重慶銀行(1963)(重銀)扣咗H股主要股東持股，街貨持股量得48%，預測4.6倍市盈率(PE)，擺埋一邊，起碼等升四成。 大新系揸重銀H股39.63%，第二大股東重慶力帆實業，揸重銀H股12.01%，真係H股街貨權益，得48%咁大把，等值40.7億銀，求其一個比較有晒士嘅基金，已經可以買起重銀。而上周三港股大插插，重銀曾經低見5.91元，但好快彈番上嚟，其中一個可能原因，就係重銀比其他內銀歸邊。 又重銀內資股股東，包括重慶市水利、重慶市地產同重慶渝富資產，全部對口單位係重慶市國資委，阿媽係大孖沙級數，無有好怕。 場內專業評估，重銀今、明兩年每股盈利1.44港銀同1.6港銀，現價(7.32元)預測5.1倍同4.6倍PE，今年預測息率4.9厘。重銀喺內銀當中，PE係至平選擇，息率回報亦唔曳。而阿爺透過一帶一路同其他財金政策，務求令祖國經濟回穩，大形勢alright，支持重銀meet盈利target。 參考番其他內銀股，2008年10月，即係金融海嘯最嚇破膽期，工商銀行(1398)當時PE跌到9倍，又建設銀行(939)頂晒磅，都係跌到得6倍幾。講咁講，中港股市若果真係仲要再調整，以重銀呢個超平PE水位，仲想佢插幾多？ 煲重銀，擺埋一邊，博財息兼收，重銀單係追番上行家今年6.4倍平均PE，講緊要升39%，到10蚊。 作者為中細價股專家
五礦建設(230)經呢期大插插，再跌番落近6年低位，隨手香港兩件投資物業，等於大半間公司市值，清倉價殘到離晒譜。 中港股市上周初大插，五礦建設最低見上周三0.64元，差一個仙，就平咗2011年10月0.63元6年低位，之後反彈，現價(0.92元)仍然喺近5年海底價，最新市值30.7億銀。 五礦建設揸咗香港中環「東方有色大廈」同尖沙咀「中國五礦大廈」兩幢投資物業，總樓面11.6萬方呎。粗略兼保守計數，兩幢物業每方呎市值2萬銀，已經等值23億元，係大半間五礦建設，仲未計，集團喺祖國，揸咗高達4,630萬方呎嘅土儲！ 又五礦建設對口係祖國超級大孖沙五礦集團，五礦建設上年亦講明，母系有望注資，資產規模上300億銀，係集團市值10倍，五礦建設遲早亦要PUMP UP迎注資。 咪扯咁遠，五礦建設啱公布無耐，今年上半年內房簽約銷售額33.5億銀人仔，增加28%，又上年，集團預售遞延收入，亦增加咗90.6%，到38.6億港銀，有咁好成績，買五礦建設嚟緊成績單turnaround。 煲五礦建設，長短棍，短打目標睇近兩個月橫行頂1.2元，五礦建設講緊要升30%，到時，集團市帳率(PB)都係得0.5倍。另一注煲長線少少博注資，翻一番到1.8元計，市值都係得60億元，晒士仲係好細。 作者為中細價股專家
青島港(6198)呢轉跟個市狂插，由5月尾6.07元高位，最多累跌咗48.5%，去番上市起步位咁滯。就算計埋噚日反彈，現價只係高過金手指Value Partners，落場增持最低成本價6%，跟金手指煲青島港。 場內專業評估，青島港今、明兩年每股盈利0.48港銀同0.52港銀，預測市盈率(PE)得10倍同9.5倍。香江場內，其他港口股呢期同樣插到無影，大連港(2880)預測15.3倍同14.2倍PE、天津港(3382)11.3倍同11倍PE。又祖國行家今、明兩年預測21倍同19倍PE，青島港平咗截。 青島港係一帶一路重要港口城市，所搭建「青島––中亞」班列，亦都正式開行。