雖然土下座唔係學生好耐，都知9月1日係開學日，食正今日出稿，不如講吓少少新消息等書友仔唔使咁頹。首先要講上星期外國瘋傳PS4 Slim實機流出，相片清晰亦有型號，引來一番討論，喺未知真偽嘅情況下，這邊廂香港PlayStation已廣發英雄帖，邀請記者朋友9月8日出席神秘記者會(東京遊戲展前夕喎！)，講明有重大消息公布，雖然土下座點收風都收唔到會係乜嘢消息，但由於PSVR喺動漫節已透露晒，斷估唔係同PSVR有關，講明重大消息，似乎新版PS4真有其事。那邊廂，Xbox唔知係咪收到風聲，宣布9月7日舉行年度活動《遊戲盛典》，唔止早一日，仲講明有Xbox One S實機，與及《Gears of War 4》、《Forza Horizon 3》同《Dead Rising 4》試玩，隻隻超級大作！咁搞法，明顯係大戰前夕，新機硬撼，上次PS4大勝，今次又會點呢？
今個星期有隻新作值得同大家介紹，就係由俗稱為「拳皇」嘅《THE KING OF FIGHTERS》，新作《拳皇XIV》繁體中文版。其實格鬥遊戲曾經風靡香港，唔講人人都識嘅《街霸》，由SNK推出嘅《豪血寺一族》、《餓狼傳說》、《侍魂》到《拳皇》等，都係非常有人氣嘅格鬥game，不過，SNK點解衰落到咁都有段好長嘅古仔，土下座都要有機會先分到幾期去講。今次新作，明顯係想要一班玩開十幾年前，仲係全盛期《拳皇》嘅老fans有回憶，除咗由2D變成3D較難接受之外，隻game水準冇想像中咁差，部分設定源自舊作，以不變應萬變，再加上系列最多嘅50個角色，故事亦係繼承OROCHI篇、NESTS篇、ASH篇之後，熟悉嘅角色例如草薙京、八神庵做番主角，如果你係《拳皇》老fans，值得試試，應該唔會令你失望。
單刀直入嘞！如果有玩過上集《勇者鬥惡龍英雄集結》，咁完全對呢隻續作《勇者鬥惡龍英雄集結II》冇期待，係理所當然，不過上集喺眾多缺點下，仍保留《勇者鬥惡龍》風格，唔似KOEI有份經手，已經相當難得。至於今集，更加睇到開發小組對系列有野心，唔止希望用「國民RPG」老字號去搵錢，係想做一款長做長有嘅新系列。同上集唔同，今集故事完全獨立，亦有RPG式探索地圖、開寶箱嘅設計，加埋角色育成，主角可以轉職等，再延續番上集已經有嘅基礎戰鬥系統，打怪要出必殺技之餘亦要出魔法，加埋唔同嘅隱藏任務，絕對有RPG風味，勉強已經稱得上係一隻ARPG，當中進步之巨大，實在嚇親土下座。另外，如果你唔識日文，必定必定要支持繁體中文版，玩過中文版你就知土下座唔係吹水，呢隻真係好嘢嚟！
連續講咗幾期任天堂、Pokémon ，都係時候停一停講番新game，當中近期呢隻「所謂」PS4大作《No Man’s Sky》就最為有趣。稱呢隻game為大作，皆因E3嘅Sony發布會上連續兩年都有重點宣傳，至於「所謂」，就同遊戲玩法有關。事實上呢隻game係冇任何明顯目的，佢有一個超巨大嘅遊戲宇宙世界，俾你飛來飛去，雖然隻game係online，但你只有1%機率會遇到其他玩家，所有好似冇乜意義嘅事，都係遊戲嘅一部分……唔明？係呀，玩咗半日，土下座都唔係好明，不過，遊戲喺外國就非常受歡迎，開始有玩家於網上討論，點樣可以搵到朋友一齊探索呢個永無止盡嘅宇宙，至於香港呢？well，呢類遊戲向來都「仆直」，好多人直情見到畫面都唔想玩，完全凸顯到兩地打機文化差異呀！
終於一星期過去，上期嘅問題已經有答案：唔止仍然大熱，仲未見有退燒跡象！相信對好多遊戲製作人嚟講，都完全唔明白遊戲有咩吸引力，可以令到全部玩家嘢唔做、覺唔瞓，8號風球都話之你，不分晝夜咁上街捉精靈，要知道遊戲設計簡單，以GPS同AR玩嘅概念唔新，所謂道館對戰問題亦多(絕對唔平衡)，到底點解會咁？其實，呢樣亦係土下座點解明明話完俾你知任天堂同Pokemon Company冇關，但又將兩件事齊齊講完嘅原因，因為《Pokémon》本屬任天堂眾多值錢IP中最強之一，《Pokémon GO》可以令人瘋狂，亦都同任天堂一直以嚟對手機市場嘅態度或多或少有關！
