AM730

全部專欄 , 足球男

足球男 - 阿鵬

哥迪奧拿信心爆棚

2016-07-21

現今歐洲球壇轉會費講下都幾千萬，仲要係歐元或英鎊，兌換港元成幾億，真係好誇張。此外，球員同領隊嘅人工非常之高，較有名氣嘅英超球員，周薪起碼過10萬鎊，絕對係打工皇帝。雖則領隊薪酬冇球員咁高，但近年亦暴升不少，反而名帥哥迪奧拿執教曼城，人工仲少過拜仁，所謂魚唔過塘唔會肥，照計哥帥轉投「藍月亮」人工應該有所提升，點解會寧願減薪？其實哥帥係選擇底薪加獎金制，只要能夠贏得英超或歐聯冠軍，就可獲額外獎金，總數計埋會仲多過之前喺拜仁，十足十香港售貨員、地產經紀及保險從業員咁，底薪少獎金高。照咁睇，哥帥真係好有信心帶領曼城取得佳績，球迷們不妨拭目以待。

李城新兵把握力一般

2016-07-20

李斯特城上季創造奇蹟勇奪英超冠軍，今季要延續神話，難度非常之大。為保持爭標實力，主帥雲尼亞里必須增兵，最近就以1,600萬英鎊由莫斯科中央陸軍收購阿密特穆沙。呢位尼日利亞射手上季喺俄超攻入13球，協助中央陸軍奪冠，並成為隊中首席射手。穆沙係一位速度型球員，但射術同把握力只屬一般，否則入球數字點只13球。李城日前把中場主力尼高路簡迪賣俾車路士，因而缺少一員猛將，另一中場核心馬列斯亦受到多間歐洲大球會垂青，李城已將其轉會費定為4,500萬鎊，但我始終希望佢會留隊，來季同占美華迪繼續並肩作戰。

紅軍睇中韋拿杜姆

2016-07-19

利物浦以2比0輕取英冠球隊韋根，熱身賽3連勝，賽後領隊高洛普透露會簽多一、兩名新兵，有傳佢本來睇中咗烏甸尼斯嘅波蘭中場施連斯基，可惜佢已決定加盟AC米蘭，另一位就係慕遜加柏嘅德國中場達侯特，但紅軍加碼到2,500萬英鎊對方都唔肯放人。高洛普唯有另覓人選，最新睇中紐卡素嘅荷蘭中場韋拿杜姆，由於「喜鵲」降班，預料轉會費唔會太貴，外界推測約2,000萬鎊應該夠。韋拿杜姆係一位腳法同速度都唔錯嘅中場球員，亦能勝任翼鋒，位置變化較多，難怪引來高洛普垂青。佢上去季已經喺英超搵食，已適應英超踢法，若加盟紅軍相信好快可融入球隊，價錢又唔算太貴，呢單收購絕對諗得過。

同球員不和冇運行

2016-07-18

比利時喺歐國盃8強止步，賽前教練韋莫斯已多次傳出與球員不和，更喺記者會上互相指責，最終冇得留低。比利時足總主席卡斯麥卡希望下任領隊有豐富國際賽經驗，仲講笑話前曼聯領隊雲高爾都係合適人選。每個領隊都有自己喜愛同唔喜愛嘅球員，如果只係同當中一、兩人不和，佢可以運用職權雪佢或賣走佢，但同成班球員不和就係另一回事，球員刻意表現差令球隊成績滑落，最終責任都係落喺領隊身上。近年最佳例子為摩連奴重返車路士，攞完冠軍，佢開始同一眾球員不和，搞到幾乎要護級，最終被班主油王再請食無情雞。

希古恩拒投中超

2016-07-15

近年中超球會為增強實力，大灑金錢四出招兵買馬，早排有巴西翼鋒侯克以5,500萬歐元由辛尼特轉投上海上港，近日又傳河北華夏幸福睇中去季意甲神射手希古恩，打算用5,000萬歐元嘅天價年薪，利誘呢位阿根廷前鋒加盟，但係佢都係一口拒絕，決意留喺歐洲發展。河北華夏幸福先後收購謝雲奴及拿維斯兩名前線殺手，若果有埋希古恩加盟，威力就更加恐怖，但個人認為，以現時希古恩嘅狀態及實力，絕對可以喺歐洲大球會立足，就算離開拿玻里亦會加盟其他歐洲強隊，過多兩、三年先考慮去中超掘金都未遲。

一老一嫩離紅軍

2016-07-14

高洛普去年10月接掌利物浦以來，成績尚算平穩，以第八完結英超球季，聯賽盃及歐霸盃均晉身決賽，可惜只能屈居亞軍。今夏高洛普重組球隊，近日一口氣放走効力多年嘅中堅史卡迪爾及翼鋒佐敦伊比。史卡迪爾自高洛普入主後上陣機會大減，近日更涉嫌喺社交網站爆粗鬧呢位德國籍領隊，事後就話係無心之失，但關係搞到咁差，唔走都冇運行啦，呢位斯洛伐克國腳將轉投費倫巴治，轉會費約550萬英鎊。20歲小將佐敦伊比就傳會以1,500萬鎊轉投升班馬般尼茅夫，佢年紀尚輕，經驗有待磨練，加上個人質素其實一般，離隊亦好合理。

