AM730

全部專欄 , Ray手記

Ray手記 - Ray

浸大60周年精英傾情演出慶賀

2015-10-29

2016年係浸大60周年，一眾校友決定於2016年1月30日舉行「我們都是浸大的」校友Show，由過百位校友一同攜手製作及匯演，並以多媒體藝術表演包括話劇、管弦樂、合唱、微電影、朗誦、跳舞、魔術及歌唱，展示浸大人的才華與創意。昨日記招亦星光熠熠，出席支持的台前幕後陣容強勁，雲集歌、影、視、藝術及傳媒界別的精英校友，包括演出嘉賓鍾景輝、劉兆銘、張堅庭、廖啟智、林超榮、顏卓靈、甄澤權、倪秉郎和麥潤壽等，監製校友鄭丹瑞同蕭潮順，為校慶創作主題曲的校友鄭國江及區瑞強，加埋六十周年校慶搞手鄭恩基，陳許多琳，錢大康教授，傅浩堅教授、趙應春等，數都數唔晒。不過由於浸大的大學會堂座位有限，而校友眾多，校慶校友活動籌備委員會主席趙應春話，校友Show的另一重點是即時在網上同步直播，大家安坐家中便能欣賞節目。

Thomson先至真

2015-10-29

Ray 前日手快快，將香港零售管理協會新主席鄭偉雄個英文名打錯咗，查實係Thomson至真，真係唔好意思，在此向大家同say sorry，並為引致鄭生不便致歉。

北韓來電？比內地電話騙案更離奇

2015-10-28

電話促銷電話原本係一個在香港由來已久的行業，但一輪內地電話騙案事件，令到人人自危，Ray的老友最近竟然接到來自北韓的來電，來電區碼850，仲寫明電話來自北韓，Ray的老友只是弱質女流，當時男朋友又不在身邊，第一個反應就係唔聽等佢響完算數。她自言不懂韓文，雖然鍾意睇韓劇，但也要跟足中文字幕先識睇，更加無親戚朋友住在北韓，故此收到呢個電話亦感到莫名其妙，雖然唔敢話一定係騙案，但她已嚇餐死。其實近年形形色色的電話騙案，已經令到好多做正當電話促銷生意的行家好苦惱，如果警方唔能夠做多D功夫，減少呢類型騙案出現，對真正以此方法促銷的營商者而言，實在是無妄之災。投身傳媒工作多年，由市場研究做起，一直與公關、廣告、新聞界結下不解緣，心境永遠青春。

鄭偉雄任零售管理協會新主席

2015-10-28

Ray昨天出席了香港零售管理協會的茶敘。剛選出的新任主席鄭偉雄(Thomas)於零售界已有28年經驗，現職係連卡佛載思有限公司常務董事，仲身兼俊思集團董事及華鐙集團總裁等職務，而佢喺2010年已經參與協會嘅事務，經驗可謂相當豐富。Thomas依然十分謙虛咁話當選高興之餘，亦感戰戰兢兢，希望可以藉協會嘅工作貢獻業界，繼續為業界發聲，加強與不同持份者嘅聯繫。同時會繼續推動優質服務文化，舉辦獎項及支持正版正貨計劃。另外，亦為業界培育更多年輕人才，以及支持中小企等。而已擔任協會主席達7年的麥瑞琼(Caroline)，則笑指雖然已交棒，但係佢仍然喺協會董事會及執委會有職務，會繼續與新主席合作，希望為香港零售界出力。Caroline真不愧大忙人，會後還要趕赴馬來西亞。Ray喺度再恭喜香港零售管理協會順利交棒，繼續推動零售業健康發展。

曹醫生捧恒發金融場

2015-10-28

恒發洋參(911)檔金融旗艦恒發金融昨日切燒豬慶祝開幕，久未露面的康健國際(3886)行政副主席曹貴子(左二)也來捧場，曹醫生同恒發主席兼行政總裁楊永仁(左四)、立法會金融界議員張華峰(左三)老友鬼鬼添！其他財經名嘴如沈大師(沈振盈)同Kenny鄧(鄧聲興)同去向未定的潘鐵珊也有出席。至於金牌莊家詹培忠個仔詹劍崙也送上花籃(圖2)。楊永仁話新公司資本3億至4億元，做得好不排除分拆上市。

