Ray手記 - Ray
2016-10-26

上學或上班前外賣一杯咖啡奶茶,已是不少香港人的生活習慣,但享用過後,有無考慮過手上不能回收再造的紙杯,會被送往堆填區,待20年才可分解,霸佔堆填區及影響生態環境。為了鼓勵大家一齊為地球「減磅」,綠色團隊Smiley Planet獲渣打香港150周年慈善基金贊助,策動「外賣,走杯!」活動;設計研發團隊以可回收PP5聚丙烯製作出杯身輕巧,方便攜帶的隨行杯供市民索取,鼓勵大眾在享用外賣飲品的同時,減少使用紙杯。 昨日渣打香港行政總裁陳秀梅(左)及環境局局長黃錦星(右),聯同支持活動的餐廳一同主持啟動儀式,各人舉起「走杯」隨行杯,一同成為「走杯大使」。Smiley Planet於9月至10月期間,透過網上問卷收集541名有外賣飲品習慣的港人的意見,發現只有不足一成(8%)受訪者有自備杯子外賣飲品的習慣,但事實上接近四成(36%)的顧客及近七成半(74%)受訪餐廳表示樂意接受顧客使用隨身杯,支持環保或迎合客人需要。提供折扣予顧客,及向餐廳提供補貼是促使大家響應使用隨行杯的主要原因。至目前為止已經有82間餐廳承諾支持「外賣,走杯!」活動,當中更有超過30間餐廳願意提供折扣/優惠,回饋自備杯子買外賣飲品的顧客。 Ray~投身傳媒工作多年,由市場研究做起,一直與公關、廣告、新聞界結下不解緣,心境永遠青春。

2016-10-24

愈來愈多海外著名學府嚟香港開設分校,來自英國嘅西倫敦大學(UWL)最近就與香港能仁專上學院合作成立教育中心,噚日佢哋喺酒店舉行開幕典禮,除咗政府官員及教育界翹楚等過百位嘉賓到賀之外,仲有香港南區管樂團演奏殿堂級音樂大師Andrew Webber的多首名曲,當中梗唔少得《歌聲魅影》啦,現場充滿濃厚音樂氣息。   開幕儀式點解用上音樂劇做主題?箇中有玄機嘅,唔單只因為該校嘅倫敦音樂學院(LCM)孕育出這位大師,亦因為LCM計劃喺香港開辦音樂碩士課程。認識Andrew Webber嘅都知佢出身音樂世家,其父與弟弟曾先後擔任該校校長,即係話報讀LCM課程嘅學生,選擇部分時間到英國院校修讀,就可以感受Webber家族嘅教育。講番今次演奏嘅樂團指揮,亦係LCM嘅校友,真係聽出耳油!   不過,音樂學院咁有成就,梗係同大學嘅教育理念有莫大關係。介紹番UWL,喺英國被譽為Career University,畢業生喺當地嘅就業指數好高,96%畢業後6個月內就搵到好工,皆因該校與好多傳統英資及國際企業,如英航、BBC及西門子等建立企業網絡。至於該校嚟到香港,亦看準本地人力市場需求,開辦8個重點課程,除咗享負盛名嘅音樂,仲有醫護、旅遊、金融及會計等。 Ray~投身傳媒工作多年,由市場研究做起,一直與公關、廣告、新聞界結下不解緣,心境永遠青春。

2016-10-21

香港電視旗下嘅HKTVmall明明做網購,突然走去開實體店,仲要搞埋「送樓大抽獎」,頭獎係一人獨得400萬元買樓基金喎。之但係,做乜咁大手筆、點解由「虛轉實」?係咪網購生意難做?噚日喺北角和富道嘅首間實體店開張,Ray梗係走去問下港視主席王維基。 王生話,HKTVmall自從舊年2月2日開業以來,業務發展平穩,仲列咗一大堆數字,根據Google Analytics數據,僅上月已經錄得99.1萬用戶瀏覽量,過去一年曾經喺佢哋度購物嘅客戶達12.8萬名。仲有係截至今年6月30日嘅6個月中期業績顯示,該網嘅營業額超過6,746萬元,較去年同期增加超過5倍! 既然表現理想,做乜開實體店?睇真只有幾百平方呎的舖面,原來擺咗超過50部平板電腦,就好似虛擬貨架咁展示產品,目的就係想吸引仲未識上網購物一族埋嚟試,即場有人教,增加對網購嘅信心。咪住!間舖開正喺大型超市對面,為乜要過嚟玩網購先?王生就梗係賣花讚花香,皆因佢哋每類貨品種類特別多,例如洗頭水都300幾種,試問有邊間超市做得到?王生仲話,嚟緊嘅開舖策略都係靠近超市,短期內開10間以下作嘗試。 講番個抽獎先,只要任何18歲持有香港永久居民身份證人士下載HKTVmall app,填妥簡單資料,就可以參加抽獎。如果中咗頭獎,就真係買樓不是夢了!祝大家好運! Ray~投身傳媒工作多年,由市場研究做起,一直與公關、廣告、新聞界結下不解緣,心境永遠青春。

/136



C觀點

中原城市領先指數

廚神

旅遊