AM730

全部專欄 , 足球男

足球男 - 阿鵬

玻璃腳夏格維斯

2010-11-08

曼聯剛喺聯賽以2比1險勝狼隊，贏波關鍵係靠朴智星梅開二度，不過同日焦點亦放喺傷愈復出嘅夏格維斯身上，可惜有「玻璃腳」之稱嘅佢，只上陣只5分鐘又因傷離場，由葡萄牙新兵碧比入替，但係呢位前鋒表現認真麻麻，錯失好多入球機會，令唔少紅魔球迷感到不滿。夏格維斯嘅足球生涯可謂多災多難，佢喺08年9月曼聯作客車路士嘅賽事遭遇重創，其後接受過兩次膝部手術，直至上季尾對新特蘭後備入替，但係比賽未踢完已經要離場，最終又要返美國就醫。好在另一位紅魔傷兵、翼鋒路爾斯華倫西亞有望提早喺明年2月復出，對紅魔迷嚟講的確係好消息。

碧咸肯定留銀河

2010-11-05

碧咸喺07年轉投洛杉磯銀河，簽下5年合約，將於2011年屆滿，合約內容表明，如果佢想提早離隊，有權買斷最後一年合約。因此，早前盛傳佢可能會重返英格蘭球壇，但近日佢話肯定會完成喺銀河嘅最後一年合約，又話自己同幾個囝囝都好鍾意美國嘅生活，冇打算離開。雖則碧咸已經35歲，體能及狀態已無復當年勇，但佢嘅罰球及傳送，仍保持一定威力，難怪仲有唔少球會對佢垂青。究竟佢約滿銀河之後，會選擇退休定係繼續踢波呢？真係令人期待。

曼城有望買入丹尼爾

2010-11-04

曼城一直都希望收購一位世界級右閘，早在今年夏季，已經對巴塞嘅丹尼爾有興趣，但由於對方唔肯放人，以致交易被迫告吹。不過，最近呢宗交易又有新進展，話說丹尼爾不滿巴塞續約條件，嫌人工太低，令續約談判陷入僵局，分分鐘會離隊。據悉丹尼爾要求22萬英鎊周薪，但巴塞只肯俾16萬英鎊另加獎金。巴塞已經對丹尼爾發出最後通牒，要求佢喺12月31日前續約，但丹尼爾嘅經理人卻回應，除非巴塞開出一份滿足丹尼爾要求嘅合約，否則唔會動筆。外界推測，若巴塞同丹尼爾談判破裂，唔排除會將佢賣俾曼城套現，另覓合適右閘人選。

AC主場難敵皇馬

2010-11-03

今晚歐聯G組有場矚目大戰，由AC米蘭主場火併皇馬。AC嘅前線攻擊鐵三角伊巴謙莫域、柏圖同羅賓奴，已開始建立默契，亦頻頻有士哥，可惜後防經常出錯，近4場已失咗6球，以致已跌落聯賽榜第三位。相反，皇馬就愈戰愈勇，聯賽9戰取得7勝2和，暫列榜首，歐聯亦3戰全勝，只要保持水準，晉身16強只係遲早嘅問題。C朗拿度狀態大勇，近4場聯賽攻入10球，係球隊贏波嘅主要功臣。睇過兩隊喺首回合嘅表現，AC作客班拿貝球場明顯唔夠打，如果唔係皇馬略欠運氣的話，應該可以大勝。雖則AC今仗返回聖西路球場作賽，但以皇馬近期嘅氣勢同鬥志，應可秤高一線。

國米作客熱刺可保不敗

2010-11-02

今晚繼續有歐聯賽事上演，其中A組有場不俗戲碼，由熱刺主場火併國際米蘭。熱刺近況只屬一般，剛喺聯賽作客以0比2敗於曼聯腳下，目前以15分排聯賽榜第五位。佢哋喺歐聯嘅成績亦未如理想，3戰只取得1勝1和1負，暫列小組第二位，同川迪及雲達不來梅只有2分距離，晉級形勢未許樂觀。相反，國米近期明顯有回勇跡象，剛作客以1比0擊敗熱拿亞，現時以18分排聯賽榜第二位。佢哋喺歐聯成績唔錯，3戰錄得2勝1和，暫列榜首，只要保持水準，如無意外應可晉身16強。兩軍喺兩周前交手，國米上半場領先4球之下，竟被熱刺翼鋒加里夫巴利連中三元，最終僅勝4比3。論近況及歐洲賽經驗，國米略為佔優，今仗可望不敗而回。

