AM730

全部專欄 , 足球男

足球男 - 阿鵬

修夫基成英軍新帥大熱

2016-06-29

英格蘭喺歐國盃16強不敵冰島而黯然出局，領隊鶴臣隨即辭職，另一邊威爾斯嘅球員喺酒店見證英軍出局後瘋狂慶祝，好似自己捧歐國盃咁高興。話晒大家都係英倫三島，唔使咁落井下石啩？所謂蛇無頭而不行，9月初開始踢2018世界盃外圍賽，英軍首先要搵下任領隊，幾位候選人當中，以U21領隊修夫基呼聲最高，有英國莊家將佢列為4賠6嘅頂頭大熱，其他候選人包括哈利列納、艾拿戴斯及剛接掌些路迪嘅羅渣士等。個人認為，英格蘭領隊呢個三煞位邊個做都冇問題，只要有番啲名望就得，修夫基的確係唔錯嘅人選。

美斯C朗同是淪落人

2016-06-28

阿根廷再一次喺美洲盃決賽不敵智利，連續兩屆屈居亞軍，美斯喺互射12碼「宴客」，賽後喺球場上痛哭，呢個畫面實在令人惋惜，喺意興闌珊下，美斯隨即宣布退出國家隊。美斯效力巴塞隆拿12年，贏盡各大球會級榮譽，個人獎項亦多不勝數，唯獨成為大國腳後，成日差臨門一腳，未能替國家隊取得任何大錦標。其實美斯嘅情況同C朗拿度好相似，個人同球會榮譽攞到手軟，唯獨踢國家隊想攞個獎都冇，真係天意弄人。若C朗喺今屆歐國盃出局，唔知會唔會好似美斯咁退出國家隊……佢哋兩個論球技及實力，絕對稱得上球王級，美中不足係未能為國家隊取得殊榮。

意大利鬥狂牛睇怕要加時

2016-06-27

意大利喺今屆歐國盃分組賽可以話令人眼前一亮，輕取比利時之後再絕殺瑞典，爭取到首名出線。可惜，西班牙令人意外地敗予克羅地亞跌落次名，令意大利喺16強就要對呢支上兩屆冠軍。上屆決賽意大利被西班牙大炒4比0，今仗能否一雪前恥？分組賽兩連勝後，意大利對愛爾蘭時收起唔少主力，輸波情有可原。球隊最煞食係一對箭頭加斯安奴柏利及艾達馬田斯，預計兩個會踢正選，加上有保方鎮守大門，呢支打穩守突擊嘅球隊冇乜輸蝕。西班牙連贏捷克同土耳其後，最後一輪唔爭氣輸波，痛失首名出線資格。經過迪保斯基訓示後，迪基亞有望及時調整心理，繼續打正選；艾華路莫拉達喺今屆賽事已攻入3球，腳風甚順。兩隊實力接近，預料上半場會先鞏固防守，試好水溫，再尋求突擊機會，唔排除90分鐘和波收場，要戰至加時或互射12碼先分出勝負。

睇好克軍挫葡萄牙晉級

2016-06-24

話咁快歐國盃去到16強階段，周六上演3場賽事，其中克羅地亞對葡萄牙戲碼最吸引。克羅地亞喺分組賽有上佳表現，先後擊敗土耳其、西班牙及賽和捷克，以小組首名晉級。雖則上仗對西班牙有中場核心莫迪歷及射手文迪蘇傑缺陣，但比列錫、馬高洛治及卡連歷表現令人眼前一亮，整體發揮有板有眼，球員士氣及鬥志高漲，難怪成為今屆黑馬之一。相反葡萄牙喺分組賽表現令球迷失望，3戰全部和波收場，只能以小組最佳第三名晉級。佢哋上仗對匈牙利搶攻之下，暴露後防弱點，雖則C朗拿度著番火，但整體發揮一般，面對前中後三路平均嘅克羅地亞，冇乜甜頭可言，預料克軍可擊敗葡軍再進一步。

羅馬買斷艾沙拉維

2016-06-23

近期球壇焦點落喺歐國盃同美洲盃身上，咁多場精彩賽事，相信大家對熊貓眼都走晒出嚟，不如轉下話題去轉會新聞。羅馬宣布，佢哋以1,300萬歐元買斷咗意大利前鋒艾沙拉維，雙方簽約4年。23歲嘅艾沙拉維近年做咗人球，被AC米蘭外借到摩納哥，但無法適應新環境，上陣15場聯賽一球進帳都冇，當然冇得留低，今年1月外借到羅馬，估唔到一拍即合上陣18場攻入8球，即刻做咗羅馬球迷同高層嘅寵兒，可能喺自己家鄉踢波，話晒同聲同氣好過流落異鄉。除咗艾沙拉維之外，羅馬上季亦借用咗首席射手穆罕默德沙拿，但係唔知車路士新領隊干地會否將佢回收。早前羅馬以3,200萬歐元賣咗中場核心比真歷俾祖雲達斯，球隊係時候出手買人，唔係來季都幾難兼顧聯賽同歐聯。

