事必低頭 - 土下座
2015-07-02

身在美國洛杉磯Sony發布會場內,坐隔籬係一班來自美國不知名遊戲網站嘅記者,土下座記得,台上螢幕突然閃出《莎木》字樣,會場播放主題音樂,全場開始隱隱有陣喧鬧之聲,當時心中諗住嘅係:「真係莎木?唔係呀嘛??」直到製作人鈴木裕真人企喺舞台上,全場歡呼聲大到我幾乎聽唔到自己嘅叫聲,擰轉面見到旁邊鬼佬記者,竟然掩住口講「Oh My God!」然後眼濕濕……你點估到,一隻走中國風格嘅日系遊戲連鬼佬都識欣賞,《莎木3》竟然係一件轟動歐美遊戲界嘅大事?但高潮過後,冷靜諗諗,《莎木3》其實有唔少隱憂。當初兩集製作費加埋超過90億日圓,唔止回唔到本,全遊戲的劇情更係一半都冇,如今《莎木3》集資200萬美金,9個鐘搞掂,以為俾咗錢就可以乖乖等game出?非也,首次轉口風,話200萬只係入場費,400萬先係基本門檻,但結果,鈴木大師最新盤口,係1,100萬美金,話只要達標,先有得玩晒遊戲世界嘅內容。但到底邊個可以保證1,100萬之後唔會係2,000萬?事實上大師退出咁耐,有冇能力控制到呢個咁龐大嘅計劃先成疑問,而且土下座更覺得大師似乎係乜嘢預算同想法都冇,若然最終有2,000萬玩,但隻game嘅水準大師都係接受唔到,又再要求多1,000萬俾佢哋執靚佢先肯推出市面,咁到時又係咪搞多次Kickstarter集資呢? https://www.facebook.com/di9gate  

2015-06-25

離港7日,終於返到香港,期間發生政改大事,「等埋發叔」成為近期潮流用語,老土都要借嚟一用。上次提及Sony發布重點係game,顯得Xbox「不務正業」,此言原因,係主機大戰雖仍然係PS主導,但Xbox仍未輸晒,專心搞game,最少做到五五波,可惜新game有睇頭嘅都係自家續作,唔會吸引到新客。似乎係微軟今年策略影響,所有旗下產品都多少要同Windows 10有關,結果Xbox發布會重點竟然係俾中國網民稱為「黑科技」嘅HoloLens。所謂黑科技,即不屬於人類世界,係極高度讚揚,見佢哋喺發布會上示範HoloLens版《Minecraft》,空無一物嘅枱面,戴上眼鏡後變出LEGO一樣嘅虛擬遊戲,仲可唔用手掣,只靠雙手控制移動同角度,神奇到睇戲一樣,土下座現場睇直頭嚇親!問題係,微軟已慣咗過度理想化,當年將平板、電腦、電話等裝置夾硬拉埋一齊,希望做到一個系統全平台用,結果未見其利,卻率先搞到Win 8唔湯唔水,令人懷疑HoloLens係咪真係有咁理想,最少肯定好難短期內做到同示範一樣水準,短期內都係等埋發叔先再算啦! 籌備已久,本周開始,土下座將聯同一班來自唔同業界嘅資深媒體朋友,同大家打開一度小小的門,將平時唔可以講、冇空間講嘅真話毫無保留講出嚟,任何公司人物都冇面俾,保證兒童不宜,歡迎入場參觀。 座下有一門,小門名門小。https://www.facebook.com/di9gate

/136



C觀點

中原城市領先指數

廚神

旅遊