AM730

全部專欄 , 足球男

足球男 - 阿鵬

國家打吡和波機會大

2010-11-29

今晚西甲有場國家打吡戰，由巴塞主場火併皇馬。巴塞近況可謂愈戰愈勇，繼作客8比0大炒艾美利亞之後，歐聯作客亦以3比0擊敗彭拿典奈高斯，肯定晉身16強。佢哋近排入球停不了，近5場已攻入22球，只失3球，美斯狀態大勇，聯賽至今已有13球進帳，成為隊中首席射手。皇馬近態亦非常可怕，聯賽已7連勝，歐聯作客以4比0大數阿積士，以小組首名晉級。首席射手C朗拿度狀態弗到漏油，聯賽已攻入15球，比美斯仲多，今場嘅焦點亦放喺二人身上。往績方面，皇馬略為輸蝕，近20次到訪魯營球場，錄得3勝6和11負戰績。不過，今季皇馬有摩連奴坐陣，可以睇高一線。由於兩隊喺聯賽距離只有1分，邊隊輸波會直接影響奪標，加上西甲係以對賽成績行先，預料佢哋會踢得較保守，大有機會和波收場。

緬恩斯穩勝紐倫堡

2010-11-26

今晚德甲有場獨腳戲，由緬恩斯主場迎戰紐倫堡。緬恩斯近況有回落跡象，近4場聯賽只係贏過包尾大幡慕遜加柏，幸好季初有上佳演出，目前仍以27分排第二位。緬恩斯季初一反常態，作客表現好過主場，4場敗仗之中有3場係主場，幸好一對箭頭艾拉基及舒賀爾尼狀態不俗，二人合共入咗10球，係球隊贏波嘅關鍵人物。紐倫堡季初表現尚算對辦，主要靠主場搵食，現時以18分排第十位。佢哋向來作客差勁，至今7戰只曾擊敗狀態低沉嘅雲達不來梅，上仗主場對住升班馬凱沙羅頓都要輸1比3。佢哋往績亦較為輸蝕，近11次到訪緬恩斯，錄得3勝1和7負劣績，對住狀態較好嘅緬恩斯，只望輸少當贏。

2010-11-25

德甲踢咗13輪賽事，現時多蒙特以34分暫列榜首。佢喺季初狀態大勇，至今攻入31球只失8球，除咗射手巴里奧斯狀態大勇之外，新加盟嘅創造中場香川真司亦有上佳表現，替隊友製造唔少入球機會。相反老牌班霸拜仁，季初表現未如理想，目前以20分排第六位。前鋒馬里奧高美斯狀態回勇，頻頻有士哥，翼鋒列貝利亦已傷愈復出，但仍缺乏狀態，另一主力洛賓仍在養傷，大大減弱側擊力。不過以拜仁嘅整體實力，遲下應可上回前列。最令人意想不到嘅係緬恩斯竟排第二位，佢哋嘅人腳實力一般，勝在整體發揮唔錯，但長遠嚟講，應會跌出三甲之外。另外，雖則史特加同史浩克04季初狀態低沉，暫列中下游，但由於本身實力不俗，預料下半季可收復失地。

不來梅難敵熱刺

2010-11-24

今晚歐聯分組賽A組有場不俗戲碼，由熱刺主場火併雲達不來梅。熱刺近況明顯有好轉，剛喺聯賽作客落後兩球下，連追3球反勝同市宿敵阿仙奴，連勝兩場後，目前以22分排第六位。翼鋒加里夫巴利及創造中場雲達華治狀態大勇，二人頻頻有士哥，射手迪科爾亦傷愈復出，有助加強前線攻力。相反不來梅近況仍未有起色，剛喺聯賽作客0比4大敗於史浩克04腳下，聯賽加盃賽連續6場未贏過，加上隊中仍有唔少傷兵，雖則數字上仍有晉級機會，但實際出線渺茫，唯有寄望以小組第三名降格踢歐霸盃。論近態同鬥志，熱刺明顯佔上風，贏波應該冇難度。

為安帥抱不平

2010-11-23

車路士喺聯賽連輸兩場後，已被曼聯追至同分，目前僅以得失球差暫列榜首。球隊成績下滑，令領隊安察洛堤帥位變得不穩，有傳班主阿巴莫域治考慮換帥。當車路士作客不敵伯明翰後，英國其中一間博彩公司將安帥被炒嘅賠率調低，令外界推測安帥地位不保。有傳車仔季初表現神勇，原本高層打算同安帥續約，但由於近排球隊成績低落，計劃已經被擱置。話分兩頭，雖則車仔近排成績唔理想，但聯賽仲係領頭羊，況且歐聯4戰全勝已肯定晉身16強，如果咁嘅成績都要食無情雞，咁韋斯咸教頭格蘭，要食幾多隻至夠呢？

