AM730

全部專欄 , 足球男

足球男 - 阿鵬

尼爾馬人望高處

2010-10-18

近日盛傳維拉利爾前鋒尼爾馬，有望喺1月球員轉會市場重開後轉投皇馬，呢位巴西射手日前接受訪問時亦表明，皇馬係一支世界頂級球隊，如果能夠成為其中一分子，一定會好高興。現年26歲嘅尼爾馬，季初有上佳表現，喺聯賽上陣6場已攻入5球，成為隊中首席射手。若然佢真係離開黃色潛艇的話，肯定會大大削弱該隊前線攻力。不過，正所謂人望高處，能夠加盟頂級球會係每一位球員嘅夢想，佢選擇離隊亦無可厚非。尼爾馬成名於巴甲國際體育會，去年7月以1,100萬歐元轉投維拉利爾，上陣39次攻入16球，亦曾替巴西國家隊上陣23次有9球進帳，佢係一位速度快、射術好嘅前鋒，受歐洲各大球會垂青亦理所當然。

盧斯奧想返德甲掛靴

2010-10-15

漢堡季初表現未如理想，目前以11分排聯賽榜第七位，佢哋成績唔好嘅主要原因，係防線不穩，至今7場聯賽場場都有失球，為咗加強後防實力，佢哋有意喺1月球員轉會市場重開後，以1,300萬歐元收購國際米蘭中堅盧斯奧。呢位巴西中堅成名於德甲球會利華古遜，04年轉投班霸拜仁，成為球隊防線主力。上季佢被摩連奴睇中，以800萬歐元轉投國米，協助該隊歷史性勇奪三冠王。不過，盧斯奧嘅缺點係經常上前助攻，令防線人腳不足，往往導致失球，但經摩帥調教後，呢方面已有明顯改善。早前盧斯奧亦透露過，有意喺佢嘅成名地德甲掛靴，但佢同國米嘅合約要去到2012年至屆滿，預料教頭賓尼迪斯未搵到合適人選代替之前，都唔會咁容易放人。

賓帥想同契仔重逢

2010-10-14

盛傳國際米蘭教頭賓尼迪斯打算喺冬季球員轉會市場重開後，收購利物浦防守中場盧卡斯，可惜國米主席莫拉堤未必肯開水喉，所以賓帥唯有用蒙達利作為交換條件，盡力同契仔盧卡斯故劍重逢。盧卡斯係賓帥其中一位愛將，早在今年夏季，賓帥已曾向利物浦提出先租後買嘅條件，但被紅軍一口拒絕。如今眼見愛將嘅上陣機會少之又少，當然希望將佢帶返意甲發展。其實近年盧卡斯喺紅軍嘅表現只屬一般，畢竟佢似乎未夠班，就算去到國米，亦未必有運行。國米陣中球星如雲，以盧卡斯嘅實力，要爭一席正選絕非易事。不過身為紅軍球迷嘅我，反而希望鶴臣答應呢單交易，事關蒙達利比盧卡斯更加適合紅軍踢法。

雲達華治識撈

2010-10-13

熱刺季初表現尚算不俗，目前以11分排第五位，由皇馬以1,000萬歐元加盟嘅雲達華治，好快適應英超踢法，表現非常對辦，聯賽已有3球進帳。雲達華治接受訪問時話，原本佢好渴望加盟拜仁，可惜拜仁無意出價收購，最終選擇加盟熱刺。被問到有冇諗過加盟另一倫敦球會阿仙奴，雲達華治就話好欣賞阿仙奴，因為隊中有好多出色嘅年輕球員，如果能夠加盟係一件樂事，但係佢認為熱刺絕不比阿仙奴差，聯賽碰頭亦有把握擊敗佢哋，甚至球季結束後，排名可以喺兵工廠之上。雲達華治的確好識做，首先讚下其他球會，為自己鋪定後路，之後就話熱刺係一支強勁嘅球隊。其實淨係識講嘢係唔夠，最緊要係球技出眾，雲達華治兩方面都掂，難怪有咁多球會對佢有興趣啦！

費爵爺睇中智利翼鋒

2010-10-12

最近曼聯領隊費格遜又有新目標，就係烏甸尼斯翼鋒阿歷斯山齊士。費爵爺日前親自承認，有睇過山齊士參與嘅賽事，令佢留下深刻印象，目前已取得有關呢位智利球員嘅資料，或會正式提出收購。雖則山齊士同烏甸尼斯嘅合約要到2014年至屆滿，但外界推測，山齊士可能喺冬季轉會市場重開後轉投紅魔。年僅21歲嘅山齊士，除咗踢翼鋒之外，亦勝任前鋒，係一位速度與技術兼備嘅攻擊球員。佢亦為智利國家隊上陣過32次，有11球進帳，難怪連費爵爺都對佢情有獨鍾啦！