西布朗比黑池優勝

2010-11-01

今晚英超有場獨腳戲，由黑池主場迎戰西布朗。黑池季初表現非常飄忽，主場至今仍未開齋，但作客竟先後擊敗過利物浦、紐卡素同韋根。前韋斯咸射手希活狀態不俗，至今已有3球進帳，係球隊贏波嘅主要功臣之一。可惜隊長查理阿當有傷在身，今仗上陣成疑，大大減弱中場創造力。西布朗近況相當不俗，令人眼前一亮，聯賽加聯賽盃已經連續8場不敗，喺3支升班馬之中，成績最好嘅一隊。佢哋今季主要靠主場搵食，開季至今5戰仍保持不敗，作客戰績亦絕不失禮，曾擊敗阿仙奴及賽和曼聯。往績方面，兩隊近4次交手，西布朗全部贏晒，加上論近況同鬥志，佢哋亦略為佔優，故此預料今仗可望作客贏波，全取3分。

紅軍熱刺爭科蘭

2010-10-29

効力馬體會嘅科蘭，早前透露有意重返英超，消息傳出後，立即成為利物浦同熱刺嘅收購目標。紅軍現時只有費蘭度托利斯較有份量，領隊鶴臣早已有意引入一位高質素射手，加強攻力。另一邊廂嘅熱刺，自迪科爾受傷後，柏夫里約真高、高治同羅比堅尼等都狀態欠佳，未能肩負入球重任，領隊哈利列納打算喺1月收購一位頂級射手，改善前線入球能力。其實熱刺早在今夏已希望收購科蘭，但因為馬體會獅子開大口，要求2,500萬英鎊轉會費，所以最終交易告吹。外界評估，31歲嘅科蘭轉會費約1,000萬鎊，相信呢個價錢除咗紅軍同熱刺外，仲會有唔少球會有意收購。

紅魔加薪綁艾夫拿

2010-10-28

英國有傳媒報道話曼聯即將同左閘艾夫拿續約，佢嘅周薪仲會由7萬英鎊加到10萬英鎊，合約為期4年。最近紅魔不斷同隊中球員續約，原因當然係想穩固球隊實力，以免主力被其他球會挖角。艾夫拿同紅魔嘅合約原本到2012年至屆滿，點解佢哋咁急要續約呢？原因係近日盛傳巴塞同皇馬都有意喺冬季球員轉會市場收購艾夫拿，紅魔為免節外生枝，於是用加薪及長約綁住呢位法國左閘。艾夫拿成名於法甲球隊摩納哥，03年協助球隊勇奪法國聯賽盃冠軍，同年更殺入歐聯決賽，但最終不敵波圖而屈居亞軍。佢喺06年1月以550萬英鎊由摩納哥轉投紅魔，表現非常穩定，受費爵爺重用，成為球隊左閘必然正選。艾夫拿屬速度快而且非常靈活嘅閘位球員，進可攻，退可守，難怪引來唔少球會對佢垂青。

紅軍睇中艾殊利楊格

2010-10-27

有傳利物浦領隊鶴臣睇中咗維拉翼鋒艾殊利楊格，並打算1月出價將佢收歸旗下，不過都要楊格唔同維拉簽新約，呢單交易先有機會落實。紅軍自新老細約翰亨利入主後，財政問題已得到解決，呢位美國班主仲會喺1月開水喉，俾3,000萬英鎊鶴臣去買人。此外，熱刺領隊哈利列納亦有興趣收購楊格，早在今夏，列納已經想簽入呢位英格蘭翼鋒，但最終未能成事，如今捲土重來，成為紅軍收購楊格嘅攔路虎。楊格成名於屈福特，07年1月以800萬鎊由屈福特轉投維拉，效力期間上陣131次，攻入24球。楊格係一位速度快嘅翼鋒，但略嫌腳法同射術一般，幸好年僅25歲，仍有進步空間，若然加盟紅軍，有助加強邊線攻力。

碧咸返英掛靴？

2010-10-26

英傳媒報道，李斯特城領隊艾歷臣有意邀請碧咸加盟。艾歷臣執教英格蘭時，碧咸係佢嘅愛將，兩人關係非常好。艾歷臣上個月接掌李斯特城後，成績唔錯，為加強實力，佢打算喺1月簽入碧咸。効力洛杉磯銀河嘅碧咸，曾兩次外借到AC米蘭，表現對辦，除咗李斯特城之外，韋斯咸同布力般都對佢有興趣，不過碧咸唔想與曼聯為敵，原則上唔會加盟英超球會。35歲嘅碧咸，仍深受球迷愛戴，雖則佢年紀唔細，但係睇過佢喺銀河嘅賽事，仍有不俗表現。個人亦希望佢可以返老家英格蘭掛靴，為足球生涯畫上完美句號。

