AM730

全部專欄 , 依話直說

依話直說 - 依雯

足球改變命運

2016-12-15

足球可以令一個人有幾大改變？C朗第四次捧起金球獎，回顧當年佢仲係黃毛小子，因為喺士砵亭對曼聯嘅友賽表現出眾，獲發掘加盟紅魔而踏上青雲路。睇住佢一路進步，由從前過度著重個人表現，到懂得同隊友合作，技術同球品都更上一層樓。C朗對自己要求好嚴格，練到入球能力好全面，遠射、罰球抑或頭槌攻門，都一樣取得士哥，可見真係落咗唔少苦功。C朗唔單止四肢發達，頭腦亦好唔簡單，除咗球場上有把握力，佢亦好聰明咁藉著自己嘅人氣去打造品牌吸金。C朗嘅經理人公司最近就逃稅指控而公開報稅表，睇到C朗喺2015年嘅總收入達2億3千萬歐元，即係大約19億港紙，果然係足球改變命運。

米希達利恩展現真功夫

2016-12-13

曼聯結束聯賽3連和，終於贏番場喇！雖然只係小勝1比0，但係起碼止一止血先呀！今場米希達利恩延續入球氣勢再下一城，接應安達靴里拉嘅直線傳送，成功突破越位，喺兩名後衛身邊依然好冷靜咁勁射網頂，攻入加盟曼聯後嘅首個英超入球。上場歐霸盃已經見識過佢嘅單刀把握力，所以今場摩連奴繼續俾佢踢正選，結果冇令人失望。利落嘅推進，控制皮球嘅準繩度，「阿美尼亞球王」終於展現真功夫，最初8次上陣都冇入球冇助攻，但對上4場就有兩個入球同兩次助攻。可惜佢喺比賽末段被丹尼路斯從後踢傷足踝而退下火線，需要休養兩場，希望拆禮物日對新特蘭，佢可以上陣再建功啦！

紅軍魯營睇波學嘢

2016-12-08

巴塞嘅最後一場歐聯分組賽喺魯營上演，雖然賽前已篤定首名出線，但仍然毫不留情地以4比0大勝慕遜加柏。「地上最強」全場993次傳球，刷新歐聯紀錄，打開個統計圖表睇，啲傳球線好似填色咁填到密麻麻。今場比賽仲吸引到由高洛普做領隊嘅利物浦遊學團到場觀戰，未知係咪因為利記上場喺英超無奈以3比4輸咗俾般尼茅夫，周中又冇賽事要踢，高洛普就同班球員一齊輕鬆下，飛過西班牙睇波。羅拔圖法明奴、拉爾拉拿、占士米拿等核心球員都有隨行，佢哋就有講有笑，高洛普就好認真咁聚精會神睇波，唔好話偷師啦，係有值得參考嘅地方嘅！即管睇下佢哋下場主場迎戰韋斯咸，會唔會有驚喜喇！

紅魔迅速打回原形

2016-12-06

曼聯球迷睇完星期日晚場波，相信十個有九個半都火滾。上場聯賽盃大勝，今場話咁快又打回原形，對住近況麻麻嘅愛華頓，都冇本事全取3分。摩連奴賽後話賽果反映唔到賽事形勢，真係咩？10次射門得兩次中龍，伊巴謙莫域挑入空門嗰球算夠運啦！問題係，紅魔次次都硬係拎唔到燕梳球擴大優勢，想死守又守唔住，之前對阿仙奴已經係咁啦！摩帥一心諗住換入費蘭尼加強高空防守，但係落場兩分鐘就搞咗個大頭佛出嚟，送球12碼俾前度。點解成日都咁大意？臨完場被追和，幾唔抵呢！其實今場都險象環生，馬高斯盧祖嗰下起雙飛鏟伊祖沙古爾，伊巴疑似故意踢史密斯高文頭部，都有領紅危機。

2016-12-01

得悉巴甲球會查比高恩斯職球員坐嘅飛機不幸意外墜毀，深感惋惜。佢哋由巴西低組別小球會開始默默耕耘，從巴丙一路向上爬到巴甲，今季更升呢成為南美球會盃決賽隊伍。佢哋喺南美球會盃過關斬將，上星期至淘汰咗阿根廷嘅聖羅倫素殺入決賽，球迷都熱烈慶祝，對於突然其來嘅噩耗，當然感到難以置信及痛心。南美足協已宣布，比賽會無限期延期，決賽對手國民體育亦建議將今屆冠軍頒俾查比高恩斯作為致敬。一眾巴甲球會向巴西足總建議，未來3季無論查比高恩斯成績係點都可豁免被降班，而且願意免費借出球員，可謂人間有情。

