兩件一周 - 錢雋
2015-09-09

北京控股(392)廿年人事幾番新,主打瓣數覆蓋晒環保國策同公用系列,可守可攻,睇位輕輕手先買一注。 北控主打燃氣,又透過北控水務(371),發展祖國供水污水項目,既係穩陣公用項目,兼係重點環保國策瓣數。而集團啱公布半年成績單無耐,盈利增長10%到31億銀,靚仔。而半年打後,大圍氣氛逆轉,市場擔心經濟放緩,但北控話,積極推動燃煤鍋爐改造,所以,即使面對經濟下行壓力,估計全年燃氣銷售量,仍然有30%增幅。睇到係,集團本身有適當策略應對,避免大波動帶嚟影響。 又以呢期淡到似水嘅悲觀睇法,加埋人仔貶值後,場內最新專業評估,兼且以最低盈利預測做準,北控2015年、16年每股盈利3.55元同3.7元,現價(43.8元)預測市盈率(PE)12.4倍同11.9倍。過去10年,北控歷史平均PE講緊26倍,北控預測PE平咗截之餘,亦係貼住10年最低水平。同樣以專業評估做準,北控今、明、後三年每股派息1.18元、1.39元同1.6元,現價2017年預測息率3.6厘,高過上年2.08厘。 不妨再計數,北控喺40蚊水位,2017年預測息率,進一步上到4厘。就算美國話加息,北控呢個息率回報,肯定吸引過未來幾年紅簿仔存款息率。北控再跌,兜40蚊先撈一注,當上番瑞銀已下調咗嘅目標價54蚊,北控都講緊要升35%,明年預測16倍PE,未有耐上到10年平均值。 作者為中細價股專家

2015-09-04

橙天嘉禾(1132)係少數仲未拍大孖沙碼頭嘅電影文化產業股,又經大股東呢期密密增持,街貨權益「變相」跌到得33%,等值3.7億元咁大把,再跌就要。 橙天嘉禾老闆伍克波,啱喺7月港股大插插時,落場增持集團3,323萬股,權益由65.9%,升到上67.15%,真金白銀投橙天嘉禾信心一票之外,街貨權益得33%。 又今年所見,電影文化產業先嚟料,唔少大孖沙都踩落呢瓣項目,好似阿里影業(1060),同今年6月,透過配股,引資百度嘅星美(198)。今年上半年,祖國票房203億元人仔,翻咗近半番,祖國電影同市場火辣辣,係另一個待開金礦。 橙天嘉禾影院網絡,唔單只喺祖國,亦連港、台,同星洲,都設有影城,合計亞洲區營運93家影城,提供690塊銀幕。而集團4月到家陣,累跌62%,現價(0.4元)市帳率(PB)得0.6倍。呢期行家同樣經歷洗倉式下跌,但星美PB,仲講緊1.7倍、漢傳媒(491)1倍、上邊阿里影業2.8倍,橙天嘉禾比行家,平咗成截。 睇到係,橙天嘉禾喺亞洲建立咗有規模影院網,本身牌頭亦一啲唔削,加埋比對行家,亦平到痺,橙天嘉禾絕對有吸引大孖沙嘅質地。 唔扯咁遠,吼實橙天嘉禾7月低位0.35元,再跌穿就輕輕注收集,到時,股價同海嘯價已經差無幾,當博反彈計,上番0.5元,都有47%潛在回報率,到時PB,未有耐上到1倍,兼遠未追到上邊行家。 作者為中細價股專家

