謝拉特日前喺社交網站感謝洛杉磯銀河球迷，被解讀為暗示離隊，利物浦主帥高洛普更公開呼籲呢位「神奇隊長」重返晏菲路，惹起利迷無限遐想。謝拉特因傷缺陣銀河最後一場常規賽，喺國際賽期間亦返咗利物浦。高洛普指出，謝拉特一直都受利物浦歡迎，球會大門永遠為佢打開，所以佢嘅回歸絕對唔成問題。不過，高洛普只係話謝老四有望重返球會，但冇講會以球員身份加盟，利迷都係唔好諗太多。個人認為，謝拉特重返紅軍踢波機會較微，36歲要應付英超嘅節奏非常吃力，加上佢不時有傷，擔任宣傳大使或教練職位會比較實際，相信唔少紅軍球迷亦希望將來謝老四可執教球隊，咁就相當完美喇！
今晚歐聯C組有場重頭戲，由巴塞主場迎戰曼城。巴塞剛喺聯賽主場4比0大勝拉科魯尼亞，暫列第四位，只落後「一哥」馬體會兩分。佢哋喺歐聯表現非常對辦，繼主場7比0大炒些路迪後，上仗作客亦2比1擊敗慕遜加柏，以6分暫列榜首。賽前教練安歷基表示，今仗會使用三中堅陣式，未知是否屬實；美斯已傷愈復出，上仗對拉科後備上陣即有入球，意味著今仗可排出最強嘅「MSN」攻擊組合。 曼城近況有少許回落，聯賽加歐聯連續3場未發市(2和1負)，上仗主場1比1賽和愛華頓，射失兩球12碼係關鍵。佢哋近來防線不穩，3場失咗6球，雖則佢哋喺歐聯取得1勝1和得4分，與巴塞攜手出線機會好大，但要爭取更佳成績，必須改善後防。對賽方面，曼城近6次到訪魯營，錄得1勝5負明顯輸蝕，不論近態、實力及往績，巴塞都佔優，應可擊敗曼城。
今晚上演英超「雙紅會」，由利物浦主場迎戰曼聯。紅軍近態大勇，聯賽加盃賽7場不敗，取得6勝1和佳績，暫列英超第四位。人腳方面，中場韋拿杜姆於國際賽傷出，拉爾拉拿上仗作客史雲斯亦告受傷，兩人均未知能趕及傷愈；後衛尼達利基尼及洛夫雲因傷缺席國際賽，二人雖已復操但仍未知能否上陣。紅魔近況明顯有改善，聯賽加盃賽4場不敗(3勝1和)，暫排第七位。隊中只有後衛菲爾鍾斯呢位長期傷兵，人腳較紅軍完整，但朗尼狀態低沉正選不保，連帶喺國家隊亦要做後備。對賽方面，紅魔近6次到訪晏菲路球場，錄得3勝3負，實力方面亦係旗鼓相當，但論季初穩定性，紅軍略為秤先，預料今仗仍可小勝。
巴黎聖日耳門今季自伊巴謙莫域離隊後，攻力明顯下降，因此球隊計劃明年夏天收購一位世界級攻擊球員，目標鎖定為巴塞翼鋒尼馬。想買尼馬，價錢肯定唔平，尼馬同巴塞嘅合約至2018年夏天先屆滿，要買得心頭好，必須買斷其合約，尼馬嘅違約金達2.22億歐元，簡直係天價中嘅天價！呢單轉會傳聞真確性有幾高真係冇人知，但係尼馬遲遲未同巴塞續約，加上翻新魯營球場嘅工程費高達6億歐元，唔排除要賣走隊中主力套現。事實上，季初尼馬狀態一般，聯賽至今只得4球進帳，若PSG以天價收購，唔排除巴塞會心動。
今日黃昏會上演兩場日本聯賽盃4強首回合，其中FC東京主場對浦和紅鑽戲碼十足。 FC東京近況尚算平穩，近8場聯賽加盃賽取得4勝3和1負，唯一敗仗係主場1比3不敵今仗對手紅鑽。佢哋喺聯賽位居中游，無緣晉身季後賽，奪標機會只得聯賽盃。可惜佢哋今季主場成績一般，聯賽15場只曾7勝，勝出率不足一半，上一圈亦只係淘汰包尾大幡福岡黃蜂，未曾受到考驗。 浦和紅鑽近況愈戰愈勇，聯賽加盃賽連贏6場，當中攻入18球只失2球，但因周四世界盃外圍賽日本主場對伊拉克，陣中有門將西川周作、後衛槙野智章及中場柏木陽介被征召缺陣，對其中後防線影響甚大，幸好前線仍有興梠慎三、武藤雄樹、高木俊幸及李忠成等坐鎮，攻力不成問題。 論近態及實力紅鑽仍略勝一籌，預料仍可小勝對手。