兵工廠爭購史篤城門將

2010-10-11

除咗傷兵問題之外，門將不穩亦都係阿仙奴嘅死穴，所以有傳兵工廠領隊雲加打算喺冬季球員轉會市場重開後，出價500萬英鎊收購史篤城門將比高域。由於兵工廠兩位門將艾蒙尼亞同法比安斯基表現欠穩，故早前曾經傳過雲加有意收購荷蘭一號門將史迪基倫堡，但由於阿積士未必放人，所以呢位法國籍教練唯有轉移目標至比高域。所謂瘦田無人耕，耕開有人爭，盛傳另外兩支倫敦球隊車路士同熱刺亦對比高域有興趣，早前車仔曾兩次向史篤城出價收購，但遭到拒絕，相信如今兵工廠要收購比高域亦非易事。呢位波斯尼亞籍門將，由樸茨茅夫轉投史篤城之後上陣機會唔多，唔知點解會引來咁多大球會嘅興趣呢？

卡卡可能回歸意甲

2010-10-08

最近盛傳皇馬教練摩連奴無意留用卡卡，會俾呢位巴西國腳轉投國米。季前有傳卡卡會回歸意甲轉投國米，但傳聞最後不了了之。最近有西班牙傳媒重提舊事，問摩連奴對卡卡離隊嘅睇法，估唔到佢話有興趣嘅球隊不妨出價商議。外界估計，因為皇馬陣中已經有德國國腳奧斯爾，所以就算卡卡離開，對整體實力亦影響不大。據悉，國米將於明年1月正式向皇馬提出收購卡卡建議，照摩帥咁講法，只要價錢合理，呢單交易可望達成。

祖記買托利斯難如願

2010-10-07

意大利傳媒報道，祖雲達斯有意喺冬季轉會市場重開後，收購一位具級數嘅射手，利物浦嘅費蘭度托利斯、禾夫斯堡嘅迪斯高同皇馬嘅賓施馬，均屬熱門人選。托利斯季初狀態未如理想，但係仍然有唔少大球會對佢垂青，加上巨額嘅轉會費，祖記要將佢收歸旗下並非易事。另外，紅軍已經搵到新班主，托利斯亦可能選擇留隊。至於迪斯高同賓施馬，今夏亦盛傳過佢哋會離隊，雖然最終留効，但係1月會唔會走仍屬未知之數。

紅軍仲有得救

2010-10-06

利物浦季初表現令人非常失望，目前排聯賽榜尾三，係近年紅軍開季最差嘅成績，唔少球迷認為紅軍若無改善，今季大有可能降班，前阿仙奴射手伊恩胡禮仲話，紅軍可能成為下一隊列斯聯！現時紅軍嘅處境，同當年列斯聯的確幾似，球會財政出現問題，球員士氣低落，最終降班收場，被迫出售隊中有名氣嘅球員。上季樸茨茅夫亦因長期負債，結果降落英冠，今季亦處於下游位置。作為紅軍粉絲嘅我，當然唔希望愛隊降班，目前最緊要係有大財團收購紅軍，還清所有債務，喺冬季轉會市場重開後買合適嘅球員，加強整體實力，應該可以救得番。

艾歷臣重返英球壇

2010-10-05

艾歷臣再一次重返英格蘭球壇，呢位瑞典籍教頭日前落實接替剛被炒魷保羅蘇沙，成為李斯特城教練，合約為期兩年。佢仲揚言要帶領球隊重返英超添！其首場領軍賽事將會喺本月16日主場迎戰侯城。艾歷臣曾執教過唔少球會及國家隊，為人所熟識嘅包括拉素、曼城、英格蘭、墨西哥同科特迪瓦等等。個人認為艾歷臣領軍能力只屬一般，係一位較保守嘅老牌教頭，佢喺2006年帶領英格蘭國家隊晉身世界盃決賽周，可惜8強出局，同時佢亦離職。休息接近1年後，喺07年東山復出，接掌曼城，雖然該隊喺季初有唔錯表現，但去到下半季成績下滑，不足1年就已離隊。其後佢出任墨西哥國家隊主帥，但由於任內成績欠佳，差啲令球隊緣盡南非世界盃決賽周，最終被請食無情雞。

