美劇狂人Mi - Yumi Ng
2016-03-29

每個家庭都總有一隻黑羊,為家人帶來好多麻煩,是以以家庭做重心的戲劇,最鍾意就是塑造一隻黑羊角色,甚麼戲劇衝突就由此而來。所以最初開始煲《Bloodline》,一開始就講家族那隻黑羊回家的古仔,我覺得係幾cliché下。 故事以科羅拉多一處度假勝地Keys為背景,老爸Robert Rayburns白手興家,經營度假酒店45年,當地政府表揚其對社區的貢獻,將其中一處景點以命名為Rayburns,所以自小離家的大仔Danny,就要返來出席慶祝;做警察的二仔John最生性,婚姻美滿,成為全家的模範;三仔Kevin事業無成老婆又要跟他離婚;孻女Meg法律系高材生,幫老爸管財政,看似最受寵愛。   暗藏殺機 成個盤開出嚟你以為睇緊笑聲笑聲滿載溫馨的《真情》,但套劇一開首就flash forward預告二仔殺大仔的畫面,美滿溫馨表象底下暗藏殺機,大仔就係成個屋企嗰隻黑羊,每次回來都帶俾屋企好多麻煩,問屋企攞錢,又爛飲又濫藥,每集講少少咁慢慢鋪陳二仔殺兄,但此劇的觀點,又唔係一面倒偏向二仔,同時又有好多backstory講番大仔點解會變成屋企的outcast,還有兄妹各人之間的dynamic,靠flashback透露家族一段深藏的悲劇,中間又加插當地偷運人蛇及販毒集團的勾當,外憂及內患一步步將這個家庭表面的糖衣撕開,走上無法挽回的絕路。   悲劇套路 呢種好典型的悲劇套路,雖然係拍得好細緻好立體,但實在唔算甚麼前無古人後無來者咁巴閉,外國有啲劇評激讚此劇係Netflix最佳原創劇,甚至比《House of Cards》、《Narcos》還要好,我就不敢苟同,不過套劇的主旨講「We’re not bad people,but we did a bad thing」,的而且確係非常relatable的,就算係十惡不赦的壞人,心底裡都可能會覺得自己唔壞,不過係或多或少做咗啲壞事之嘛! 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-03-18

一口氣睇完精采番嘅《House of Cards》第4季,仲喺度回味當中,呢個禮拜啲新劇相對就乏善足陳,都話好奇心會殺死貓兒,知有新劇上,總會抵不住頸試一試菜,若果係好嘢當然有種先拔頭籌嘅滿足感,但瀨嘢起上嚟都幾氣餒,搞到平時追開嘅煲唔切,好鬼唔抵。   真係凶兆《Damien》 冇番咁上下年紀都可能唔識呢套鬼片經典《凶兆》,原來今年係《凶兆》面世40周年,為咗紀念呢套經典,A&E就籌拍《Damien》,仲係由《The Walking Dead》其中一位監製Glen Mazzara負責開發,好自然有少少期待,可惜瀨到一褲都係。 劇情講男主角正係電影中俾邪靈上咗身嗰位小主角Damien Thorn,長大成人後對童年發生過嘅事一概失憶,仲做咗戰地記者,喺舊城大馬士革採訪時發生炸彈襲擊,發生一連串怪事勾番起部分模糊嘅童年回憶,跟住返回紐約追查自己身世,同佢接觸過嘅人統統慘遭不測,第一集結尾就以佢發現自己頭殼有666三個數目字結束。劇情發展平鋪直敘,氣氛營造又例牌,驚嚇度係零,拍到咁渣真係對原作嘅侮辱,我真係無眼睇落去,奉勸各位都係無謂嘥時間。   自欺欺人《Flaked》 Netflix又有新劇上,仲要係由評價甚高嘅《Arrested Development》男主角Will Arnett身兼監製、編劇、主演三職,又係睇來頭猛來追,點知Netflix都有失手時。套劇講男主角10年前醉駕車死人,(想)洗心革面重新做人,仲當上戒酒輔導小組(Alcoholics Anonymous)組長,開一間爛溶溶無人幫襯嘅家具店,沒有一段關係能認真持久,老死心儀嘅索女佢又啱feel卻又死口不認,總之性格充滿缺點;其實主角不是完人好多時唔係問題,而且仲係戲味劇力的泉源,但呢齣我睇咗兩集都無法relate to,致命傷係男主角自欺欺人,佢身邊班老友角色以致女角們都比佢討好,睇住佢左瞞右瞞實在有點噁心,都係行人止步好啲。 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-03-11

