AM730

全部專欄 , 足球男

足球男 - 阿鵬

睇好紅魔再取一勝

2016-12-14

周中英超加開快車，今晚曼聯將造訪水晶宮。水晶宮近況好轉，繼主場3比0擊敗修咸頓後，上仗作客亦3比3賽和侯城，暫列第15位，但仍有降班威脅。佢哋今季主場至今只曾兩勝，贏嘅亦只係修咸頓同史篤城等中游球隊，略欠說服力。前鋒賓迪基狀態大勇，聯賽連續3場有士哥，已累積9球成為隊中首席射手。紅魔喺主場1比0小勝熱刺後，聯賽加盃賽連續8場不敗(5勝3和)，現排英超第六。射手伊巴謙莫域狀態回勇，對上兩場聯賽均有進帳，佢哋今季作客成績一般，只贏過3場，勝出率得43%，唔算太理想。對賽方面，紅魔近6次到訪水晶宮，錄得4勝2和不敗，明顯佔盡上風，加上近態同實力都佔優，預料紅魔可小勝。

羅馬主場強勁可挫AC

2016-12-12

今晚意甲有場大戰，由羅馬主場火併AC米蘭。羅馬剛喺歐霸盃最後一輪分組賽，作客0比0悶和艾斯特拉，但由於賽前已肯定首名晉級，呢場波收起咗大部分主力。佢哋今季主場威力驚人，至今7戰全勝，平均每場攻入3.28球只失0.85球。但今仗仍有穆罕默德沙拿繼續倦勤，或多或少令攻力減弱。AC近況回勇，上仗主場2比1擊敗克羅托內後，聯賽連續5場不敗(4勝1和)，暫列意甲第三位。射手卡路士巴卡早前已恢復操練，但今仗無法趕及復出，加上中場古卡停賽，未能以最佳陣容出擊。對賽方面，AC近6次到訪奧林匹高球場，錄得1勝3和2，唔係太輸蝕，兩隊近態亦旗鼓相當，但羅馬主場威力實在太勁，相信今仗可小勝。

睇好波圖贏波出線

2016-12-07

今晚歐聯G組甚有睇頭，李斯特城肯定以首名晉身16強，布魯日5戰全敗提早出局，另一出線席位就由波圖及哥本哈根去爭。波圖領先哥本哈根兩分，佢哋只要主場擊敗李城就肯定晉級，相反哥本哈根作客布魯日，除咗一定要贏，仲要望波圖失分先有機會出線；若兩隊同分的話，哥本哈根將以較佳對賽成績晉級。李城喺聯賽成績未如理想，已捲入降班漩渦，預料今仗會留力派二線兵上陣，鬥志成疑，相反波圖佔主場優勢，一定搏到盡。另一場賽事，布魯日出線無望，相反哥本哈根狀態大勇，20場聯賽取得15勝5和保持不敗，拋離第二嘅邦比11分，今場贏面較大。不過，波圖始終佔有主導權，預料可以同李城攜手出線。

米堡主場可挫侯城

2016-12-05

今晚英超嘅獨腳戲係下游之戰，由米杜士堡主場迎戰侯城。米堡近況未如理想，聯賽連續3場未發市，跌落第16位。佢哋今季主場成績差勁，至今只曾1勝，而且攻力疲弱，平均每場只入0.92球，幸好前鋒尼格度近態回勇，上仗作客憑佢梅開二度，賽和李斯特城2比2。侯城剛喺聯賽盃8強經互射12碼淘汰紐卡素，殺入4強，但係喺聯賽表現認真麻麻，作客只曾1勝，最大問題係防線不穩，平均每場失2.67球，今仗更有前鋒艾保靴南迪斯、馬隆尼及中場賴恩美臣因傷上陣成疑，陣容不整。對賽方面，侯城近6次到訪河畔球場，錄得1勝1和4負明顯輸蝕，論近態同往績，都係米堡略勝一籌，預料今仗可以喺主場威番次。

兵工廠可晉聯賽盃4強

2016-11-30

今晚繼續有英格蘭聯賽盃8強，當中阿仙奴主場對修咸頓幾有睇頭。兵工廠近況不俗，聯賽加盃賽19場不敗(13勝6和)，暫列英超第四位。前線嘅阿歷斯山齊士、基奧特及禾確特狀態大勇，3人合共喺聯賽攻入18球，佔全隊64.2%。修咸頓近況略為飄忽，上仗歐霸盃作客0比1不敵布拉格斯巴達，但晉級仍未絕望。佢哋今季攻力唔強，但勝在防守唔錯，前鋒查理柯士甸狀態不俗，上仗憑佢一箭定江山主場擊敗愛華頓，聯賽累積6球，差不多佔全隊一半。對賽方面，修咸頓近6次到訪酋長球場，錄得1勝1和4負明顯被比下去。論近態、實力及往績，兵工廠都佔盡上風，即使唔以最強陣容出戰，預料都可以小勝晉級。