呢個班列，係將日韓、中亞、東盟同歐洲地區串連，成為一條大型國際物流通道，青島港憑住地利，加埋努力咁組建，中線少少嘅成績單增長，比起行家，應該仲要爆炸。又場內出晒名，以價值投資見稱嘅Value Partners，喺今年4月到6月中，一路增持青島港，最新揸咗集團1.35億股，或15.8%H股，唔係嘢小。 又Value Partners最高每股成本價約5.82元，最低講緊4.66元，青島港現價(4.95元)比起最低入市成本價，高出6%咁大把，比起最高入市價，係講緊潛緊水。跟Value Partners買青島港，煲中線，就算以祖國行家，呢轉經股價調整後、明年平均19倍PE做目標，青島港講緊要升100%，到9.9元。 作者為中細價股專家
重慶機電(2722)由上個月頭2.11元高位，最低跌到周一0.9元，大插57%，到3年橫行底，現價市帳率(PB)得番0.6倍，單位數市盈率(PE)，同一瓣數當中，重機呢批硬數據，吸引到痺。 重機主打數控機床、包括潔能、電線電纜等電力設備，同汽車零部件幾大瓣數，現價(1.24元)嘅往績PB0.6倍，場內近磅行家華中數控(深：300161)5月尾停牌，當時，PB炒到上7.4倍、又瀋陽機床(深：000410)，由5月尾到家陣，累跌60%，PB仲講緊喺4.5倍，香江上海電氣(2727)1.4倍，重機PB，平咗大截。 又重機往績6.9倍PE，好保守估計，集團今年每股盈利，得5%盈利增長，到0.184港銀，今年預測6.6倍PE，比起上邊行家上電預測19倍PE，亦係平咗大大截！ 又重機經呢轉洗倉式下跌，現價往績息率4.7厘，就算保守估集團今年只係Keep住呢個息率，亦比行家吸引。 各省市為配合阿爺一帶一路，喺本省市興建交通基建物流，初步上報50個基建項目，而重慶市本身，亦計劃上萬億銀人仔基建投資。諗到係，重機食住一帶一路本市發展，中線少少，有運行，可以重拾增長動力，預測PE進一步走低。 煲重機，博上番1倍PB，重機講緊要升60%到1.98元，而目標PB，亦未有耐追到上邊所有行家。 作者為中細價股專家
6月中《兩件一周》主打中信(267)，話中信明年超低單位數市盈率(PE)，比恒指平均值平咗半，勁抵搞。場內信達(1359)，2017年時預測PE，得5倍幾，又係平通街。 場內專業評估，信達今、明、後年每股盈利0.54港銀、0.64港銀同0.75港銀，現價(4.16元)往績10.3倍PE，跌到得2015年7.7倍、2016年6.5倍，同2017年時5.5倍水位。阿爺放水減息政策，信達除咗主打不良資產管理瓣數，有進一步增值獲利潛力，另一瓣證券同投資瓣數，亦一樣食到應一應，信達絕對係金融政策同中港超級牛下，受惠一員。 場內主要祖國券商中信証券(6030)，經呢轉股價調整，今、明兩年預測PE，仲係企喺14.9倍同12.7倍、銀河證券(6881)兩年預測9.8倍同9.3倍PE、海通證券(6837)13.3倍同12倍，信達平咗起碼一半！ 又北水透過滬港通買信達，由6月中應佔信達1.95%H股權益，增加到最新本周一2.14%，或總持2.5億股。睇到係，北水唔係呢潮信達調整掟貨嘅大淡友，兼相反，係keep on增持。 道理好簡單，信達基本面平靚正，集團大股東，又係中國財政部，實力勁厚，唔使怕橫風橫雨。買信達，只係當翻半番到6.48元計數，明年同後年預測PE，都係得10倍同8.7倍，未有耐追到任何一隻內券股。 作者為中細價股專家