 《紙牌屋》(House of Cards)3月4號第四季回歸,上季劇情好messy,好多位去得太過不合情理,雖然仍能叫觀眾眼睛黐住螢幕睇到尾,但一路睇一路鬧的不少;今季我用咗三晚煲晒13集,可以無慮同大家講,今季堅回勇,整季plotline我得一處唔滿意,但如果唔咁樣處理,下半部嘅劇情又無辦法進展落去,實在好糾結。 兩公婆大鬥法 我盡量唔劇透,因為穿咗橋大家又未睇的話,即係叫你唔好睇我寫乜嘅啫。上季最大的cliffhanger是Claire(Robin Wright飾)要離開Frank Underwood(Kevin Spacey飾),今季上半部劇情就是要化解這個危機。呢對power couple如果唔結盟變仇敵,Frank嘅連任大計肯定凍過水,睇住呢兩公婆大鬥法,係幾賞心悅目的一回事,劇情中段發生大轉折,令二人又走番埋一齊(唔算劇透,我話佢哋從此各行各路你都唔信啦),呢個轉折好關鍵,令到下半部劇情可以好合理地展開,但這個轉折來得太方便了,編劇係有少少懶,整季唯一要詬病嘅位係呢點,相對上季咁多bugs,實在好難得了。   現實vs 虛構 下半部劇情兩公婆強勁對手出現,對家共和黨嘅總統候選人Will Conway(Joel Kinnaman飾)乃現任紐約市市長,靚仔、愛國(服過兵役)、家庭美滿(老婆靚、有兩個可愛小朋友),正如Claire所言,「全美國人都愛上他們」,但Frank同Claire呢對腹黑夫妻又點會咁易服輸,Frank一句「We will destroy them」未夠心寒,Claire接住話「Yes,we will」先至凍到入骨。有次我喺面書睇到有網友話「唔明啲人點解鍾意睇政治劇,睇輕鬆一啲嘅唔好咩」,實在太天真,你以為唔睇唔聽,政治就唔存在,虛構嘅劇情就係base on現實而來,虛構嘅頂唔順,活在恐怖過虛構萬倍嘅現實當中,卻甘之如飴。   夢魘成真 編劇Beau Willimon今季能收復上季嘅失地,最精采嘅地方係將第一季嘅loose end勾番出來,Frank害死嘅冤魂喺今季返回來haunt him,並唔係夢魘咁簡單(visual上的確係,而且處理不俗,有點《Hannibal》的感覺),而是真正嘅backfire,絕對有力將呢對邪惡夫妻繩之於法。呢條線喺季尾引爆咗,會爆成點要等下季了,最可惜是下季Beau將會離隊,全劇嘅大腦離開,水準能否保持冇人知,但全球唔知幾多個百萬已洗濕咗嘅頭,點都會按時按候繼續洗,係咪? Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-03-04

上個禮拜掛住追番幾套奧斯卡提名電影,美劇就擺埋一邊煲少咗,而且呢排啲新劇都係做咗兩、三集左右,仍在鋪墊階段,仲未進入狀況,講唔上十分精采,唯有蜻蜓點水,係咁意講吓。 主角唔使好人但要真 《Vinyl》今個禮拜去到第三集,我作為觀眾仍然未投入到主角嘅世界裡,編劇雖然極力寫男主角Richie Finestra幾咁熱愛音樂,有對超乎常人觸覺嘅music ears,但佢為咗上位向上爬,中間做咗唔少陰質事:置朋友不顧、獨裁專橫、自我膨脹,編劇Terence Winter以往作品嘅男主角,雖然都係性格充滿缺點嘅人物(《The Sopranos》嘅Tony、《Boardwalk Empire》嘅Nucky),但就係寫得有血有肉,觀眾明知係壞人,但仍然會invest到;so far到第三集,我仍然未感覺得到男主角係一個真人,外國有劇評人甚至話繼續咁發展落去,因住《Vinyl》會成為HBO史上少數嘅爛劇添,真係幾大鑊。   慢鋪出細貨 反之,《The Night Manager》第二集就戒咗首集嘅冒進急躁,用咗整整一集鋪墊男主角Jonathan如何去取得表面係慈善家、實為跨國走私軍火集團頭子嘅信任,劇情推進放慢咗,有多啲具體細節嘅描繪,將主角嘅背景一步步帶出來,整件事就立體可信好多,亦能讓觀眾投入,為主角嘅安危擔心。這劇嘅production value亦好高,兩集下來已經分別喺埃及、西班牙、倫敦、瑞士取景,好有跨國諜戰片氣勢,電影感好強。   平淡時空旅行 改編自史提芬京同名小說,佢自己亦有份落場監製嘅《11.22.63》,第二集仍然在鋪墊階段,講男主角時空旅行返回六十年代,想改寫已故美國總統甘迺迪遭刺殺嘅歷史,大橋聽落都吸引,但兩集下來拍得平平無奇。男主角James Franco演出我覺得一般,反而配角比較搶鏡,男主角嘅love interest今集亦出現了,呢位女演員Sarah Gadon幾省鏡,喺目前仍然平淡嘅劇情當中,算係有番少少亮點。 Yumi Ng 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-02-26

