英超周末正式開鑼，開咧前各球會買人停不了，繼曼聯以破世界紀錄轉會費簽回祖雲達斯中場保羅普巴後，同市死敵曼城亦高價收購愛華頓後衛史東斯。今季曼市雙雄都有世界級領隊坐鎮，曼聯有寸王摩連奴，曼城就有哥迪奧拿，究竟邊隊成績較好？球迷們不妨拭目以待。 個人會睇高曼聯少少，事關摩帥曾帶領車路士贏過英超冠軍，往績較有利，加上紅魔今季人腳重整後實力更強，前鋒有伊巴謙莫域及朗尼，中場有普巴，組成RIP攻擊組合。相反哥帥初登英超，相信要時間去適應踢法及運作，今季「藍月亮」人腳變動不大，未必有太大進步空間，相比下認為曼聯較優勝。
今夏轉會市場嘅矚目焦點，當然係由祖雲達斯轉投曼聯嘅中場保羅普巴，日前佢終於落實以8,930萬英鎊回歸，打破2013年皇馬以8,600萬鎊收購熱刺翼鋒加里夫巴利嘅世界最高轉會費紀錄。普巴值唔值咁貴就見仁見智，但無可否認只得23歲仲有好多進步空間，睇過佢喺今屆歐國盃嘅表現，的確有大將之風，難怪寸王摩連奴肯用天價收購，仲讚到佢天上有地下無咁。當年普巴太年輕不受重用而離開，今次重返奧脫福一定會證實當年大家走漏眼，雖然要適應英超節奏並唔容易，但以普巴嘅能力，相信好快可以融入球隊。
今晚上演歐洲超級盃，由皇馬對西維爾。皇馬喺季前國冠盃表現唔錯，3戰取得2勝1負，贏過車路士及拜仁，只係輸俾巴黎聖日耳門。佢哋今夏人腳變動不大，有傳佢哋睇中拜仁後衛阿拉巴，打算用6,500萬歐元將佢收歸旗下。施丹賽前講到明加里夫巴利、卻奧斯及比比將缺陣，C朗拿度及門將基羅拿華斯繼續養傷，今仗皇馬人腳嚴重不整，實力成疑。西維爾今夏主要有教頭艾馬利轉投聖日耳門，由阿根廷籍嘅森柏奧利接任，早前已簽入日本國腳清武弘嗣，代替轉投史雲斯嘅洛蘭迪。佢地喺熱身賽非常醒神，6戰全勝，雖然友賽未能反映其真正實力，但皇馬讓晒車、馬、炮，預料今仗西維爾可贏波捧盃。
今季德乙正式開鑼，老牌球會史特加降班之後，首仗喺主場對聖保利。史特加今季有主力迪姆華拿、菲臘高斯迪治及迪達維相繼離隊，幸好由波琴羅致咗上季喺德乙入25球嘅神射手泰路迪，加上有中場華拿加盟，論人腳喺乙組應該唔成問題。教頭盧侯基亦有番咁上下料子，曾帶領慕遜加柏、奧格斯堡及哈化柏林升班，有望帶領史特加重返德甲。 聖保利向來攻力唔太好，上季平均每場只入1.32球，係聯賽前6名入球最少嘅球隊，今季為加強攻力，先後收購多蒙特前鋒杜古斯治及辛特侯遜嘅布夏迪斯。佢哋季前熱身賽成績一般，7戰取得2勝1和4負，近6次到訪史特加，亦錄得1和5負而處於下風。論近態、實力及往績，史特加明顯佔優，相信今仗可旗開得勝。
今晚英冠開鑼，開咧戰有富咸主場對紐卡素。富咸喺2013至14年度球季過後降落英冠，諗住呢支老牌倫敦球會好快可以重返英超，點知愈踢就愈差，上季差少少再降多級落英甲，隊中人腳面目全非，較為人熟悉嘅只有前車路士中場柏加，其餘多數係年輕球員，預料成績難以大躍進。「喜鵲」今季降落英冠，領隊賓尼迪斯選擇留任，今夏佢哋有荷蘭中場韋拿杜姆轉投利物浦，但從馬體會簽入後衛捷西斯加美斯，以去季班底為主，有望衝擊英冠錦標。對賽方面，喜鵲近6次到訪卡雲農舍球場，錄得1勝5負明顯輸蝕，但今時唔同往日，富咸已今非昔比，去季主場只曾8勝，勝出率得35%，預料今仗喜鵲可先拔頭籌，全取3分。
