AM730

全部專欄 , 事必低頭

事必低頭 - 土下座

《Super Mario Run》會否成為年尾神話？

2016-12-15

喺iPhone 7發布會度成為全世界焦點嘅手機遊戲《Super Mario Run》，如無意外喺出稿前已經同步推出iOS版本(Android版稍後)，所以都要回帶，點都要講呢隻相信會吸引到唔少男女朋友嘅app。有睇開《am730》嘅朋友，相信都對遊戲玩法唔會太陌生，所以土下座想講現象：首先，任天堂其實從未試過喺其他非自家平台度推出Mario作品，亦因如此，Apple亦「還人情」，首度為一隻app提供通知(Notify)服務，game未出已可下載定，一出就通知你！《Pokémon GO》用咗兩個月時間就做到全球5億下載，有分析師指出最終遊戲有望突破15億下載，不過，土下座就覺得諗多咗，畢竟呢隻app要收費，何況全球上網人口先係30億，有20億左右係用行動裝置，係咪真係勁到每2個人就有1個人玩先？

Game廠搞乜？ 12月遊戲玩唔哂

2016-12-08

上期同大家分享完《FFXV》，本來再想介紹埋出稿日正式推出嘅《人中之龍6 生命詩篇》，呢款系列最終作品，亦係全中文版本，睇頭十足，不過，愈諗愈唔對路。咪住先喎，呢排點止呢兩隻game呀？仲有早兩日出嘅經年大作《The Last Guardian》呢？Xbox One S獨佔嘅Capcom重頭作《Dead Rising 4》呢？何況，仲有好多人未玩完《Watch Dogs 2》同《G Gen GENESIS》，係咪真係玩得晒架？雖然土下座唔明點解啲遊戲公司個個揀喺呢段日子出game正面鬥爭，不過gamer就慘啦，真係晚晚打通頂都玩唔晒呀！

《Final Fantasy XV》會是系列最終作？

2016-12-01

自從2006年有呢個計劃開始，《Final Fantasy XV》經過10年開發時間。背後嘅事件已經變得非常傳奇，首先遊戲嘅原製作人野村哲也，因為想用《FF》去做啲冇試過嘅嘢(本來想做第一身視點甚至音樂game)，於是唔用正統續作名，而叫做《Final Fantasy Versus XIII》，然後經歷好多實驗，製作人再由野村換上田畑端，又加入新遊戲引擎「夜光」，及真正改名做《FFXV》，終於無驚無險出得成。土下座幾乎係第一時間入game試，簡評一句就係水準的確非常高，但唔可以有fans包袱，否則好多地方都唔會睇得順眼。有傳今集極可能會係最後一集，因為已經花咗好多時間先完成到，而野村亦有講未打算開發續作，以後係咪唔會再有咁大投資嘅日式RPG呢？

Pokémon偷跑醜聞

2016-11-24

最近行內一單大新聞，唔止賣game行家講，連記者朋友都提起過，就係本定於本月18日發售嘅3DS遊戲《Pokémon Sun/Moon》「偷跑」推出，早咗成個禮拜，由於隻game向來有好友對戰系統，愈早玩當然愈著數。不過，偷跑發售其實唔算咩大新聞，香港更加係慣例，愈係受注目嘅game就愈會偷跑，點解偏偏今次又會成為行內大新聞？原來，係因為有個早一步玩到嘅大陸玩家，竟然走去遊戲製作人增田順一嘅Twitter度「挑機」，問佢有咩感覺，最弊係呢位玩家玩嘅唔係偷跑正版，而係老翻破解版，增田見到當然嬲到震啦！土下座聽聞件事已影響到香港部分批發同game舖，同時亦block咗唔少偷跑玩家。今時唔同往日，玩翻版玩到去挑製作人機，認真有創意呀！

任天堂的不敗之謎？

2016-11-17

話說早前任天堂宣布推出新主機Nintendo Switch，又以分割式雙手掣、能連接電視兼可當手提機使用作為賣點，睇落有新意，但結果喺公布後受盡外界抨擊，有傳唔少投資者都唔睇好呢部新主機，令任天堂股價下跌6.5%，結果又一如以往，再有唔少人講「任天堂就快執啦」！其實，土下座亦曾經稍為提過，呢類意見對任天堂嚟講根本多餘，要呢間遊戲公司倒閉絕對唔係講咁易，太深入唔講，就睇Amiibo仍然大賣，加上今日Apple正式公布iOS遊戲《Super Mario Run》於12月15日推出，以今時今日手機game嘅傳播率，反而睇到任天堂好快會再有人氣，畢竟《Pokemon GO》都仲有好多人玩緊！