呢個禮拜有新劇出有舊劇返,《The Walking Dead》第六季下半部回歸咗,追劇追得吃力,睇唔切,所以今次將幾齣新舊撈埋一齊講,炒雜碎難免冇乜營養。 愛情小品《Love》 Netflix新劇《Love》創作人Judd Apatow寫都市愛情小品耍家,加上Netflix出品金漆招牌,點都要「碌碌」。男主角喺片場做補習老師,因為荷李活好多童星,為免佢哋學習追唔上進度,片場長駐老師幫童星溫習。呢個設定幾得意,男主角梗係電影發燒友,朝思暮想佢寫寫埋埋嘅劇本會有製片賞識;女主角則喺電台做producer之類,即係打雜,有食大麻習慣,成日stone到混混沌沌。男女主角都剛剛跟前度分手,一次偶遇將兩個性格大纜扯唔埋嘅人拉埋一齊。睇呢類小品,最緊要人物性格可愛討好,能夠將後生仔女的處境煩惱,寫得到point就已經睇得下,咁《Love》係做到嘅,不過追看意欲就比較低,我睇咗三集就停咗。    間諜鬥智《The Night Manager》 BBC新劇《The Night Manager》改編自John le Carre於1993年的同名暢銷小說,卡士都唔錯,有雷神細佬Loki(Tom Hiddleston)及《House M.D.》Dr. House(Hugh Laurie)。講Tom飾演嘅退伍英軍男主角係酒店夜班經理,時值2011年「阿拉伯之春」發生期間,發現英國大慈善家(Hugh飾)黑市販賣軍火予埃及的有勢力人士,之後成為英國情報機關的線人,合力將黑幕搗破的故事。我睇咗首集,氣氛營造算唔錯,不過劇情推進有啲太快太急,幸好男主角演出討好,Tom Hiddleton個樣亦正亦邪,演一個看似平凡的酒店經理,卻願意身陷險境收集情報,係一個幾有層次的角色,佢演來幾稱職。    衰收尾《The X-Files》 回歸迷你季全六集播完,呢集大結局真係惡睇到不能,最後又係人口滅絕計劃呢類老掉牙的陰謀論調,外星人擄拐地球人做實驗、將外星人DNA移植到人類身上,透過破壞人體免疫系統,以爆發瘟疫及不明病變將人口滅絕,呢一切陰謀又係歸咎神秘吸煙男係幕後黑手,世衞或美國疾控中心束手無策,但無理由咁大壇龍鳳完全缺乏美國政府高層介入嘅描寫,連一個CDC記招鏡頭都無,好冇真實感。     重現華荷《Vinyl》 《Vinyl》第二集立即跌watt,主力講男女主角之前相遇經過,著力描寫男主角老婆曾經係好有潛質的攝影師,連Andy Warhol都留意她,覺得她是可造之才,最終她卻揀了相夫教子,由璀璨回歸平淡。我唔知女主角呢條線同劇集主線最終會有乜嘢交疊同映襯的作用,似乎今集就係用佢嚟帶出Andy Warhol同The Velvet Underground & Nico呢場戲,因為真實人物俾大家嘅印象太深刻了,今集連Karen Carpenter都出埋,但總覺得點扮都唔似,實在影響觀影樂趣。   終於……《The Walking Dead》 《TWD》下半部回歸首集,阿Rick同Michonne終於錫錫了,基本上二人嘅chemistry由day 1儲到家陣,都係時候一嘗shipper的心願,編劇好識做呀! Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-02-23

上星期日晚首播的《Vinyl》長達兩小時,基本上是一齣電影,好濃縮、好多事發生。以1973年紐約的punk rock scene作為背景,馬田史高西斯親執導演筒,如預期中deliver到一個充滿sex、drugs & Rock ‘n’ Roll的世界,我不是特別要唱反調,但史高西斯喎!對大師的期望當然不近人情地高,要surprise us才合理。   戴番頭盔先,以史高西斯+Terence Winter(《The Sopranos》、《Boardwalk Empire》)這個金牌組合,還有Mick Jagger首次做監製,故事內容不用擔心貧瘠失實,製作水平亦超晒班,兩個小時首播集應有盡有:背景營造、燈光布置、人物造型、服飾、音樂,全部一絲不苟恰如其分,沒有可挑剔的地方,我卻嫌每分每秒畫面都充斥著對白、音樂,叫人沒有思考喘息的餘地,可能這種急劇的節奏是有深意的吧,Punk rock本身就是憤怒、反建制、爆炸性、極具破壞力的,或許史高西斯覺得,非要這樣處理不可。   蒲友的音樂事業 男主角Richie Finestra(Bobby Cannavale飾)是唱片廠牌American Century老闆,基層出身,做過酒保等低下層工作,熱愛音樂,卻沒有當樂手的才華(他自己說的)。劇集一開首就以他將車泊在暗角向街邊的dealer買可卡因開始,一連串鏡頭拍他像驚魂未定,但急不及待馬上在車上「開飯」,用來   粉的是兇案組探員的卡片,他遲疑一下終於鼓起勇氣撥通這個電話(原來七十年代美國汽車內係裝有固網電話的),鏡頭一轉成班「依嘩鬼叫」的蒲友,又跑又跳踩上車頂走過,街角對面那間叫Mercer Arts Center傳來轟耳欲聾的音樂(New York Dolls早期作品《Personality Crisis》),男主角不能自控地離開車廂,跟住班蒲友去了。    戲劇化的音樂史 這個opening scene拍得點題到極,也引人入勝,將虛構的人物(男主角)無縫糅合在真實(Mercer Arts Center及New York Dolls)中,接住帶出男主角的唱片生意瀕臨倒閉,為挽救事業,導致一連串無法逆轉的後果。第一集就已經有Led Zeppelin(當然由演員扮的)出現,劇情講男主角想以簽到Led Zeppelin,公司就有救,故事講到似層層,明知呢一part不是真實發生過,作為樂迷也已樂不可支。  編劇以假作真,在真假穿插間帶來無限浮想空間及趣味,還有米積加個仔James Jagger粉墨登場演出一角,飾演虛構樂隊Nasty Bits主音,外形討好瘦掹掹似足band仔,卻靚仔過老竇好多,初試啼聲演出及唱腔都有板有眼,立即俘虜了我這個小劇迷(我認我膚淺)。 兩小時劇情中還有許多小節饒有趣味: *男主角老婆對他說:「You can’t always get what you want。」,係滾石樂迷一聽就會心微笑。 *男主角對住公司班A&R破口大罵:「你哋知唔知出面啲人點樣笑我哋?American Cemetery!簽邊個死邊個!」 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-02-12

