AM730

全部專欄 , 兩件一周

兩件一周 - 錢雋

成渝PE、PB平霸

2015-05-22

四川成渝(107)一個唔該，跌到近3月尾起步位，再有番唔錯嘅A、H股折讓。又講市帳率(PB)、市盈率(PE)，成渝亦至抵搞，再跌有得諗。成渝由4月9號5.19元高位到家陣，調整咗近24%，現價(4.05元)0.84倍PB，場內公路股，寧滬高速(177)2.05倍PB、深圳高速(548)1.01倍、浙江滬杭甬(576)2.5倍、安徽皖通(995)1.2倍，成渝PB平霸。又成渝現價比對本身上海上市A股(編號601107)，係折讓咗56%，而上邊有對應A股行家，寧滬高速香江H股，幾乎同A股同價，無乜折讓。成渝主打地區，係一帶一路起步重要支點，喺交通運輸物流需求逐步回暖，加埋地方政府配合一帶一路，完善化基礎設施，成渝主打公路同工程建設瓣數，已經有數圍。再講，成渝近年亦都著力轉型，加多瓣城市營運，主打有仁壽縣城北新城房地產項目。亦都諗到，加埋阿爺減息谷房產turnaround，嚟緊日子，成渝又有咗個增值/獲利本錢。咪扯咁遠，場內專業評估，成渝憑住原有瓣數，今年每股盈利已經可以增長16%，到0.463港元，預測PE得8.7倍，上邊寧滬高速14倍、深高速12.3倍、滬杭甬17倍，安徽皖通10.4倍。講PE，成渝又係至抵搞。兜轉成渝，當追番上最近磅嘅皖通10.4倍PE，成渝係講緊要升37%，到4.8元，到時，集團PB亦啱先追到最近嘅深高速。作者為中細價股專家

兜轉中金投

2015-05-20

中國金融投資(605，下稱中金投)食住祖國潛力勁厚嘅中小企貸款市場，長搵長有，預測市盈率(PE)仲喺單位數，有得諗。中金投主打祖國中小企貸款，集團兼喺上年下半年，搵多條財路，踩埋落香江。而據諮詢機構預測，祖國小額貸款公司，由2013年到2017年時，貸款餘額會keep住26%複合增長，而去到2017年時，規模更加上到2.2萬億元人仔，係2012年時4倍！又全球第二大金融租賃企業CIT，前排接受《中國證券報》訪問，非常睇好亞洲區，尤其係祖國市場。CIT報告兼指出，祖國租賃市場滲透率，得5%，相對歐美先進體15%至30%，有一定距離，潛力勁厚。睇到亦諗到，中金投單係祖國市場，已經坐定粒六。再講，中金投上年同天津銀行北京分行，及第二大B2B電子商務營運商北京慧聰，訂立協議，進一步擴大分銷渠道同客路，對嚟緊日子成績單，更加如虎添翼！中金投家陣得9.5倍PE，場內行家佐力小貸(6866)15.4倍PE、主打香江市場嘅靄華押業(1319)近19倍。又係咁意估中金投今年每股盈利，keep住上年13.4%增長，去到接近0.1元，現價(0.84元)預測PE，跌到8.5倍。兜轉中金投，博翻1/4番到1.05元，今年預測PE先到10.6倍，超級牛底下，呢個PE水位，未有耐過龍。作者為中細價股專家

