AM730

全部專欄 , 兩件一周

兩件一周 - 錢雋

國美來猶可追

2015-11-04

國美電器(493，圖)線下實體店靚絕，明年度得13倍市盈率(PE)，來猶可追。國美唔計上年上半年非經營性收益，啱呢個半年度，實際盈利係增長16%，到6.9億銀(人仔，下同)。場內專業評估，國美喺未計入計劃收購大股東其餘線下實體業務(藝偉發展)前，單靠已上市部分，今、明兩年每股盈利9.8港仙同0.11港元，預測15倍同13.7倍PE。同級對手蘇寧雲商(深：002024)今、明兩年預測500倍PE，去到2017年大降，但都講緊148倍PE。市場咬住一點，蘇寧線上營收夠SIZE，俾到蘇寧呢個PE水位。咁睇，國美本身已經有雄厚實體線下網絡，而上個月中，國美公布藝偉今年上半年盈利，去到近2.6億銀，增長咗75%。而收購藝偉作價，亦由原先113億銀，減到90.9億銀。樂觀計數，按藝偉半年盈利起個孖計，今年全年預測6.3億港元盈利，收購價PE，折約14.4倍PE，比起國美今年本身預測PE，仲要平，國美兼會成為場內頂級線下零售商，打線上市場，無往而不利。當然，呢壇製作，係咪成事，要等股東議決。唔扯咁遠，睇硬數據，國美來猶可追，當上番兩蚊港銀計，現價(1.47港銀)要升37%，明年預測PE，先得20倍，若果國美兩年後線上瓣數成熟，仲企呢個PE水位，中線爆炸力，更不得了！作者為中細價股專家

1168再食息無著數

2015-10-30

百仕達(1168)手頭淨現金高達28億銀，喺雙降情況下，揸Cash收息，愈嚟愈奀，現金牛要搵發財路數。百仕達到今年6月尾，揸現金近30億銀，得借款2.2億銀，淨現金28億銀，幾乎係總市值水位。百仕達無細分存款數額分部，但講咗大部分係人仔、港元同美金。都咁睇，喺高息年代，百仕達現金多，單係食住利息收入，都好和味。但港、美長期keep住低息，而美國話加息，講緊N時，嚟緊日子，就算真係加，都無條件加得多。呢邊廂，阿爺放水救經濟，keep住雙降，即係話，嚟緊日子，連人仔存款息率，亦一路減少。再睇姐妹系威華達(622)，上年以嚟，透過運用手頭銀彈，進行證券投資，亦因為呢瓣發力，到今年6月尾，資產大升值近40%，到60.5億銀。百仕達淨現金，係威華達2.8倍，一樣可以好似威華達咁，利用超級銀彈優勢，去壯大資產同搵真銀。百仕達近年無售樓收益，講緊過百倍市盈率，但現價(0.87元)市帳率(PB)0.4倍，有唔錯折讓墊底。又百仕達喺上海長寧區「寧國府邸」呢個超豪項目，總面積雖則得146萬方呎，但肯定寸金尺土，隨住呢壇製作明年下半年搞掂，百仕達資產增值，肯定係以斷十億咁計數。呢轉煲百仕達，當追番上威華達0.56倍PB水位，係講緊要升38%，到1.2元。作者為中細價股專家