飛腳可小勝松鼠

2016-07-13

今日黃昏日職聯加開快車，論戲碼首選大宮松鼠主場對大阪飛腳。松鼠踏入第二階段表現略有好轉，繼主場1比0小勝名古屋鯨魚後，上仗作客亦能1比1賽和磐田山葉，暫列第六位。佢哋今季作客成績仲好過主場，至今主場只曾兩勝，大部分和波收場，係暫時日職主場和波最多球隊，首席射手家長昭博仍因傷繼續缺陣，影響咗前線攻力。飛腳有前鋒宇佐美貴史轉投德甲奧格斯堡，以為會造成影響，點知反而愈戰愈勇，早前作客3比1擊敗第一階段冠軍鹿島鹿角，上仗主場亦以3比1輕取仙台維加泰，升上第五。飛腳季初因要兼顧亞冠盃而分心，導致成績下滑，如今再冇包袱，相信第二階段會有好表現。佢哋今季作客成績尚算平穩，至今贏過5場，勝出率有55.6%。對賽方面，飛腳近6次到訪松鼠，錄得3勝1和2負，論近態、實力及往績，飛腳有望小勝而回。

睇C朗捧盃諗起美斯

2016-07-12

首先恭喜葡萄牙勇奪今屆歐國盃冠軍，見到C朗拿度捧盃嗰一刻開心到傻咗咁，就知佢好想為國家隊奪標。美中不足嘅係C朗喺早段因傷退下火線，要靠隊友完成呢個艱辛任務，但足球比賽講求團隊精神，呢場就係最佳證明。睇到C朗捧盃一刻，忽然諗起美斯喺今屆美洲盃決賽射失12碼坐喺球場嘅喊樣。首先我要講清楚，就係兩個我都非常欣賞同尊重，絕對冇影射美斯之意。我其實好戥美斯唔抵，成日差少少就可帶領國家隊捧盃，搞到成日俾球迷話佢淨係識幫球會捧盃……雖則失落美洲盃，但係以球技嚟講，相信美斯喺好多球迷心目中始終都係一代球王

一朝天子一朝臣

2016-07-11

近日盛傳曼聯將出價1億英鎊收購祖雲達斯中場保羅普巴，成為摩連奴今夏最後收購。坦白講。普巴值唔值1億鎊就見仁見智，但若然紅魔真係想買佢，相信會出售部分球員套現。有指摩帥接掌紅魔後，已有一份清洗球員名單，包括上季表現一般嘅馬高斯盧祖、舒韋恩史迪加同舒尼達連；桑馬達、戴利白蘭特及贊奴沙則屬「高危」。所謂一朝天子一朝臣，雲高爾重用嘅球員，唔代表摩帥都鍾意，勉強留低對大家都冇好處，而且新上任領隊都唔想活喺上任領隊嘅陰影之下，多數都刻意進行大換血，成績有好有壞。當年曼聯以超低價將普巴賣俾祖記，如今又欲以天價購回，以商業角度嚟講，真係蝕晒大本。

米希達利恩入魔可創高峰

2016-07-08

自摩連奴接掌曼聯後，唔少球迷亦議論紛紛，究竟摩帥組軍會買乜嘢人。摩帥日前喺記者會講過，今夏會簽4名球員，結果第一簽係維拉利爾中堅艾歷拜利，第二簽係前巴黎聖日耳門射手伊巴謙莫域，最新第三簽係多蒙特進攻中場米希達利恩，唔知第四簽會係邊個呢？27歲嘅米希達利恩加盟紅魔，合約為期4年，估計轉會費約2,600萬英鎊。呢位阿美尼亞中場當年加盟多蒙特係頂替轉投拜仁嘅馬里奧葛斯，佢好快就融入球隊，除咗技術及助攻了得之外，埋門把握力亦甚強，經常有士哥，入球數字拍得住前鋒，難怪摩帥公開讚到米希達利恩天上有地下無咁，相信佢今次轉戰英超，會有另一番新景象。