信達等第二波飛天

2015-05-15

信達(1359)喺3月尾四個交易日一枝箭之後，盤整咗一個月有多，場內涉及券商瓣數，而仲係單位數市盈率(PE)，得番信達，等第二波飛天。信達係祖國四大不良資產管理龍頭之一，兼有市場熱爆嘅券商瓣數。而集團阿媽係財政部，兼有社保基金做股東，股東實力超班。睇番上年到家陣，阿爺通過減息降準，加大刺激經濟力度，而睇祖國呢期數據，嚟緊日子，應該仲有得再減息。亦都諗到，隨住阿爺進一步放水，尤其房產呢part，果效反映，信達不良資產呢一瓣，水漲船高。再講，阿爺除咗透過一帶一路，去拉動實體經濟，亦都通過股市，去製造財富效應。同其他券商一樣，信達一樣有運行。場內專業評估，信達今、明兩年每股盈利0.53港元同0.64港元，信達現價(4.61元)預測PE，得8.9倍同7.4倍。場內內券股，中信証券(6030)明年15倍PE、海通證券(6837)14倍PE、銀河證券(6881)14倍PE，又祖國上市行家平均PE，炒到上41倍，信達平咗大大截。又信達家陣市帳率(PB)1.4倍，祖國行家平均PB，係講緊5倍，講PB，信達同同級數內券股比，又係平霸！買信達，當追番上上邊內券股明年14、15倍PE水位，係講緊要翻一番到9.2元樓上。超級牛底下，呢個PE水位，只係碎料。作者為中細價股專家

2618數據省鏡

2015-05-13

TCL通訊(2618)喺今年頭3個月靚仔數據下，再接再厲，新鮮熱辣4月數據，亦靚爆鏡，預測市盈率(PE)得番7倍，係勁抵搞。 TCL通訊啱公布4月銷售數據，當中，智能終端產品銷售量按年大增41%，到355萬台，手機同其他產品，就同比增加13%。TCL通訊喺今年頭一季，亦係傳統銷售淡季，盈利都keep到4%增長，一到4月，產品銷量，已經見到快放。仲要咁睇，集團上年度毛利率近19.3%，今年頭一季，亦keep到喺相若19.1%水位，唔錯之餘，比比行家，好似酷派(2369)上年12.1%毛利率，係醒好多。又據預測，全球可穿戴式智能產品，去到2018年時會達到1.1億台，複合增速，高達78.4%。食住呢潮水，TCL通訊推出嘅智能手錶，又可以為集團掘多桶金。講增長潛力、毛利穩定性，同阿媽實力(TCL集團，市值915億港銀)，TCL通訊一啲都唔削，但股價短短1個月，就插水20%，上邊酷派最高升到5月4號，係升咗88%！場內專業評估，TCL通訊今明兩年預測PE，得7.6倍同6.9倍，酷派明年20倍、聯想(992)近18倍，TCL通訊係平咗一大截。數咁計，買TCL通訊，當由現水位(8.06元)起步，去到上邊酷派88%升幅，見15.2元，明年預測PE，都係得11倍，係未有耐追到任何行家。作者為中細價股專家

珠管有得諗吓

2015-05-08

紐約期油由今年3月中5年底，彈咗近50%，石油相關設備股，尤其包括一帶一路Concept嘅，有得諗，珠江鋼管(1938)係其中一隻。珠管主打油氣直縫焊接鋼管，上年就受到油價跳崖式插水，搞到成績單大出血近3.6億銀人仔。但嚟緊日子，食住一帶一路，應該有番運行。呢個重中之重國策，當中一瓣link up，就係能源項目。其中大製作，就包括上年中俄簽訂天然氣供輸協議。按協議，俄羅斯最快喺2018年，為祖國每年供應最多680億立方米天然氣，諗到係，呢壇製作，無論中俄之間，以至到祖國本身管道輸送，都俾到包括珠管在內管道企業，勁厚商機。再講，阿爺「十二五」，規劃5萬公里管道建設目標，但仲未搞掂，情況好似鐵路項目，要趕落後追目標，嚟緊日子，祖國本土，亦眼光無限。場內專業預測，珠管今、明年度每股盈利0.1港銀同0.18港銀，明年度每股盈利，係爆炸式增長80%，兼由家陣無市盈率(PE)，去到今、明兩年22.4倍同12.4倍。又珠管由2013年4.32元高位，跌到家陣，現價(2.24元)市帳率(PB)0.55倍，祖國行家嘅平均PB，係講緊高達3.5倍。兜轉珠管，上番上年橫行頂3蚊，講緊要升34%，明年預測16倍PE，未係好過太，而PB仲喺0.75倍，未有耐追到行家。作者為中細價股專家