現實比小說更離奇,所以當FX會將90年代轟動一時的「世紀審判」、O.J. Simpson案搬上螢幕時,基本上所有劇迷都會屏息以待,當然我不例外;看了本月2號首播一集,個頭開得非常好,只是睇咗一集我都會瞓身推薦,執筆之際第二集也見街了,卻沒有心情看,這個農曆新年香港發生甚麼事大家自己都親身經歷,也都各有感受,我一介小民無辦法疏理好脈絡,我淨係覺得,大部分香港人(班高官權貴例外)都是政府各式各樣制度暴力下的受害者,你叫我pointing fingers at邊個邊個,我實在做唔出。    種族衝突陰影籠罩 這裡是劇評不是時評,但當兩位師徒關係的黑人律師於這單案,一開首就處於控辯對立位置,辯方律師作為控方檢控官的師傅,幾乎語帶命令式的叫徒弟「choose a side」,個心立即寒一寒,編劇功力深厚,開頭短短幾分鐘,藉一場對手戲就為劇集定調:劇集要重現的不僅是這單世紀大案,到底O.J.是否真是殺人兇手亦唔重要,而是從90年代至今,美國的種族衝突及矛盾,仍然cast a shadow on我們如何看待及追求真相;以致這位資深的黑人辯方大律師,可以未審就要求他的徒弟歸邊。作為律師,作為司法系統的重要一環,不是理應揀定了司法公正獨立這一邊嗎?難道因為O.J.是黑人,就算他是殺人兇手,都要掩埋雙眼視如不見?   編劇克制處理有度 O.J.這單案審結至今已經成廿年,作為遠在地球另一方的小劇迷,我印象非常模糊,最初這劇公布製作名單時我還好有保留,因為製作人Ryan Murphy(《American Horror Story》、《Nip/Tuck》)出晒名煽情灑狗血,但首播一集由他親自執導,卻處處顯出克制,慢慢build up卻又能夠牽引觀眾的情緒,我相信美國觀眾肯定對事件記憶深刻過我好多,明知O.J.今日仲生勾勾響度,但當劇情講到發現他意圖自殺寫緊遺書時,仍然會倒抽一口涼氣。我一路睇一路對比各個角色同真實人物有幾神似,好明顯編劇已經成功收編我呢位小觀眾,據美國不少劇評人經已睇咗6集得來的叫好評價來看,《ACS》就算爛尾,至少個過程都worth your time。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-02-04

第一集有點捱,第二集漸入佳境,《The X-Files》回歸第三集,終於叫人有拍爛手掌的衝動,我都唔想個個禮拜都講Agent Mulder & Scully,搞到好似呢排劇集乏善足陳(實情係有少少),但呢一集既向經典致敬,笑中有悲,最後又回歸母題,環環緊扣,如果餘下三集都有此水準,Fox冇理由唔添食,兼夾全球fans都唔肯過佢。 怪物襲擊人類 Mulder同Scully於這集接到單疑似怪物襲擊人類的case,Mulder起初緊接住頭兩集的懷疑情緒,經過多年好多舊檔案的疑團經已水落石出,不少同外星人其實無關,Mulder因此否定自己,反而Scully好似跟Mulder調轉角色,覺得係咪徒勞都好,至少係查案過程中好有樂趣。接住點都會爆少少劇情,唔想被spoil的讀者最好就此打住。  人類的荒誕 呢單新案turn out發現被襲的不是人類,反而是那頭類似蜥蜴的「怪物」,最正係這頭怪物被襲後竟然變成人類,焗住要過人類的生活,短短幾日就參透人生的無常。Mulder同怪物的一段對話好精采,怪物話做人真係好鬼荒謬,又要打工供樓又要儲錢退休,日日無事忙都唔知為乜,短短幾日的人類生活經已叫怪物想死,仲叫Mulder一槍打瓜佢了結生命好過,Mulder給他一言驚醒夢中人,原來怪嗰個是人類自己。呢段戲簡直係樂極生悲,由一頭怪物總結人類的荒誕,編劇想帶出的譏諷訊息十分成功,幽了眾生一默。  我的莫探員 雖然呢集以Mulder為重心,但Scully有好多oneliners搶番不少鏡,好似「Mulder, the Internet is not good for you」、「Yeah, this is how I like my Mulder」,my Mulder呢句肯定叫唔少shippers聽到心花怒放,仲有原來Mulder個電話鈴聲係套劇嘅片頭曲,都係叫大家一睇莞爾的畫面。  《明日傳奇》惡睇 叉開話題講兩句《DC’s Legends of Tomorrow》,講到捱,呢套就真係幾捱吓,劇情小學雞唔在講,Hawkgirl同Hawkman兩個選角又唔討好,勁多情情嗒嗒對手戲,搵兩位省鏡啲嘅演員來做好唔好呀?家陣好惡睇,我估我都係行人止步,放棄。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-01-28

好了好了,講咗成年,《The X-Files》第十季終於回歸,於剛過的周日首播,首播推出後反應認真麻麻,但大家都有感情分,劇評人踩極都留番些少餘地,唔知點解FOX接住喺周一就播埋第二集,呢集整體來講,劇情推進及節奏的掌握好番好多,對白仲有不少自嘲位,叫劇迷個心都立即定番啲。 重現羅茲威爾 劇情就無謂講太多了,因為唔知大家睇咗未,第一集就開門見山,1947年著名的羅茲威爾事件重演,不明飛行物體墜落的場面實在不過爾爾,畢竟過咗成廿年,荷李活的CG特效可以幾天花龍鳳未見過咩,重現這些畫面係for old times’ sake理由多,也可能係第一集,編劇太想recall番大家的記憶,Agent Scully同Mulder爭吵間經典對白馬上如子彈橫飛,Scully一句「you want to believe」,Mulder立即應「I do believe」,我就覺得太生硬了,鋪墊不夠。  第一集也引進兩個新角色,一個好有錢的陰謀論者,話911是false flag operation,政府隱瞞真相等等,另一個角色則是一個年輕女子,多年來遭外星人擄走做實驗,甚至是借她的肚生外星混種B;這些其實都是陳腔濫調了,但這兩個角色一出現,就直接令到Mulder 180度急轉彎,推翻他一貫深信的,我也覺得寫得太急,難以令人入信。   外星人DNA 第二集的pacing就好番啲,講一個同國防部有合作的基因研究組織,進行秘密人體實驗,實驗對象仲要全部係兒童,從而帶出Scully同Mulder之前所生的兒子William。二人為了William的安全,不得不放棄撫養權,Scully母性大發,多年來的思念變成愧疚,再加上驗出自己體內有alien DNA,發惡夢已屆少年的William變成羅茲威爾;Mulder亦幻想自己同兒子一齊生活的情景,好明顯二人兒子這條家庭線會是今次回歸的主軸之一。  第二集亦有好多編劇自嘲位,好像Scully話自己old school,她的知識都是前Google年代學番來的,Mulder查案時給對方搶白話「The Truth is in here」,在在都是編劇幽自己一默的表現,我覺得OK喎,至少睇到呢兩個位我有笑。 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-01-26