今晚德乙有場獨腳戲，由史特加主場迎戰格雷特霍夫。史特加近況有回勇跡象，聯賽連續3場不敗取得2勝1和，當中更喺主場以2比0打破一哥布倫瑞克不敗身，升上聯賽榜第五位，只要保持佳態，來季有望重返德甲。人腳方面，中場華拿已傷愈，但前鋒泰路迪小腿有傷，上陣成疑，若呢位德國籍射手缺陣，或多或少影響前線攻力。 格雷特霍夫近況一般，近4場聯賽取得1勝2和1負，暫列德乙第八位。佢哋向來作客成績一般，至今只曾贏過下游球隊紐倫堡，幸好中場羅拔蘇爾積停賽後復出，加上隊中冇任何傷兵，可強陣出擊。 對賽方面，格雷特霍夫近6次到訪史特加，錄得1勝5負明顯輸蝕。論兩隊近態、實力及往績，史特加略佔上風，預料今仗可小勝對手。
今晚歐聯D組分組賽有場矚目戲碼，由馬體會主場迎戰拜仁。 馬體會近況回勇，繼作客1比1賽和巴塞後，上仗主場亦以1比0小勝拉科魯尼亞，升上聯賽榜第三位。基沙文有不俗表現，頻頻有士哥，聯賽累積5球，成為隊中首席射手。另外，新加盟嘅前鋒加美路亦好快融入球隊，加上費蘭度托利斯狀態唔錯，前線火力十足。 拜仁季初表現弗到漏油，聯賽加盃賽連勝7場，攻入25球只失1球，坐穩德甲第一把交椅。前鋒利雲度夫斯基狀態唔錯，聯賽已攻入5球，上仗歐聯主場5比0大勝羅斯托夫亦有一球進帳，整體球員發揮出應有水準，新領隊安察洛堤功不可沒。 兩軍上屆喺4強碰頭，當時馬體會主場以1比0小勝拜仁，最終2比2憑作客入球優惠晉身決賽，雙方實力旗鼓相當，難有必勝把握，大有機會握手言和。
今晚英超有場獨腳戲，由般尼主場迎戰屈福特。 升班馬般尼季初表現唔太理想，上仗作客0比3不敵李斯特城後，聯賽連續3場未發市，暫列榜下游位置。佢哋成績差主要係攻力疲弱，5戰只攻入3球，平均每場入0.6球，係暫時英超入球最少球隊，若不改善攻力問題，大有機會做升降機。 屈福特近況有回勇跡象，繼作客4比2擊敗韋斯咸，上仗主場又以3比1贏曼聯，連贏兩場後升上中游位置。中場伊天卡普爾及前鋒迪尼狀態唔錯，頻頻有進帳，前者聯賽累積4球，成為隊中首席射手。後衛真馬特上仗傷出，今仗肯定缺陣，另外中堅卡保奧因傷上陣成疑，或多或少影響防線實力。 對賽方面，近6次到訪般尼，錄得4和2負略為輸蝕。但論近態及實力，屈福特應可坐和望贏。
周中西甲加開快車，重頭戲當然係巴塞主場對馬體會。巴塞近態甚勇，繼歐聯主場7比0怒炒些路迪後，上仗聯賽作客亦5比1大勝升班馬雷加利斯，暫列聯賽榜第二位。美斯、蘇亞雷斯及尼馬呢個「MSN」攻擊組合腳風大順，頻頻有士哥，搞到對手後防疲於奔命。馬體會近況亦回勇，聯賽加歐聯連贏3場兼一球不失，現排西甲第四。前鋒基沙文長期保持佳態，聯賽連續兩場梅開二度，新加盟嘅加美路同費蘭度托利斯亦有不俗表現，整體人腳比上季仲好。對賽方面，馬體會近6次到訪魯營球場，錄得2和4負明顯輸蝕，但近兩次僅以1比2落敗，反映兩隊實力接近，但巴塞喺魯營始終硬淨，預料可小勝對手。
今晚西甲有場獨腳戲，由升班馬艾拉維斯主場迎戰拉科魯尼亞。艾拉維斯開季表現不俗，先後作客賽和馬體會及擊敗巴塞，成為一時佳話，球員信心及士氣增強不少。佢哋今季嘅主要收購中場丹尼爾托利斯及卡泰爾，其他新球員都係借用或以自由身加盟，整體實力比上季好，但要保持佳績有一定難度。拉科開季未如理想，開咧戰主場2比1擊敗伊巴，但其後作客賽和貝迪斯，跟住主場不敵畢爾包。佢哋近日簽入前利物浦翼鋒賴恩巴布，但呢位荷蘭球員因狀態不足，相信短期內難以披甲。對賽方面，拉科近6次到訪艾拉維斯，錄得2勝1和3負，略為輸蝕，而且論近態及士氣，艾拉維斯都有明顯優勢，預料今仗可再下一城。