仲有4倍PE股？！

2015-05-06

有！俊知(1300)食住祖國移動電信用戶同祖國4G時代，主打射頻同軸電纜，同阻燃軟電纜，已經有運行，呢期再加注光纖電纜呢瓣，嚟緊日子成績單，仲靚仔，大時代下，得4倍市盈率(PE)，好抵搞。工信部數據，祖國今年頭一季4G用戶達到1.62億戶，兼以爆發性增長，形容3月客戶淨增數量。祖國4G時代，用戶增加，加埋電貿網購手遊，對電信商持續性擴容嘅需求好大。而俊知主打瓣數，係電信基建重要配套部分，長做長有。俊知啱上年尾，完成增持俊知光電52.5%，成為集團附屬。增持對象，主打光纖、光纜瓣數。據統計機構預測，單係祖國，去到2018年時，光纖同光纜嘅需求，會由上年1.38億芯公里，同1.13億芯公里，分別增加到1.68億芯公里，同1.36億芯公里。同移動電信一樣，祖國固定寬帶用戶增加，加埋上邊因素，同寬帶國策，刺激光纖、光纜呢類產品需求。呢壇製作，今年一反映，俊知成績單，更掂檔！係咁意估俊知今、明兩年，盈利keep住上年度約18%增長，去到4.37億銀人仔同5.15億銀人仔，計埋攤薄，明年預測PE，都係得4倍多少少。中港超級牛，俊知仲有咁低PE，漏口水。買俊知，現價(2.02元)博一個double到4蚊樓上，俊知PE都係得8倍幾。但講到明，俊知股價唔興一枝箭，所以，咪博命，免嘥機會成本，刀仔博樹仔算。作者為中細價股專家

搵多件冷灶：台泥

2015-04-29

《兩件一周》本月17號主打咗隻唔起眼嘅橙天嘉禾(1132)，到家陣翻咗一番有多。搵第二隻冷灶煲，台泥(1136)有得諗吓。台泥係港股通北水可買賣股份之一，睇番場內，北水同樣可以透過港通股買賣水泥股，仲有山水水泥(691)、安徽海螺(914)同華潤水泥(1313)。場內專業評估，台泥今年度每股盈利0.57元，增長近6.5%，預測市盈率(PE)得5.8倍。上邊山水水泥26倍、海螺12倍，潤泥8.2倍，又四隻股嘅市帳率(PB)0.6倍、1.6倍、1.3倍同1.16倍。貨比幾家，台泥預測PE同PB，係平咗一大截。又台泥喺祖國廠房，遍及華南、華東、東北同西南地區。阿爺搞一帶一路，而西南地段，就係重要支點所在。加埋通過呢個重策，消化近年包括水泥、鋼材類供過於求問題，睇到台泥食到國策，又有地利，照計，中線少少，turnaround嘅速度，可以再快。咪扯咁遠，呢轉超級牛，北水狂炒落後，上邊海螺經3月以嚟一枝箭，半年計，累升咗31%、山水山泥仲勁，計到16號停牌價6.29元，半年累升115%，台泥同期計數，係無進帳！呢轉博資金水向下流，買台泥，吼實250日線同20日線交匯位3.13元兜轉，台泥上番最近磅潤泥8倍PE，現價(3.27元)都講緊要升近43%，到4.65元。　作者為中細價股專家