天津發展(882)對口係天津市政府，又係恒指小型成分股一員，咁嘅牌頭，有得博津發喺新一輪中港通擴容時，成為可買賣一員，再博津發注資。 津發上年喺中層控股權公司，發生變動，但點變都好，終極對口單位，仍然係天津市政府，份屬「正統」。又有聲音建議，中港通擴容，要納入恒指小型成分股，津發chance面大。 當然，就算津發成為中港通一員，北水唔一定買你。又不妨睇睇硬數據，津發系統，有香江上市天津港(3382)，同祖國天津港(滬：600717)。津發家陣得0.76倍市帳率(PB)，香江津港1倍PB、祖國天津港，更加上到2.1倍，津發PB，系內最平！又祖國天津港，1年嚟累升咗118%，津發升咗37%咁大把。所以，若果津發真係成為中港通股份，北水炒同氣連枝理由，係好強烈。 又場內地區旗艦，深圳國際(152)1.5倍PB、上海實業(363)0.82倍、北京控股(392)1.35倍、珠海控股(908)1倍。津發係繼閩信(222)之後，PB第二平。 而上邊講，津發中層控股公司有變化，加多咗實力企業渤海國資，同天津醫藥。市場估呢個變化，係津發獲注資前奏。 買津發，當現價(8.27元)翻半番到12.4元，PB先得1.1倍，啱過咗津港少少，兼未有耐追到天津港。而津發街貨市值50億銀唔夠，講注資，晒士仲係細奀啲。 作者為中細價股專家
哈爾濱電氣(1133)喺核電瓣數中，市帳率(PB)平霸，手頭又有高近200億港元現金，係總市值兩倍！哈電又多重超級現金牛墊底，再跌好收集，博半年盈喜。 哈電到上年尾揸現金147億銀人仔，折約184億港銀，哈電家陣H股市值得43億銀，就算計晒所有權益，總市值都係得87億銀，現金係總市值2.1倍！再均真啲，扣晒欠款，哈電淨現金仍高達72億銀，係總市值83%，超級現金牛。 又只係以上年尾資產值計數，哈電現價(6.33元)PB得0.55倍，場內東方電氣(1072)1.28倍、中廣核礦業(1164)2.9倍、中廣核電力(1816)3倍，而上海電氣(2727)PB，亦上到兩倍。喺核電瓣數，哈電又平通街。 咁睇，阿爺核電投資開波，未來5年，年均投放800億至千億銀人仔，成塊餅大咗，哈電有分受惠，業績turnaround，股價殘得耐，一彈，單係炒折讓向上收窄，和味過和味龍。 再講，哈電亦有投資祖國電力股，當中一隻國電電力(滬：600795)，由上年尾4.63元人仔，到家陣翻咗近半番，為哈電帶嚟額外增值，已經去到3.6億港銀。連埋投資增值計數，哈電資產值提升，PB再平啲，而嚟緊半年成績單，有機會博盈喜。 呢轉趁哈電跟大市調整，貼近6蚊，好兜轉，哈電翻半番到9蚊，PB都係得0.8倍，都仲未追到最近磅嘅東方電氣1.26倍PB水位。 作者為中細價股專家
中信股份(267)由年頭到家陣，累升8.8%，跑輸恒指同期13.08%升幅，買中信，博遲嚟先上岸。 中信上年重組，獲注入保險、證券同銀行幾瓣熱爆市場，兼食正呢潮狂牛嘅資產，到上年尾，呢批資產總值5萬億，中信已經變身金融巨無霸。亦諗到係，隨住阿爺一路進行金融開放政策，加埋減息放水，嚟緊日子，牛三一到，中信主打瓣數，實實在在受惠之餘，資金擁落後，中信股價亦大有機會放紙鳶。 事實亦係咁，睇番往績，圖表派所信奉循環周期，中信10年一個大pattern，喺97年同07年牛三期，股價搶見50蚊，中信現價14.38元，係講緊要升248%！ 