李斯特城今季能否衛冕英超冠軍？相信都幾難，奇蹟嘅嘢，可一不可再。睇番佢哋今季增兵暫時只有4名，包括前鋒阿密特穆沙、中場艾馬迪及南柏斯文迪等，但要應付聯賽及歐聯兩邊戰線，相信人腳仍未足夠，有傳波蘭國腳卡佩斯卡將以740萬鎊來投。個人認為，幾名新兵之中，只有阿密特穆沙較具名氣，其餘只屬二、三線球員，加上要適應英超踢法並唔容易，預料冇咁快融入球隊。有指李城嘅泰國老闆維猜大開水喉，只要雲尼亞里鍾意就可以隨便掃貨，但呢位老教頭向來量力而為，若大灑金錢去買人，之後成績唔好都幾難交代。
今晚歐聯第三圈外圍賽次回合有場不俗戲碼，由摩納哥主場對費倫巴治。首回合摩納哥作客1比2落敗，佢哋今夏踢過6場熱身賽，表現算平穩，取得3勝1和2負，射手法卡奧已歸隊而且狀態唔錯，開始重拾射門鞋，上仗更取得一個關鍵嘅作客入球。費倫巴治今夏嘅重點收購有利物浦中堅史卡迪爾，但荷蘭前鋒雲佩斯決心離隊，有機會轉投蘇超球隊格拉斯哥流浪，其餘人腳變動不大，以上季班底為主。佢哋今夏踢過3場熱身賽，取得2勝1和不敗，但友賽未能反映其真正實力。兩隊季初狀態成疑，但摩納哥佔主場優勢，相信可小勝對手晉級。
李斯特城去季創造神話奪取英超冠軍，兩位主力功臣占美華迪及馬列斯受到萬千球迷愛戴，華迪嘅成名故事更加成為咗電影題材。其實除咗呢兩位仁兄之外，李城仲有幾位無名英雄，前線首選日本國腳岡崎慎司，佢嘅走動範圍非常大，進可攻、退可守，體能消耗好大，所以經常喺下半場中後段被換走，相信係雲尼亞里嘅戰術之一。另一位就係法國中場鐵漢尼高路簡迪，佢喺中場攔截成功率相當高，可惜今夏已轉投車路士；當然唔少得另一中場硬漢真禾特，佢夠晒硬淨瓦解對方唔少攻勢，近日佢同球會傾續約，外界盛傳熱刺有意出價2,000萬英鎊利誘李城放人，但佢哋已經放走咗簡迪，相信唔會再放走埋真禾特喇。
俄超上周末開鑼，老牌勁旅莫斯科中央陸軍同辛尼特開咧戰只能和波，今晚就到魯賓卡山主場對阿馬卡。魯賓卡山今夏大灑金錢招兵買馬，先後收購8位球員，總支出佔整個俄超轉會費一半以上，較為人熟悉嘅有前巴塞中場桑治同查維加西亞等，實力大為增強，今季有望躋身前列。相反，阿馬卡班費有限，今夏加盟新球員全屬免費，可謂限米煮限飯，預料今季成績難有太大進步。佢哋近期友賽成績唔錯，7戰取得5勝1和1負，但友賽未能反映真正實力。對賽方面，阿馬卡近6次到訪魯賓卡山，錄得2勝3和1負絕不輸蝕，但睇過魯賓卡山對韋斯咸嘅友賽，整體球員發揮唔錯，相信今仗可憑主場優勢及實力，小勝對手食頭胡。
周六日職有場矚目大戰，由大阪飛腳主場硬撼廣島三箭。飛腳近況未如理想，上仗作客2比3不敵柏雷素爾後，連續3場未發市，無可否認射手宇佐美貴史離隊，影響咗前線攻力，上仗其中一個入球，亦只係靠對方擺烏龍。佢哋今季主場成績一般，至今只係贏過4場，勝出率得36.3%，以一支老牌勁旅嚟講絕對唔收貨。三箭近況尚算平穩，上仗主場2比0擊敗神戶勝利船後，聯賽連續3場不敗，射手烏達卡長期保持佳態，計埋上場嘅士哥，聯賽已累積15球，暫列射手榜首位；進攻中場柴崎晃誠亦有不俗表現，頻頻有入球。對賽方面，三箭近6次聯賽到訪飛腳，錄得1勝3和2負較輸蝕，但論近態同實力，三箭可望不敗而回。