中渝未彈夠

2015-04-24

資金追炒落後個勢明顯，場內勁低市帳率(PB)嘅內房，呢轉亦turbo，中渝置地(1224)仲係落後未彈夠。中渝今年嚟一直喺一年底橫行，上個月中先開始識彈，但1個月計，累升得28%，都仲未創到1年新高。場內同樣係二線內房，好似上實城開(563)，同期幾乎翻一番，兼創1年新高，又五礦建設(230)升32%，亦創1年高位，中渝仲係落後。又中渝主打祖國西部，呢個地區，係阿爺一帶一路嘅重要起點，而集團坐擁近9,000萬方呎土地儲備，每方呎平均地價，都係講緊得224蚊！諗到係，食住地區性優勢，加埋勁平地皮成本，加埋阿爺放水，放寬限購，刺激經濟同樓市，中渝中線增值，可以好爆炸。又中渝上年度派嘅成績單，盈利高達10.7億銀，創晒5年新高，比起2013年度盈利，係翻咗一番。但中渝現價(1.71元)比起2013年高位3.19元，仲係累跌46%，又唔計上邊土儲增值，家陣PB得0.29倍。又去到上年尾，中渝等入帳收入141億銀，而當中有120億銀係已完工或者喺今年落成項目。呢個數額，已經超過上年度百億銀收入，照計，嚟緊今年張成績單，keep住靚仔。呢轉買中渝，唔謀望勁彈，當喺現水平再翻1/4番到2.13元，PB仍然得0.37倍，兼未有耐上番上邊所講2013年時高位。作者為中細價股專家

賽特仲未浮水

2015-04-22

國企鋼材股炒A、H股折讓，同一路一帶，創咗3年新高，場內近磅中國賽特(153)，比起2013年上市價，講緊仲係潛水，得超低3倍市盈率(PE)，魚缸水向下流，賽特有得諗。賽特係江蘇省第二大預製組件商，同該省第三大鋼結構供應商，講分量，亦唔嘢少。而呢期所見，場內國企鋼材股鞍鋼(347)，短短1個月升咗18%，重鋼(1053)更加大升61%，全部創晒3年新高。除咗炒A、H股折讓，阿爺重點一路一帶國策，嚟緊十年會陸續投放萬億元，喺大型基建項目上，呢個point，亦係資金大炒鋼材股原因。賽特現價(0.79元)比起2013年11月上市價1.03元，同翌月高位1.31元，仍然潛水，集團亦係一路一帶受惠群，資金無理由走甩。再講，賽特呢期拍上祖國500強市政企業之首嘅「上海城建」，務求透過對方，將主打瓣數延伸輻射到其他地區。賽特拍到大孖沙，對嚟緊日子增長，肯定positive。又阿爺新一屆工作報告講明，會繼續加大保障房基建力度，今年新安排740萬套保障房項目，賽特另一瓣預製組件，食住國策，亦應該掂檔，今年預測PE，keep住得勁低3倍單位數，無問題。上邊鞍鋼今年所講預測PE，係27倍！兜轉賽特，當上番上市最高位1.31元，講緊都要升近60%，到時，PE都係得4倍幾。作者為中細價股專家

影業股升甩轆 1132大落後

2015-04-17

港股超級牛，除咗中資股係炒家樂園，娛樂文化瓣數亦炒到甩晒轆，場內橙天嘉禾(1132)係未點郁過，市帳率(PB)平霸，有得諗。呢轉港股超級牛，影業文化股由阿里巴巴旗下嘅阿里影業(1060)開波先，1年累計升咗200%，家陣市值上到822億銀，市值係橙天嘉禾區區15億銀嘅55倍！又瞓足一年覺嘅星美控股(198)，上個月頭起身狂發力，短短一個月，亦累升咗80%樓上，兼創埋3年新高，家陣市值，係橙天嘉禾3.6倍。主打橙天嘉禾，一年計數，幾乎係橫行，微升咗6個仙咁大把(升幅12%)，而現價(0.56元)嘅PB得0.85倍。上邊阿里影業家陣PB，挨近11倍、星美1.6倍、漢傳媒(491)兩倍，又星美文化(2366)1.47倍，橙天嘉禾PB平霸。到上年尾，橙天嘉禾喺祖國經營59間影城，提供420塊銀幕，而集團嚟自祖國影院收入，去到5.8億銀。又新鮮熱辣數據，祖國今年頭一季票房95.8億銀人仔，同比大增咗41.6%，市場中人估計，祖國全年票房，有望衝擊400億銀人仔嘅大關，再創高峰。睇到亦諗到係，橙天嘉禾喺祖國票房收入唔係嘢少，影城配套亦唔削，中線有條件透過資本市場去釋放祖國地區價值，價值一浮面，身價家底又唔同睇。呢轉先兜轉落後，橙天嘉禾追上星美PB計，都講緊要升60%，到0.93元。作者為中細價股專家