都話《Critics’ Choice Awards》賽果比較正路,雖然北美影評人都係將「最佳劇集」,頒咗俾我覺得有點虎頭蛇尾的《Mr. Robot》,但「最佳喜劇」(《Master of None》)、「最佳Limited Series」(《Fargo》)、「最佳喜劇男主角」(《Transparent》Jeffrey Tambor),以及「最佳戲劇女主角」(《The Leftovers》Carrie Coon)等重要獎項,都係實至名歸。 1月下旬開始新劇陸續推出,首先跑出搶盡眼球的是Showtime的《Billions》,通過描繪兩個野心勃勃但角色對立的人物:精明、強硬的檢察官Chuck Rhodes(Paul Giamatti飾)和極具野心的對沖基金大亨Bobby’Axe’Axelrod(Damian Lewis飾),來講述關於財富、影響力和腐敗的問題。首播嗰集嘅opening極盡kinky之能事,為免劇透我唔講啦,等大家自己睇。   金融界的《豪門恩怨》 呢套劇我覺得好啱班搵食至上嘅香港人睇,當警世寓言咁睇都好。一個拜金、一個貪權,下一步就走不出人性的弱點:權力如何使人腐敗。劇情當然不是說教式的講金錢萬惡這一套,反正很腹黑,一心想跑贏大市的朋友們,還是返去看金股匯行情算了。爛番茄同IMDB都俾相當高分,相信係因為呢類劇種實在太少,之前有一套叫《Dirty Sexy Money》,短命劇得嗰兩季,以為係講財金界勾心鬥角的故事,其實不過是一套失敗的《豪門恩怨》。   冇個好人的劇集 劇集一開首已講白手興家的hedge fund king,成為美國檢察官頭號打擊人物,但檢察官的妻子卻又是該大亨集團核心要員,不是簡單white collar式商業罪案調查劇,對沖基金的內幕交易操作要幾黑有幾黑,偷拍跟蹤要脅恐嚇樣樣齊;但咪以為司法一方就好乾淨,檢察官的心計同城府都好深。 目前睇咗兩集,可以話成套劇無個好人,單就呢點我覺得夠真實喎,財金的世界,老好人只有給斬到一頸血的下場,我呢啲塘邊鶴企埋一邊隔岸觀戰算咯。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。  

2016-01-15

 《第73屆金球獎》最佳劇集:《Mr. Robot》(戲劇類)及《Mozart in the Jungle》(音樂及喜劇類),係咪實至名歸?唔…… 文:Yumi( iamyumi@gmail.com) 呢個禮拜冇乜新劇,我看了Fox的《Second Chance》首播集,故事設定吸引,如果有機會給你死後復生,再活一次,你會幹甚麼?這個前設實在有無限可能,但編劇似乎信心不足,慌死觀眾會悶,硬生生加入啲唔好笑的錯摸笑話,意圖乜都有啲來取悅觀眾,well,取悅唔到我囉,不過會觀察多一兩集嘅。   為何《Transparent》是喜劇? 既然冇幾可談新劇,講吓《金球獎》賽果。電影方面我不敢班門弄斧,《復仇勇者》攞晒最佳電影、導演同男主角我都覺賽果正常,但《火星任務》歸類為喜劇,哈,都真係幾好笑。同樣提名亂咁嚟嘅情況出現喺電視方面,《Transparent》被歸類為喜劇,套劇對性小眾及trans people喺社會及家庭中所受的歧視,描寫得好細緻深入,好多時都慘到笑唔出,你當佢喜劇咁睇,無異係送部劇去死啫,所以兩項提名——最佳劇集及男主角(音樂及喜劇類)均落空了,我好戥此劇唔抵。   《金球獎》的公信力 要罵今屆《金球獎》仲有大把。最佳劇集(戲劇類)由《Mr. Robot》奪得,獲得提名但落敗了的包括《Game of Thrones》、《Narcos》、《Outlander》同埋《Empire》,我明《Mr. Robot》講電腦黑客及敘事手法係有新意,但後半已開始有爛爛地尾收唔到科之感,仲係第一季咋喎,已經無以為繼,咁樣都攞到best drama?!而最佳劇集(Limited Series及電視電影),《Fargo》又輸咗俾《Wolf Hall》,贏嘅贏得不明不白,輸嘅又輸得莫名其妙。  仲有最佳女主角(Limited Series及電視電影類別)竟然由Lady Gaga奪得,唔x係下話,難怪連主持人Ricky Gervais都兜口兜面挖苦話贏唔使開心、輸咗唔使喊,畢竟金球獎係由一班唔夠100友嘅荷李活外國記者協會選出嚟,根本無公信力;我等睇今個月18號公布的Critic Choice Awards好過,至少呢個係由北美地區規模最大的專業影評機構The Broadcast Film Critics Association頒發的獎項,提名及評審都嚴謹好多。   Netflix首月免費睇 最後,點都要提吓Netflix終於到港,登記首月免費,梗係要試吓,登記手續及使用介面都超簡單,一讚;我用Apple TV睇,畫質OK高清無窒過,呢點係基本要求,唔使讚;Netflix自家製作的劇集當然夠update(除咗《House of Cards》,據聞係香港區版權問題),但其他網絡出品,放喺Netflix播的都唔係最新季度,呢點我面書朋友就狂罵,話咁樣訂嚟做乜,即係咁,呢個安排我理解喎,若果Showtime、AMC、CW等等有線網絡出品都擺最update嘅喺Netflix度播,咁邊個仲會去訂佢哋? 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-01-08

