AM730

全部專欄 , 足球男

足球男 - 阿鵬

英超轉會費高處未算高

2016-09-01

現今球壇轉會市場的確瘋狂，轉會費貴到離晒譜，當中曼聯今夏以打破世界紀錄嘅8,900萬英鎊購回中場保羅普巴，令英超總轉會費又刷新紀錄。去年夏天，英超總轉會費高達8.7億鎊，所謂高處未算高，今夏以貼近10億鎊埋單，連出晒名手緊嘅雲加，都動用約5,200萬鎊收購前鋒盧卡斯佩雷斯同中堅梅斯達菲。夏季轉會市場即將關閉，曼城陣中有唔少唔受哥迪奧拿重用嘅棄將，唔知最終會花落誰家。被外借到拖連奴嘅赫特都幾慘，堂堂英格蘭一號門將，居然要去意甲踢中型班，相信赫特嘅粉絲要一段時間先可以平伏心情。

勝利船可再挫紅鑽

2016-08-31

今日黃昏上演4場日聯盃8強，其中神戶勝利船主場對浦和紅鑽最為吸引。兩隊剛喺聯賽交過手，勝利船主場2比1擊敗紅鑽，聯賽連贏3場而升上第五位。勝利船前線火力十足，一對巴西前鋒柏度祖尼亞及李安度蒙迪拉狀態大勇，後者更連續3場有進帳，另一射手渡邊千真亦有尚佳表現，呢個攻擊鐵三角真係唔嘢少。紅鑽近況回落，上仗主場1比2不敵川崎前鋒，聯賽10場不敗走勢告終。佢哋前線幾位主力狀態下滑，興梠慎三踢完奧運歸隊後表現麻麻，早前狀態大勇嘅武藤雄樹近兩場又冇料到，只有李忠成較為對辦。紅鑽近6次到訪勝利船，錄得1勝1和4負，明顯輸蝕，睇埋近態，勝利船有望再贏多次。

巴斯杜斯轉戰葡超係好事

2016-08-30

禾夫斯堡今季人腳變動較大，不過首仗都能夠作客2比0擊敗奧格斯堡，有個好開始。為加強前線攻力，佢哋今夏由比錫達斯引入前鋒馬里奧高美斯，所謂一山不能藏二虎，荷蘭長人中鋒巴斯杜斯就冇得留低，「狼堡」官方證實佢以1,000萬歐元轉投士砵亭，簽約4年。近年狼堡成績咁好，巴斯杜斯功不可沒，佢喺2014至15年球季攻入個德甲16球，協助球隊取得亞軍，可惜近年經常受傷缺陣，表現亦大不如前。巴斯杜斯轉投士砵亭其實都唔錯，話晒呢支老牌葡超勁旅，今季3戰全勝暫列榜首，有望衝擊聯賽冠軍，轉下環境另覓新挑戰都係好事。

杜塞爾多夫今晚可保不敗

2016-08-29

今晚德乙有場獨腳戲，由凱沙羅頓主場對杜塞爾多夫。凱沙羅頓開季麻麻，繼主場0比4大敗於漢諾威，上仗作客亦只能1比1賽和升班馬禾斯貝加踢球者，加上喺德國盃首圈踢至加時不敵賀利舒查，士氣及體能都受損。佢哋上季主場成績一般，只贏過5場，幸好今仗只得中場摩列斯因傷缺陣，其餘主力可悉數披甲。杜塞爾多夫近況唔錯，聯賽主場1比0擊敗史特加，德國盃亦作客3比0大勝羅斯托克。球會賽前借得般尼前鋒洛雲軒寧斯，佢曾經喺2014至15年球季攻入17球而成為德乙神射手，有助增強前線攻力。杜塞爾多夫近6次到訪凱沙羅頓，錄得2勝1和3負唔算太輸蝕，而且佢哋近態唔錯，今仗可望不敗而回。

拜仁食硬不來梅

2016-08-26

今晚德甲正式開鑼，開咧戰由班霸拜仁主場對雲達不來梅。拜仁今季主要收購有中場連拿度辛捷士及中堅曉姆斯，加埋原有班底，繼續稱霸德甲問題不大。佢哋上季主場強勁，勝出率達88%，平均每場入3球只失0.47球，係德甲主場王。不來梅今季人腳變動較多，主要收購有禾夫斯堡前鋒麥斯古斯、中場科利安卡恩斯及後衛摩辛達等等。佢哋喺季前熱身賽表現麻麻，喺德國盃第一圈亦作客以1比2不敵SF洛特，仲有新兵麥斯古斯左膝韌帶撕裂，需養傷一段時間。佢哋向來作客成績一般，上季只贏過5場，勝出率得29%。對賽往績亦係一面倒，不來梅近6次到訪安聯球場全部輸晒，當中更有4場被大炒，今次都係輸少當贏啦！