又場內專業評估，中信今、明兩年每股盈利2.15元同2.3元，預測市盈率(PE)，由家陣9倍，進一步跌到得6.7倍同6.2倍，恒指所講今、明兩年預測PE，都上到12.7倍同11.5倍，中信平咗近半！中信超低PE，加埋中港狂牛資金市因素，絕對有條件SUPPORT集團，中線上衝50蚊水位。 再講，中信今年頭引入包括泰國首富謝國民為首嘅正大集團做股東。謝生對上一次，大額投資祖國股票，係2013年時，買入當時應佔15.57%嘅平保(2318)權益。平保到咗家陣，係累升超過80%。謝生無寶不落。 煲中信，就算保守少少，當追番上恒指明年11.5倍PE水位，都講緊要升85%，到近27蚊。 作者為中細價股專家
山東墨龍(568)唔止受惠呢期油價彈，嚟緊日子，深港亦遲早通，會香江H股升幅，慢過A股九拍，趁調整，買墨龍。 墨龍主打石油鑽採機械設計同產銷。啱4月尾，該集團公布第一季盈利增長3%，而嚟緊半年度成績單，盈利起碼keep到上年同期水位，到最多增長30%。美國期油單係1年嚟，累跌咗78%，墨龍頭一季keep到，兼半年盈喜機會，主要係自家產品value added，又攞到新客。墨龍有競爭優勢，低迷期過後，肯定大放異彩！ 咪扯咁遠，墨龍半年盈喜有得叫胡，呢轉油價彈，墨龍又有point炒。又墨龍深圳上市A股(002490)現價折約20.3港銀，墨龍香江H股4.96元，比A股大折讓咗75%！場內同樣係油服股嘅中海油服(2883)，H股比A股(滬：601808)折讓62%。喺有對應A、H股行家當中，墨龍折讓係最大。 仲未止，墨龍A股由4月打後一枝箭，創咗1年新高，香江H股郁都唔郁，而喺香江所有對應A股嘅H股，墨龍A、H股折讓，係排第二。 諗到係，深港遲早通，北水睇到墨龍咁大折讓，漏晒口水。唔好計多，墨龍單係升番A股由4月頭以嚟升幅，講緊係要升42%，到7蚊！就算A股唔再升，到時，墨龍H股比A股折讓，亦啱收窄到上邊中海油服A、H股折讓水位！ 作者為中細價股專家
新時代能源(166)1年累計，係無升過，同呢期炒到甩轆嘅股仔脫晒節，大落後，食住呢潮油價彈，新時代有得諗吓。 新時代係新世界彤叔嫡系成員，主打美洲區油田，手頭有包括阿根廷Palmar Largo同美國猶他州尤因塔盆地能源資產。而啱今年4月，集團亦趁油價喺近6年低位，再出手，買入阿根廷Chirete能源區塊50%參與權項目，係實實在在有油賣。 睇番油價，美國期油今年3月18號見42蚊美金，係08年12月環球金融海嘯底32.4美金之後，近6年低位，之後油價一路直彈，到家陣累升45.5%，新時代食住油價彈勢，已經有point炒。 再講，新時代上年二供一，供股反應一般，有效接納率得67.6%，包括大股東「萬新」同部分一致人士，要履行包銷，股權由供股前40.52%，跳到供股後59.98%，係變相大增持。經供股後，街貨股數只係多出3.35億股，現價(0.33元)等值1億銀咁大把。新時代上年年報講明，若果有必要(資金需要)，集團會考慮其他不同資源籌集。即係話，新時代再供股可能性，係減低咗。 又連呢板供股，新時代每股資產值仍然高達1.9元，現價折讓83%，油氣股當中，無乜邊隻折讓，有新時代咁離譜！趁油價彈，炒新時代，當翻半番0.5元計數，折讓仍然高達75%。 作者為中細價股專家
