美劇狂人Mi - Yumi Ng
2016-09-05

HBO今夏最出色的迷你劇《The Night Of》本周一大結局,因為套劇叫好叫座,之前傳有第二季,但今次這個finale是真的有個了斷,男主角Naz被控謀殺有判決,誰是兇手亦水落石出,放心下文無劇透,只想講若真有第二季,亦只會是個全新故事。   舉證粗疏瑕不掩瑜 此劇雖然在追查Naz到底有無殺人方面,我覺得非常粗疏,可能係睇得太多罪案劇,好似《Dexter》甚至《CSI》等,都對搜證描繪得好仔細,就算一般觀眾都睇得出警方及檢控官,一開首就釘死Naz係殺人兇手,存在好多疑點;但編劇應該是專登寫成咁,用以反映美國司法制度諸多漏洞,檢控部門以效率及勝算凌駕追求真相,表面證據充分,卻不探究深層動機,而且racial profiling問題嚴重,少數族裔兼且是回教徒,就算你如何循規蹈矩,一旦惹上官非,整個傳媒以至社區,都會戴上有色眼鏡看你,未審先判,尤其今日恐怖主義陰影龐罩,就算主流回教徒是和平的,都抹不走這層社會偏見。    大制度小人物悲歌 大制度下小人物的悲歌,我覺得是此劇最好看的地方,無論Naz最終有否被定罪,他的人生經已被改寫,此劇最好看的不是劇情,更不是抽絲剝繭追查案情,反正動殺機,不離錢與情兩樣,現實與戲劇人生俱如是。人物建構才是重心,看男主角如何由一名平凡守規矩大學生,不得不適應鐵窗生涯,為獄中大佬賣命,紋身、吸毒、走粉,完全是適者生存的叢林法則;幫他洗脫罪名的律師John Stone,更是一名不入流的流氓律師,只能接些妓女及黑幫小混混案件,終日在警署內等生意,幫他們跟警方求情做保釋,沒有人看得起他,更不會找他打大案。    人性多樣立體 John這個角色最複雜最立體,最初吼準機會幫Naz,只為揚名立萬吐烏氣,逐漸對男主角產生同情,沒甚麼錢賺也幫他,編劇對這位律師深受哮喘及濕疹困擾、手手腳腳一撻撻影響儀表落墨甚多,有好多幕拍地鐵途人對他側目,也是為了帶出歧視及偏見的可怕,用這個方法將兩位男角的命運並列接連上,John能否打贏官司、Naz能否脫罪,除了是看underdog能否翻盤的故事,也是一面鏡子,照照自己對社會上的弱勢有幾多成見,甚至身為弱勢而不自覺,反而幫強權欺壓弱者,成為欺壓者幫兇而不自知。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-08-26

今周無劇評,新劇未有時間煲,追開的如《The Night Of》及《Mr. Robot》等,就快季尾大結局,無理由唔「等埋發叔」睇到尾先好講;坦白從寬,實情係晚晚都出街捉比卡超荒廢(煲劇)學業,原本煲劇經已夠玩物喪志,點知一山還有一山高,喪上喪,真係相當無出息。  不過,作為十多年的舊愛(煲劇),我相信自己始終會鳥倦知還,何況9月新劇季開鑼,有重頭劇回歸,又有超級新劇上場,我相信以下兩齣一定夠份量,可以叫我屁股黐番實張梳化。    《Narcos(毒梟)》第2季 Pablo Escobar番嚟啦,這位八十年代末哥倫比亞大毒梟真人真事改編故事,精彩程度可以話有今生冇來世,第1季我係慢人哋N拍先追番睇,由美國DEA緝毒部門特派探員的視點出發,講美、哥兩國聯手緝拿呢位大毒梟過程,當中揭露哥倫比亞政界、司法界、軍隊、警方舉國上下貪污腐敗不堪,可以說爛到入心;Escobar壞事做盡,販毒殺人唔在講,但佢卻有自己一套扭曲的政治觀點,用他自己的方法解決國家貪污腐敗、貧富懸殊的問題,人物性格立體有血有肉,內心世界陰暗複雜,而且實感強烈,不時會將真實的歷史片段剪輯滙入劇情中,集集都緊張刺激扣人心弦,追看指數係120分,未睇第1季嘅麻煩速速補課,9月2日第2季Netflix開播。   《Westworld》第1季 應該係HBO想要收復失地嘅大製作,暢銷科幻小說作家Michael Crichton同名電影翻拍電視版,講一個名為「Westworld」的未來主題公園所發生的故事,HBO官方介紹話係「描述一趟關於人工意識覺醒以及未來罪惡的黑暗旅程」。Crichton最為人熟悉作品梗係《侏羅紀公園》,他的作品暢銷通俗,描繪未來或科技發展通常只會帶來災難,今日睇番只覺平面粗糙不堪。今勻由荷李活最識炒作嘅導演/編劇J.J. Abrams監製,Christopher Nolan細佬Jonathan Nolan執導/改編,J.J.的作品影迷基本上邊罵邊睇,開拍以來不利傳聞滿天飛,一時話試播集爛爛哋HBO唔收貨,一時又話製作費太龐大收唔到科要煞停,終於推出有期,幕前卡士又堅抽,有Anthony Hopkins (!)、Ed Harris、Evan Rachel Wood,點樣我都會坐定定睇首播,到時係龍係蛇就自有分曉。10月3日HBO首播。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-08-12