《Pokémon GO》熱潮已旋風式襲港，全港媒體用力24小時免費宣傳，非常唔簡單，不過，土下座想先繼續上期話題。任天堂作為一間古板嘅日本大企業，多年嚟，一直堅持盡量唔做日本地區以外嘅生意，係直到近年先有改變。所以，你會見到今時今日，任天堂仍然仲有啲鎖區政策，例如港版3DS，竟然玩唔到日本版遊戲。背後其中一個原因係語言，唔少日本企業都深信，如果語言不通，就無法提供最好嘅售後服務，任天堂當然亦唔例外。老實講，地球都一體化咗好耐，呢種堅持都幾無謂，不過，正正係呢種堅持，先令任天堂咁與眾不同。下期會講番《Pokémon GO》，大家估下一星期後會唔會仍然大熱？
因為《Pokémon GO》大熱，令土下座身邊唔少對遊戲產業唔太熟悉嘅朋友，終於開始對任天堂產生興趣，更有唔止一個做緊代理公司嘅老闆，想經土下座聯絡香港任天堂，睇下有冇辦法拎到隻game嘅香港代理。不過似乎唔係好多人知道，Pokemon Company同任天堂，完全唔係同一間公司，嚴格嚟講，《Pokémon GO》同任天堂只有間接關係。亦有好多人唔明白，點解今時今日任天堂都未涉獵手機市場，其他日廠都紛紛做嘢，但佢哋竟然搞咁耐先間接有隻《Pokémon GO》。其實，要搞清任天堂之前，先要對日本傳統企業文化有基本認識。好多嘢想講，下期再續。
全球比卡超fans期待已久嘅《Pokemon GO》，上星期靜雞雞喺澳洲App Store上架，消息一出，唔少人都即刻開個澳洲帳號先玩為快，不過唔夠半日，成隻game就已經鎖區，入到game都玩唔到，認真濕滯！不過，煩還煩，遊戲確實引發全球熱潮，仲令任天堂股價上升25%，市值去到280億美金，有可能重回高峰。講咁耐，你可能都未知《Pokemon GO》玩乜，隻game係利用GPS摸擬出真實世界地圖，再利用AR(擴增實境)去令小精靈出現喺實景地圖上，之後就同正常《Pokemon》玩法一樣，進化育成再對戰，你就好似化身成遊戲主角一樣，要行去唔同地方搵出唔同嘅小精靈，完全免費下載，不過捕捉小精靈嘅精靈球就要錢買，長久玩落去相信絕對唔平，不過，香港有得玩先再講！
都唔止第一次講，VR(虛擬實景)裝置將會係未來遊戲世界一個好大嘅趨勢，今年發力嘅就有HTC Vive，但土下座認為，做開手機嘅HTC好似唔係幾熟遊戲界玩法。遊戲世界同手機唔同，規格強弱並非最重要，機能從來唔係唯一，否則任天堂唔會仍然比Sony、微軟更有價值。要喺遊戲立場立足，最重要都係遊戲本身，呢方面，就算HTC Vive用幾多錢宣傳、幾有心推廣都完全冇用，背靠Steam平台聽落強勁，實際就係冇乜跟機大作，結果部機出咗都唔係人人知。呢方面，連任天堂、SEGA都試過打低嘅Sony，明顯係經驗十足，PSVR未出，首發作已去到50隻，嚟緊香港動漫節又會公開多隻大作title嘅新恐怖game《Until Dawn：Rush of Blood》，未出都已經贏晒話題啦。
由「洛克人之父」稻船敬二開發經年嘅橫向動作遊戲《Mighty No.9》終於正式推出咗，呢隻game由Kickstarter集資到開發，可算係唔少game友萬眾期待嘅作品，土下座作為紅白機年代嘅玩家，當然亦等到頸長。可惜，《Mighty No.9》水準確實好糟糕，佢只係意圖想100%複製《洛克人》成功方程式，但無論關卡設計定美術風格，竟然都無法同20年前嘅《洛克人》相比，平凡無奇，刻意將操作難度提升，純粹就係想抄舊作，咁嘅諗法其實都幾惡劣。復古懷舊風格嘅遊戲唔係問題，但始終時代會進步，如果冇打算喺回憶當中，創造到可以打破情懷嘅創新元素去建立風格，肯定唔會變成好嘅作品。《Mighty No.9》冇個性亦冇趣味，玩玩吓，反而會令人覺得「不如玩番《洛克人》！」，難怪接受能力高嘅外媒都口碑一致地差啦。