柏度李安摩帥傳不和

2010-10-04

據西班牙傳媒報道，AC米蘭打算喺冬季轉會市場重開後，收購皇馬中場柏度李安。據悉，柏度李安不滿摩連奴嘅戰術而作出批評，激嬲咗摩帥，所以上周中舉行嘅歐聯分組賽作客歐塞爾，佢被剔出大軍名單之外，可見兩人關係頗為惡劣。外界推測，摩帥或會將柏度李安掛牌出售，而呢位西班牙翼鋒為爭取上陣機會，亦將選擇離隊他投。消息傳出後，立即引來AC米蘭注意，仲打算於本月19日對皇馬嘅歐聯分組賽中，提出收購柏度李安建議。柏度李安係一位助攻力強嘅翼鋒，曾經効力過梅西亞、利雲特、華拉度列同基達菲等球會，今夏以1,000萬歐元由基達菲轉投皇馬。年僅23歲嘅佢，仍有大把進步空間，難怪AC會對佢垂青，話唔定過檔之後會有更多上陣機會。

西維爾凶多吉少

2010-09-30

今晚將會上演多場歐霸盃分組賽，其中一場重頭戲，係J組多蒙特主場迎戰西維爾。多蒙特最近愈戰愈勇，雖然喺開咧戰主場不敵利華古遜，但之後連勝5場，現時以15分排喺聯賽榜第二位。佢哋嘅攻擊鐵三角——巴里奧斯、哥斯基奧斯同香川真司，狀態大勇，3人合共攻入咗10球，係球隊贏波嘅主要功臣。西維爾季初狀態一般，剛喺聯賽作客以0比2敗於升班馬靴高斯腳下，目前僅排第七位。自從右翼捷西斯拿華斯受傷，佢哋嘅前線威力明顯減弱。射手法比安奴剛傷愈，仍未上力，入球能力大減，以致破關乏力。加上整體球員發揮亦只屬一般，難怪上場歐霸喺主場以0比1不敵巴黎聖日耳門。以目前西維爾嘅狀態，作客近況大勇嘅多蒙特，恐怕凶多吉少。

紅魔華倫和波格

2010-09-29

今晚歐聯分組賽有場矚目大戰，由華倫西亞主場火併曼聯。華倫今季賣走韋拿同大衛施華等主力球員，大大減弱整體實力，但季初嘅表現的確令人刮目相看，聯賽至今取得4勝1和不敗佳績，暫列榜首。不過，佢哋贏嘅只係馬拉加、桑坦德、靴高斯同希杭等實力一般嘅球隊，今仗對住英超班霸曼聯，先至係真正考驗。紅魔剛喺聯賽作客以2比2逼和保頓，目前仍以12分排喺第二位。最近佢哋嘅防線相當不穩，6場聯賽失咗9球，中堅伊雲斯表現差勁，經常犯錯，射手朗尼狀態仍未見起色，好在貝碧托夫季初回復最佳水準，對住利物浦個人連中三元，現時以6球同車路士中場馬隆達並列射手榜首位。兩軍喺聯賽均屬不敗球隊，狀態同實力可謂旗鼓相當，預料今場會握手言和，各得1分。

車仔贏馬賽問題不大

2010-09-28

今晚深夜會上演多場歐聯分組賽，其中F組車路士主場迎戰馬賽較為矚目。車仔剛喺聯賽被曼城打破不敗身，但由於其他強隊同樣失分，故目前仍以15分坐穩榜首位置。車仔喺歐聯抽到支上上籤，同組實力較強嘅對手就只有馬賽，只要佢哋保持應有水準，晉身16強應該問題不大。相反，馬賽喺歐聯分組賽首仗主場以0比1不敵莫斯科斯巴達，餘下賽事仍需積極搶分。佢哋近期表現明顯好轉，聯賽已保持5場不敗，但贏嘅對手只係阿勒斯同索察等弱旅，似乎略欠說服力。兩隊近年甚少喺歐聯交手，對上一次要數到99至00年球季，當時同樣係分組賽，車仔喺主場以1比0小勝馬賽。不過今時唔同往日，車仔實力強咗好多，預料今場可贏波全取3分，甚至大勝。

紅軍幾時至振作？

2010-09-27

利物浦季初表現令人非常失望，剛喺聯賽只能主場逼和新特蘭2比2，開咧至今6場淨係贏過西布朗咁大把，唔少人都認為，佢哋今季未必打得入前4名踢下季歐聯，甚至有球迷話，佢哋分分鐘會陷入護級邊緣。個人認為，以目前嚟睇，紅軍要打入前4名的確有困難，但講到護級就言之尚早。冇計啦！鬼叫佢哋財困，兩位美國班主又唔肯賣盤，搞到人心惶惶咩！加上好幾位主力球員狀態欠佳，費蘭度托利斯傷愈後狀態未見起色，雖然隊長謝拉特近兩場已有好轉，可惜整體上中場缺乏創造力，防線又錯漏百出，真係好懷念佢哋有沙比阿朗素同馬斯查蘭奴嘅日子。紅軍前中後三路都有問題，希望佢哋可以盡快重新振作，唔好再令球迷失望啦！

<
1
...
97
98
99
100
101
...
101
>

/136

新聞搜尋



	至

C觀點