祖雲達斯以破意甲轉會費紀錄嘅9,000萬歐元收購拿玻里前鋒希古恩，成為全球歷來第三高身價球員。呢位阿根廷前鋒把握力及射術了得，相信好多球迷都知，但估唔到28歲身價仲係咁高！依家球員嘅轉會費真係天文數字，有少少名氣都要幾千萬歐元，照咁計，希古恩都唔算特別貴啦！祖記近年稱霸意甲，如今加埋去季意甲神射手就係如虎添翼，難怪同鄉保羅戴巴拿都喺社交網站拍埋片歡迎佢，今季佢哋將會組成阿根廷攻擊線。個人都幾鍾意希古恩，落到場又搏又好波，上季聯賽入36球打破意甲紀錄，足足多第二位嘅戴巴拿17球，喺意甲超晒班。
利物浦今夏繼續活躍於轉會市場，近期先後收購紐卡素中場韋拿杜姆及奧地利門將曼寧加。 作為紅軍迷，收購韋拿杜姆加強中場實力無可厚非，相信高洛普引入門將曼寧加係貪佢夠經驗，若正選門將米洛列特有乜閃失或受傷，即可隨時補上。 有入自然有出，中場祖阿倫以1,300萬英鎊轉投史篤城，合約為期5年。祖阿倫今夏代表威爾斯參加歐國盃，協助球隊歷史性殺入4強，有不俗表現備受讚賞，入選由專家評選嘅賽事最佳陣容。 坦白講，祖阿倫一直唔受高洛普重用，上季英超只曾8次正選上陣，坐後備多過食飯，唔走都無運行，加上級數略嫌普通，絕對唔係高洛普杯茶。如今佢加盟中型班史篤城，仲有更多上陣機會，可以話係雙贏局面。
辛尼特繼侯克以5,500萬歐元轉投中超球會上海上港後，近日又有比利時中場韋素即將轉戰英超愛華頓，有傳轉會費約2,500萬英鎊。 拖肥糖今夏有美國大水喉射住，財力不下於其他傳統豪門，於是第一時間高薪撬走修咸頓領隊朗奴高文，更活躍於轉會市場，除咗韋素，又睇中紐卡素法國中場穆沙施素高，外界推測，其身價約為3,500萬英鎊。 韋素嘅級數唔算太高，技術及速度一般，唔知能否適應英超踢法，好在價錢唔貴，加上愛華頓已有盧卡古及米拿拉斯，若韋素加盟的話，就可以組成比利時攻擊鐵三角。
今晚北京鳥巢運動場會上演曼徹斯特市打吡戰曼聯對曼城。 紅魔上仗以1比4不敵多蒙特，整體發揮一般，以試陣為主，未能反映其真正實力，新加盟中場米希達利恩倒戈為球隊破蛋。藍月亮上仗派出多位二線球員上陣，最終以0比1敗於拜仁腳下，話晒都係佢哋首場熱身賽兼國冠盃，更何況對手係拜仁，輸波亦無可厚非。佢哋今仗對完曼聯，3日後會到深圳對多蒙特，養傷多時嘅中堅高柏尼，上仗對拜仁擔任後備，預料今仗有機會上陣。而剛收購嘅彭美拉斯前鋒加比爾捷西斯，會以借用形式留喺舊會一年。 國冠盃係季前熱身賽，兩軍會以練兵為主，但話晒係打吡戰，加上雙方都係新領隊，相信會較上仗認真，預料會合演一場好波俾大家睇。
今晚上演國冠盃中國站賽事，由曼聯對多蒙特。紅魔今次中國之旅會先喺上海對多蒙特，下周一就喺北京鳥巢對曼城。紅魔25人名單之中，除咗伊巴謙莫域、舒尼達連同安東尼馬迪爾休戰之外，其餘球員都成行，包括新加盟嘅後衛艾歷拜利同中場米希達利恩。佢哋剛喺友賽2比0擊敗韋根，大軍抵達上海安頓好後，隨即到球場開操，反映摩連奴一絲不苟，非常認真。多蒙特今夏有根度簡及米希達利恩兩位中場主力離隊，後防亦有曉姆斯轉投拜仁，中後場實力大打折扣。雖然引入咗奧士文尼迪比利、馬斯巴查及拉菲爾古里路等多名新兵，需要時間融入球隊。多蒙特上場友賽0比1不敵德乙球隊1860慕尼黑，雖則友賽唔可以作準，但整體發揮一般，論實力、人腳及領隊級數，紅魔可睇高一線。
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