巴禾入城赫特非走不可

2016-08-25

巴塞門將哥迪奧巴禾轉投曼城好事近，呢位智利國腳已飛抵曼徹斯特，只要通過體測同傾妥個人合約細節，就可披起「藍月亮」戰衣。咁講法，英格蘭一號門將赫特應該冇得留低，盛傳只要有球隊肯出3,000萬英鎊轉會費，即可帶走佢。赫特正值當打之年，應該有球會願意出呢個價，但各球會知道曼城急售，點都會壓下價，希望佢可以盡快搵到新東家啦。至於巴塞點解又會咁快賣走巴禾？有指33歲嘅巴禾轉會費約1,700萬鎊，巴塞認為好價，加上佢哋同阿積士達成咗協議，引入荷蘭門將施利臣頂替巴禾，唔係嘅話，又點會咁易放人。

阿積士可憑經驗晉級

2016-08-24

今晚繼續上演歐聯附加賽次回合，阿積士首回合喺主場只能以1比1賽和羅斯托夫，今晚作客俄羅斯亦會係一場硬仗。羅斯托夫係歐洲賽嘅初哥，上一圈淘汰安德列治整體發揮唔錯，佢哋善於穩守突擊，上仗作客阿積士踢5-3-2陣式，擺到明死守，最終得償所願取得和局。阿積士近況麻麻，繼歐聯主場賽和羅斯托夫，上仗荷甲又喺主場以1比2不敵威廉二世，聯賽連續兩場失分，暫列第八位。主帥法蘭迪保亞轉投國際米蘭後，球會搵咗前飛燕諾教頭保沙執教，相信仍需時間適應；正選門將施利臣有傳即將轉投巴塞，今夏引入嘅一對箭頭多貝及辛達卡比沙斯狀態唔錯，加埋翼鋒卡拉臣，攻力不俗。論近態及士氣，羅斯托夫略勝一籌，但講到歐洲賽經驗，始終阿積士豐富得多，今仗亦可睇高一線。

摩納哥可晉歐聯分組賽

2016-08-23

今晚繼續上演歐聯附加賽次回合，論戲碼首選摩納哥主場迎擊維拉利爾。首回合作客贏2比1嘅摩納哥，上季防守力差勁，失球數字偏多，所以今夏主要收購防守球員，佢哋今仗繼續有前鋒法卡奧及路夫因傷缺陣，加上後衛班捷文文迪今場停賽，整體實力受到一定削弱。「黃色潛艇」季前有教頭馬些連奴請辭，由法蘭艾斯利巴頂上，佢哋今季有中堅艾歷拜利轉投曼聯，防線或有所影響，新兵方面有巴西射手柏圖及中場羅拔圖蘇利安奴等，但需要時間去建立默契。論近態及實力，摩納哥都略勝一籌，應可贏波晉級。

睇好華倫首戰贏波

2016-08-22

今晚上演兩場西甲聯賽，其中華倫西亞主場對拉斯彭馬斯戲碼較吸引。華倫去季表現未如理想，最終只排第11，今季佢哋有中場安祖高美斯同前鋒尼格度離隊，雖然引入咗翼鋒蘭尼同後衛馬田蒙托亞，但整體實力仍有所減弱。拉斯彭馬斯上季排名低華倫一位，球隊資源有限，今季主要有加納國腳奇雲保定免費加盟，有助增強中前線攻力，但難以挑戰前列位置。對賽方面，華倫近4次主場遇上拉斯彭馬斯，錄得2勝2和不敗，雖則後者喺季前熱身賽表現較好，但熱身賽未能反映真正實力，論人腳始終華倫略勝一籌，加上主場出戰，小勝應該唔難。

紅魔主場首戰可挫聖人

2016-08-19

今晚英超有場獨腳戲，由曼聯主場對修咸頓。紅魔上仗作客3比1擊敗般尼茅夫，整體發揮唔錯，新加盟嘅伊巴謙莫域表現不俗，亦有一球進帳，另外桑馬達同朗尼各建一功。佢哋上季主場威力有所減弱，但聯賽都贏到12場，勝出率有63%。修咸頓喺開咧戰主場多打一人下，只能1比1賽和屈福特，整體發揮一般。佢哋今季人腳變動不大，但有主帥朗奴高文轉教愛華頓，點都有啲影響。佢哋上季作客絕不失禮，不敗率有68.4%，但今季能否保持係一個疑問。「聖人」近6次到訪奧脫福錄得2勝1和3負，冇乜輸蝕，但係紅魔今季由摩連奴領軍，又有幾位星級猛將加盟，今仗可繼續贏波。