信達食正寬鬆政策

2015-10-28

中國信達(1359)幾瓣業務，食正阿爺金融寬鬆政策，股價仲潛喺上市以嚟低位，得5倍超低市盈率(PE)，大把博向上彈嘅空間。信達係祖國四大資產管理龍頭之一，主打不良資產管理、證券、資產管理投資等瓣數。啱過去周末，中國人民銀行雙降，阿爺再放水，信達幾瓣都食到正。又信達現價(3.07元)，仲潛喺2013年上市以嚟低位，比起5月時高位5.23元，仍然累跌40%過外，相對上市價3.58元，潛水15%，殘到爆。場內專業評估，信達今、明兩年每股盈利0.52港銀同0.6港銀，兩年預測5.9倍同5.1倍PE，祖國同樣食正減息潮內券股，兩年平均16倍同15.2倍PE。仲吸引係，除咗受惠雙降之外，信達前排話買南洋商業銀行，呢壇製作若果順風順水，集團將會係四大不良資產管理公司中，唯一一間攞到金融瓣數全牌照，對日後坐大壯大，同資產值提升，更加無往而不利。專業預估，亦係咁估，信達今、明兩年每股資產值，分別增加11%同12%，去到3.57元同4蚊，今、明兩年市帳率(PB)得0.85倍同0.77倍，而內券平均PB，係講兩倍樓上，信達又係平咗超過50%。參考彭博18個場內大行報告，有16個建議買入信達，即係佔咗近90%評級，都係睇好信達，又唔好貪多，中線當信達係咁意翻半番到4.6元計數，明年預測PE先得7.5倍，係未有耐追到內券股平均PE水位。作者為中細價股專家

1798冷灶有得諗

2015-10-23

大唐新能源(1798)綜合今年頭9個月，無論成績單或者發電量，都有睇頭，但股價係無點郁過，同級數新能源國企股，大唐新能源市帳率(PB)又至抵搞，冷灶有得諗。大唐新能源由上年上半年出血1,440萬銀(人仔，下同)，虧轉盈到今年上半年盈利2.8億銀。就算唔計今年金融資產虧轉盈5,400萬銀(上年項目出血1.28億銀)，呢項非主打項目收益，實際盈利都增長近40%，靚仔到痺。又拉上補下，今年頭9個月，大唐新能源完成發電量778.27萬兆瓦時，按年增加近10.5%，該集團今年第四季，只要中規中矩，全年成績單已經掂檔，有得炒盈喜。大唐新能源現價(1.04港銀)潛喺近兩年半低位，比起今年6月底資產值，現價得0.7倍PB，又比起集團由2010年上市以嚟嘅平均0.9倍PB，亦折讓咗22%。場內同樣係大型國企級旗下潔能股，華電褔新(816)同華能新能源(958)，都係1.3倍PB，又北京市重點新能源企業京能潔能(579)1.25倍，就算大唐新能源比最平嘅京能，PB亦係平咗44%。五中全會就開波，新能源應該係阿爺焦點鐵膽，冷灶煲大唐新能源，當上番本身平均0.9倍PB，講緊要升28%，到1.3港銀，呢個目標PB水位，都仲未追到京能。作者為中細價股專家

煲綜環魚毛變星斑

2015-10-16

大孖沙新世界彤叔乖孫鄭志明，擔正綜合環保(923)掌舵，綜環潛喺上市以嚟海底價，可以繼續一沉不起，但綜環係有放長線釣大魚嘅條件。綜環前稱褔和，因為前朝問題帳目，搞到2012年時，要狠撇17億銀大出血，上年1月先復牌，鄭志明入局坐正做主席。又經上年中供股，周大褔變相增持，由原先20%，增加到近47%，成為綜環最大股東。綜環經歷風雨，由2010年高位2.39元，累跌92%，現價(0.2元)係海底價。綜環個名，無掛「新」字，唔認真係新世界嫡系，又集團區區9.7億銀市值，比起新世界系股份，係魚毛晒士，大股東擺埋一邊，唔奇。但咁睇，鄭生入局後，最新拍住德國企業ALBA，搞廢棄電器同電子產品處理回收。網站介紹，ALBA大有來頭，係廢物回收再生原料先驅，成立近50年，去到2012年時嘅年營業額，高達29億歐元，折約257億港銀。睇到兼諗到，鄭生入局後，真係堅做嘢，而廢電回收呢個環保經營行頭，世界通行，尤其喺祖國咁龐大嘅發展空間。唔講注資同大股東牌頭背景，對新掌舵一手一腳，湊大綜環，係有一定憧憬。但老老實實，綜環新瓣數開Turbo前，嚟緊一年半載，業績如此這般，暫時，係得0.76倍市帳率，同4.5億銀淨現金墊底，短線更視乎有無資金炒落後辣起。煲綜環，博魚毛變星斑，要有擺埋一邊嘅準備。作者為中細價股專家