今個夏季新劇有好幾套相當出色,Netflix的《Stranger Things》、AMC的《Preacher》、HBO的《The Night Of》都一一介紹過,亦誠意推介大家煲,唯獨未講Fox這套《Outcast》。 打著由《The Walking Dead》監製Robert Kirkman改編自己同名漫畫旗號而來,注目程度不弱,但就是聲勢不如上述三套,好在去到季尾第9集,劇情終於來到一個爆發點,為之前稍慢的鋪墊扳回不少分數,下集第10集係首季大結局,終於讓人有點逼切期待的心情。   能力愈大 困擾愈大 眾多劇情介紹都說此劇是一個關於驅魔人的故事,連官方中文譯名都叫《末路驅魔人》,但看到季尾,都不像講一個典型驅魔人故事。因為劇種的懸疑及驚慄元素,放心我不會劇透,故事一開始就講男主角Kyle重回故鄉West Virginia一個叫「羅馬 (Rome)」的小鎮,鎮中男牧師Anderson得悉他回來,就馬上叫他一齊去為一個遭惡靈附體的小男孩驅魔,再以倒敍方式回溯男主角原來從小就有驅魔能力。 在Kyle童年時,媽媽就已經給鬼上身,但Kyle似乎有驅魔能力,一經身體接觸,給惡靈附身的「載體」就會痛苦不堪及尖叫不已,但事後Kyle媽變成植物人,話就話惡靈給成功「驅逐」,但連自身靈魂都離開埋,Kyle為此自責不已,亦深受自己難以理解的能力困擾。   嗜酒好賭非典型牧師 Kyle長大成人結婚,卻因虐打老婆,遭法庭頒禁制令不准再接近妻女,事情原委當然不是打老婆咁簡單,但全鎮居民已當他是怪物及衰人,唯獨牧師相信他,認為Kyle跟他一樣,都是上帝的旨意,是對抗邪靈這場「聖戰」的戰士。劇中牧師也是一個非傳統的角色,他的信仰很堅定,篤信上帝,同時也深信邪靈的存在,而且日益壯大;自身卻是一個充滿缺點的人物,嗜酒、好賭,有其人性的陰暗面,符合美劇中人性刻劃的立體及多元。 劇中描繪的惡魔代理人角色,多番暗示明示邪惡的勢力,不是簡單的黑白二分正邪對決,Kyle的驅魔能力亦正亦邪,惡靈一方面忌諱他,另一方面卻似乎共生共存,甚至有一幕惡靈從他身上吸取力量。其實從劇名已見端倪,人性本身就善惡並存,是一幣的兩面,所謂的惡魔,不過是人性的outcast而已。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-08-09

近年HBO除了一套《Game of Thrones》熱爆全宇宙,其他都有點後勁不繼,《True Detective》第二季好惡睇、《Vinyl》大熱倒灶一季收工、兩套David Fincher參與嘅計劃直頭胎死腹中,得番10月首播嘅大堆頭製作《Westworld》值得期待一下;估唔到呢套英、美共同製作嘅《The Night Of》,以黑馬姿態跑出。   《The Night Of》大部分演員都名不見經傳,題材倒不冷門,從一宗謀殺懸案帶出美國司法制度千瘡百孔,兼且種族歧視問題嚴重,不單只針對黑人,基本上只要是有色人種,生活中都面對著各式有形無形嘅歧視。    移民悲歌 故事開端其實好實況劇,男主角Naz是巴基斯坦裔美國出生的大學生,父親揸的士擔起成頭家,跟一般移民家庭沒兩樣,一家人安份守己默默過活。Naz平時是個書呆子,生活枯燥乏味,難以融入友儕圈子,一晚學校搞派對,他偷揸老爸的士外出,竟然於紐約downtown迷路,搭上中途截車以為他是的士司機的女角Andrea,色字頭上一把刀,半夜飛來點會咁好死係豔遇……    飛來橫禍 Andrea勾搭Naz回家,飲酒嗑藥玩埋(界)手,想當然有下文,完事後Naz迷迷糊糊半夜醒來發現Andrea倒卧在血泊中,全身多處刀傷。Naz大驚下,心虛、斷片,匆忙逃離現場,途中衝燈給警察攔截帶返警署,還在他身上搜出染有血迹的刀。他一心以為,拎走這把有他指模的刀,可以消滅他曾在案發現場的證據,豈料更大鑊,馬上成為頭號姦殺犯。    制度漏洞 劇情發展至此,司法程序中其他主要人物一一出現:總有自命精明幹練的老差骨,連死因、指紋、精液、濺血痕跡等等搜證報告都未出,就一口咬定男主角是兇手;認錢唔認人的律師也馬上撲出來想幫他辯護刮一筆;檢控官則想速戰速決盡快了結此案;整個司法制度內,無一個有心追查真相,律師甚至明言真相不重要,若果陪審員覺得不是,幾真都無用,看得人非常心寒。    反思空間 此劇精采精緻在,唔需要灑狗血聲色俱厲,靠具體細緻的實況描繪,將美國社會低下層生活實況、司法制度的缺陷及漏洞一一呈上,全劇陰沉的藍調及緩緩推進的節奏,叫觀眾投入角色遭遇及竭力解開謎團之餘,也有思考空間反思制度的缺失,叫我想起Netflix那套真人真事紀錄美國一單轟動全國的錯案冤獄《Making a Murderer》,雖然《The Night Of》是戲劇,但真實的感覺,一點不減。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-08-03

