周六英超有場矚目大戰，由曼城主場迎戰車路士。剛喺聯賽盃第三圈出局嘅曼城，今季整體表現一般，聯賽5戰只曾兩勝，幾位新加兵仍需時間融入球隊。相反車路士季初表現一流，聯賽5戰全勝兼攻入21球。幾位主力球員狀態大勇，就算林柏特仍需繼續養傷，亦無減整體實力。 雖然車仔同樣喺聯賽盃第三圈出局，但好明顯教練安察洛堤唔在意呢隻盃仔。兩軍上季兩度碰頭，曼城兩場都贏晒，但車仔目前銳不可當，今仗當然有力作客全取3分。
捷西斯拿華斯近年喺西維爾有上佳表現，引來唔少歐洲大球會垂青，傳聞祖雲達斯、車路士同阿仙奴都有意羅致，打算喺冬季球員轉會市場重開後，正式提出收購。喺幾間球會之中，以兵工廠對佢興趣最大，有傳雙方更已經達成口頭協議，現階段只待轉會費達成共識，交易就會落實。 不過，西維爾要求嘅轉會費高達2,500萬歐元，平時雲加咁精打細算，未必會咁易就範。捷西斯拿華斯係一位具殺傷力嘅右翼，除咗助攻力強同速度高之外，射術亦有番咁上下，況且佢年僅24歲，正值當打之時，難怪咁多球會對佢有興趣啦！
今夏以1,600萬英鎊由拉素轉投曼城嘅塞爾維亞後衛高拉洛夫，於開咧戰作客熱刺足踝受傷，至今仍未傷愈，預計最快要到11月先至可以復出。 最初隊醫預測高拉洛夫可望喺3星期內康復，點知時至今日，傷勢仍然冇好轉，相信最擔心嘅肯定係教練文仙尼，縱使依家隊中仍有布歷治可以調動，但佢亦尚未回復最佳狀態。高拉洛夫成名於拉素，除咗防守了得之外，助攻力亦非常之強，尤其是佢隻「黃金左腳」，善於處理罰球及中距離射門，可惜天意弄人，英超開咧至今，僅上陣過一場，希望佢可以早日康復啦！
巴西國家隊隊長盧斯奧，於09年7月以800萬歐元由拜仁轉投國米，加盟後表現非常穩定，上季更協助球隊奪得三冠王佳績，難怪最近會引來俄羅斯球隊辛尼特嘅垂青。盧斯奧同國米嘅合約會去到2012年屆滿，據悉辛尼特教練史巴列堤已準備喺明年1月轉會市場重開後，以700萬歐元羅致呢位巴西中堅，不過，國米教頭賓尼迪斯喺未搵到合適代替人選之前，應該唔會咁輕易放人。 無可否認，盧斯奧係一位出色嘅後防球員，但略嫌佢太鍾意上前助攻，搞到後防唔夠人防守，容易失球。幸而，經過一向著重防守嘅前國米教練摩連奴調教，盧斯奧已經少犯咗輕出嘅毛病。
國際米蘭右閘馬爾干今夏不斷被傳會離隊，跟隨摩連奴轉投皇馬，但由於兩間球會就轉會費問題傾唔掂數，交易被迫告吹。暫時轉會無望，馬爾干唯有乖乖留隊，仲一改態度賣口乖。喺國米於歐聯分組賽作客2比2賽和川迪之後，佢話雖然目前狀態尚未回覆巔峰時期，但仍滿意自己嘅表現，好高興可以繼續為國米効力，真係識做！呢位巴西國腳於高士路出道，04年轉投摩納哥，06年以600萬歐元加盟國米，由於一直有上佳表現，成為球壇數一數二嘅右閘。馬爾干亦能勝任右翼，事關佢防守意識好之外，進攻亦有一手，係一位技術與速度兼備嘅球員，難怪深受歐洲各大球會垂青。
盛傳熱刺有意喺冬季轉會市場重開後，收購紐卡素前鋒安祖卡路爾。呢位英格蘭年輕射手被譽為舒利亞嘅接班人，上季佢協助喜鵲重返英超，今季亦有好表現，至今佢已經攻入4球，暫列射手榜首位。 據悉，熱刺打算用600萬英鎊羅致卡路爾，但外界認為佢哋出手太低，事關卡路爾年僅21歲，前途無限，而且係一位具殺傷力嘅數胡人物，加上英格蘭球員向來身價較高，所以喜鵲應該唔會放人。另有消息指，若熱刺遭到拒絕，會加碼將不受重用嘅羅比堅尼，再加現金利誘喜鵲，孰真孰假，睇怕都要到明年1月至知。
効力西維爾嘅西班牙翼鋒捷西斯拿華斯，早前成為轉會市場嘅搶手貨，有傳兵工廠、祖記、皇馬、車仔同巴塞均有意將佢收歸旗下。 目前捷西斯拿華斯仍未與西維爾續約，外界盛傳，佢將會喺1月轉會市場重開後，離隊他投。 不過，要收購呢位西班牙右翼絕不容易，事關佢同西維爾嘅合約列明，交易落實的話，買家要向西維爾賠償巨額解約費，淨係呢點已經令唔少球會卻步，所以現階段仍未有球會與西維爾接觸過。 現年24歲嘅拿華斯，以速度及腳法細膩見稱，經常替隊友製造入球機會，穩佔球隊右中場正選位置。但由於西班牙國家隊中場球星如雲，故未能取得一席正選，只能經常以後備身份上陣。