摩連奴勿再火爆

2016-11-29

摩連奴繼續燥底，又俾球證罰咗去觀眾席。梗係因為心情唔好啦，開波90秒就俾韋斯咸先入波，雖然之後伊巴頭槌追和，但喺聯賽主場已經連和4場，近10場只得兩次全取3分，家陣同第四阿仙奴嘅差距，已經擴大到8分，聖誕快車都仲未到，就已經坐過山車咁要食定驚風散。不過，摩帥最好都係唔好太火爆，以免重蹈之前執教車路士時嘅覆轍。轉個頭，紅魔喺聯賽盃又再同韋斯咸碰頭，希望今次可以把握主場之利，同埋唔好再白白浪費啲寶貴嘅入球機會喇！不過今場佢哋有保羅普巴同費蘭尼停賽，卡域克又有傷，中場實力受到一定影響。

多蒙特瘋狂入波

2016-11-24

8比4？有冇眼花呀？賽前已經穩奪出線權嘅多蒙特，返到主場都係要大炒歷基亞，上演超級入球騷之外，仲創出歐聯多項入球紀錄。比賽頭25分鐘已經好激烈咁踢成3比2，半場更加領先到5比2，直到完場，雙方加埋入咗12球，打破2013年前摩納哥以8比3擊敗拉科魯尼亞嘅紀錄。連同首循環作客大勝6比0，「蜜蜂兵團」兩戰對歷基亞總共射入14球，亦創出歐聯一季內對同一對手入波最多嘅紀錄。今場多得傷愈復出嘅馬高列奧斯同香川真司各自梅開二度，列奧斯養傷咗6個月，復操後腳踭又整親錯過上場對拜仁，可能真係餓波餓太耐，一出嚟就好似獅子撲兔咁，即入兩球仲有兩次助攻。

皇馬反擊清脆利落

2016-11-22

由於周日要打拳賽(我贏咗，嘻嘻)，所以冇得去澳門睇賽車，不過我都有睇電視直播。感受完拳速同車速，又點少得足球嘅球速呀！皇馬對馬體會場打吡戰，就顯示出乜嘢叫速度嘞！皇馬一向啲反擊都好閃電式，佢哋今場喺領先2比0嘅情況下，依然得勢不饒人，加里夫巴利爆速接應一個長傳過頭波，順勢推埋入禁區，C朗一見巴利有所行動亦迅速跑去搵食位，接應傳中完成帽子戲法。佢兩個「超跑」拍住上，無論係跑動、速度同走位，都做到清脆利落。到底C朗嘅出色表現，能唔能夠令佢贏得下月公布嘅金球獎呢？協助皇馬贏得歐聯，再幫黑馬葡萄牙捧歐國盃，但威水還威水，都要睇投票結果先知嘅！

哥迪奧拿用心良苦

2016-11-17

作為頂級領隊，為咗調教好球隊，有時真係要奇招盡出。曼城領隊哥迪奧拿一向管得好嚴，例如訓練場禁用Wi-Fi上網、球員要一齊用膳等，但最搞笑應該係下「性旨」——今季被外借去西維爾嘅拿斯利爆料話，有一次放假前夕，哥帥同班球員講，做愛唔係唔可以，但一定要午夜之前，因為充足睡眠至為重要，仲話美斯之前都係因為聽咗哥帥話，先至冇再咁易受傷。拿斯尼最後都讚哥帥係一等一好教練，要求咁高，都係用心良苦啫！哥帥嘅影響力，確係有目共睹，睇英格蘭對西班牙場友賽，史東斯、史達寧被調教後嘅進步至為明顯。雖然英軍喺領先兩球下臨尾被扳平，但對「三獅兵團」嚟講都叫有進步呀！

有心未怕遲

2016-11-15

運動員每每都要同時間競賽，尤其係本身嘅年齡。踢波嚟講，三十幾歲已經到咗職業生涯尾聲，但保養得好嘅話，即使未必保持到年輕時嘅托弗狀態同體力，都可以憑經驗同頭腦制勝。好似百米飛人保特咁，唔經唔覺又年屆30，短跑成就已經達到一個高峰，但係佢冇就咁停下步伐。保特一向都好鍾意足球，於是佢因定去多蒙特跟操，轉職做「高齡」足球員就言之尚早，不過有心有力嘅話，冇話冇可能嘅。勵志例子其實好多，一個白髮老伯70歲先開始健身操肌肉，80歲成為知名天橋model，所以我都34歲先開始打拳，今個周日會打第二場比賽。幾時開始都唔會遲，人生就係要盡做、盡情享受每一個當下！