我發覺我有少少強逼症,作為2016年第一篇文同大家見面,梗係急不及待介紹新劇,整合名單之際,單係1月值得講的都有6、7套,我又想十全大補咁齊輯輯湊夠10套,呢樣唔係強逼症係乜?最終這裡只有9套,始終無謂濫竽充數,我可以實牙實齒咁講,呢9套我堅會追,因從牌面睇十分promising,至少會睇首播集先啦! 《Colony》(本月14日首播) 又有少少《Lost》班底,包括編劇Carlton Cuse,飾演Sawyer的演員Josh Holloway擔正,女主角係《The Walking Dead》阿Rick死鬼咗個老婆Lori(Sarah Wayne Callies),科幻劇種我至愛,似乎又係外星人侵略地球的古仔,其實單係劇名已估到,第一集講到地下反抗組織已成形,我睇咗,第一時間感同身受,點解?仲使問!  《Billions》 (本月17日首播) Showtime重頭劇講打金融大鱷的故事,卡士強勁,有《Homeland》的Damian Lewis演大鱷,《酒佬日記(Sideways)》男主角Paul Giamatti演檢察官,對於我呢類財經盲毛來講,涉及幕後操盤、內幕消息交易等金股匯東西,簡直如外星人語言,但呢類勾心鬥角財經劇種相當新鮮,Showtime已free咗首播集俾大家睇,我就肯肯定會追落去。  《War & Peace》(本月18日首播) BBC出品嚴格來講不是美劇,但俄國文學名著改編,又有靚女Lily James(《Downton Abbey》),miniseries一季全8集拍足兩年,於俄羅斯、拉脫維亞同立陶宛三地取景,場景逼真,服飾美指等都交足功課,睇咗第一集我完全收貨,係有點擔心拍到戰爭場面時會點處理,畢竟《戰爭與和平》喎,咁大堆頭巨著濃縮成8集,不惜工本呢下,無理由唔追。  《DC’s Legends of Tomorrow》(本月21日首播) DC Comics數部美漫改編劇如《綠箭俠》及《閃電俠》我都無追,劇評口碑都算不俗,作為姊妹劇兼集8位DC超級英雄的《明日傳奇》,再miss就真係講不過去,主角們都有些熟悉面孔,包括當年《Prison Break》靚仔男主角Wentworth Miller、06年Bryan Singer拍嗰套《Superman Returns》做超人的Brandon Routh,單為eye candy都睇得過啦。  《The X-Files》(本月24日首播) 講足一年,莫探員同霍探員真係返嚟啦,雖然只是試水溫的6集,只怕期望愈大失望愈大,但對於睇《X檔案》送飯的上一代電視迷來講,係童年回憶嚟㗎,有網友話就算係爛,都「I don’t care」,只要見到Agent Mulder同Agent Scully再一齊查案就好。Fox播出咗半小時製作特輯同大家熱身,唉,老實講,感覺係有伏味,David Duchovny同Gillian Anderson抵不過歲月洗禮,面露疲態,製作人Chris Carter講到興奮無比的特技場面,就咁睇不過爾爾,喺咁多不利消息籠罩下,唯一安慰嘅係,神秘吸煙男人冇死到囉!  《The Magicians》(本月25日首播) 單係改編自Lev Grossman的同名暢銷都市奇幻小說呢點,經已足夠吸睛,起用新人Jason Ralph飾演主角Quentin Coldwater,雖然有人話太老,但據外媒講演出稱職,特技場面同效果都nicely done,點樣都要試試菜嘅。  《American Crime Story:The People Vs. O.J. Simpson》(2月2日首播) 老實講,我對於Ryan Murphy繼《American Horror Story》後染指人物自傳兼是轟動一時的O.J. Simpson大案,應該又係大灑狗血的作品,《AHS:Hotel》仲未播完,但劇情已經亂來,Lady Gaga唔識演戲只能做自己的弱點也已表露無遺;今勻玩到咁大,事件咁有爭議性,又睇吓佢會點樣亂扯一通。加分位反而係選角,唔單止主角O.J.,各個角色造型同真實人物相比都有幾分神似,睇落投入感會大好多㗎。  《Vinyl》(2月14日首播) 幕後班底強勁到不行,編劇是《華爾街狼人》、《The Sopranos》、《Boardwalk Empire》的Terence Winter,有馬田史高西斯同Mick Jagger(!)做監製,講一位七十年代於音樂圈呼風喚雨唱片監製的故事,可以想像米積加一定提供咗好多故事靈感同養分,單係呢點已不能不睇。  《11/22/63》 (2月15日首播) 史提芬京都算係荷李活影視劇本的豐富來源,佢又嚟啦,今次係呢套2011年同名小說,講一個英文教師通過時間旅行想改寫JFK被刺殺的歷史;監製係大家都熟悉的J.J. Abrams,男主角係James Franco,單係撻呢幾個名嘅朵,就算係電影都會買飛入場啦,何況係電視? Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。  