除了Now TV與Netflix合作勁煲旗下劇集之外,我面書上Newsfeed都日日彈出樂視催谷《Mr. Robot》的廣告,當然沒有催谷我都會追,但有種劇集明明題材很對胃口,製作亦在水準之上,但就是sort of自己無法relate to,可能這份抽離感乃編劇刻意營造出來的吧,對我來說,《Mr. Robot》就是屬於這一類劇集。   其實上季我已有少少不滿意,全劇重心是講男主角Elliott這位超級黑客天才,如何憑一己之力,將主宰全球經濟秩序的邪惡軸心Evil Corp拉倒,透過金融架構土崩瓦解,人民得以釋放重獲自由;但結局卻將全副心神放在Elliott與Mr. Robot二人身上,原來Mr. Robot是Eillott的……這劇大橋不能穿,只能說這個結局很underwhelming,拿來解釋全季男主角的行為,是一個easy wayout,亦因為too easy,我覺得是cheap tactic,不可取。   Sam Esmail(被認為)編而優則導 但人就是賤,這劇也不是沒可取之處,氣氛營造大體來說是OK的,有些影像尤其出色,第二季回歸,我又死死地氣乖乖依時依候追看。因為上季叫好叫座,編劇Sam Esmail更有話事權,據聞全季12集USA Network都讓他親自執導,往好處想是拍攝手法同敍事風格可以更統一,反過來說,就有淪為過度沉溺的可能。    咪當全部觀眾係師奶先得㗎! 此劇播到第三集,已有太多Stanley Kubrick的影子,多到我不禁要問編劇係真致敬定simply ripping off,雖則有幾幕的而且確相當出眾(例如Elliott嗑藥high 爆時,瞳孔放大倒影出轉動中的洗衣機滾筒),但說到底影像懾人之餘,作品要感動到人、引發思考,如何說故事的方式還是重要的,我明白編劇想帶出訊息的心迫切,但講的方法太生硬、太說教、太in your face,就好像監生捉學生去聽訓導主任訓話一般,有一幕Elliott在教會互助小組大放厥詞,篤爆宗教對人的思想箝制,就好condescending,觀眾當無知婦孺般當頭棒喝,看得人很不舒服。 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-07-25

應該係我跟得唔貼,上周Netflix無聲無息推出一季8集新劇《Stranger Things (怪奇物語)》,IMDB係我盲公竹,一睇評分9.2不得了,咁高分點都有啲嘢啩,而且還有沉寂已久的Winona Ryder,九十年代靚到不可方物的女神呀,就開機睇,一睇到尾一晚就給我焚掉。 八十年代重現熒幕 故事設定八十年代印第安納州小鎮一名小男孩Will Byers神秘失蹤案件開始,Will跟他三個好友Mike、Dustin同Lucas,都係嗰種充滿好奇心、沉迷科學實驗及魔幻故事嘅小男生,就算瞞住大人點都要用自己方法去搵番失蹤老友,半夜三更幾個小鬼攞住自製又粗疏嘅防備工具出發,嗰份童真童趣令人一睇就覺得好有《E.T.外星人》影子。 一睇首播集,經已發現整套劇的氛圍、背景設定、set design、配樂等等,都會叫人邊睇邊想起史匹堡一系列電影、或Stephen King嘅小說,再加John Carpenter感覺的配樂,整個八十年代完完整整重現熒幕。若果純粹當gimmick就容易有抄襲之嫌,但此劇拍得功整緊湊,完全睇到創作者擺足成擔心機,冇heart嘅叫抄,有heart嘅就叫致敬囉!    故事緊湊層層緊扣 有沒有超越前人我唔敢講,但故事非常緊湊,人物角色刻劃同build up都好夠,由男孩失蹤帶出擁有神秘超能力的女孩角色,女孩遭遇原來涉及機密的政府實驗,其超能力成為八十年代美蘇冷戰收集情報的秘密武器,女孩透過接觸地球另一面「The Upside Down」的神秘力量,有機會搵番失蹤男孩同時,又引出超自然世界的怪物……層層緊扣基本上每集都勾住觀眾好奇心,一口氣追住睇晒好容易,單係呢點經已唔簡單,就算以Netflix原創劇水平一般都以中上來計,都唔係套套得。    小演員搶戲過大人 人物選角非常有驚喜,Winona Ryder做失蹤男孩媽咪,一個刻苦耐勞低下階層單親媽咪角色,那份鍥而不捨搵仔搵到瀕臨崩潰邊緣,演得十分稱職,Winona向來不以演技做賣點,因為後生時實在太靚,唔使出力演都叫人目不轉睛;最出色反而係幾位小演員,四小男生唔在講,演超能力女孩Eleven的Millie Bobby Brown簡直係show stealer,演一個自細就淪為科學實驗對象的小女孩,劇中設定連普通對答都有困難,單靠眼神及肢體動作交戲,由充滿戒心到跟男孩們孕育出純摯友誼,就算係鐵石心腸嘅大人都俾佢感動到。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-07-15