關信輝支持口述影像助盲人

2015-10-27

11月29日的中原葡萄慈善跑嘉年華昨日開記招，除各主辦單位派代表出席外，《五個小孩的校長》導演關信輝同編劇張佩瓊，亦獲邀出席分享，Ray得悉他們同今次的受惠機構香港盲人輔導會頗有淵源。事緣關導演曾在中心播放其作品《流浪漢世界盃》給視障人士欣賞，並配有口述影像旁白，其中一名好開心嘅觀眾當時對佢話，如果有戲院嘅爆谷同汽水就更好了。關導演就為這一句話而非常感動，明白原來一般人眼中頗為普通嘅事物，對視障或失明人士來說，竟是一種奢侈。於是，到關導演套賺人熱淚嘅《五個小孩的校長》今年初公映前，他特別安排在正式嘅電影院搞了一場優先場俾盲人輔導會一班朋友欣賞，並且由他自己親自做口述影像旁白，令視障人士亦可同步欣賞電影嘅內容。關導演講到這段經歷時，眼眶早已濕透，難怪他有淚眼導演之稱。講開《五個小孩的校長》，關信輝導演同編劇張佩瓊話當日劇本來回改了八次之多，可謂慢工出細貨，唔怪得咁細緻感人，至於籌備中的新作品，關導演話未方便透露內容，但係就與年輕人有關，同樣係勵志故事。至於今次冠名贊助葡萄慈善跑嘉年華的中原地產及中原薈，出錢又出力，更會資助鼓勵同事參與慈善跑，據聞唔少中原同事已經報咗名，依家正積極練跑，跑步跑數同樣落力。中原地產亞太區總裁黃偉雄話，覺得今次受惠機構香港盲人輔導會的工作好有意義，尤其是口述影像同視障人士圖書館服務，令視障人士可多些接觸社會，人生亦變得積極，他更親身看過一齣配有口述影像嘅電影，看時感受甚深，覺得參與的義工都非常有心。

網民挑機齊昕cap圖過招

2015-10-27

「龍蝦女」梁齊昕昨日在facebook好活躍，不斷貼文，並貼出穿拖鞋顯示腳傷的相片(圖1)，引來好多like及留言。話說立法會議員黃毓民日前在答問會問特首梁振英「幾時死」後，有網民在齊昕面書帳戶提出相同問題：「真心問：你老豆幾時死？」(圖2)雖然呢句留言已刪去，但鬼妹仔性格的齊昕將呢句留言截圖，並貼文話「I love this guy. Too funny hahaaa」，佢之後更貼出該位網友「Leonard Leung」帳戶的個人資料截圖，叫「大家頒個創意史獎俾依條友 hahaaha lmao(lmao是網絡用語，即Laugh my ass off笑到碌地咁解)」；Leonard喺帖子留言「多謝晒」，並追問「咁有答案未」，又話「我都好想獲得689祝壽加持」；齊昕跟住用中文留言：「大家明唔明諷刺依兩個字」，呢個貼文po了3小時後已有300幾個like。齊昕之後繼續又中又英連番貼文，「呢個世界太多白癡人、冇眼睇。救命 # 太好笑」、「好蠢呀啲人救命」、「Stop fxxking calling me 民主女神. Get a job」

中原新主角「TOLdi」隆重登場

2015-10-27

中原地產「小睦」廣告面世好幾年，反應不俗，Ray枱頭亦有一個「小睦」公仔，佢終於有新拍檔，就係叫做「TOLdi」(Told Digitally)的另一個得意公仔。以佢為主角的新一輯中原廣告，以漫晝形式迎合現今的e世代，用「BIG 爆樓盤資料褲」為題，向客戶介紹中原的海量資料庫，包括中原網頁，中原的流動程式等。而廣告中出現嘅豪宅、上車盤、煙花景、背山面海等不同物業，會化身成不同漫畫形象，向「TOLdi」提出查詢，TOLdi則運用資料庫解答。新一輯中原平面廣告昨日已在各大報章出現，電視廣告亦於昨晚9:30開始於各大電視頻道，包括TVB、有線電視及Now TV 等播出。未來仲會於各主要大眾運輸工具，如巴士、東鐵西鐵中見到「TOLdi」的蹤影。