4K畫面PS4 Pro出爐

2016-11-10

全面升級嘅新版PlayStation 4 Pro於今日發售(售價$3,180)，今次係PlayStation第一次將同世代、同model嘅主機喺進化周期內升級，背後原因都幾令人好奇，特別係以全球銷量計，PS4其實已經跑贏咗對手。點都好，部機就快上市，土下座身為業內人，亦好快響水貨舖度見過呢部機嘅真身。不過，聽聞香港Sony都幾重視部機嘅保密，所以即使外國評測、開箱一早做晒都好，呢部機亦統一要喺某個時間先俾傳媒公開，水貨幾快都冇用，唔俾賣住！最終，土下座亦優先試咗部行版PS4 Pro，遊戲係4K版嘅《Call of Duty: Infinite Warfare》，認真講畫面確實升咗幾級，畫面亦夠流暢，肯定係大提升！不過，都要大家有4K電視支援先得，有興趣不妨自己行場睇睇！

《World of Final Fantasy》激發兒時情懷

2016-11-03

尚有不足1個月，全世界都高度期望嘅《Final Fantasy XV》就會推出，不過最近都有另一隻全新「FF」系列推出，同樣係由Square Enix開發嘅《World of Final Fantasy》，風格完全走小朋友、女性玩家路線，角色、怪物都不斷賣可愛，但土下座估唔到，原來隻game竟然幾有元祖味！故事講主角失憶，突然有個自稱為神嘅女人，同佢講佢以前係世界之王，憑控制「迷影獸」拯救世界，為咗尋找回憶，於是踏上旅程。睇落好求其嘅開場，其實當中大有文章，皆因主角正正係影射咁多位由細玩FF玩到大嘅玩家：唔止主角失憶，連你哋都失憶，乜唔記得咗細個打機係幾開心幾投入？成隻game雖然好小朋友風格，不過，遊戲系統偏偏又好有戰略性，加上老玩家必定睇得明嘅故事隱喻，絕對推薦俾大家！

任天堂Switch不是家用機

2016-10-27

任天堂全新遊戲主機一直以「NX」作為代號，但終於喺上星期以Nintendo Switch之名正式亮相，相信唔少人已經知道詳情，土下座都唔再補充！令人意外嘅係，呢部機唔似家用機，更似一部手提遊戲機！首先，Switch用番3DS式嘅插帶設計，唔用光碟，其次就係由硬件可以睇到，今次Switch係用NVIDIA出品嘅Tegra系列做晶片，而Tegra主要係俾手機、平板用，最新一代已經運行到Unreal Engine 4遊戲引擎，所以話，佢定位係手提遊戲機市場應該唔會有錯。偏偏佢又可以好簡單咁，將遊戲畫面轉移到大電視，算係幾有趣嘅嘗試。不過，新主機能唔能夠成功，最主要都係睇遊戲，如果仍然係《Zelda》、《Mario》、《Mario Kart》、《Pokemon》等等，係咪就足夠站穩市場呢？

PSVR瘋狂大賣

2016-10-20

近期熱話都仍然係PSVR，雖然市場上早就有HTC Vive、Oculus Rift或者SAMSUNG Gear VR呢類比較入門級嘅產品，但都仍然冇影響PSVR銷量同人氣，SONY接受外媒訪問時，更透露已賣出「好多個幾十萬」。睇番舊文，咁嘅結果絕對係土下座預計之內。皆因VR裝置要成功，遊戲確實先係最重要，有行家話，HTC、Oculus可以喺電腦用、規格又勁啲、又有更多games選擇，唔係比PSVR更好咩？重點正正就係遊戲呢樣嘢，從來都係貴精不貴多，一隻好game已足夠吸引人買機，再加上PSVR有龐大PS4 fans支持，4,000萬機主只要有一成人買，銷量已經好可觀！

PS4 Pro HDR技術出色

2016-10-13

講番先！上期土下座真係要嚟個土下座謝罪求大家原諒，因為寫錯咗PSVR發售日期，正確係13號，冇錯，亦即係今日已經發售！不過，首批貨絕對有限，相信睇到呢段稿先想買嘅朋友，應該都唔會第一時間拎到機嘞！講完PSVR，唔爭在講埋，今日PlayStation4 Pro(PS4 Pro)亦開始接受預訂，主打支援4K高清畫質功能，機能亦有所提升。如果屋企冇4K電視係咪冇用？唔係，皆因PS4 Pro仲加入咗HDR高動態範圍技術，Sony已經講咗，除咗未來嘅新game之外，唔少舊game都會更新番HDR技術去提升畫質，只要你部電視支援就可以玩到！相信影開相嘅朋友都知，HDR主要就係將光暗、色彩，變得更實在更有層次，土下座上月去TGS時已經率先試過，上圖就係PS4舊作《inFAMOUS》開咗HDR嘅實拍畫面，可見效果非常好，招牌霓虹燈字眼清晰，絕對值得大家期待。