土下座剛由美國E3返香港，呢個遊戲界年度活動，又一年圓滿結束，今年入場人數去到7萬人次，但相比德國gamescom仍然有段距離，加上全球最大之一嘅game廠EA都唔參展，難怪外國開始有聲音指出E3影響力已不如前。不過，一單還一單，土下座覺得E3仍有一定代表性，睇Sony選擇在E3宣布PlayStation VR發售日，與及公布幾隻VR首發大作，例如《Bio Hazard 7》等，微軟亦趁機公布Xbox One S新機，都仍然令到E3充滿話題性。
轉眼又一年，土下座前幾日飛到美國參加本月14日開幕嘅E3大會，呢個每年一度嘅遊戲界盛事，雖然近年影響力已大不如前，但仍屬兵家必爭之地(有機會再慢慢講)。執筆時傳出微軟突然將Xbox One減價50蚊美金，同時，外界早就傳言，今年E3，Sony會發表PS4加強版PS4.5 NEO，支援4K遊戲及影片，同時，微軟亦會有部尺寸細40％嘅收身版Xbox One迎戰，幾樣嘢加埋，似乎E3會幾有睇頭。不過，目前PS4全球已賣出超過4千萬部，Xbox One呢？大約只有2千萬。輸一倍，仲有冇得鬥先？
絕少手機遊戲成功後，遊戲公司可以再下一城，勁到好似《Angry Birds》嘅Rovio咁，基本都係一game公司(不過賺勁多錢)，其後冇隻game爆到，日本成功挑到任天堂機嘅GungHo，曾經都用《Puzzle and Dragons》創造奇蹟，但唔止後來開發幾隻game，全部都係失敗收場，連PAD本身漸走下坡。同樣嘅事，竟然冇發生喺madhead身上，上星期講《時空之門》氣勢強，今星期再睇，香港、台灣、澳門、新加坡同馬來西亞App store，全部都係NO.1，連暢銷排行亦曾上過三甲，睇埋台灣巴哈姆特，人氣討論區果然又係第一位。出咗兩星期，講真都未發力，個波已經開得咁靚，睇嚟要去到《神魔之塔》咁強，都真係有可能，土下座認真佩服！
土下座喺年頭同大家分享咗madhead新手機game《時空之門》嘅消息，眨下眼原來《時空之門》已經推出完全版！之前嘅封測版，都只係玩到戰鬥部分，瞭解遊戲玩法之類，完全版當然有齊要有嘅元素，抽角色、育成、打限時敵人等等，相對就耐玩好多嘞！不過土下座反而想講，好多人大概會以為香港人對madhead肯定有偏見，不過事實係，遊戲上星期推出公測版，即刻連續7日成為iTunes Store下載No.1，喺Facebook分享隻game心得嘅朋友亦非常之多，實際情況反映唔到有咩影響。講番隻game，美術方面絕對出色，難得細節位做足，例如語音係廣東話、NPC助手會跟住你隻手指方向望左望右、全部角色識郁等等，香港製造有咁嘅水準，真係搵唔到理由唔支持呀！
由傳奇遊戲公司Naughty Dogs開發嘅PS4大作《Uncharted 4: The Thief’s End》終於出咗，老實講，土下座事前唔算好大期望，皆因每次《Uncharted》都只係代表性能示範作品，PS4已傳會出加強版去跟貼電腦界，間接講，即係機能一早玩盡啦？點知咁諗原來真係幼稚到不得了，錯錯錯呀！好膚淺咁講句，《Uncharted 4》畫面真係好靚！佢靚嘅程度，係足夠彌補佢睇多過玩呢個死症(好在劇情唔差，講兄弟情)，有時玩玩下，甚至會有睇緊戲嘅錯覺，而且音效方面亦係非常足料，如果你有部PS4，呢隻真係完美試機碟，可以話推盡部PS4嘅機能，絕對係唔買唔得。朋友同我講，隻game最勁係玩online mode時，都仍然可以keep住同玩單機一樣全程60fps流暢度，到底Naughty Dogs用咗咩魔法？點都好，果然不負眾望，滿分！
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