CY開面書戶口短暫消失

2015-10-26

FB幾乎是現代人必備的社交工具，被指地位超然的特首梁振英，昨日終於都開了戶口，阿Ray問過新聞統籌專員馮煒光，佢確認個戶口真係CY本人；不過好多人都唔係好信，話說CY開FB後，第一時間喺民政事務局政治助理徐英偉個acc留言說「Hi」，民建聯大狀馬恩國半信半疑問「Really our CE？」徐英偉回答「真」。 CY個acc昨日多次短暫消失，至傍晚已重開，並上載多張蓮花相，唔知佢係咪自比君子呢？哈哈！CY並貼文：「很多朋友經常同我交換種花照片和心得，今日開個FB會同大家分享花菓樹木和生活照片。希望大家欣賞。」不過呃like指數未算好勁，花相po了個幾鐘都只係得六十幾個like，反而年初開面書嘅財爺鬍鬚曾，已經有3千幾個friend，每個po亦閒閒地有幾百個like，可以話係最受網民「喜愛」的官員，不過有心唔怕遲，大家俾啲時間CY儲朋友啦。至於CY點解呢個時候開FB？馮專員話想開便開，FB也很多人用，又話讓其他官員先開acc，而CY自己有空也會管理acc；至於交友要求會唔會選擇？馮專員只係話社交媒體是溝通工具一種。 Ray 投身傳媒工作多年，由市場研究做起，一直與公關、廣告、新聞界結下不解緣，心境永遠青春。

譚志源伴愛妻嘗美酒

2015-10-26

一年一度的美酒佳餚巡禮昨晚閉幕，吸引不少城中名人及嗜酒一族，入場人數勝去年；政制及內地事務局長譚志源(Raymond)早幾日亦自己買飛入場支持，佢同阿Ray講當晚氣氛好好，原來Raymond同埋太太一齊入場，兩公婆難得sweet sweet嘆紅酒，怪不得局長笑得咁甜。 Ray 投身傳媒工作多年，由市場研究做起，一直與公關、廣告、新聞界結下不解緣，心境永遠青春。

大輝預見政壇波譎雲詭

2015-10-26

工業界立法會議員林大輝每3個月出一次工作報告，比起其他議員都勤力，最新一期報告封面陰霾密布，配合「政壇風暴波譎雲詭」的主題，他在文中亦提到對下任特首的期望，話只有才德兼備的特首，才能令市民心悅誠服，社會才會民心歸向，空談不切實際的宏願，高談闊論虛無飄渺的大計，絕對不會得到市民信任，「舢舨充炮艇，更只會令市民唾棄」。大輝又意有所指話，特首是中央與港人之間的「橋樑」，但如果這是一條「爛橋」或「斷橋」，兩地關係只會愈來愈差；近年兩地矛盾愈演愈烈，主因係政府無做好疏導工作、扮演溝通橋樑的角色。 Ray 投身傳媒工作多年，由市場研究做起，一直與公關、廣告、新聞界結下不解緣，心境永遠青春。

林家亨新搞作

2015-10-23

做開洋參生意的恒發洋參(911)邁向業務多元化，最新一炮就是進軍金融業，打正旗號「恒發金融」，將於下周二開幕剪綵，總部更會設於中環中遠大廈。新項目自然要吸納猛將坐鎮，恒豐證券研究部董事林家亨將出任恒發金融MD，即董事總經理，由研究部的後勤部門走上前線。 Simon(林之英文名)何Ray證實將加盟，早期由十多人起步，先推證券買賣服務，目標當然要拓展更多業務包括資產管理。傳聞他亦是股東之一，Simon笑言確實有Option(認股權)，日後公司上市自然有機會行使，實行多勞多得！ Ray 投身傳媒工作多年，由市場研究做起，一直與公關、廣告、新聞界結下不解緣，心境永遠青春。

