作客贏般尼茅夫3比1，3個入球分別由桑馬達、朗尼同伊巴射入，背後都各有古仔。馬達當年喺車路士就係俾摩連奴賣去紅魔，當時摩帥嫌馬達防守唔夠好，後者入魔之後就改善咗，依家摩帥都另眼相看，俾正選機會佢，仲爭氣入埋波！摩帥講過，朗尼一定係踢前鋒，結果如佢所願，朗尼信心當堂返晒嚟。伊巴除咗年輕時効力瑞典聯賽球會馬模同之後嘅荷甲球會阿積士之外，每項賽事嘅處子戰都有波入，計埋今場，佢喺5個頂級賽事嘅處子戰都有士哥，真係犀利！

哥帥人工高過阿古路

2016-08-11

正所謂「進可攻、退可守」，所以前鋒值錢，後衛都同樣有價有市。曼城就以高達4,750萬英鎊買入史東斯，令後者成為史上第二貴後衛，僅次於大衛雷斯當年由車路士轉投巴黎聖日耳門嘅5,000萬鎊天價轉會費，不過都已經係英超最高身價後衛喇！冇話抵唔抵買嘅，22歲仔簽約6年，勝在後生，大把世界啦！曼城為打造最強防線真係不惜工本，近年以過億英鎊先後買入英超史上3位最貴後衛(其餘兩人係文加拉同奧達文迪)。曼城一向都使得起錢，淨係主帥哥迪奧拿份人工，年薪達1,800萬歐元，比曼城最高人工嘅球員阿古路仲要多290萬歐元，就算同全世界嘅球員比，都只有5人年薪高過佢。重金打造最強陣容，哥帥似乎已經贏在起跑線，但最後跑唔跑得贏就睇自己造化喇！

奧運節目有待改善

2016-08-10

奧運係好睇㗎，有啲項目平時未必有機會睇到，但大台喺節目製作嘅表現，就令人慘不忍睹！例如奏國歌時，肅靜係基本尊重，主持人唔應該繼續講嘢；畫面顯示國家英文縮寫同國旗，都將智利講咗做中國；一個奧運體壇盛事直播，慘變清談節目等等……其實如果可以講啲比較有用嘅分析同跟番畫面評述，點都好過想扮專業但又想富娛樂性，結果兩頭唔到岸。我相信坐得喺電視機面前睇奧運嘅觀眾，都係對運動有興趣，而唔係想睇騷囉！做主持一定要做功課，好似張夢雪以黑馬姿態喺女子10米氣手槍射擊勇奪中國第一金，由於佢唔係主流奪金選手，都冇乜佢嘅背景古仔可以講囉。

球壇好男人基沙文

2016-08-04

今屆歐國盃基沙文憑6個入球成為神射手，可惜佢二奶命，喺歐國盃同歐聯都屈居亞軍，而且咁啱都係輸俾C朗。不過，基沙文已成當紅搶手貨，各大豪門爭住招手，其實佢早喺6月就同馬體會續約到2021年。著名法國籍球探奧拿斯接受訪問時爆料，基沙文仲踢緊皇家蘇斯達嗰陣，巴黎聖日耳門係佢另一選擇，並且開出相當吸引嘅條件，但當時佢女友有咗BB，而佢哋又住喺西班牙，所以決定留喺西甲發展。最近基沙文被影到同女友去咗美國邁亞密度假，拍拖5年依然恩愛到爆，球壇好男人嘅形象，令佢即時加晒分呀！

英國播中超

2016-08-02

世界變喇！宅男唔再宅喺屋企，為咗捉精靈竟然掛住躝街，咁英國電視台除咗播英國波之外，仲播埋中超又有咩咁出奇呀？雖然對英國球迷嚟講，中國球員冇個識，但由於中超豪擲千金買人，所以都叫有啲國際球星壓一壓場。打頭陣嘅上海申花對蘇寧，以及富力對上港都合演咗精彩入球騷，令英國球迷大叫過癮。不過，每周兩場中超直播戲碼，可唔可以保持到咁嘅進攻節奏呢？場地條件、執法水平等又可唔可以合乎標準？讚賞過後，係不絕嘅潑冷水，因為怕中超淪為國際笑柄。其實邊驚得咁多呀，反正已成事實，幫佢哋打下氣好過啦！