紫百合作客強可保不敗

2016-11-28

今晚意甲有場不俗戲碼，由國際米蘭主場迎戰費倫天拿。國米喺歐霸盃作客2比3不敵比亞斯華夏普爾後，肯定晉級無望，可專心聯賽。佢哋今季主場成績一般，至今只曾3勝，勝出率得50%，絕對唔收貨，中場硬漢加利美度上輪打吡戰撞傷右膝後已接受手術，預計要明年初先可復出。「紫百合」喺歐霸盃主場2比3不敵PAOK，但目前仍以10分暫列榜首，晉級機會高唱入雲。佢近期喺聯賽表現尚算平穩，連續6場不敗(3勝3和)，作客更取得3連勝，聯賽大部分入球亦來自作客。對賽方面，佢哋近6次到訪聖西路對國米，錄得2勝4負略為輸蝕，但論到近態及今季作客戰鬥力，紫百合今仗有望不敗而回。

曼城作客慕軍坐和望贏

2016-11-23

今晚歐聯C組有場生死大戰，由慕遜加柏主場對曼城。慕軍近況未如理想，聯賽加歐聯連續4場未贏過，今場佢哋有中場基拉馬及祖利安確比停賽，後衛馬雲舒侯斯及前鋒祖斯比迪米斯亦因傷上陣成疑，實力受到一定削弱。「藍月亮」近況回勇，聯賽加歐聯近4場取得3勝1和。哥迪奧拿剛喺聯賽將中場耶耶托尼解禁，佢首次上陣就入兩球，協助球隊作客2比1擊敗水晶宮，可惜歐聯大軍榜上無名；中堅高柏尼上仗因頭部受傷退下火線，今仗上陣成疑。對賽方面，兩隊近3次喺歐聯交手曼城全部贏晒。形勢上，慕軍今場必須贏波先有機會晉級，一定搏到盡，但為確保出線資格，曼城亦唔會放軟手腳，預料可坐和望贏。

睇好西布朗小勝般尼

2016-11-21

今晚英超有場獨腳戲，由西布朗主場迎戰般尼。西布朗近況未如理想，近6場聯賽取得1勝3和2負，暫列中游。佢哋今季主場成績差勁，至今只曾1勝，前鋒比拉希奴自9月起因傷缺陣，今仗有望復出，但中場主力查迪尼要通過體測先知能否上陣。相反般尼近況不俗，繼作客0比0踢和曼聯後，上仗主場以3比2擊敗水晶宮，聯賽連續3場不敗(2勝1和)。佢哋今季主要靠主場搵食，至今4勝全屬主場，作客仍未開齋(1和3負)，而且作客攻守力奇差，平均每場入0.25球，但就失2.25球。對賽方面，般尼近6次到訪西布朗，錄得1和5負，完全輸蝕。西布朗雖然今季主場唔掂，但般尼作客更差，故今仗睇好主隊小勝。

紅軍有望首奪英超冠軍

2016-11-16

英超至今踢咗11輪，利物浦有上佳表現，已經9場不敗，取得7勝2和佳績，依家暫排榜首。新加盟嘅沙迪奧文尼好快融入球隊，表現相當對辦，頻頻有士哥，菲臘比古天奴及羅拔圖法明奴亦狀態大勇，整體發揮出色，若能保持佳態，有望首奪英超冠軍。車路士、曼城及阿仙奴緊隨紅軍，係有實力嘅爭標分子，相反曼聯季初連贏3場氣勢強勁，但近況低沉，近5場只曾1勝，唔少紅魔迷開始對摩連奴有質疑，射手伊巴謙莫域早前連續6場冇進帳後，幸而上仗打破入球荒梅開二度，協助球隊贏波，可惜朗尼仍然狀態低沉。包尾雙雄新特蘭及史雲斯暫時只得5分，再唔加把勁搶分，降班只係遲早嘅事。

波蘭友賽可挫斯洛文尼亞

2016-11-14

今晚有場國際友賽，由波蘭主場迎戰斯洛文尼亞。波蘭剛喺世盃外圍賽作客3比0大勝羅馬尼亞，目前4戰取得3勝1和，暫列E組榜首，只要保持佳態，出線世盃決賽周機會好大。由於今仗係友賽，教練拿華加未必會強陣出擊，大有機會派遣副選上陣，首次入選嘅哥拿斯基及迪保斯基均有望披甲，傷兵則有拿玻里射手米利克、里昂後衛韋巴斯及波琴後衛達維杜域斯。斯洛文尼亞剛喺外圍賽作客1比0小勝馬爾他，4戰取得2勝2和，排F組第二位。教練卡坦歷今仗徵召好幾名新兵，好讓球員吸收經驗，預料今仗都係試陣為主。兩隊今仗都唔會全力以赴，但論實力波蘭略為佔優，加上主場出戰，相信可小勝對手。

