AC射手亨特拉爾早前同唔少球會拉上關係，轉會傳聞一個接一個，雖然佢曾經公開話過唔會離開AC，但自從該隊獲得伊巴謙莫域加盟之後，情況立即起咗變化，而佢最終亦都冇得留低，要轉到德甲搵食，過檔史浩克04。 史浩克04教頭馬加夫就話，收購亨特拉爾嘅過程比預期中困難，但最後終於成功買得心頭好，相信憑呢位荷蘭國腳嘅射術，可以增強球隊前線攻力。兩間球會未有就今次交易透露轉會金額，外界推測轉會費約為1,300萬歐元。 個人認為，亨特拉爾轉投史浩克絕非壞事，起碼佢可以得到更多上陣機會，加上夥拍前皇馬隊友魯爾，話唔定會擦出新火花。
夏季球員轉會市場剛關閉，昨日已經有關於冬季球員轉會市場嘅相關消息，有英國傳媒報道，利物浦有意喺1月出售荷蘭國腳古積特。早前盛傳古積特會以 1,000萬英鎊轉投國際米蘭，同舊老細賓尼迪斯再續未了緣，但紅軍拒絕對方要求，結果交易告吹，其後古積特亦公開表示，願意繼續留効紅軍。不過，紅軍領隊鶴臣為咗重組球隊，需要大量資金，喺兩位美國班主講到明唔會開水喉之下，唯有出售陣中球員套現，如無意外，古積特將會係其中一個被售對象。 30歲嘅古積特，成名於飛燕諾，能勝任前鋒或右中場，佢喺06年轉投紅軍，一直係正選主力。雖則佢唔算係世界頂級球員，但喺球場上嘅拚搏心，確實值得尊重，係紅軍近年其中一個唔錯嘅收購。
據英國傳媒報道，紐卡素欲收購熱刺前鋒羅比堅尼。 呢位愛爾蘭射手上季被熱刺外借到蘇超嘅些路迪，今季回收後，仍未獲得領隊哈利列納重用，因此有意離隊他投。另一邊廂，紐卡素領隊曉頓一直都好欣賞羅比堅尼，打算收購佢配合隊中首席射手安祖卡路爾組成攻擊組合，預料呢單交易好快成事。 羅比堅尼喺季前熱身賽有不俗表現，可惜開咧後立即被打入冷宮，事關哈利列納喜愛選用迪科爾、高治同柏夫里約真高等前鋒組合，而且有傳AC米蘭前鋒亨特拉爾亦即將來投，因此相信羅比堅尼嘅上陣機會將會愈來愈少。 其實以羅比堅尼嘅實力同經驗，的確唔愁冇班落，轉投紐卡素可能會有另一番新景象，我亦好期待佢披起喜鵲嘅球衣上陣。
AC米蘭官方網站宣布，已經同巴塞就前鋒伊巴謙莫域嘅轉會交易達成協議，呢位瑞典國腳將以外借1年嘅形式加盟，當今季結束後，將獲得2,400萬歐元嘅優先購買權，只要佢通過體測，就會成為紅黑兵團一分子。 伊巴謙莫域喺交易落實之後，接受訪問時就賣口乖，話AC係全世界最偉大嘅球會之一，佢哋擁有出色嘅進攻組合，好高興能夠為該隊効力，亦希望能夠協助該隊贏得意甲同歐聯冠軍。 由於伊巴謙莫域未獲得巴塞教頭哥迪奧拿重用，後者更曾經表明，呢位射手今季肯定冇正選，只會列作後備，加上該隊季前已成功從華倫西亞收購射手韋拿，前鋒線有人滿之患，所以伊巴謙莫域勉強留隊，亦冇運行，難得AC賞識佢，佢當然唔會say no啦！