2015-12-31

本文見街之日應該是大除夕,2015年最後一day,正路應該展望2016有甚麼值得興奮期待的新劇,不過我諗,不好好回顧過去,又怎能展望將來?何況一年流流長,要講新劇大把時間講,趁這一年將盡的時刻,我又來個年尾盤點,要清一清自己的美劇checklist,以下係入唔到個人十大list又停咗成季無追的美劇,但我仍然覺得值得追番;新劇,留番下年先講。 1.《The Affair》第二季 故事大綱幾cliché下㗎都,懷才不遇想做作家的男主角,只能屈就一個中學教席,不知是幸或不幸,娶了個有點家底的老婆,生活看似平淡是福,心底卻一直對自己要依賴富貴的岳父耿耿於懷。女主角是任職長島小鎮餐廳的女侍應,年紀輕輕卻已經歷喪子之痛,跟同樣後生但疑似有虐妻歷史的老公婚姻問題多多。男主角舉家到長島放暑假,與女主角相遇一撻即著發生婚外情,陳腔濫調的情節就因二人涉及一宗命案而扭轉,二人盤問環節將每集分成兩部分,由男女主角各自表述,就同一角色同一事件要演兩次,情情塔塔演變成懸疑命案羅生門,he says she says各執一詞,觀眾就從中找出破綻,一路睇一路估,劇集就變得有睇頭得多。   2.《Homeland》第五季 講反恐講政治,一定是話題作,我想美國觀眾都係幾政治性的動物,基本上這一類劇種都會掀起熱潮。回想11年首播到第三季,此劇都是獎項大贏家,女主角Claire Danes連續幾屆贏視后,但到了第四季,唔知係劇組定係做觀眾嘅我疲態畢現,其實應該係貪新忘舊,喺新亮點面前(《House of Cards》?)大家嘅眼球就咁遭吸過去了,《Homeland》聲勢大不如前,但點都好,這劇製作嚴謹、劇力也逼人,到第五季依然係不少劇評人心目中的十大,無論如何我都會有始有終,追番佢嘅。  3.《Hannibal》第三季 作為《沉默的羔羊》前傳的電視版或spinoff或乜都好,任何有關Dr. Hannibal Lector的古仔,係電影電視迷都唔應該錯過,頭兩季我係坐定定每個禮拜準時收看,其實兩季水平都相當高,劇情懸疑影像奇詭,配樂又正,兩位男主角都是好戲之人,因為此劇實在太intense了,每每看畢都有唞不過氣來的感覺,不知怎的第三季開播時沒跟上,諗住等它完結便一氣呵成的追回來,點知Showtime已決定取消,第三季已是它的句號,我仲未睇實在欲評無從,通常劇集腰斬或取消的消息都會影響我繼續煲的意欲,但我對此劇創作人Bryan Fuller有信心,應該不是因為爛尾而被斬,是因為口味太偏收視不理想而被斬吧。   4.《The Americans》第三季 講八十年代美蘇冷戰格局的間諜劇,當時的蘇聯仍未解體,故事主角是兩個前蘇聯間諜喬裝成夫妻,在華盛頓郊區收集情報,一方面華盛頓海量的情報都由他們經手,工作的壓力危險不能讓兩個無知的孩子知道;另一方面FBI探員裝成平民搬到主角夫婦隔壁定居,對其展開調查;主角二人也假戲真做發生感情,男主角更開始愈來愈適應美國人的生活和思維方式,從而帶出一連串對國家效忠、對身份認同的詰問。此劇可觀之處,是存在大量的灰色地帶,KGB間諜不是百分百的壞人,他們也有真情流露的一刻,也對自己本來的信念深信不疑,在劇情推進中,南轅北轍的價值觀所產生碰撞同衝突,就是劇力所在。   5.《The Mindy Project》第四季 我的劇集清單好像很少喜劇,其實我都有看,經典的《Friends》、《Sex & The City》唔在講,仍然在播的《The Big Bang Theory》我都睇到第七季,但已停;反而這套《The Mindy Project》我仍然有心想keep住,女主角是印度裔演員Mindy Kaling,她自編自演,其實不少喜劇都是一人身兼編演的角色,男的有Louis C.K.,女的有Amy Schumer,而Mindy Kaling的喜劇感及對人情的洞察,都係幾獨到的,加上劇中幾位男角的喜感都相當不錯,係睇得過的。 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2015-12-24