法國齊腳兼主場可晉決賽

2016-07-07

今晚繼續上演歐國盃4強戰，由東道主法國迎戰德國。法國愈戰愈勇，上仗5比2終止冰島奇蹟之旅，至今5戰取得4勝1和。翼鋒基沙文狀態大勇，暫以4球位列射手榜首位，前鋒基奧特亦大打爭氣波，配合埋中場保羅普巴及馬杜迪自然如虎添翼。佢哋今仗有防中尼高路簡迪及中堅阿爾拉米坐完波監復出，將以最強陣容出擊。德國上仗憑互射12碼淘汰意大利，但付出咗代價，中堅曉姆斯累積兩黃停賽，前鋒馬里奧高美斯及中場基迪拉因傷退下火線，前者肯定缺陣，另一中場舒韋恩史迪加亦有傷在身，上陣機會較微，教練路維喺人腳及戰術上必須有所變動。兩隊入得4強都係堅料，實力可謂旗鼓相當，但法國人腳較為完整，加上佔主場優勢，可睇高一線。

威爾斯葡萄牙五五波

2016-07-06

今晚上演歐國盃4強戰，由威爾斯對葡萄牙。今場焦點當然係皇馬隊友C朗拿度同加里夫巴利嘅對決，即管睇下邊位球星能夠晉身決賽。威爾斯喺今屆歐國盃一鳴驚人，上仗3比1擊敗世界排名第二嘅比利時，除咗單天保至尊巴利有好表現之外，中堅兼隊長艾殊利威廉斯、中場艾朗藍斯及仍未有班落嘅前鋒笠臣簡奴均有不俗演出。不過，佢哋今仗有藍斯同後衛賓戴維斯停賽缺陣，或多或少影響整體實力。葡萄牙今屆可算係奇蹟球隊，至今5戰法定時間90分鐘都未贏過，但竟可晉身4強。C朗狀態有好轉，前線數胡除咗佢同拿尼之外，新星連拿度山齊士表現亦一場比一場好，拜仁果然有眼光，喺歐國盃前簽入呢位明日之星。差一步就入決賽，預料兩隊會踢得較保守，隨時又要去到互射12碼先分到勝負。

德國4強戰未許樂觀

2016-07-05

德國經互射12碼以6比5險勝意大利晉級，4強將遇上主辦國法國。德國陣營傳出好消息及壞消息各一，好消息係上仗因傷退下火線嘅基迪拉，可望趕及於4強戰復出，壞消息就係前鋒馬里奧高美斯因傷緣盡歐國盃。高美斯喺今屆歐國盃重拾信心，有兩球進帳，但上仗傷出，其後證實右腳大腿肌肉拉傷，無法繼續餘下賽事。上仗自高美斯傷出後，教練路維採用無鋒陣，但前線攻力明顯減弱，最終要踢至互射12碼先分出勝負。除咗前線之外，佢哋防線亦有中堅曉姆斯累積兩面黃牌停賽，4強戰未能以最佳陣容對法國。個人認為，德國已無復兩年前奪世界盃之勇，加上有主力受傷停賽，對法國一戰並不樂觀！

比利時應以和為貴

2016-07-04

比利時以1比3不敵威爾斯黯然出局，賽後有傳主帥韋莫斯同門將泰拔高圖爾斯大打出手，喺記者會上又公開互相指責，醜態盡露人前。世界排名第二嘅比利時陣中球星如雲，前鋒盧卡古、中場核心奇雲迪布尼及翼鋒夏薩特等，能夠喺球會都獨當一面，但踢國家隊欠缺默契及火花，加上有華美倫及維頓漢倦勤及停賽，令防線出現不穩，面對士氣及鬥志大勇嘅威爾斯，輸波亦無話可說。其實賽前已有傳韋莫斯得唔到球員尊重，佢只係決定出場人選，點樣踢由球員決定。高圖爾斯話韋莫斯唔識應付3-5-2陣式，令球隊輸波；韋莫斯就話高圖爾斯上季喺車路士輸大咗而失晒信心。坦白講，輸波大家都有責任，唔應該互相指責，檢討輸波原因，令錯誤唔好再發生，同埋以和為貴先可以解決問題。

波蘭整體較佳可挫葡軍

2016-06-30

今晚歐國盃開始上演8強戰，第一場係波蘭對葡萄牙。波蘭喺分組賽擊敗北愛爾蘭、烏克蘭及賽和德國，與德國同得7分，僅以較差得失球屈居次席晉級。16強對瑞士要踢到互射12碼，最終射贏5比4。主力射手羅拔利雲度夫斯基表現令人失望，聯賽可以9分鐘入5球，打破4項世界紀錄，但踢國家隊喺今屆賽事仍未開齋，幸好佢嘅中場及前線隊友有不俗表現，加上防線穩健，否則都幾難去到8強。葡萄牙今屆歐國盃做咗「和波王」，分組賽3戰全和以小組最佳第3名晉級，上仗對另一支黑馬克羅地亞，兩隊踢得超保守，90分鐘互無紀錄，諗住要互射12碼之際，一次突擊由哥利斯馬門前頂入險勝。入得8強絕非泛泛之輩，但睇過兩隊幾場賽事，個人認為波蘭整體發揮較好，預料可再進一步。

<
1
...
3
4
5
6
7
...
101
>

/136

新聞搜尋



	至

C觀點