自從《Mad Men》及《Breaking Bad》完結以來,個人覺得AMC新劇都比較淡靜,連《The Walking Dead》套衍生劇《Fear The Walking Dead》都好頹,追追下無心機睇;不過憑呢套《Preacher》大有機會收復失地,至少我覺得於今夏新劇當中,以呢套最吸睛,好睇過Fox另一套講驅魔人的《Outcast》,下周另文介紹。 首播集內容無厘頭,簡直無從歸類,一股外太空不知名物體衝向地球,分別衝進非洲部落小村莊、俄羅斯教堂、美國科學教總壇,衝入當地傳教士身體,個個傳教士都好似如有神助神情亢奮不已,幾秒後卻自體爆炸,將村落教堂總壇一一夷為平地,場面核突血腥,特技處理粗疏簡陋,點睇都似係專登,一開波就行cult片路線,以電視劇來講當然是稀有品種,亦叫人一睇就覺得有塔倫天奴作品影子。   雜燴劇種Cult片格 到男主角Jesse出場,一個明顯有黑暗過去的殺手,為了繼承父親遺志,返回家鄉德州小鎮做傳教士,但信仰並不堅實,講道又悶,搞到信眾愈來愈少;那股不知名力量終於找上門,Jesse非但沒爆炸,反而如有超能力,一開口所有人便言聽計從,門庭冷落的小教會開始個個蜂擁而至,接二連三奇奇怪怪人物便衝著男主角而來。 首先是男主角前度女友Tulip死咬不放,偏要男主角繼續跟佢末路狂花;手握全鎮經濟命脈及害死男主角父親的惡爺,想收埋小教堂作發展,呢啲煩極惡極都係人類,男主角都處理到;最爆係連吸血鬼同一孖天使都嚟埋。   稀有電視劇既血腥又爆笑 呢隻吸血鬼Cassidy不嗜血,鍾意飲酒同吸毒,搽咗太陽油(!)就可以喺日間出沒,仲成為男主角最佳損友,二人成日無聊吹水講cult片;兩隻天使更勁,為了追查不知名力量的下落,瞞住上帝來到凡間,過程中打打殺殺用埋德州電鋸分屍係閒事,自己係不死身之餘,仲有複製功能,不停殺不停死不斷翻生,屍首疊到一地都係,既血腥又爆笑,超現實到暈,以電視劇來講,絕對係稀有奇行品種。 因為劇種咁奇特,便留意一下編劇名單,原來係搞笑組合Seth Rogen及Evan Goldberg,聯同Sam Catlin共同開發,Seth係知名喜劇演員,前作有《The Interview》及《This is the End》,唔怪得之咁麻甩,係估唔到佢哋玩暴力血腥都有一手唧。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-07-08