青島港(6198)喺「一帶一路」港口股當中，預測市盈率(PE)平霸，上番行家平均水位，現價係講緊要翻過一番。 青島港係青島市港口旗艦，上年，集團貨物吞吐量增加8%，比沿海主要城市港口平均增幅5.6%好。而由上年到家陣，青島港已經先後同西哈努克、巴基斯坦瓜達爾港，同法國布雷斯特港，簽訂戰略合作協議。 仲未止，啱上月尾，青島港公布同海豐國際(1308)合作，發展港口同海上物流業務。睇到係，青島港跑贏其他港口同時，無鬆懈到，集團本身為一帶一路呢個重中之重國策，喺度密密布局，務求阿爺拉動項目上馬，青島港即時到位，青島港跑贏其他港口行家，唔係無道理。 又喺香江幾隻重點港口股當中，Value Partners亦揀青島港嚟買，家陣揸青島港H股15.25%，真金白銀投青島港信心一票！ 場內專業評估，青島港今明兩年每股盈利0.48港元同0.53港元，現價(5.33元)明年預測PE，得10倍。場內大連港(2880)明年預測16.3倍PE、廈門港(3378)15.5倍、天津港(3382)15倍，又祖國一帶一路港口股，明年PE係25倍到30倍不等，青島港平霸！ 買青島港，當上番行家平均23倍PE，現價要升128%到12.2蚊。打個五折計數，青島港升64%到8.7元，潛在回報率亦已經好肥仔！ 作者為中細價股專家
海爾智能健康(348)1年累升30%，場內同樣有個超級母系嘅威靈(382)，就算唔計啱除息效應，1年都累跌26%，本身淨現金，亦講緊挨近到20億銀，威靈有個超級媽打，加埋超級銀彈，遲早發圍。 威靈對口係美的集團(深：000333)，市值高達1,600億人仔，折約2,000億港銀，係青島海爾(滬：600690)1,194億港銀嘅1.67倍，亦係威靈50.4億銀市值近40倍！威靈終極對口，係超級大孖沙，若果母系有心湊大威靈，一啲無難度。又威靈到上年尾，揸咗淨現金19億銀，係市值38%比重，威靈本身又係超級現金牛，要發圍，本身又有銀彈優勢。 再睇威靈下家空調市場。今年頭一季，祖國家用空調銷量1,610.3萬台，同比增加0.45%。踏入4月，空調生產總量1,391萬台，同比增加5.4%，銷量1,397萬台，同比增加4.65%。成個picture係，喺頭一季空調淡季，祖國空調銷情，比起上年同期，起碼持穩，到4月，開始踏入旺季，產銷兩旺。威靈主打空調電機有運行。再講，智能家居大熱，家電value added，母系美的，已經同阿里巴巴、小米等等巨頭合作，威靈中線有機跑出。 咪扯咁遠，買威靈今年turnaround，每股盈利去番2013年0.277元水位，已經講緊增長16.6%，預測市盈率(PE)得6.5倍，keep住4厘高息。買威靈，PE上到10倍計，現價(1.79元)都講緊要升54%到2.77元。 作者為中細價股專家
中糧包裝(906)喺中糧系同行家裡面，市帳率(PB)至平選擇之一，跑輸幾條街，已經夠晒條件追落後。 中糧包裝對口係超級大孖沙中糧集團，而中糧系總共8隻股票，PB最貴係中糧生化(深000930)，股價1年升咗300%過外，去到6.5倍。香江中國食品(506)，同期亦翻咗一番，家陣2.7倍PB、蒙牛(2319)3倍，大悅城地產(207)啱4月尾發力，亦翻咗半番，PB上到1.3倍。 中糧包裝又點？1年計數，仲累跌緊10%，1.1倍PB，係繼中國糧油(606)之後，PB至平選擇。又行家中國鋁罐(6898)3倍PB，中糧包裝又係平咗大大截！ 中糧系姐妹股升到甩轆，一個好重要賣點，就係炒注資重組，中糧包裝炒同氣連枝，炒落後，已經有Point。 