卡度素可望披紅軍戰衣

2010-11-22

近日盛傳賓菲加前鋒奧斯卡卡度素，會喺明年1月轉到英超發展，利物浦、熱刺及布力般均有可能成為呢位上季葡超神射手嘅落腳地。紅軍易主，新班主約翰亨利答應開水喉，讓教練鶴臣增兵，為咗增強前線攻力，鶴臣於是打算收購一位具級數嘅前鋒，夥拍費蘭度托利斯攻堅，人選正是卡度素。雖則卡度素同賓菲加嘅合約要到2014年至屆滿，但合約訂明，如果有球會出價1,400萬英鎊轉會費，卡度素可提早離隊。

倫敦打吡兵工廠佔優

2010-11-19

周六英超有場倫敦打吡大戰，由阿仙奴主場火併熱刺。近排兵工廠有唔少主力球員傷愈復出，表現相當不俗，目前只落後聯賽榜首車路士兩分，暫列次席。自從隊長法比加斯復出後，佢哋嘅中前場創造力大大增強。熱刺近況時好時壞，主場仲靠得住，但作客就認真一般，至今6戰只係贏過史篤城同富咸。自雲達華治加盟，明顯加強前線攻力，加上加里夫巴利狀態大勇，兩人亦成為球隊贏波嘅關鍵人物。可惜佢哋後防相當不穩，作客場場都有失波。往績方面，熱刺明顯輸蝕，近19次作客兵工廠未嘗勝仗，論近況同實力，兵工廠略為佔優，預料今場可擊敗對手，全取3分。

皮利斯標尾會

2010-11-18

近日維拉喺官方網站宣布，前維拉利爾翼鋒皮利斯即將加盟球隊。維拉助教麥阿里士打大讚皮利斯係一位經驗豐富嘅球員，球技同埋球品同樣出眾，係年輕球員學習嘅榜樣。37歲嘅皮利斯，上季同維拉利爾約滿後，並無續約，回復自由身，為咗保持狀態，佢今季返回阿仙奴跟操。呢位法國老將曾經透露，如果冇球會收留佢，會選擇結束職業球員生涯，但如今維拉邀請佢加盟，總算標番個尾會。維拉連老將皮利斯都唔放過，莫非艾殊利楊格會喺1月轉投兵工廠嘅傳聞係真嘅？

巴塞搶閘簽阿費利

2010-11-17

目前距離明年1月轉會市場重開，仲有一個多月時間，但巴塞已經搶閘收購燕豪芬翼鋒阿費利。巴塞同燕豪芬各自官方網頁上宣布，雙方已經就阿費利嘅轉會達成共識，呢位荷蘭國腳將會明年1月正式轉投巴塞。24歲阿費利，同燕豪芬合約去到明年夏天屆滿，倘若燕豪芬再唔將佢賣走話，隨時人財兩失。據報巴塞與阿費利簽下一紙5年合約，轉會費約300萬歐元，年薪為200萬歐元。阿費利係一位助攻力強翼鋒，但係巴塞隊中球星如雲，要爭取一席正選並非易事，預料佢加盟巴塞後，會先列作後備。

保臣投紅軍半季就想走

2010-11-16

英國傳媒報道，季初由祖雲達斯加盟利物浦嘅丹麥中場保臣，有意喺1月離隊他投。話說保臣早前接受訪問時話，由於未能適應英國生活，加上未獲紅軍教練鶴臣重用，上陣機會甚少，所以希望盡快離隊，另覓新發展。外界預料紅軍會喺明年1月大肆擴軍，陣中部分不受重用嘅球員，大有機會被賣走套現，故此唔排除會將保臣賣番俾佢嘅母會西維爾。保臣司職防守中場，曾効力德甲史浩克04、西甲西維爾及祖雲達斯等，可惜佢未能適應英超高速度及緊迫性嘅踢法，勉強留喺紅軍亦冇運行，選擇離隊亦無可厚非。

卡比路大讚卡路爾

2010-11-15

最近有「新舒利亞」之稱嘅紐卡素前鋒安祖卡路爾，獲英格蘭教頭卡比路點名稱讚，話佢除咗頭槌了得之外，腳下功夫亦唔錯，係英格蘭國家隊未來嘅希望，不過卡比路亦同時提醒佢要注意私生活(早前卡路爾因毆打前女友被告上法庭)。年僅21歲嘅卡路爾，上季喺英冠以17個聯賽入球，協助紐卡素重返英超。今季佢亦有不俗表現，目前以7球同路蘭並列球隊首席射手。睇過好幾場卡路爾有份參與嘅賽事，發覺佢的確係一位把握力唔錯嘅射手，希望佢以後會生生性性，為紐卡素甚至英格蘭國家隊帶來好成績啦！