OITNB第三季是全劇水準最低沉的一季,對頭兩季的記憶又模糊了,所以從無認真向大家推介過,而且此劇實在也太難寫得好,人物多但位位立體,對白密集連珠炮發,尤其新一季(第四季)超級回勇,可以話全季13集集集精采,水份少到得人驚,我用咗三晚就煲完,睇完個心真係噏到冇朋友,一句到尾:瞓身推介。   種族問題盤根錯節 今季主線明顯受到2014年紐約黑人Eric Garner,於街頭遭警方無理濫捕意外致死一案啟發,意外中執勤警察使用過度武力將Garner壓至窒息死亡,其後的死因聆訊裁定警察無失職,引發全國一連串示威浪潮,名為Black Lives Matter,事件反映美國國內種族歧視,以及警權過大等問題盤根錯節,不是選出一個黑人總統就天下太平。   監獄服務外判成計時炸彈 在這個脈胳下來理解第四季,Litchfield女子監獄服務外判衍生的問題不單止浮面,而且去到爆發的階段。為了減低成本,管理公司將另一所監獄囚犯調進Litchfield,令監倉逼爆,饍食水平更差,來自不同種族及宗教背景的女犯亦產生不少衝突;為了鐵腕管治,再引入退伍軍人當獄卒,犯人因此受到眾多不人道的對待,基本上成個監獄已是計時炸彈,就睇幾時爆發一鑊熟。   強硬手段鑄成大錯 壓逼愈大反抗愈大,因為獄卒的種族歧視,只向有色人種搜身,拉丁裔女犯 Flores忍無可忍默站抗議,連續數天企上飯堂桌上不肯下來,眾女犯最終深受感召全體一齊默站,獄卒以強硬手段對付,終於錯手壓死其中一名女犯,大錯鑄成。   扭曲制度下犧牲品 這條主線的悲劇意味,不止於簡單的搞出人命,死者是眾犯中最和平最有人緣之外,連闖禍的獄卒也是新丁,與那班行鐵腕的退伍軍人不同,更加突顯了扭曲制度下,縱然人性本善,也無法制止悲劇發生;編劇也不會非黑即白將過錯釘死在一兩個大奸角身上,劇中最無人性的獄卒阿頭,其實也不過是制度下的犧牲品:作為同性戀退伍軍人,本身都飽受歧視,不單止沒有反抗,反而當制度有利他的時候,壓逼更不幸的人,最可悲的地方,莫過於此。 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-06-30

激動,真係好激動,周一晚《GoT》第六季結局集,一次過滿足我好多個願望,季初開出多條支線,於今集都完完整整收回來,亦為下季發展鋪墊得妥妥當當,基本上我沒有甚麼可挑剔的了,除了又要等一年先有得睇了。(警告:成篇劇透,未睇劇嘅唔好睇。) Daenerys西征Westeros 船有了,軍隊有了,連三位龍兒都來了,龍媽終於揮軍進攻Westeros,下一站當然又是君臨城,最有趣是龍媽撇下愛人Daario,聽從Tyrion意見,從戰略考慮以政治婚姻換取籌碼,大家已經起勢估到底龍媽會同哪方結盟,Jon Snow係大熱人選,不過……。   Arya親刎殺母仇人 呢條絕對不是今集最主線,但看得我最激動,Arya重回Westeros,第一件事不是返回臨冬城(Winterfell)尋親,而是去Riverrun親手幹掉弒母殺兄的仇人Walder Frey,一報當年血色婚禮之仇,自第一季以來,House Stark厄運連連,父母、長兄被殺,其他兄姊或流亡或下落不明,足足6年了,才真正初嘗大仇得報滋味。我估Arya下一站一定是君臨城King’s Landing,一報當年老爸被砍頭之仇,我好想Cersei死在Arya手下,雖然這個是end中之end,下一季未必能實現住。   Jon Snow身世之謎 之前鐵粉講到言之鑿鑿的R+L=J理論,Jon Snow是私生子,不過不是Ned Stark所生,而是Ned親妹Lyanna與龍族Rhaegar Targaryen的骨肉,今集終於揭了一半盅,編劇專登唔講邊個係親生老竇,應該係留待下季大爆發,因為Jon終於得到北方諸侯推舉為北方之王,然而若果他身世大白,不僅有一半Stark血統,亦有一半龍血,即係龍媽係他姑姐?!媽,我好亂呀!   Bran成為Three Eye Raven Bran得到已成為「半異鬼」的叔叔Benjen拯救,靠一己之力通靈回到極樂塔,重現年輕時的Lyanna向Ned託孤一幕,呢幕跟Jon接受諸侯推舉的一幕無縫剪接,既交代了Jon Snow身世之謎,又預視到下季將會爆鑊勁,串連得非常巧妙。   野火燒君臨城 Bran的通靈不僅能穿越過去,更能預視未來,或者根本無所謂過去或未來,而是歷史不斷重複自己?Bran預視中野火燒君臨城一幕發生了,整個教堂倒塌,將High Sparrow及一眾黨羽殲滅,當然是Cersei的復仇之火得逞了。   Tommen自盡 野火燒君臨城,Tommen看著灰飛煙滅的教堂,想起自己深愛的皇后Margaery慘死,摘下皇冠踩上窗台跳下,結束了受人擺布的一生。     Cersei登上Iron Throne 為了一報Walk of Shame之仇,為了收復King’s Landing,Cersei不惜用到萬萬不能使用、前Mad King儲備的野火庫,一把火將教堂及在內眾人包括親家及新抱活活燒死,坐上了Iron Throne寶座。Cersei應驗了她在第五季第一集回憶中的女巫預言:「她的三個孩子將以黃金為寶冠,以黃金為裹屍布。」Joffrey、Myrcella同Tommen都死在Cersei所作的因果業報中。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-06-24