梅度又惹麻煩

2010-10-25

羅馬尼亞前鋒梅度天生愛搞事，繼早年吸毒及服用禁藥後，最近又惹上麻煩，佢涉嫌喺一間酒吧內嚴重傷人，現正接受警方調查。據悉，梅度當時因帳單問題，出手攻擊一名侍應，打到對方倒地之後，仲繼續不停用腳踢佢，事後醫生指傷者胸部及面部多處受傷，需要留院約一個月。梅度係一位唔錯嘅射手，可惜佢唔潔身自愛，04年因吸食可卡因被罰停賽7個月，當時不但被所効力嘅車路士終止合約，之後更被車仔追討巨額賠償金，面臨破產危機，幸而最終逃過大難。以為佢之後會生生性性，點知喺今年1月又被驗出服用禁藥，原本停賽令會喺本月底屆滿，但費倫天拿高層表示，梅度涉嫌嚴重傷人，現正接受警方調查，唔排除會對佢作出內部處分，睇怕佢嘅足球事業都危危乎。

文仙尼未夠班

2010-10-22

超級富豪球會曼城今夏用咗一億英鎊收購球員，效果非常理想，現時8戰得17分暫列聯賽榜第二位，只要保持佳態，絕對有力取得下季歐聯入場券。近日盛傳佢哋會喺1月球員轉會市場重開後，以天價收購朗尼，但領隊文仙尼日前話冇接觸過朗尼，澄清呢單轉會傳聞只屬流料。文仙尼仲話，唔打算喺冬季球員轉會市場買人，事關世界上有太多好球員，冇可能將佢哋買晒返嚟，現階段最重要係利用現有班底，踢完今個球季。無可否認，曼城近年大灑金錢四出收購好球員，成績有目共睹，以佢哋目前嘅走勢，十足十當年嘅車路士，有力問鼎聯賽冠軍及其他錦標。一支球隊能否取得好成績，除咗要有好球員之外，領隊亦非常重要，我略嫌文仙尼唔係好夠料，未必能夠帶領曼城去到巔峰。

洛蘭迪入魔似層層

2010-10-21

朗尼同費格遜不和升級，日前朗尼拒絕與曼聯續約，其後費爵爺仲公開話，朗尼希望離隊他投。消息傳出後，紅魔同市球會曼城被傳會動用天價收購呢位英格蘭前鋒。日前又有西班牙傳媒報道，紅魔睇中咗畢爾包前鋒洛蘭迪，打算由佢取代朗尼嘅位置。近日傳媒多次拍到洛蘭迪同費爵爺個仔馬田費格遜會面，令到呢單轉會傳聞更加似層層。不過，呢位西班牙射手同時亦有唔少球會垂青，好似西甲雙雄巴塞同皇馬都對佢有興趣，外界推測，洛蘭迪目前嘅身價大約3,500萬歐元。洛蘭迪成名於畢爾包，効力期間上陣173次攻入50球，亦曾代表西班牙上陣12次，有7球進帳。洛蘭迪係一位典型嘅柱躉式中鋒，頭槌非常了得，故亦被喻為「西甲空中霸王」。

熱刺經驗輸蝕

2010-10-20

國際米蘭今晚會喺歐聯分組賽於主場火併熱刺。國米季初表現一般，上周作客1比0小勝卡利亞里後，目前以14分排喺聯賽榜第三位。佢哋季初入球力偏低，7場聯賽有3場交白卷，射手迪亞高米列圖狀態未如理想，幸好伊度奧表現唔錯，至今已攻入6球，暫時雄踞意甲射手榜第一位。熱刺季初表現尚算對辦，剛喺打吡戰作客擊敗富咸，現時排聯賽榜第五位。自從雲達華治加盟後，佢哋明顯加強咗中前場攻力，但後防不穩仍然係佢哋嘅死穴，聯賽除咗開咧戰，之後7場都有失球。兩隊甚少喺歐洲賽碰頭，對上一次交手，已經要數到06年7月嘅友賽，當時熱刺喺主場以2比1擊敗國米，不過論歐洲賽經驗，熱刺較為輸蝕，作客上屆歐聯盟主國米，輸波亦無可厚非。

AC作客難敵皇馬

2010-10-19

今晚歐聯分組賽有場矚目戲碼，由皇馬主場迎戰AC米蘭。皇馬近況相當不俗，繼主場6比1怒炒拉科後，日前作客又以4比1大數馬拉加，現時以17分暫列西甲榜首。C朗拿度狀態回勇，除咗喺國家隊有士哥之外，聯賽近兩場亦有4球進帳，射手希古恩都有上佳表現，兩人至今合共入咗10球，係球隊贏波主要功臣。不過AC近況亦都唔錯，剛喺主場3比1擊敗基爾禾，聯賽加埋歐聯連續7場不敗。前線攻擊鐵三角羅賓奴、柏圖同伊巴謙莫域開始建立默契，亦頻頻有士哥，不過略嫌AC作客表現飄忽，聯賽曾不敵升班馬切塞納，上仗歐聯作客亦只能以1比1賽和阿積士，面對主場強勁嘅皇馬，應該凶多吉少。

<
1
...
96
97
98
99
100
...
101
>

/136

新聞搜尋



	至

C觀點