今晚繼續上演歐聯分組賽，當中祖雲達斯會主場迎戰西維爾。祖記今季有保羅普巴轉投曼聯，但引入咗希古恩及比真歷，兩名新兵好快融入球隊，前者喺聯賽已有3球進帳，球隊整體實力有增無減，開季3連勝暫列意甲榜首。佢哋向來主場成績強勁，去季歐聯4戰取得2勝2和不敗，強如曼城到訪亦要輸波。西維爾今季由森柏奧利接掌帥印，開季表現不俗，3戰取得2勝1和不敗，暫列西甲第二位。佢哋今季人腳變動較大，新加盟嘅幾位球員狀態唔錯，例如馬體會借將韋圖、中場清武弘嗣、賓耶達及沙拉比亞等，總算維持到整體實力。兩隊上季同樣喺分組賽碰頭，當時「老婦人」主客都贏晒，論實力、近態同往績，祖記都佔優，要擊敗西維爾應該唔難。
今晚英超有場獨腳戲，由新特蘭主場迎戰愛華頓(周二 3:00am now621台/樂視直播)。「黑貓」季初表現未如理想，3戰取得1和2負仍未開齋，佢哋飽受傷兵問題困擾，前鋒波連尼、中場施巴斯坦拿臣及卡達莫、門將文路尼等都有傷，轉會市場關閉前簽入葡甲博維斯塔門將米卡杜明基斯，預料今仗可披甲上陣；另外仲簽咗自由身嘅前鋒安尼捷比，但前線仍要靠迪科爾數胡，略嫌火力唔夠。「拖肥糖」開季唔錯，3戰取得2勝1和不敗，轉會市場關閉前由韋斯咸借得中場安拿華倫西亞，人腳較黑貓完整。對賽方面，愛華頓近6次到訪光明球場，錄得2勝2和2負平分秋色，論近態及實力，拖肥糖都略勝一籌，預料可小勝。
C朗拿度同賓施馬已全面復操，預料會喺周六聯賽主場對奧沙辛拿復出，加埋加里夫巴利，皇馬嘅「BBC」攻擊組合應可喺今季首次亮相。C朗同賓施馬喺周一嘅操練十分活躍，頻頻頭頂腳踢入波，狀態十足，佢哋復出必定大大增強攻力。雖則皇馬開季缺少呢兩位星級射手坐鎮，但整體實力仍相當強勁，西甲先後擊敗皇家蘇斯達及切爾達，巴利喺開咧戰梅開二度，表現非常對辦。皇馬去季聯賽攻入110球，C朗加賓施馬合共入59球，成為隊中首、次席射手，佔球隊總入球54%，如今兩人一齊復出，對皇馬球迷及教練施丹嚟講絕對係大喜訊。
今晚繼續有世界盃歐洲區外圍賽，其中G組以色列主場對意大利戲碼不俗。以色列近年成績一般，大部分陪跑居多，甚少晉身決賽周，主要原因係青黃不接，陣中後防仍要靠老將賓希姆，前線入球重任就落喺希密特身上，人腳無太大驚喜，比較意外係老將班拿約落選。意大利今夏喺歐國盃表現唔錯，8強戰至互射12碼不敵德國，可算雖敗猶榮。干地離隊後由雲杜拿接掌帥印，今仗人腳以歐國盃為骨幹，包括門將保方、基亞連尼、邦路斯、蒙杜利禾、加斯安奴柏利及迪羅斯等等。坦白講，兩隊實力的確有距離，G組之中意大利同西班牙較為突出，預料今仗作客仍可小勝以色列，取得今屆外圍賽首勝。
近年歐洲球壇掀起回購潮，賣走嘅球員隔幾年又買番轉頭，好似上季馬體會回購後衛菲臘路爾斯，同埋今夏曼聯以破世界轉會費紀錄買番保羅普巴等。夏季轉會市場關閉前，又有一單回購，車路士以3,200萬英鎊簽入巴黎聖日耳門中堅大衛雷斯。個人認為，今次干地回購大衛雷斯並非壞事，事關車仔中堅人選唔多，泰利年紀有番咁上下，表現大不如前，只有加利卡希爾較穩定，法國小將葛特蘇馬未能擔大旗，況且市場上好中堅難求，話晒大衛雷斯踢過車仔，相信短時間內可適應，而最主要係兩年前佢以5,000萬鎊賣俾聖日耳門，如今平咗差唔多三分一，回購尚算合理。
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