多蒙特比漢堡優勝

2010-11-12

今晚德甲有場矚目大戰，由多蒙特主場迎戰漢堡。多蒙特季初狀態大勇，自從開咧戰主場以0比2不敵利華古遜，打後10場聯賽取得9勝1和不敗佳績，當中包括作客以3比1擊敗史特加、主場以2比0輕取禾夫斯堡，以及在主場兩球淨勝班霸拜仁慕尼黑，目前以28分雄踞榜首。前線攻擊鐵三角——巴里奧斯、香川真司同哥斯基奧斯，合作無間，3人合共攻入咗14球，絕對係球隊贏波嘅主要功臣。相反，漢堡表現時好時壞，能夠喺主場以2比1擊敗強敵賀芬咸，但作客又可以輸俾實力較差嘅科隆，可見發揮相當不穩。自從老牌射手雲尼斯達萊受傷缺陣後，佢哋嘅前線把握力變得不足，幸好另一射手柏歷有不俗表現，肩負起入球重任，近兩場聯賽都有士哥。目前漢堡以5勝3和3負得18分，排聯賽榜第六位。往績方面，多蒙特近17次主場對漢堡，錄得9勝4和4負成績，略為佔優。加上近況、實力及球員鬥志，多蒙特亦肯定在漢堡之上，所以今仗可睇高一線。

娃娃臉殺手有情有義

2010-11-11

有「娃娃臉殺手」之稱嘅前挪威國腳蘇斯克查，即將離開曼聯，執教挪威球隊莫迪。自從蘇斯克查掛靴後，隨即退居幕後，成為紅魔青年軍教頭。蘇斯克查接受訪問時話，佢同恩師費格遜商討應否離開紅魔時，忍唔住不停流淚。話晒効力咗紅魔11年，其後又執教咗青年軍3年半，呢十幾年係蘇斯克查人生無法忘記嘅時光，當然唔捨得啦！執教莫迪係蘇斯克查展開領隊生涯嘅第一步，當佢累積更多執教經驗後，或唔定若干年後，能夠成為紅魔領隊呢！蘇斯克查對紅魔有情有義，相信費爵爺亦會好安慰，希望佢能夠喺莫迪打響名堂，成為一位出色領隊啦！

連拿離紅軍情有可原

2010-11-10

利物浦門將連拿近排非常搶手，有傳費格遜為物色雲達沙接班人，於是想打佢主意，最近就連阿仙奴嘅雲加亦對佢有興趣，打算明年夏季將佢收歸旗下。冇計啦！鬼叫兵工廠兩位門將艾蒙尼亞同法比安斯基，經常表現不穩又錯漏百出咩！原本雲加想喺明年1月收購富咸門將舒華沙，可惜對方教練曉士唔肯放人，以致交易被迫告吹。雲加唯有轉移目標喺連拿身上啦！至於當事人連拿日前接受訪問時，就未有明確表示會否留効紅軍，只係話會起碼留隊至明年夏季，亦無意重返西甲發展。正所謂人望高處，連拿喺華倫西亞話晒都攞過聯賽冠軍，目前紅軍捧盃機會渺茫，就算選擇離隊亦無可厚非。

紅軍仍有力爭前四

2010-11-09

英超進行咗11輪賽事，車路士剛作客以0比2不敵利物浦，但仍以25分暫列榜首，喺主場以2比1險勝狼隊嘅曼聯，就以兩分之差排第二。車仔向來主場強勁，至今5戰全勝，但作客表現略嫌不穩，面對實力較強嘅曼城、維拉同紅軍，都要失分而回。反觀紅魔演出較為穩定，雖則和波偏多，但仲係20支球隊之中唯一不敗之師。同市嘅曼城亦有不俗表現，目前以20分排第四，好幾位新加盟嘅球員，開始融入球隊，只要保持水準，仍有力問鼎冠軍。阿仙奴近期已有多位傷兵復出，大大加強整體實力，可惜剛喺主場以0比1不敵紐卡素，失分後仍排第三。論強隊開季成績差勁，非利物浦莫屬，幸好易主後近況已有好轉，聯賽已連贏3場，現時排第九，仍有力躋身前四，取得下季歐聯入場券。

<
1
...
95
96
97
98
99
...
101
>

/136

新聞搜尋



	至

C觀點