2015-09-02

大健康(2211)啱派咗半年度成績單,盈利keep住唔錯增長,憑住大型網絡優勢,加埋藥品係必需品瓣數,大健康繼續有運行,市盈率(PE)平過行家一截。 大健康主打醫藥零售同分銷,亦係東北省最大零售商,到今年6月,零售店總數953家,係地區巨無霸。之所以係咁,集團亦都成為阿里健康(241)東北平台合作連鎖藥店。又大健康前稱金天藥業,7月改名,反映集團正朝住多元瓣數嘅醫藥產業進發。 成個picture係,互聯網世代,大健康憑住呢個線下網絡優勢,上拓線上瓣數,同埋進軍多元瓣數,更加事半功倍!咪扯咁遠,國家統計局數據,今年上半年,全國醫藥規模以上企業,收入1.2萬億銀人仔,同比增加8.91%,而大健康期內營收25.7億銀人仔,同比增加近26%,遠遠跑贏大市,盈利亦keep住9%增長。 尤其集團主打醫藥零售瓣數,受經濟循環嘅左右比較低。又人口老化、都市病增加,係老調,亦係事實,據中國醫藥信息中心估計,到2019年,祖國醫藥市場會去到2.2萬億元人仔,大健康喺靚仔環境底下,繼續有運行。 場內專業評估,大健康今、明兩年每股盈利0.34港銀同0.38港銀,明年預測PE由家陣9.7倍,跌到得7.3倍,祖國行家閒閒地10倍樓上,大健康PE好吸引。 個市大chok chok,吼住大健康今年頭橫行底2.3元兜轉,上番10倍PE計,講緊要升65%,到3.8元。   作者為中細價股專家

2015-08-21

中國高速傳動(658)發盈喜,都頂唔順港股大chok chok,但跟貼國策股無壞,預測市盈率(PE)又喺行家當中數一數二咁平,有得諗。 中傳動主打發電齒輪傳動設備,集團啱公布話,嚟緊28號派嘅今年上半年成績單,盈利會翻一番,主要係因為風電傳動設備大幅增長。睇到係,中傳動盈喜,主要係主打瓣數帶動。仲有係,集團未計1),今年應該排除好似上年,要計入出售聯營公司虧損1.3億銀人仔,同2),一項工業用地被收儲,獲益3億銀人仔,呢兩項額外盈利增長因素。連埋呢兩板因素反映,中傳動全年成績單,仲fit。 祖國報載,嚟緊「十三五」規劃,包括風電目標上調基本確定,估計會由「十二五」時2億千瓦,提升到2.5億千瓦。又據估計,「十三五」期間,市場投放落環保瓣數資金,高達6萬億銀人仔。中傳動做上家設備生產,又係祖國最有規模設備商之一,食住阿爺環保國策,加埋自身優勢,繼續有運行。 場內專業評估,中傳動唔計上邊兩項額外因素,單靠自然增長,今明兩年每股盈利0.57港銀同0.64港銀,現價(5.72元)預測PE,得10倍同8.9倍。場內有咁上下分量行家,明年預測13倍到20倍PE不等,中傳動平咗一截。 買中傳動,當明年預測PE上到13倍計,都講緊要升45%,到8.3元,市帳率1.4倍,亦啱先追到最近磅嘅航天萬源(1185)。 作者為中細價股專家

2015-08-12
2015-08-07
2015-07-31

天津發展(882)阿媽開始action,向津發注醫藥瓣數,但似乎只係第一波動作,注資應該陸續有嚟。 津發啱上周發公告,話以約29億銀,向對上控股公司,購入醫藥項目,以作價對應保證溢利計出預測市盈率(PE),過20倍,但津發收購價,就比成撼藥業資產,有4%折讓,呢個point睇,算係買平嘢。又呢壇製作若果順風順水,意味住津發轉型或者加大醫藥瓣數機會提高,又由於動用銀碼唔多,30億銀唔夠,注資應該陸續有嚟。 粗略計數,唔計出售王朝酒業(828)股權,呢項非經常性收益,津發上年實際稅前溢利6.15億銀。呢次津發買醫藥瓣數,未來兩年,年均保證溢利過1億元,數額喺等於上年實際稅前溢利20%比重樓上。亦都諗到,新增醫藥瓣數,可以彌補其他原有瓣數不足,而祖國醫藥市場潛力勁厚,呢瓣亦有機會成為津發中線增長turbo。 唔扯咁遠,津發現價(6.4元)往績市帳率(PB)得0.6倍,已經係祖國窗口股當中,最平選擇之一,若果加埋醫藥瓣數,津發就更加抵買。場內隨手揀件有質地醫藥股,PB都1倍過外,而津發計劃買入資產當中,有包括祖國上市力生製藥(深:002393),PB係講緊2.3倍。 收集津發,博第二輪注資,炒PB折讓,一樣有得諗,當上番美銀美林啱發目標價9蚊,津發要升40%,到時,集團PB都仲喺1倍樓下。 作者為中細價股專家

/136



C觀點

中原城市領先指數

廚神

旅遊