PSVR 鎖定本月18日發售

2016-10-06

由2年前PlayStation決定推出自己嘅VR裝置Project Morpheus，直到產品改名為PlayStation VR，外形、規格都一再修改，終於呢件產品唔再只係傳說，好快於本月18日就會正式推出。土下座要話俾大家知，PSVR，係一件無辦法用文字準確形容到嘅遊戲產品，你可能已經試過玩坊間以手機連接嘅VR裝置，甚至功能強勁嘅HTC Vive，但係都唔代表你已經知道PSVR到底係點。就以《Biohazard 7》為例，正常玩只係一隻比較恐怖嘅逃生game，但當你用PSVR玩，你直情同入咗隻game係冇分別，佢嘅視野、焦距，係絕對會令你大腦產生錯覺，甚至戴住PSVR玩賽車時，竟然覺得有離心力！聽我講一定唔夠，好在好快就有得玩，到時你就知土下座冇吹水！

Xbox重點作品《ReCore》要玩

2016-09-29

因為身邊朋友都係玩PS4，所以好多時土下座都偏心去咗一邊，搞到Xbox One朋友好似邊緣化咁，所以嚟緊都會多番少少講Xbox遊戲。最近有隻稱得上Xbox機主必玩game《ReCore》出咗，係由著名遊戲人稻船敬二同Armature Studio創作，屬於劇情為主嘅動作冒險遊戲，畫面非常出色，而且有齊日系精緻同美式嘅高度遊戲性，講真，點都值得一玩。同埋呢隻game仲有個使命，就係話俾大家聽「Xbox Play Anywhere」呢個方向，簡單講，就係當你買咗Xbox One下載版，可以同時有埋Windows 10版，而且遊戲進度同成就等等，都會互通，全部依賴雲端儲存。聽落好奇怪，不過有時家人可以想睇電視，例如韓劇大結局，咁你都可以屈就打住PC先，到可以拎番「電視使用權」先再喺電視度玩，對土下座呢啲「尊重老婆」嘅小男人嚟講，真係好實用呀，嗚嗚嗚……

東京遊戲展 2016後記

2016-09-22

隨住土下座由東京返咗嚟香港，今年東京遊戲展已圓滿結束，入場人數27萬亦破咗紀錄。先寫總結：好悶！以下再好簡單咁寫個感想，首先因為PS4 Pro已經公布在先，TGS亦失去好大重點，雖然有首次PS4 Pro體驗，可以俾行家見到實機機能示範，但名額卻非常限量，土下座亦冇辦法參與，但據有見識過嘅行家講，部機冇令人失望，show咗3隻4K解像度、HDR技術嘅遊戲，都同以往PS4有相當大分別。重點遊戲，個人心水就有《人中之龍6》同《Biohazard 7》，前者係完結篇，後者係新玩法，兩者都有新試玩公開。不過，一如game名，呢兩隻都已經係十年以上嘅作品，唔知日廠青黃不接嘅問題仲要維持幾耐，唔係續作，就係高達、龍珠或FF，都幾大鑊。所以，特別期待PS4隻《Horizon Zero Dawn》，至少係新title呀！

估你唔到PS4 Pro

2016-09-15

上次都有提過新版Xbox同PS4將會正面對戰，剛剛過咗嘅本月7日，唔止係iPhone 7發布會，更加係新版PS4面世大日子(題外話，任天堂突然高調踩入iPhone 7發布會，都係土下座好想講嘅topic，遲啲再講)，估你唔到，仲要係一次過兩部新機！分別係流出咗嘅薄版，同埋1部玩到4K遊戲、睇到4K網片嘅PS4 Pro，仲會喺11月10日就出，定價$3,180，唔貴喎！講真，4K版嘅PS4都係傳咗好耐，不過冇諗過突然推出有期，唔少行家都覺得，Sony咁做好難捉摸，因為外國已有消息傳出，PS5先會係真正秘密武器，用嚟對付Xbox明年嘅Project Scorpio，PS4又一直形勢大好，實在冇必要特別強化，唯一解釋，就係可以用盡PS VR囉。出稿今日，土下座已經身在東京遊戲展，為咗準時交稿，趕唔切update，下星期先同大家事後評論。

《Winning Eleven 2017》家謙、Keyman講波

2016-09-08

早兩日土下座去咗《Winning Eleven 2017》記者會，終於試到隻game嘅香港版！今次最特別，當然要數到Konami正式加入咗廣東話旁述配音，負責嘅仲要係好出名嘅專業評述伍家謙同馬啟仁(Keyman)，睇開波嘅朋友相信都可以放心，絕對唔會亂嚟，如果唔想聽廣東話，一樣可以轉番英、日文(甚至國語，又係新增)。雖然，遲就遲咗啲，講真早十年見到阿叔林尚義講波版嘅winning老翻碟，就應該已經知道呢件事係work，仲可以搵到阿叔、伍晃榮添，不過遲到好過冇到，而且廣東話仲係跟番香港譯名，點都算係幾有誠意嘅gimmick。至於隻game嘅水準，土下座玩咗兩局唔係太試到，sorry嘞大家。留意番，本月15日就出，到時點都會撐吓嘅。

1
2
3
4
5
...
8
>

/136

新聞搜尋



	至

C觀點