文華美食進軍酒展

2015-10-23

旅遊發展局一年一度重頭項目、一連四日嘅香港美酒佳餚巡禮(Wine and Dine Festival)今年回歸中環。昨日正式開幕前，旅發局主席林建岳博士(Peter)邀請傳媒老總午宴試味，Ray甫進場便感覺猶如置身鬧市中的秘密花園。Peter話為求達到好效果，今次不單草地要執過，連部分地磚也重新鋪砌。門票同13年一樣30元，希望有14萬人次入場。今年美酒佳餚巡禮規模係歷年最大，有300多個攤位，當然唔少得近年好潮嘅威士忌及手工啤酒。入到尊尚品酒區，又是另一番感覺，現場布置得既高雅又舒服。遇見Riedel的第十代傳人Mr. Georg Riedel，Ray當然不會放過請教品酒心得。去到日本街，日本清酒商喜和的負責人跟Ray說，因舊年反應很好，所以今年加碼再來。不過，Ray認為最特別的，係品味館於24同25日提供嘅酒店級美食，以Master Chef Lunch午餐為例，4道菜配埋酒盛惠650大元，由文華扒房及酒吧提供，包括食得嘅盆栽頭盤，打開寶盒才見牛柳嘅主菜，非常有特色。經典文華東方酒店下午茶亦只係每位290元，要訂位就要快手啦。 Ray 投身傳媒工作多年，由市場研究做起，一直與公關、廣告、新聞界結下不解緣，心境永遠青春。

比亞迪雙層電巴士現倫敦

2015-10-23

雙層巴士係英倫特色，動力要求頗大，不過內地電動車製造商比亞迪終於開發了全球首台純電動雙層巴士，並趁國家主席習近平訪問英國期間邀請試車同安排簽約。該款比亞迪純電動雙層巴士設有空調，每次最多可運載乘客81人，充滿電後可行走190 英里，每次充電只需4 小時。比亞迪之前與英國最大的客車製造商亞歷山大丹尼士（Alexander Dennis Limited, ADL）合作過純電動單層巴士，比亞迪提供電池技術和底盤，而ADL則負責製造車身，今次再進一步，成立合資公司開發電動雙層大巴，金額達65億人民幣，可謂強強聯合。 Ray 投身傳媒工作多年，由市場研究做起，一直與公關、廣告、新聞界結下不解緣，心境永遠青春。

亞視新聞王子重出江湖

2015-10-22

亞視賣盤成功後，大老闆亦銳意革新，重點之一自然係新聞部，據聞，亞視有意搵番有新聞王子之稱嘅鄧景輝(Kelvin)出山做主播，以壯聲勢。Ray就此事致電Kelvin問個究竟，佢沒有否認此事，仲話電視行業有多一些競爭係好事，如果搵佢，佢會認真考慮。其實Kelvin係由亞視一手培養嘅男主播，有唔少粉絲，佢自2000年離開亞視後去了營商，發展不俗，但始終對幕前工作有份情意結，期間主持過港台「議事論事」及不同類型清談節目，屢經磨練，如果今次成事，希望令亞視新聞有脫胎換骨表現，本地新聞界更加熱鬧。講開Kelvin，好多人唔知，其實佢係美國華盛頓大學University of Washington UW畢業，是少有浸過鹹水，仍然願意長期投身傳媒行業的資深電視新聞主播。就算唔做幕前，佢而家仍然在DBC數碼電台開咪做節目同報新聞，Ray久不久亦在數碼電台對面的演藝學院餐廳碰到Kelvin食早餐，而且發覺呢位老友仍然十分著重身體健康同身形，每次都係食粥居多，反而西式早餐好似豬扒、牛扒就唔使預佢，始終做慣幕前，著重形象亦相當合理，抵佢「襟撈」嘅。 Ray 投身傳媒工作多年，由市場研究做起，一直與公關、廣告、新聞界結下不解緣，心境永遠青春。

<
1
...
45
46
47
48
49
>

/136

新聞搜尋



	至

C觀點