葡軍戰意鮮明可挫匈牙利

2016-06-22

葡萄牙喺頭兩場分組賽只能和波，今晚最後一輪分組賽對匈牙利，真係不容有失。若然大家有睇過葡萄牙之前兩場波，都應該會有同感，就係贏唔到非常之冇運，首場對冰島錯失多次入球機會，上仗對奧地利更有C朗拿度射失12碼。今場葡軍戰意鮮明，贏波即可晉身16強，預料一定主攻。匈牙利上仗1比1賽和冰島後得4分，基本上已夠出線，但若果今場落敗，就有機會跌落第三名，16強可能要硬撼西班牙或德國，因此今場未必會放軟手腳。匈軍喺今屆歐國盃表現令唔少球迷刮目相看，好似「睡褲門將」基拿利、中場謝拉同迪素迪沙基都踢出水準，但今仗遇上同組實力最強而且一定要贏波嘅葡軍，預料都係難逃一敗。

北愛實力有限難抗德國

2016-06-21

歐國盃C組爭持激烈，目前德國與波蘭同得4分，德國憑較佳得失球暫列榜首，北愛得3分，烏克蘭就冇分成為包尾大幡。德國今晚面對北愛爾蘭，只要不敗即可晉身16強，相反北愛一定要贏，否則只可寄望以最佳第三名晉級。德國頭兩場分組賽表現唔算太好，上仗只能0比0悶和死敵波蘭，中堅曉姆斯傷愈復出，表現算對辦，有助鞏固防線。德國近態冇兩年前世界盃咁好，但前中後三路人腳仍然相當強勁，繼世界盃後再捧埋歐國盃都唔出奇。北愛爾蘭上仗正選陣容作出5個調動，最終喺雨戰2比0擊敗烏克蘭，佢哋守強於攻，遇上同組實力最強嘅德國，相信會以和波為目標，但始終實力懸殊未必頂得住，預料會小敗一場。

斯洛伐克有力踢和英軍

2016-06-20

今晚歐國盃上演B組最後一輪賽事，英格蘭取得1勝1和得4分暫列榜首，以1分之微落後嘅有威爾斯同斯洛伐克，得1分嘅俄羅斯仍未絕望，只要擊敗威爾斯仲有望出線。首先講下俄羅斯對威爾斯，睇過兩場俄軍嘅賽事，佢哋踢法較保守，把握力一般，加上賽前有幾位主力因傷退隊，整體實力大打折扣。威爾斯上仗戰至補時失守，1比2僅負英格蘭，整體表現尚算平穩，加里夫巴利狀態唔錯，連續兩場入靚罰球，如發揮到應有水準，可望小勝俄羅斯。至於英格蘭對斯洛伐克，英軍對上兩場表現唔算太好，但勝在質素搭夠，上仗落後下一口氣換入占美華迪及史杜列治，攻力明顯有好轉，今仗睇下呢兩位射手會唔會踢正選。斯洛伐克對上兩場演出尚算對辦，反擊能力唔錯，有力左右大局，今場遇上同組實力最強嘅英軍，預料會穩守為主，有力賽和對手。

威爾斯升呢無懼英軍

2016-06-16

今晚歐國盃B組上演矚目大戰，由英格蘭對威爾斯。英軍首仗補時被俄羅斯追成1比1平手，但整體發揮其實唔錯。李城首席射手占美華迪首仗只坐冷板凳，預料今仗領隊鶴臣會以佢夥拍哈利卡尼掛帥，隊長朗尼就後上支援，攻力會較首仗強勁。威爾斯首仗2比1擊敗斯洛伐克，成為英倫三島唯一首輪贏波嘅球隊，加里夫巴利不負球迷厚望，射入一記美妙罰球，協助球隊贏波，球隊整體發揮唔錯，只要保持狀態，有望晉身16強。對賽方面，兩隊近年6次交手，英格蘭錄得5勝1負明顯佔優，但今時唔同往日，威爾斯實力大為提升，預料今仗可保不敗。

俄羅斯斯洛伐克均欠本錢

2016-06-15

俄羅斯今晚會喺歐國盃B組賽事鬥斯洛伐克，佢哋上仗面對同組實力最強嘅英格蘭，落後一球下至補時追成1比1平手，但整體發揮一般。史路斯基本身係莫斯科中央陸軍教頭，佢兼顧埋國家隊，以應屆俄超冠軍中央陸軍為骨幹亦好合情理，球隊首仗明顯狀態未起，相信今場會有更好表現。今屆歐國盃黑馬之一嘅斯洛伐克，首仗面對威爾斯表現唔算太差，但最終1比2輸波痛失3分。佢哋陣中大牌球員不多，較為熟悉嘅有咸錫、古卡、史卡迪爾、比卡歷及施雲圖等，以整體踢法為主，實力同俄羅斯差唔多，都係冇乜贏波本錢，睇怕都係和波收場。