據聞曼聯有意收購阿積士門將史基倫堡，取代老將雲達沙。史基倫堡喺南非世界盃有上佳表現，協助荷蘭殺入決賽。有傳上周歐洲國家盃外圍賽荷蘭對芬蘭一役，紅魔派咗球探去觀察佢嘅狀態同演出。 費爵爺近年不斷尋找一位好門將，希望喺雲達沙掛靴後接棒，但實在唔容易，身為荷蘭國家隊1號門將嘅史基倫堡係合適人選，但除非紅魔開出天價，否則阿積士未必放人。 史基倫堡係阿積士青訓出身，佢嘅身高同反應的確係門將嘅好材料，加上只得27歲，正值當打之年，難怪引來費爵爺垂青啦！
今夏熱刺原本打算用前鋒羅比堅尼加現金，向維拉收購艾殊利楊格，點知維拉領隊奧尼爾突然辭職，該隊高層為咗穩定軍心，於是拒絕出售陣中主力球員。不過，熱刺對艾殊利楊格似乎仍未死心，打算喺一月轉會市場重開時，加碼以羅比堅尼、贊拿斯再加現金利誘維拉放人。 熱刺為艾殊利楊格開出一份周薪65,000英鎊、為期5年嘅合約，但呢位英格蘭翼鋒仍嫌人工太低，目前仲未肯簽紙加盟。冇計啦！依家英超球員嘅人工相當之高，較有名氣嘅球員，周薪都過10萬英鎊，熱刺開出呢個價錢的確唔算吸引，難怪艾殊利楊格唔心動啦！預料熱刺為買得心頭好，應該會再提高周薪，吸引艾殊利楊格過檔。
有英國傳媒報道，利物浦打算喺1月冬季球員轉會市場重開後，出售翼鋒賴恩巴布，購入漢堡翼鋒艾利亞。 荷蘭新晉國腳艾利亞喺南非世界盃有上佳表現，隨即引來唔少歐洲大球會垂青，早前意甲勁旅祖雲達斯亦有意將佢收歸旗下，但被漢堡拒絕。其實艾利亞同賴恩巴布嘅踢法好相似，但講到表現同穩定性，艾利亞就明顯好得多。 賴恩巴布成名於阿積士，07年7月轉投紅軍，加盟後初期表現不俗，但其後演出非常反覆，經常錯失入球機會，結果被前領隊賓尼迪斯打入冷宮，依家輪到鶴臣接掌球隊，都係同一命運。 好在賴恩巴布只有23歲，仲有大把進步空間，盛傳熱刺同韋斯咸都對佢有興趣，話唔定佢喺其他球隊發展，會表現復甦呢！
AC米蘭為爭取佳績，今夏收購咗伊巴謙莫域同羅賓奴，加強前線攻力，不過，球會嘅開支亦相對增加，為咗節省經費，該隊打算要求隊中部分球員減薪，首當其衝係前世界足球先生朗拿甸奴。現時細哨年薪高達800萬歐元，合約於2011年6月屆滿，該隊打算將佢嘅年薪減至400萬歐元，但預料呢位巴西球星唔會接受，或會選擇喺冬季轉會市場重開後離隊他投。今夏曾傳出細哨會離隊重返巴甲，不過最終留効AC。雖則細哨已不復當年勇，但始終爛船都有三斤釘，只要佢專心踢波，唔出去蒲，相信仍不愁冇班落。
據英國傳媒報道，利物浦打算喺1月轉會市場重開時，收購拜仁前鋒馬里奧高美斯。 紅軍領隊鶴臣為咗加強前線攻力，有意搵一位具級數嘅射手夥拍費蘭度托利斯，可惜佢哋今夏向拜仁提出先借用一季，之後再以2,000萬英鎊收購高美斯嘅提議，被拜仁主席路明尼加一口拒絕，最終交易告吹。馬里奧高美斯成名於史特加，09年以3,000萬歐元破德甲轉會費紀錄轉投拜仁，但佢加盟之後表現只屬一般，已失去球隊正選位置。 高美斯只屬歐洲二線射手，臨門把握力一般，經常錯失入球機會，踢中型班史特加尚可，但踢大會如拜仁就似乎未夠班。估唔到紅軍會對佢有興趣，真係令人難以理解。
英格蘭國家隊自從施路頓掛靴後，近十幾年來門將水準一直欠穩，但最近呢一、兩年，出咗一位年輕好門將——赫特，佢近年嘅神勇表現，深受球會領隊文仙尼及國家隊教頭卡比路賞識，連一向演出穩定嘅基雲，喺曼城亦要退居後備。不過，其實除咗赫特之外，仲有一位年輕門將冒起得好快，佢就係効力英冠球隊屈福特嘅史葛路治。 外界視史葛路治為赫特喺未來10年於國家隊嘅最大競爭對手，據英國傳媒報道，目前已經有多支英超球隊對佢虎視眈眈，包括阿仙奴、熱刺、富咸、愛華頓同曼城等，老實講，我未睇過佢嘅演出，唔敢妄下判斷，但既然有咁多球會都賞識佢，相信佢必有一定實力，讀者們不妨拭目以待。
因傷缺席南非世界盃嘅波歷克，將會再次以隊長身份，帶領德國征戰2012年歐國盃外圍賽。話說德國領隊路維同波歷克私下會面過，之後決定任命佢再擔任國家隊隊長。不過，由於波歷克未回復狀態，所以未有入選今輪對比利時及阿塞拜疆嘅大軍。重返利華古遜嘅波歷克，狀態明顯不足，話晒咁耐冇踢過德甲，的確需要時間適應，加上剛告傷愈，表現唔好亦無可厚非。
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