據英國傳媒報道，利物浦領隊鶴臣為加強後防實力，有意收購富咸左閘高捷斯基。 據悉，利物浦打算動用350萬英鎊，羅致呢位前英格蘭國腳，除咗高捷斯基之外，紅軍亦睇中燕豪芬嘅墨西哥左閘沙斯杜，但前者加盟機會較大。不過高捷斯基亦有唔少球會垂青，早前伯明翰出價收購，可惜被富咸一口拒絕。 高捷斯基曾効力過查爾頓、熱刺、韋斯咸同富咸等英超球會，亦曾兩次入選英格蘭國家隊，但由於艾殊利高爾一直穩佔正選位置，所以他鮮有獲得徵召。 高捷斯基係一位幾穩定嘅左閘，進可攻退可守，替隊友製造唔少入球機會，可惜質素平庸，踢中型班尚可，踢紅軍就略嫌唔夠班，但以紅軍目前嘅財政狀況，的確好難買入高質素球員，唯有將就吓。
轉會市場關閉在即，相信嚟緊呢幾日，將會有更多轉會交易落實，唔知當中會否包括利物浦防守中場馬斯真蘭奴轉投巴塞呢？紅軍剛喺聯賽作客以0比3不敵曼城，當時馬斯真蘭奴並冇入選大軍之中，有傳係佢罷踢，威脅紅軍放佢走，亦有外界猜測，因為佢即將加盟巴塞而缺陣，是真是假，目前仍未有答案。 早前巴塞已為馬斯真蘭奴出價1,600萬英鎊，不過，當年以2,000萬英鎊收購呢位阿根廷防中嘅紅軍，不滿呢個價錢，更表明唔會以低價將佢賤賣，令交易陷於膠著狀態。巴塞教頭哥迪奧拿日前接受訪問時話，希望喺轉會市場關閉前羅致到一位防守中場，至於係唔係馬斯真蘭奴，大家不妨拭目以待。無可否認，馬斯真蘭奴對紅軍中場非常重要，但如果佢無心戀戰，勉強留隊亦唔係好事，倒不如將佢賣走，話唔定能達到雙贏局面。
韋斯咸開季表現未如理想，目前排聯賽榜尾二，領隊格蘭備受壓力，打算喺轉會市場關閉前，收購幾位中前場球員增強攻力。有英國傳媒報道，話呢位以色列教頭睇中咗國米前鋒奧賓拿。 奧賓拿未獲國米重用，上季被外借到西甲球會馬拉加，雖則今季回收，但預料上陣機會唔多，因此佢亦有意轉投其他球會發展。正所謂「瘦田無人耕，耕開有人爭」，估唔到奧賓拿都有唔少球會垂青，據聞另一英超球會史篤城亦有意將佢收歸旗下。 現年23歲嘅奧賓拿，係一位速度型射手，但埋門把握力一般，佢喺基爾禾闖出名堂，及後於08年轉投國米。國際賽方面，佢曾替尼日利亞國家隊上陣34次，攻入11球。
西維爾官方網頁宣布，已經同阿仙奴就後衛史基拿斯嘅轉會交易達成協議，目前史基拿斯已前往倫敦接受體測，若然通過，佢就會以650萬英鎊正式加盟兵工廠。阿仙奴今夏一口氣放走咗加拿斯、施維斯達同蘇甘保3位中堅，雖則雲加早前喺法甲羅連安特買入咗哥斯尼，但由於要應付幾邊戰線，後防人腳始終唔夠，所以再收購埋史基拿斯。 其實史基拿斯轉投兵工廠早已有跡可尋，事關西維爾上周中對布拉加嘅歐聯附加賽時，刻意將佢收起，好讓佢今季可以替兵工廠出戰歐聯。史基拿斯喺08年7月由里昂轉投西維爾，由於上季受傷患困擾，聯賽只上陣16次，不過，吸引到向來買人精打細算嘅雲加，花650萬鎊將呢位已年屆30歲嘅法國中堅收歸旗下，相信佢仍有一定實力。
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