雖然《Orange is the New Black》返嚟了,暫時睇到第9集,我仲未binge完,但已可以話整體比上季好睇,有時間一定講;(內含劇透,驚就咪睇)不過《Game of Thrones》(《GoT》權力遊戲)今季近尾聲,周一晚尾二這集「Battle of the Bastards」仲係重頭大戰,終於來到Stark家族復國時刻,見到Sansa同Jon手刃仇人重奪Winterfell,無可能唔期待唔興奮,作為小劇迷,就算今集尚有少少值得挑剔的地方,例如Ramsay死法一如所料,驚喜度減分,但都無礙我照單全收,睇完腦海中仲有千軍萬馬在奔騰。   今集其實有兩場戰爭戲,頭盤當然係龍媽係威係勢收復Meereen,場面同CG都交足貨,但場面幾盛大,都比唔上受盡凌辱嘅Sansa臉上浮現出復仇者勝利的一抹微笑。   Sansa的黃蜂尾後針 今集打生打死嘅都係男人,Jon、Tormund、Ser Davos、巨人Wun Wun,Jon成面血那鏡頭一時間忽悠以為穿越了,「搞乜《GoT》會crossover《The Walking Dead》」,但Sansa今集肯定係winner,佢不但outsmart Ramsay,仲瞞住Jon串通LittleFinger及時班到救兵一舉潰敗Bolton,亦冷靜(冷血)地預告細佬Rickon唔會有命返,可見苦難係成長必經之路,對比起一心只想救細佬的Jon,城府同心計都一日千里。 之前講過今季對白似乎冇以往犀利,睇完今集我收番,用字係顯淺,但直插入心,好似Ramsay臨死前仲打咀炮,Sansa四句簡單重疊句,「Your words will disappear, your house will disappear,your name will disappear,all memory of you will disappear」,之後以彼之道還施彼身,Ramsay遭自己養嘅惡犬「犬決」,大快人心。   最長一集為劇情解畫 來到季尾當然繼續有人捲鋪蓋,今集Rickon Stark領便當,但佢作為Stark家族一員,從來沒甚發揮機會,而且預咗;反而巨人Wun Wun今集終於魂斷臨冬城,諗番之前Jon Snow同野人族係對頭人,難得化干戈為玉帛仲出兵義助,如此iconic嘅巨人倒下,睇到個心好噏,外國鐵粉梗係有做fan art紀念佢啦! 下集季終集,今集冇現身嘅Arya同Bran會唔會重回Winterfell一家團聚?龍媽終要出征Westeros了嗎?下集將會是《GoT》歷來最長一集75分鐘,given咁多線發展要收番晒啲線頭線尾,呢個長度,一啲都唔長咯。 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-06-17

因為美國奧蘭多同志夜店槍擊案,我回想起去年路易斯安那州戲院槍擊案(其實仲要死幾多人,美國政府先肯做嘢),當時戲院正放緊Amy Schumer嘅《Trainwreck》,因為咁,我就攞番現正播出嘅第四季《Inside Amy Schumer》出嚟睇,發現第二集佢就用咗成集來講槍械管制,可見她一路都好上心。   呢位微胖女笑匠,並唔係典型金髮大波無腦妹,佢生得唔算靚,如果從未睇過佢作品,只從一般娛樂新聞認識佢嘅話,可能會以為佢係為上位,不惜搞騎呢醜化自己,例如專登喺Kanye West兩公婆面前仆街博見報,但只要睇任何一集《Inside Amy Schumer》,就會對佢改觀,唔錫身醜化自己當然容易惹人發笑,香港好多所謂「笑匠」都係咁,本身行為經已醜陋到唔恨,笑就笑嘞,不過係恥笑嗰隻。   公義笑聲非小丑能達 但Amy出位行徑背後,都係為咗嘲諷批判種種惡行,例如第二集講gun control,開首以直銷節目搞gag諷刺美國槍械管制形同虛設,但後半段找來民間組織倡議人士講番點樣促使政府做嘢,俾番airtime講正經嘢,唔係只為譁眾取寵,真係笑聲救地球,為公義發聲,值得欣賞同尊重。 或者你會話,講吓笑唧,why so serious?但講笑話或者乜話都好,言之無物即係廢話,垃圾言論聽得多會變蠢,搞到自己乜都唔識,只識陪笑,家陣好多香港人已經自甘墮落,唔使預我。Amy關心嘅課題,不僅是眾人之事嘅政治,而係作為一個生得唔靚又有少少肥嘅女人,她最懂得以自嘲來帶出女性自我認同及價值危機,兩性不平等及保守嘅性別定型,先至係佢嘅恆常母題。   Hater心態唔係講笑 好似有一段佢攞Twitter嚟玩,搵位女演員來扮Twitter要員,上節目介紹一個全新emoji icon,一個男仔鍊住女仔條頸,個要員話有咗呢個icon,大家就可以唔使打一大抽「……threat to rape & kill her」等字,直接點個icon就得。由一位女演員扮嘅Twitter要員仲要理直氣壯咁講出嚟,咁離譜當然係搞笑,但呢個笑話正正反映美國社會嘅現實,這個社會瀰漫住一股仇恨、暴力正常化嘅心態,好多時反映在男女之間權力、兩性性別嘅不平等,亦係普遍反映出一種非我族類就該死嘅hater心態,今次跟以往數唔清咁多次嘅槍擊案,就係呢種情況下產生嘅悲劇。 Amy以搞笑形式帶出,但笑完諗番個脈絡就會完全笑唔出,所以無論男人女人、不同膚色種族,都能夠relate到,Amy因此被傳媒追捧為當下全美最紅笑匠。我唔知香港有幾多觀眾有睇開佢嘅嘢,但每集短短廿多分鐘,花唔到你幾多時間,至少唔會似睇荷蘭叻獻世咁眼寃。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-06-10