飛腳可小勝心跳

2016-11-09

今日上演3場日本天皇盃第四圈賽事，其中大阪飛腳主場對清水心跳戲碼十足。早前飛腳喺聯賽盃決賽戰至互射12碼，最終以4比5不敵浦和紅鑽飲恨，今季唯一奪標希望，就落喺日本盃身上。佢哋近況有回勇跡象，繼主場3比1擊敗新潟天鵝，上仗作客更喺落後兩球下以3比2反勝川崎前鋒，艾迪美臣、井手口陽介及遠藤保仁等均有不俗表現。清水心跳近況相當強勁，聯賽連贏7場，最終取得乙組第三名，需要進行附加賽，有望重返日職。一對箭頭鄭大世及大前元紀狀態大勇，兩人喺聯賽合共攻入43球，前者更成為日乙神射手第一位，亦係日乙入球最多嘅球隊。對賽方面，心跳近6次到訪飛腳，錄得1勝2和3負，略為輸蝕。兩隊始終級數有別，加上心跳要踢附加賽，難免分心，預料飛腳可小勝晉級。

聖保利作客表現奇差

2016-11-07

今晚德乙有場獨腳戲，由禾斯貝加踢球者主場對聖保利。踢球者近況有回落跡象，上仗作客1比3不敵漢諾威後，聯賽連盃賽連續3場未發市，暫列中游位置。佢哋季初主場成績一般，5戰取得2勝1和2負，勝出率得40%，今仗仲有杜比亞斯舒洛克因腳趾受傷上陣成疑。聖保利近況認真差勁，聯賽連續7場未贏過，取得3和4負成績，成為包尾大幡。佢哋今季作客表現奇差，6戰仍未開齋，取得1和5負劣績，平均每場入0.34球，但失咗1.83球，攻守力都相當疲弱。中場老將尼域累積5黃今仗要停賽，首席射手布夏迪斯、中場宮市亮及後衛施雷斯亦因傷上陣成疑。兩隊各有缺點，但以踢球者較穩定，預料今仗可小勝對手。

熱刺利華似又再和波

2016-11-02

今晚歐聯E組有場不俗戲碼，由熱刺主場迎戰利華古遜。熱刺近況未如理想，聯賽加盃賽連續5場未贏過(4和1負)，堪稱和波專家。自射手哈利卡尼受傷後，球隊攻力明顯減弱，另外兩位前鋒孫興民及雲遜贊臣表現略為飄忽，幸好卡尼已傷愈有望今仗復出，絕對係好消息。利華古遜近況亦唔好得幾多，連續4場未發市後，上仗終於作客2比1反勝禾夫斯堡中止頹勢。佢哋喺今屆歐聯分組賽表現一般，3戰未嘗勝果全部和波收場，前鋒查維亞靴南迪斯狀態明顯不及季初，聯賽連續3場冇進帳，加上整體發揮一般，難怪現時只排德甲第十位。兩隊上一輪碰頭只能0比0悶和收場，事隔兩周預料變化不大，唔排除再次和波。

沙基利可助史篤城贏波

2016-10-31

今晚英超上演「雙史之亂」，由史篤城主場迎戰史雲斯。史篤城近況有回勇跡象，繼主場2比0擊敗新特蘭後，上仗作客亦以2比0贏侯城，連勝兩場後升上第17位。自中場核心梳頓沙基利復出後，史篤城表現明顯改善，上仗佢梅開二度，協助球隊贏波，係隊中贏波關鍵人物。史雲斯近況仍未見起色，聯賽連續8場未發市，取得2和6負劣績，暫列尾二。新領隊巴特利領軍兩場，首仗作客2比3不敵阿仙奴，上仗就主場0比0和屈福特，都算有交代，相信仍要時間去適應球隊。對賽方面，史雲斯近6次到訪史篤城，錄得1勝2和3負較為輸蝕，加上論近態及實力，史篤城都略勝一籌，相信今仗可藉主場之利小勝。

曼市打吡90分鐘難分高下

2016-10-26

今晚英聯賽盃16強有場打吡大戰，由曼聯主場火併曼城。紅魔剛喺聯賽作客慘吞車路士4蛋，士氣不免受到打擊，射手伊巴謙莫域鬧入球荒，聯賽連續5場冇進帳，中場保羅普巴狀態亦一般。紅魔季初主場成績一般，聯賽4戰取得2勝1和1負。「藍月亮」近況亦未如理想，聯賽加歐聯連續5場未發市(3和2負)，上仗主場只能1比1逼和實力一般嘅修咸頓；射手阿古路近態低沉，聯賽連續3場冇士哥，當中更射失過12碼，中場核心奇雲迪布尼則很大機會因傷缺陣。對賽方面，曼城近6次到訪奧脫福，錄得4勝1和1負，包括9月初贏2比1。兩隊各有缺點兼狀態欠佳，難有穩勝本錢，唔排除要踢至加時或互射12碼先可分出勝負。

1
2
3
4
5
...
101
>

/136

新聞搜尋



	至

C觀點