期待伊巴為紅魔披甲

2016-07-28

成日傳曼聯想回購C朗，但其實34歲嘅伊巴謙莫域唔會被比下去，佢隨時會成為紅魔嘅救世主。「戰神呂布」曾經同摩連奴合作令國際米蘭贏得意甲冠軍，今次再度拍住上，可唔可以繼續做出「得伊巴，得天下」嘅效果呢？想當年伊巴嘅一扭五神之入球、時速達150公里嘅炮彈式勁射、30碼遠距離誇張倒掛破門等，威水史真係一籮籮。雖然佢冇歐洲同世界足球先生嘅牌頭，但佢嘅入球能力、個人魅力絕對同C朗、美斯有得揮，而且單憑佢嗰份認為自己係最好嘅霸氣同自信，就可以感染到紅魔上下啦，真係超期待佢喺曼聯嘅演出呀！唔知今個周六紅魔同加拉塔沙雷踢熱身賽，伊巴會唔會處子登場呢？

紅魔24人夠晒數

2016-07-26

早前見朋友出讓兩張價值2,800蚊人仔嘅鳥巢曼市打吡波飛，大家都話太貴，倒不如飛去英國睇仲好。點知，噚日宣布因為場地問題取消埋，如果買晒機票飛去北京先至知冇得睇，肯定失望到爆。雖則暫時睇唔到摩佬同哥帥世紀握手，但前者又有驚人舉動俾大家談論。話說英超賽會容許各支球隊註冊25名球員，而U21球員就更加唔限名額，點知摩佬就話24人已夠晒數，而且已包括好幾名U21球員添。有quota都唔要咁蝕？摩佬認為應貴精不貴多，咁樣反而對球隊組織同士氣更有幫助，就算要兼顧歐霸戰線都係咁話。

期待魔佬鬥哥帥

2016-07-21

到底李斯特城來季可唔可以延續神奇之旅，繼續衝擊英超冠軍呢？佢哋陣中主力成為各大球會嘅獵物，今鋪真係考起領隊雲尼亞里喇！不過，雲帥就話，壓力落喺其他領隊身上就真，事關大球會對爭標渴求更大。冠軍只得一個，來季英超淨係睇領隊大鬥法已經好有睇頭——曼聯有寸王摩連奴入主變「魔佬」、哥迪奧拿減人工都要教曼城，呢兩位大佬碰頭肯定不得了。望下賽程，第一場曼市打呲會喺9月10號上演，先係曼聯主場，再次交手就要去到下年2月25號嘞！聯賽未開鑼，踢熱身賽都唔可以馬虎，曼聯先嚟個下馬威2比0贏韋根，最重要係摩佬滿意球員明白佢想要乜嘢。

投身綜合搏擊尋新挑戰

2016-07-19

我由2006年世界盃開始主持工作，不經不覺已經10年，係時候尋找新挑戰同突破，所以我膽粗粗、三張幾先至一嘗做運動員嘅滋味，仲要唔難唔玩——我一講話打拳賽，相信十居其九都會以為我打「豬瘟格鬥」，又話我實俾人打到豬頭咁，聽完之後真係好火滾，心中嗰團火係想身體力行，希望大家認識乜嘢為之綜合搏擊。其實香港好多運動都發展得唔差，但進步空間仲好大，需要更多支持。本地班霸東方大地震，需要大幅削減經費，被迫退出亞協盃賽事。雖然少咗條大水喉，但堅持到底，先至係運動精神！

老費愛的抱抱

2016-07-14

葡萄牙贏到歐國盃冠軍，俾人話「-6」、死好命、爆冷……各式各樣嘅葡萄說話不絕，但又唔會讚下佢哋喺今屆歐國盃咁多場都未輸過嘅？防守唔係實力嘅一種嚟嘅？呢啲唔尊重同負面嘢真係令我有啲激氣，但只要保持正能量，依然唔難發現美好事物——葡萄牙捧盃之後，費格遜都有現身觀眾席，好似小粉絲咁等C朗同拿尼經過時相認，仲互相擁抱，呢一幕真係睇到人眼濕濕呀！當年踢曼聯嘅小子C朗，由費Sir一手湊大，真係冇佢就冇今日。C朗最終結束12年嘅漫長等待，人生有幾多個12年呀，所以得到恩師嘅愛的抱抱，真係包含咗無法言喻嘅感動同好多好多嘅回憶。C朗，好多謝你帶俾我哋咁多美好回憶！

<
1
...
1
2
3
4
5
...
41
>

/136

新聞搜尋



	至

C觀點