馬列斯去或留？

2016-08-18

上季創造神話奪得英超冠軍嘅李斯特城，開季首仗作客1比2不敵升班馬侯城，賽後唔少球迷認為，今季李城未必可以躋身前四，甚至會跌出前六。雖則我都認為佢哋今季前四機會渺茫，但只係踢咗一場，又唔好咁快下定論。隊中兩大主力占美華迪及馬列斯，該仗表現好一般，前者已續約留効，但後者仍未決定去留問題，若然真係離隊他投，將大大削弱中前場實力。其實今夏已傳過車路士及阿仙奴有意將佢收歸旗下，所謂魚唔過塘唔會肥，球員生涯短暫，有邊個唔想加盟頂級球隊？距離夏季轉會市場關閉大約兩周，唔知馬列斯最終會否離隊呢？

英超首輪觀後感

2016-08-17

英超剛踢完第一輪賽事，幾支老牌勁旅表現唔錯，曼聯、利物浦、車路士同曼城都贏波，最激烈嘅一場係阿仙奴對利物浦，兩隊合演入球騷，最終紅軍作客4比3險勝，最慘係兵工廠本身已傷兵滿營，踢完呢場大戰仲有中場艾朗藍斯要養傷1個月，可謂雪上加霜。另一場係倫敦打吡戰，車路士2比1險勝韋斯咸，賽後唔少球迷質疑球證判決，認為迪亞高哥斯達侵犯門將阿祖安理應被判黃牌，從而雙黃一紅被逐，如果哥斯達出咗場，賽果可能會改寫。上季英超盟主李斯特城就出師不利，諗住作客升班馬侯城小勝唔成問題，點知仲要輸波而回，唔知今季李城仲有冇神話呢？

歡迎赫特過檔利記

2016-08-16

曼城喺開咧戰主場2比1擊敗新特蘭，英格蘭一號門將赫特竟然坐冷板凳，由後備門將韋利卡巴尼路正選上陣。有睇過曼城嘅季前熱身賽就知，卡巴尼路錯漏百出，絕對唔係哥迪奧拿杯茶，可惜哥帥又唔like赫特，早前曾批評佢狀態有問題，所以一直盛傳曼城會喺轉會市場關閉前簽新門將。哥帥向來心儀巴塞球員，有傳佢好想收購達史特根，但巴塞未必肯放人，惟有向另一門將哥迪奧巴禾打主意。赫特喺曼城睇嚟都係冇運行，不如離隊好過，以佢嘅能力絕對唔愁冇班落，個人意願係佢轉投利物浦，事關米洛列特好神經刀，赫特把關一定比佢穩健。

倫敦打吡睇好車仔

2016-08-15

今晚英超獨腳戲上演倫敦打吡戰，由車路士主場對韋斯咸。「藍戰士」今季改由意大利教頭干地接掌帥印，佢地喺今夏轉會市場動作不大，主要收購只有李斯特城中場尼高路簡迪及馬賽前鋒巴舒亞伊。車仔喺6場熱身賽取得4勝2負，成績尚算唔錯，但未算真正考驗。「大槌仔」上季表現不俗，領隊比歷同中場皮耶功不可沒，今夏主要收購有史雲斯前鋒阿休同阿爾及利亞中場菲侯利等，但要應付聯賽及歐霸略嫌實力不足。對賽方面，韋斯咸近6次到訪史丹福橋錄得2和4負，明顯輸蝕。論人腳同往績，車仔都佔盡上風，預料今仗可打開勝利之門。

PSG開咧贏波冇問題

2016-08-12

今晚法甲正式開鑼，揭幕戰由巴斯蒂亞主場對巴黎聖日耳門(PSG)。巴斯蒂亞今季人腳變動不大，整體實力一般，季前熱身賽表現亦麻麻，4戰取得1勝3負。佢哋向來靠主場搵食，上季主場贏過11場，勝出率有58%。PSG今夏由艾馬利接掌帥印，季前表現相當對辦，國冠盃連贏3場，剛喺法冠盃亦以4比1大勝里昂。佢哋今季雖則有伊巴謙莫域離隊，但引入咗賓艾化及謝斯洛迪古斯等前鋒，加埋原有班底，應可繼續雄霸法甲。對賽方面，PSG近6次到訪巴斯蒂亞錄得5勝1負，明顯佔優，加上實力同近態都起碼高一班以上，預料PSG今仗可輕取對手先拔頭籌。

<
1
...
1
2
3
4
5
...
101
>

/136

新聞搜尋



	至

C觀點