冰島對葡軍難偷雞

2016-06-14

今晚歐國盃上演兩場F組賽事，其中葡萄牙對冰島較有睇頭。葡萄牙喺上屆歐國盃晉身4強，可惜互射12碼不敵西班牙而未能打入決賽。今屆葡軍捲土重來，外圍賽取得7勝1負，以小組首名出線，佢哋最大隱憂係前線，因為除咗C朗拿度單天保至尊之外，艾達、拿尼同哥利斯馬都係級數一般，未必擔到大旗。冰島可謂一路奇兵，外圍賽取得6勝2和2負，以小組次名晉身決賽周。隊中大部分球員出外搵食，但只係効力二、三線球會，整體實力一般，37歲嘅前車路士射手古莊臣仍然入選，始終都係佢最大名氣。兩隊上次對碰要數到上屆歐國盃外圍賽，當時葡軍主客都贏。雖則冰島近年表現有明顯進步，但面對實力較強兼有C朗押陣嘅葡萄牙，始終難有偷雞本錢。

比意之戰謹慎行先

2016-06-13

今晚歐國盃E組有場矚目大戰，由比利時對意大利。比利時近年進步明顯，兩年前喺世界盃晉身8強，喺今屆歐國盃外圍賽取得7勝2和1負，以小組首名晉身決賽周。隊中多名主力外流搵食，大部分効力英超球隊，前線數胡有盧卡古、賓迪基及奧歷治，中場則有夏薩特、奇雲迪布尼、卡拉斯高及迪比利等，中前場人腳鼎盛。意大利喺歐國盃外圍賽取得7勝3和不敗佳績，亦係以小組首名晉級。佢哋今屆人腳以老帶新，把守最後一關嘅仍係保方，後衛有佢嘅祖雲達斯隊友基亞連尼、巴沙利及邦路斯，可以話夾到熟晒，中場有迪羅斯、莫達及費奧倫斯等好手，前線就有羅馬射手艾沙拉維，加強活力。兩隊實力不相伯仲，加上首戰會比較謹慎，和波機會都幾大。

法國揭幕戰可響頭炮

2016-06-10

今晚上演歐國盃揭幕戰，由東道主法國對羅馬尼亞。法國身為主辦國唔使踢外圍賽，只以友賽作操練，近10場主場取得8勝2負，平均每場入2.5球失1.2球，曾擊敗過德國、俄羅斯、喀麥隆及蘇格蘭等，但友賽始終未能反映其真正實力，今場嚟真先至係真正考驗。羅馬尼亞喺今屆外圍賽，10戰取得5勝5和不敗，以小組次名晉身決賽周。佢哋近期作客表現唔錯，外圍賽及友賽連續6場不敗，取得3勝3和。23人大軍名單之中，較為熟悉嘅有拿玻里後衛基利捷斯及科爾多瓦前鋒安多尼，比較實而不華。對賽方面，羅馬尼亞近6次到訪法國，錄得2和4負，相當輸蝕。論實力及往績，法國都高至少一班，預料可打響頭炮。

意大利實力經驗俱備

2016-06-08

意大利喺上屆歐國盃有出色表現，先後淘汰英格蘭及德國晉身決賽，但最終以0比4不敵西班牙而屈居亞軍。佢哋喺今屆外圍賽表現保持水準，取得7勝3和，以不敗佳績小組首名晉身決賽周。佢哋嘅23人名單之中，有6位來自祖雲達斯，分別係門將保方、後衛基亞連尼、巴沙利、邦路斯、中場史度拉利及前鋒薩沙，修咸頓嘅加斯安奴柏利亦有入選，當然唔少得羅馬射手艾沙拉維，中場就以老帶新，包括迪羅斯、莫達及費奧倫斯等。意大利喺E組嘅對手有比利時、瑞典及愛爾蘭，要突圍絕不容易，但憑佢地嘅實力及經驗，始終較大機會出線。

葡萄牙小組出線冇問題

2016-06-07

上屆歐國盃葡萄牙晉身4強，可惜經互射12碼以2比4不敵西班牙，未能打入決賽。今屆外圍賽，葡軍取得7勝1負，以小組首名晉身決賽周。葡軍向來前線選擇不多，喺早前公布嘅23人名單，前線4人係C朗拿度、艾達、拿尼同哥利斯馬，除咗C朗之外，其餘3位略嫌級數一般，未必擔到大旗。中場線以士砵亭為骨幹，祖奧馬里奧、艾迪恩施華及威廉卡維奴，值得一提嘅，係剛剛以3,500萬歐元轉投拜仁嘅18歲天才連拿度山齊士亦有入選。後防則有老將般奴艾維斯、卡華奴及比比等，雖則經驗豐富，但年紀有番咁上下，恐怕體力不足。不過葡軍喺F組嘅對手只係奧地利、匈牙利及冰島，只要演出對辦，出線問題不大。

<
1
...
4
5
6
7
8
...
101
>

/136

新聞搜尋



	至

C觀點