今集S06E07個title叫「The Broken Man」,一開首就見久違了的The Hound,我一睇就嗌「乜佢唔係死咗咩」,阿邊個(我都未搞清佢叫乜名就死咗)講「it's never too late to come back」,即係呢集主力人物就係The Hound啦,點知Arya上集好哋哋終於重拾Stark身份,做唔成「Faceless Men」,今集就大意俾嗰件三八學姊一嘢拮穿腸,焦點都係去番Arya度;唔使擔心,我好老定Arya係唔會死嘅。   咁老定唔係話睇劇睇到能預視未來,不過係因為睇過一份訪問,作者George R.R. Martin老婆話過,如果老公寫死Arya的話就同佢離婚(!),同埋Arya已打定主意重回Westeros,我等睇佢嘅復仇大計;我又睇睇埋埋好多fans嘅大膽預測,講到似層層,有啲推斷都幾合理,話唔埋真係揣測到R.R.心意,劇情走向果真如此都講唔定啊!   外國劇迷夠熱情 講還講咪當真住,有個論調係話Arya媽咪Lady Stoneheart Catelyn Stark將會回歸,既然連Jon Snow、The Hound都可以翻生,點解Catelyn唔得?又有一個講法係Catelyn唔係真翻生,而係Arya會扮成媽咪出現,以媽咪嘅身份報仇雪恨。 4月中,Arya同Sansa兩姊妹先後出席Yahoo一個遊戲節目,有一環節要佢哋講三項《GoT》劇情發展,當中有兩個真一個假,Arya講咗佢喺今季trailer出現次數最多,但大家未必會察覺;而Sansa就直接話Lady Stoneheart會回歸,外國劇迷就此細心推敲,得出Arya會扮媽咪現身。外國劇迷嘅投入及熱情,真係叫喺香港嘅我既羨且妒。   網上幻想劇情進展 今集龍媽Daenerys冇出現,但上集佢又大發龍威呼召龍仔現身,俾佢御龍飛返Meereen,留低班Dothrakis精兵慢慢趷番去。今集赫然發現Ironborn嘅Yara Greyjoy原來係lesbian,外國網友立即無限FF,既然龍媽要過千艘船攻打Westeros,Ironborn精曉水戰,會唔會Yara見到龍媽生滋貓入眼,兩女過電會有下文?呢個FF都真係諗過龍,笑吓就龍。 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-06-03