年尾結算時候,總係有好多Top 10排行榜,IMDB、爛番茄兩個我係必睇的,其次如indiewire、A.V. Club、《紐約時報》等十大電影電視排名我都「lun」晒,當然有一定參考價值;我都不能免俗,梗係要整番個 2015個人心水電視劇十大啦!先旨聲明,我睇得好少docu同喜劇,所以呢個榜清一色係戲劇種類㗎咋! 1.《Games of Thrones》第五季 去到第五季終於同同名小說同步,無得再估劇情啦,雖然幾季下來有起有伏,但係今季令人難忘嘅場面依然有好多,好似White Walker來襲、Cersei全裸示眾遊街、Jon Snow唔知真死定假死的最後一幕;煲劇唔煲《GoT》,真係唔好同我講你係美劇迷。 2.《The Walking Dead》第六季 冬休前播出咗前半部,頭幾集鋪墊元老角色Glenn疑似命喪喪屍群噬,成功引起萬千電視迷鬼哭神嚎,玩咗咁多季爛肉zombie,仍然可以成功牽扯我哋呢班電視迷神經,梗係要俾佢入三甲啦! 3.《Mad Men》第七季 《Mad Men》的結束,簡直有一種the end of an era的感覺,創作人Matthew Weiner從五十講到七十年代美國廣告界興衰、側寫整整兩代美國社會、文化的滄海桑田,嗰份人文情懷同氣息,我喺其他美劇中真係未見過,就算今季絕對算不上最精采,點樣我都要擸佢入我名單之中。 4.《Sense8》第一季 是《Matrix》導演姊弟檔Wachowski首部電視劇,科幻題材就梗㗎啦,講世界各地有8個人無啦啦有咗心靈感應之後發生的一連串怪事,我好鍾意個平行發生的storytelling,鏡頭移動同埋配樂都好飄吓,有種奇特的科幻詩意。 5.《The Leftovers》第二季 又係科幻劇種、又是名牌編劇,我之前都專文推介過,科幻面心靈救贖底的古仔,係heavy咗啲,但我鍾意一路睇一路有嘢諗,唔會白白過咗嗰45分鐘。 6.《Deutschland 83》第一季 83年東、西德仍處於冷戰格局的諜戰故事,唔係玩大堆頭火爆動作場面,好多爾虞我詐心理戰術,同埋資料搜證做得好足,好有實感。 7.《Orange is the New Black》 第三季美國女囚生活踏入第三季,白人女主角的嘮叨不休雖然開始叫我生厭,但看點仍然是獄中形形色色的黑人女囚眾生相,往往叫人忍俊不禁。 8.《The Knick》第二季 Steven Soderbergh + Clive Owen這孖導、演金牌組合,透過一位放浪形骸(毒癮甚深)的名醫講上世紀二十年代的現代西方醫學發展史,無論題材、拍攝風格同演出都走偏鋒,啱啲食得偏的朋友。 9.《Fargo》第二季 改編自高安兄弟同名電影,單係呢個牌面就要追啦,估唔到電視版一樣咁出色,睇啦。 10.《The Man in the High Castle》 第一季 呢套我之前亦推介過,講平行歷史,若然二次大戰戰勝的是納粹和皇軍,併吞兼將美國瓜分,這個世界是如何模樣?單係這個前設足夠叫我坐定定睇晒一季,結果也沒叫我失望。 Honorable Mentions 漏網之魚梗係有啦,好似講變性家長的《Transparent》、反英雄講黑暗面的《Marvel's Jessica Jones》、講少數民族處身Big Apple的《Master of None》、《Breaking Bad》衍生出來的《Better Call Saul》、講兩性關係說得不落俗套的《Catastrophe》、講八十年代美蘇間諜戰格局的《The Americans》……有啲係我追唔切,有啲係連開波睇嘅時間都未有,如果大家想試下煲美劇,不妨就base on我個名單開始啦! Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2015-12-18

再一次又要認自己「背」到不行,上周才開始追番Amazon首套網上串流劇集《Transparent》,第二季全十集今個12月經已一次過發布,我先啱啱睇晒第一季,有心唔怕遲,全十集一季,每集半小時,好快煲完啫!   《Transparent》可以歸類為處境家庭喜劇,但呢種分genre方式都好out吓,睇落去你就知。   劇名起得夠妙 故事講一個洛杉磯的猶太裔家庭,爸爸係退休教授,早年離婚,三個仔女已長大成人,大女已婚、二子從事唱片業、三女一直都是無業遊民。就咁睇看來沒甚看點,但原來爸爸Mort/Maura(Jeffrey Tambor飾)一直隱瞞自己的性別取向,不是攣直咁簡單,他/她是一個男人身女人心,到晚年(68歲)決定出櫃;這個劇名改得正是妙到毫巔,字面就是向家人坦白、夠晒透明度的意思,另一層意思就是Trans-parent,一位面對性別轉向的家長。   何謂真實人生 LGBT性別議題,都是年輕人自我認同、性向、情慾身份的問題?大錯特錯啦,劇集透過加插倒敘的方式,將爸爸早年隱藏自己性向的掙扎及辛酸,拍得非常入味,好似互聯網仲未好發達的90年代,爸爸要鬼祟地於書店暗角翻閱小眾性向口味的色情雜誌,遇上同道中人,二人成莫逆,還雙雙偷偷瞞著家人去一年一度易服者於山區搞的嘉年華camp,途中還要不忘打電話回家報平安,要以平時男人腔說話,這些生活細節描繪得很細緻很平實,正因為淡淡道來,就更感真實,更似real people。 故事好看不僅於爸爸身上,三個仔女都有發揮。貌似婚姻穩定的大女Sarah,重遇高中好友Tammy,少年時瞹眛的同性情誼一發不可收拾,要跟丈夫離婚;二子Josh是樂隊經理人,半隻腳喺娛樂圈,跟一般藝人一樣,自我認同極度缺乏,以無時無刻渴求愛情來肯定自己,具體行為就變成濫交同濫情;三女Ali據老爸口中是最有才華,卻想多過做,樣樣都三分鐘熱度,一時要寫書、一時又受老爸出櫃刺激,要去讀性別研究同女性主義,對自己情慾身份感到迷茫。   金牌編劇說故事 此劇創作人Jill Soloway正是《Six Feet Under》的編劇,難怪《Transparent》會咁好睇,金牌編劇說故事,每part都做足功課,人物心理刻劃同轉折都好細膩,鏡頭畫面的色溫時暖時冷,配合劇情發展,連配樂都好有心思,像為劇集度身訂造,很能帶出那個年代的氛圍及情調。 看出色的英美劇,就是每個細位都有可堪咀嚼的地方,話我崇洋媚外都要認啦,法國瑞典德國都有好多出色劇集,係唔識聽之嘛,當然,時間都是一大問題,話到尾,都係想大家放眼世界,唔好淨係齋煲韓劇啫! 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

/136



C觀點

中原城市領先指數

廚神

旅遊