再睇本業。中糧包裝係全國最大金屬包裝企業，又喺奶粉罐、氣霧罐、旋開蓋等等細分市場排名，又係No.1，實力超班。集團又食住兩片罐需求增加個勢，上年以嚟，再新增廣州同南寧生產線，照計，今年兼可以全面反映。 場內專業評估亦係咁估，中糧包裝今年每股盈利增長9%，到0.48港元，11.4倍市盈率(PE)，比起集團本身16倍平均值，又係低咗截。 買中糧包裝，今年PE上番呢個平均值計，現價(5.5元)講緊要升近40%到7.7元，PB兼未有耐追到行家。 作者為中細價股專家
寶勝(3813)運動零售年銷售額過百億元，又有近7,000間零售店，fight低晒對手。互聯網+年代，寶勝有呢個靚絕線下優勢，若果辣埋線上電貿，肯定事半功倍！ 寶勝主打祖國運動零售，阿媽就係鼎鼎大名嘅裕元(551)，寶勝系出名門！睇番寶勝，集團上年年報講明「投資科技，務求為中長期內，應會實施有效的電子商貿策略，做好準備」。電貿呢瓣，聞到有味。 寶勝上年營業額高達154億(港元，下同)，行家安踏(2020)111億銀、李寧(2331)84億銀、特步(1368)59.7億銀，361度(1361)49億銀。而到上年尾，寶勝直營零售店4,263間，加盟店2,689間，總數高達6,952間。講零售網點規模，講營收晒士，寶勝top fit！ 互聯網+時代，要虛實兼備，寶勝線下條件贏盡，市值得54億銀，細過上年見紅嘅李寧84億銀市值，更加只得阿媽裕元約1/8市值。 寶勝今年第一季盈利，一枝箭增長近80倍，去到6,955萬元，4月營收淨額亦增加咗18%，到17.6億銀，靚仔到痹！唔求多，寶勝今年盈利係第一季年度化，到近2.8億銀，已經講緊增長6.7倍！ 又寶勝現價(0.92元)市帳率(PB)得0.72倍。安踏近5倍PB、李寧3倍、特步1.2倍。講PB，寶勝又係平霸。硬數據比併，寶勝追番最近磅嘅特步PB，都要翻過半番，到1.5元。 作者為中細價股專家
祖國港口股喺一帶一路concept下，升到甩轆，場內保華集團(498)主打港口瓣數，亦食正一帶一路，兼且市帳率(PB)平霸！ 阿爺搞一帶一路國策，咪以為港口股瞓晒覺，查實隻隻生猛，關係到一帶一路區域港口股，好似日照港(滬：600017)，一年累升咗180%、營口港(滬：600317)升咗246%，又市值講上167億港銀嘅連雲港(滬：601008)，同期亦升咗191%。 睇番保華。集團主打宜昌港務、江陰蘇南集裝箱碼頭、南通港，全部都係一帶一路重要區域港口。但保華同期升咗68%咁大把，炒一帶一路，無理由甩漏保華。又保華現價(0.28元)潛喺8年海底價，得0.26倍PB，上邊日照港2.2倍、營口港同連雲港，都係企喺4倍樓上。搵齊中港兩地，得番保華PB，係喺1倍樓下！ 再講，保華家陣喺南通市小洋口，擁11.5平方公里土儲，正係開發成區域性旅遊中心。綜合2013年時報章資料，旅遊中心目標2020年時，接待旅客200萬人次，又唔計商住項目，旅遊綜合收入19億銀。 亦諗到係，食住一帶一路，呢壇製作若果順風順水，俾到保華中線增值同收益，唔係講笑。咪扯咁遠，保華PB平到笑，兜轉落後，當PB係咁意收窄到0.5倍，保華都講緊要升89%，到0.53元。而目標PB水位，兼未有耐追到任何一隻港口股！ 作者為中細價股專家
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