趁呢段時間夏季劇未返齊,唯一必追係《Game of Thrones》,我「的」起心肝狂煲擺埋一邊好耐嘅《The Americans》。呢套劇喺香港關注度唔算高,至少我「面書」同身邊朋友沒幾個會提起,回想2013年第一季推出時,同期有Netflix呢個全新網上串流平台,推出嘅《House of Cards》、《Orange is the New Black》都係熱爆話題作,鋒頭給蓋過係好自然嘅事,家陣睇番先知好彩冇走寶,呢套絕對要瞓身推薦。    日瞞夜瞞間諜夫妻 故事設定於八十年代列根主政時期,美蘇冷戰格局,一對蘇聯間諜夫妻(Philip & Elizabeth Jennings)隱身於華盛頓收集情報,二人育有一子一女 (Paige & Henry),平時身份是小型旅行社老闆,典型美國中產階級核心家庭模樣,正常包裝底下卻做盡一切你想得到想不到間諜勾當,扮裝變身、偷聽竊錄、跟縱線人、行刺暗殺落毒,乜都做齊,但唔係占士邦嗰種風流倜儻身邊美女無數間諜片格局,反而非常人性化,兩公婆關係雖然本身係政治婚姻,由組織指定奉旨成婚,但相處十多年,已孕育出深厚感情;子女都是美國出生,典型美國青少年,對父母二人間諜身份渾然不覺,隨住子女漸懂世事,二人日瞞夜瞞漸感吃力,每日嘅生活就係講數不清嘅大話,不斷做雙面甚至多面人。 第二季劇情講到Philip為咗要喺FBI反情報單位頭目嘅辦公室安裝竊聽裝置,色誘頭目嘅秘書,為取得對方嘅信任,直頭要呃到位秘書死心塌地愛上佢兼且同佢結婚,心甘情願幫佢安插偷聽筆。作為一位喺FBI返工嘅秘書,亦唔係省油的燈,要令秘書入信,Philip老作自己係美國反情報官員,工作就係監視各政府部門有冇內鬼;大費周章,就係為咗擺低一支偷聽筆,但正因為寫得咁具體細緻,劇情可信,人物立體,冇可能生安白造憑空想出來,好明顯就要追溯到創作人Joseph Weisberg個背景上來。    真.C.I.A編劇 Joseph Weisberg未轉行做編劇之前,原來真係一名C.I.A.情報人員,喺C.I.A.受訓及工作4年期間,過嘅生活雖然冇劇集兩位主人翁咁驚險刺激,但講大話當食生菜係閒事;經過4年嘅浸淫及觀察,佢覺得美國間諜情報工作並唔算做得好,收編得來嘅線人提供嘅情報好多時都好「流」,雙面人嘅生活亦好痛苦,決定退下來寫小說。因為2010年爆出前蘇聯間諜潛伏美國多年一案,令佢萌生寫此劇嘅念頭,並將時空設定為八十年代美蘇冷戰時期。   美麗謊言下做盡壞事 當初我放低冇追,正係覺得冷戰格局已打破好耐,蘇聯經已解體,覺得套劇唔夠relevant,家陣睇番先覺自己膚淺。第三季有一幕戲我印象好深刻,FBI部收發文件嘅mail robot要入廠維修,二人夜半潛入工廠安插偷聽器,給半夜返工填報稅表嘅婆婆撞破,Elizabeth淡淡然同婆婆交代自己來歷,婆婆亦處變不驚咁講晒多年獨力經營小工廠,老夫二戰陣亡嘅經歷。講到中途,婆婆深知自己今晚必死毋疑,因為一個間諜怎會輕言同你交心,臨終前婆婆講咗一句,你壞事做盡,包括今晚犧牲一條無辜性命,為嘅就係你口中所謂令這個世界更美好?Elizabeth無半點遲疑地答係,跟住婆婆嗰句超級點睛:「壞人做壞事嘅時候,都係咁樣同自己開脫 (That’s what evil people tell themselves when they do evil things) 。」 Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

2016-04-01

呢排煲過《Bloodline》之後,接住來呢一套《Bosch》,都係網上串流平台的原創劇集,前者係Netflix、後者則是Amazon Prime,《Bloodline》第二季5月就回歸,《Bosch》第二季今個月已經推出,我仲喺度追緊第一季,實在係劇集太多、時間太少。   《Bosch》改編自《紐約時報》bestseller、偵探小說作家Michael Connelly一系列以洛杉磯警探Harry Bosch為主角的小說,點解當初我唔追呢,因為對警匪類型劇有種先入為主嘅抗拒,覺得走唔出鬥智緝兇申張正義的老套格局,而且呢兩年對警察的觀感,係正定負,有眼你睇,我不解釋啦。   典型角色設定但不沉悶 但呢兩個串流平台開發的劇目質素,有目共睹係不爭事實,《Bosch》首季推出後的評價亦相當不俗,仲有原作者親自參與,確保原著的神髓保留,唔會面目全非;雖然角色設定不免比較典型,男主角Harry Bosch當然是神過神探,經驗老到,但又唔係老油條,屢屢挑戰上級,痛恨辦公室政治,最盞鬼呢啲老差骨又硬係會有靚女cadet冧,仲要主動投懷送抱喎,你話係咪典過典型先。  撇除呢啲例牌角色設定,故事卻是穩打穩紥相當扎實的,人物性格心理描寫亦好立體,男主角由老戲骨Titus Welliver擔綱演出,第一次獨挑大樑,但睇開美劇的,都不會覺得這位演員陌生,佢個額頭直情鑿住「好戲之人」,所以此劇男主角出場時間,佔壓倒性大部分時間,都絕對冇難捱感覺。   平實卻有質感 此劇嘅美指、動作唔係華麗大龍鳳嗰隻,冇大量刺激火爆槍戰飛車追逐場面,反而回歸最old school講求劇本嚴謹,滴水不漏,有種實淨感,好易聯想起奇連伊士活以前嘅作品,不花巧不賣弄。睇得多撚鏡頭玩意識流虛無飄渺嘅作品,呢啲敘事手法同風格,都比較傳統平實一點的,反而睇得舒服;而且節奏一點不慢,情節緊湊、峰迴路轉,我肯收貨有突啦。 美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

/136



C觀點

中原城市領先指數

廚神

旅遊