太實肥仔水

2015-04-15

天行國際(993)俾大孖沙華融睇中入主，3月24號復牌，到家陣累升171%。追唔切天行，可以吼住太平洋實業(767)，後邊太實，揸咗天行6,275萬股，增值一樣超級肥仔水。天行3月復牌公布俾華融香港入主，而華融香港嘅對口單位「中國華融」，係國務院批准，由財政部、中國人壽共同發起嘅國有大型金融機構，總資產值高達6,000億元人仔。潛在新主，係超級大孖沙級數。睇番太實，集團到上年底，一共揸咗天行6,275萬股，以天行噚日收市價計，太實應佔權益等值2.9億銀，已經相當太實市值76%，潛在變現勁豐厚！又太實上年尾每股資產淨值(NAV)0.54元，連埋呢期天行股價上升，太實額外增值1.8億銀，NAV上到0.6元，現價(0.137元)，市帳率(PB)得0.23倍。再講，阿爺喺實體同金融政策落藥，隨住A股牛三，加埋華融實力，呢轉入股天行順風順水，天行日後爆升潛力，唔講得笑，太實家底，就更加肥仔水。又太實本營財仔業務，場內行家靄華押業(1319)2.2倍PB、第一信用(8215)0.86倍，太實亦係平咗一截。呢轉趁天行股價飛天，又魚缸水向下流，嚟緊日子，細價股應該有轉癲鳳鬥狂龍日子，博資金埋身炒，兜轉太實，當反映呢轉嚟自天行所嚟每股增值，太實都要升近43%，去到0.198元，到時，集團PB先得0.33倍，未有耐追到行家。作者為中細價股專家

重機仲未創新高

2015-04-10

國企隻隻股價放紙鳶，要搵落後股，可能要揀仲未創新高嘅炒，重慶機電(2722)相距歷史高位3.3元，仲係累跌緊50%，兼有注資跟尾。港股大時代，超級資金市底下，就算無基本面support嘅二線國企，都升到甩轆，重機又點？家陣往績8倍市盈率(PE)，得0.82倍市帳率(PB)。呢轉中資股狂潮亂舞，單位數PE兼1倍PB樓下，無乜得邊幾隻，重機係其中一隻。家陣同樣係以重慶市對口單位嘅A股，包括重慶港九(滬：600279)、渝開發(深：000514)，又或者祖國近磅瓣數股瀋陽機床(深：000410)，全部PB係上到兩倍至4倍，重機係平咗大大截。又重機啱公布無耐，以1.77億銀人仔，出售重慶美的通用35%權益。重機呢壇製作，變現銀碼唔大，但呢次出售，係為重機日後喺製冷機產品方面，更加海闊天空鋪路。而之前重機亦講明，阿媽會向重機注入優質資產，作整體上市。重機呢次出售，有開始重組本身業務架構，似係開摩打發力舉動。又重機成間企業總市值，得59.7億銀，上市H股部分，更加只得18億銀。諗到係，就算有注資，重機市值咁細奀，都啃唔落；又港股上2,000億銀樓上成交，重機街貨市值，唔算係乜，資金擁落後，重機分分鐘可以炒到甩轆。買重機，炒落後，博注資，當翻一番到3.3元計數，PB都係1.5倍，未有耐追到上邊祖國股份。作者為中細價股專家

