Ray手記 - Ray
2015-11-18

紙媒雖吹淡風,但免費報紙仍算站穩市場,廣告收益微升。不過,Ray最近頻頻聽聞有人話am730已經冇錢賺,講到實牙實齒咁, Ray於是找am730頭頭問個明白,盧社長聽後哈哈大笑,話自從兩年前將花紅制度由一年分2次改為一年分4次之後,公司財務狀況應該比前更透明,因為每季分多分少係同業績掛鈎,佢話其實自從報紙在創刊第23個月賺錢開始,從未試過無花紅分,同事都好清楚,C觀點亦分享過幾次有關分紅制度的好處。相信am730的讀者,亦對3-3-3制有一定的認識,即在公司有盈利的時候,三分一分予員工,三分一給股東,三分一保留作長遠發展。 佢仲隨手將手機中一幅相片給Ray看,是一名發行部組長在派第3季花紅給派報員前拍下的照片,原來佢地每次派花紅利是時都會將現金(呢一季是250元)放在透明膠袋內,再附加一張寫有鼓勵語句嘅打氣紙,非常醒神,相中右上角是頭3季嘅打氣紙設計,以春夏秋為題串連起來,還差第4季就集齊一個四季小全張了,真的頗有心思,去年就用梅蘭菊竹。 盧社長又透露,派報員花紅計法同一般全職員工不同,係按公司盈利表現而派多或派少,金融海嘯等低谷時都未停派過,今季派得也不算差。Ray亦覺得惡意流言本來不值一哂,惟希望其他同業如果有錢賺,亦不妨與工作人員分享下盈利。 投身傳媒工作多年,由市場研究做起,一直與公關、廣告、新聞界結下不解緣,心境永遠青春。

2015-11-17
2015-11-13

平板電腦近期競爭激烈,科技版行家試機都試到手軟,仲未玩到盡,昨日又到Microsoft Hong Kong宣布Surface Pro 4正式來港發售。記者會上,除了照常有體驗區,同場仲請傳媒猜猜部機有幾薄、有幾重,不過,唔係用一般度量衡單位嚟度,而係估佢等於幾多個一蚊銀咁厚,同埋幾多個蘋果咁重,唔好會錯意,係食得嘅蘋果喎。   Ray記得,上一代Surface嘅發布會,已經試過將部機同食得嘅蘋果一齊秤,擺明係玩幽默,唔怕貨比貨。今次新機出街,對手的新機又啱啱開售,咁蹺都係平板電腦外加keyboard嘅2 in 1兼可配埋支筆,教主在生時明明話咗唔用筆,依家又成套裝備咁似Surface,Microsoft又點會唔趁機揶揄下。 今次新機發布會上,Microsoft Hong Kong一哥、總經理鄒作基就話做晒survey,調查對象仲要係亞洲的Y世代,發現當中17%已經有2 in 1裝置,而且有22.5%計劃今個季度節日假期購買一部全新的2 in 1裝置。鄒作基話,證明佢哋當初設計Surface的理念無錯,仲笑笑口講多句:所以依家見到有競爭對手都有抄,但係抄到一半,抄唔足。 會後,Ray問鄒作基對於大家差不多同期出2 in 1嘅平板電腦,會否擔心被搶去市場?佢話,應該倒過來講,之前我哋出Surface Pro 3時食咗人哋嘅market share,佢仲提供數據話該部機去年銷售額達36億美元,上季度(7至9月)的收入更較前一季增長100%。到依家出新機,他亦預見好兆頭,因為在香港推出的預購優惠,發現雖然高階機種售價較高,但仍大受客戶歡迎,當中用Intel Core i7處理器的已經一早訂晒啦! 投身傳媒工作多年,由市場研究做起,一直與公關、廣告、新聞界結下不解緣,心境永遠青春。

2015-11-12

諗起《城市論壇》就自然會諗起佢嘅、前主持人謝志峰,退休之後抖咗幾個月,靜極思動,又開始佢嘅金牌金持人生涯,不過今次由大氣電波走入數碼廣播,做數碼電台峰煙節目。由下周一起,以後逢周一至五的放工時間就會聽到佢把聲。 多年來,謝志峰最擅長控制大場面,就連語不驚人誓不休的議員、維園阿伯,一樣俾佢治得貼貼服服。今次加盟數碼台主持《DBC 主場》,佢一樣選擇與人民對話,「初時構思係兩個主持人做節目,搵啲嘉賓上嚟傾吓偈,但我覺得,一定要同聽眾建立關係,至會有多啲人聽節目,所以決定做phone-in。我知道數碼台現在最多司機大佬聽,所以我嘅第一服務對象梗係各個道路網絡嘅司機大佬啦!先鞏固現有,再慢慢打開市場,第日請唔同嘉賓上嚟,都會照顧唔同政策同層面嘅聽眾。」 新地方固然不及以前香港電台入晒屋、人人識,不過謝志峰充滿信心,同Ray話「我反而好樂觀,唔一定要有個數碼收音機至會聽我個節目,仲可以喺電腦手機一樣收聽到,路係人行出嚟,我個座右銘就係:鼓起餘勇,繼續奮進。」至於到時會請哪些嘉賓上來,謝志峰話同佢做城市論壇嘅心態一樣,最hit最有話題嘅都會請,話之係建制定泛民。 原來喺未退休前,數碼台已經俾謝志峰的個人魅力吸引到,Mark實佢退休之後一定要過嚟DBC幫手。即使前一排數碼台曾經出現裁員潮,依然無損要找謝志峰過檔的意願,第一時間致電他穩定軍心,講到明絕唔會影響之後的合作計劃。 投身傳媒工作多年,由市場研究做起,一直與公關、廣告、新聞界結下不解緣,心境永遠青春。

/136



C觀點

中原城市領先指數

廚神

旅遊