美斯新紋身令人好奇

2016-11-10

好多球星都鍾意紋身，不過美斯隻左腳個新紋身實在太搶眼，就好似著咗隻10號波襪咁，所以引來唔少人談論。原本佢左腳紋咗足球、花及翅膀等圖案，依家變咗10號數字、一個足球同一隻細路仔手，填到密麻麻。莫非美斯因為後悔，所以大改個紋身？呢個終極版本引起大眾嘅好奇，但恐怕要留待下次記者會，先有機會追問當事人喇！咪睇美斯近來轉造型，染吓金毛、留吓鬚咁，以為佢變得好粗豪，其實佢踢波風格從來唔係火爆亂嚟，好少犯規攞牌。佢出道以來，只有兩次被罰紅牌紀錄，但都唔係發生喺西甲，分別係17歲時代表巴塞B隊參加西乙賽事時，因抗議球證被罰。另外係代表阿根廷國家隊，同匈牙利對壘時被罰，自此之後就再冇染過紅喇！

賓斯馬要為續約加油

2016-11-08

一度有傳皇馬主席佩雷斯覺得C朗年紀大，傷患又多咗，未必會同佢續長約，但C朗嘅超級經理人文迪斯落足嘴頭，終於傾掂數。 C朗同皇馬已落實續約5年，即係合約期去到2021年，到時C朗已經36歲，如無意外會喺銀河艦隊踢到掛靴。據報佢嚟緊5年嘅人工大約有21億港元咁多，真係誇張。加里夫巴利早前都延長咗合約至2022年，莫迪歷、卻奧斯同盧卡斯華斯基斯等主力亦都續晒約。不過，賓斯馬就要加把勁喇！事關同佢爭正選嘅莫拉達相當弗，不斷有波入，今季7次正選上陣取得8個入球，更壓過C朗同巴利嘅7球，成為皇馬目前嘅最佳射手，非常厲害。

2016-11-03

摩連奴上周喺聯賽盃帶領曼聯擊敗曼城1比0，報番上月英超打吡戰一敗之仇，但佢就冇慶祝，反而向球迷做出0比4嘅手勢，然後合十低頭道歉。球迷始終係米飯班主，所以要認低威，佢都好樂意。不過，對住英足總佢又會點呢？上場曼聯對般尼，摩帥因辱駡球證而被逐到看台，今次已經係佢今季第二次對球證唔禮貌而被罰。首次被罰嗰陣，本來佢可以作出回應，但佢冇現身，今次唔知佢又肯唔肯認錯呢？馬體會教練施蒙尼反而好肯認錯，事緣喺歐聯險勝羅斯托夫之後，雖然球隊提早兩輪晉級16強，但佢話自己做咗錯嘅對策，好彩球員自己解決到。詳細點錯法就唔肯講，不過錯咩都好，最緊要都係知錯能改啫！

伊巴紅魔齊低迷

2016-11-01

曼聯同升班馬般尼互交白卷後，喺英超已3場不勝，今仗全場射咗37腳，但唔係中楣中柱，就係俾對方門將湯希頓救到。湯希頓曾効力曼聯8年，但未曾踢過一隊嘅賽事，今次倒戈屢救險球，都算爭番一口氣。當中一球伊巴謙莫域車身窩利，佢冒住斷手嘅危險衝出去封位，真係搏到盡。相反，開季係威係勢嘅伊巴就好似失咗靈咁，佢唔係唔出力，今場都有12次射門，佔咗全隊差唔多三分之一，但都係冇運行。伊巴已經連續6場聯賽冇波入，計起腳次數都有35次，但始終未能破門，係個人9年以來最差走勢，佢同曼聯成隊波一樣，愈嚟愈低迷呀！

摩連奴曼市生活唔好過

2016-10-27

所謂「修身、齊家、治國、平天下」，作為現代足球主帥，標準又係點？近日英國傳媒報道，摩連奴上任以嚟，至今都仲住喺酒店，因為摩帥嘅老婆仔女都安居於倫敦，住緊價值2,500萬英鎊嘅豪宅，佢又一直心繫家人，所以未有打算喺曼徹斯特買屋落腳。不過，佢咁講就梗係俾人懷疑，其實係咪方便隨時執包袱走人呢？保羅普巴同摩帥住埋同一間酒店，我之前去曼徹斯特亦住過，距離奧脫福只係4公里，卡寧頓訓練基地就12公里，其實都幾方便，而且普通房都勁大間，個浴缸大到6呎幾都可以伸直瞓。曼聯成績欠佳，把握力更係英超最差，1月隨時要大清洗，咁搞法，你話摩帥仲有冇動力長駐兼買屋呢？

1
2
3
4
5
...
41
>

/136

新聞搜尋



	至

C觀點