津發等放紙鳶

2015-04-08

天津發展(882)喺窗口股當中，市帳率(PB)仍然係最抵，嚟緊日子，中資股注資，仍然係其中一個Hot topic，津發大有機會俾阿媽湊大。津發最新0.62倍PB，場內同樣係窗口，有深圳國際(152)，家陣1.3倍PB、上海實業(363)0.8倍、北京控股(392)1.4倍，珠海控股(908)0.83倍。津發喺呢批地區性旗艦當中，PB至抵搞。再睇津發近年業務同股權變化。津發原先揸住仲停緊牌兼延遲刊發上年度業績嘅王朝酒業(828)權益。上年5月，就俾控股公司全數買番晒，除咗為津發變現近9億銀，津發亦唔使再受王朝酒業任何潛在虧損影響。再喺上年9月，津發對上控股權益，發生變化，由原先天津醫藥揸津發，改為由渤海國資揸天津醫藥，再控津發。因為對上控股架構，多咗間瓣數齊備嘅國有資產管理企業「渤海國資」，所以，市場推斷，津發若果真係俾湊大，未來可供注資瓣數，亦相應更多，而唔係單單只係停留喺醫藥項目。又津發現價(6.47元)市值，得69億銀，上邊深圳國際228億銀、上實274億銀、北控790億銀。老老實實，津發若果唔快高長大，無可能食到龐大注資。呢轉津發若果有調整，吼實10日平均線5.8元好搞，唔使多，追番上上實PB，津發講緊都要升44%，到8.35元，又津發若果有注資，以呢期熱錢咁暢旺，股價肯定放紙鳶。作者為中細價股專家

國美超級現金牛

2015-04-01

國美電器(493)到上年尾，手頭淨現金高達140億港銀，總市值都係得190億銀左右，扣除咗淨現金後嘅市值，更只得50億銀。又國美家陣市盈率(PE)得11.6倍，專業評估預測10.9倍PE、市帳率(PB)約莫0.89倍。又場內專業評估，認為仲繼續會蝕錢嘅祖國行家蘇寧(深：002024)，3.6倍PB，家陣市值上到1,215億港銀，係國美總市值6.4倍，或國美扣除淨現金市值後嘅24倍！電貿新時代，單靠傳統零售，肯定唔掂檔，但國美有品牌，而線上線下(擁過千間門店)，加埋完備物流，瓣數係一籃子齊全，兼top fit到爆。以國美預測15倍PE計數，市值先上到261億元，兼只係蘇寧市值兩成多少少。講係咁講，國美話出價15倍PE，肯定大把超級大孖沙或者行家爭住要。當然，呢個只係假設，排除呢個可能性都得，但亦都證明，國美實在好殘。再講，嚟緊日子，包括超級銀彈下，新開小型貸款業務，加快集團盈利增長。仲有，國美在線未來分拆增值，都係好嘢，國美仲keep喺近三年底，就係殘上加殘。國美現價(1.12元)翻半番到1.7元，PE得16倍，市值先得285億元，算係乜？作者為中細價股專家

威華達肥仔肥肥仔

2015-03-27

威華達(622)公布上年靚仔業績，股價翌日插咗8%，食住中港股市大茶飯，威華達銀彈又勁多，博佢投資回報增值肥仔肥肥仔。威華達上年度張成績單，盈利一枝箭增長2.6倍，去到5.2億銀，盈利大增，主要係金融資產增值收益翻咗一番，去到6.3億銀。喺威華達上年資產度，金融資產亦相應增加咗1.1倍，到20.37億銀。呢個增幅，相信除咗因為新投放資金落呢啲投資度，威華達有眼光，受惠所購資產增值，亦係好大原因。咁睇，威華達再對上一年，即係2013年尾，現金17億銀，齋長放銀行低息，老老實實，真係無乜作為，但上年風向一轉，投放金融資產，即時效應係，資產大升值。而上邊所講金融資產，等於威華達每股0.28元，已經超過威華達現價(0.225元)，潛在變現亦都好肥仔。又呢筆資產，連埋威華達手頭現金11.57億銀計數，相當於每股0.44元，係集團現價近兩倍！嚟緊日子，深港股市又快通，中港股市若然牛三，威華達仲有咁多銀彈優勢，食住呢潮大茶飯，仲唔肥過肥仔水？呢轉買威華達，當上番上邊每股金融資產值，講緊要升23%，又威華達升94%，到0.44元，啱先上到每股金融資產連現金值，到時，集團市帳率(PB)仲係得0.73倍，呢個PB水位，應該仍然係券商行家中，數一數二至平之列。作者為中細價股專家

<
1
...
3
4
5
6
7
...
11
>

/136

新聞搜尋



	至

C觀點