2015-10-14

天津創業環保(1065)A股，由呢個月10號到家陣，累升32%，津創香江H股，跑輸A股之餘，A、H股折讓挨近60%，而香江H股預測市盈率(PE)，又比行家平一大截，津創殘到痺。趁市場炒新水務條例出台，兜轉津創。津創近期低位喺9月2號，當日創半年新低，以當日收市價3.85元計，到家陣都係累升26%，跑得比本身A股慢。又津創A股現價約11.84港元，H股現價(4.85元)比A股折讓59%，A股呢邊2015年度預測PE，高達41倍，津創H股同年預測16倍PE。仲未止。場內行家，北控水務(371)今年預測23倍PE、東江環保(895)28倍、中滔環保(1363)24倍，就算比最近磅嘅北控水務，創津預測PE，都平咗25%。又祖國水資源污染同匱乏，當中，津創主打天津市，亦被喻為水資源嚴重缺乏城市。又喺一帶一路同京津冀兩個重點國策底下，阿爺落墨，重點扶持天津市，亦需要搞好包括食水、污水處理等等必需嘅民生配套。諗到係，喺呢個優勢底下，津創可以長做長有。上周五，市場炒水價改革將出爐，北控水務率先開波，津創亦一樣受惠，博轉津創，就算北控水務今年近22倍PE做目標，津創都講緊要升37%到6.6元。又假定津創A股唔郁，到時，H股比起A股，亦仍然有46%折讓！作者為中細價股專家

二七孖二殘得很

2015-10-09

重慶機電(2722)挨係近5年底，成間公司總市值得41億銀，市帳率(PB)比上市以嚟平均值，仲要平咗近四成。喺重慶市GDP跑第一優勢下，重機仲係如此這般，係等阿媽湊大。重機現價(1.11元)得0.59倍PB，集團上市以嚟平均值0.96倍，家陣PB係大折讓咗39%。又重機H股市值得12億銀，成間公司市值41億銀左右，場內雙馬(馬雲及馬化騰)系殼股嘅市值，隨時高過重機。重機殘得很，主要原因，相信係集團唔能夠突破業績框框。對上幾年，盈利喺4億至5億銀人仔上落。而今年上半年，祖國汽車工業唔掂檔，集團側重嘅汽車零部件瓣數，分部更加見紅過兩億銀人仔，總體盈利倒退3%，到1.85億銀人仔。但咁睇，重機阿媽重機集團，係重慶市國資委授權經營國有企業，來頭唔係細。再講，重慶市多咗好多新興戰略性產業，而得力於產業轉型，該市今年上半年GDP全國跑第一。重機喺咁優厚環境優勢下，係有條件進行產業轉型同升級。又早喺上年4月，集團管理層亦講明，為配合混合所有制，母企計劃注入優質資產。重機係等阿媽湊大。呢轉國央企重組Concept股，時唔時俾資金辣起，重機一樣有呢個Concept，加埋水向下流炒落後，落後重機，一樣有機。唔貪多，博重機翻1/4番到1.4元計，PB先得0.71倍，未有耐上到平均值水位。作者為中細價股專家

銀證跌到嘔凸

2015-10-07

銀河證券(6881)唔計今年以嚟增值，單以上年尾每股資產值(NAV)做準，市帳率(PB)仍然係至平選擇之一。環球股市大彈，明日A股復市，博復市彈，銀證有得諗諗。銀證到今年6月尾NAV6.92港銀，現價(5.79元)PB得0.85倍。6月打後，中港股市倒水咁倒，就當銀證今年以嚟增值一筆勾銷，以上年尾NAV 4.64港銀做準，銀證1.25倍PB，比起該行上市以嚟平均1.57倍PB，已經平咗。銀證由今年5月高位14.12元，一路直插，到家陣累跌59%，相若期間，上證綜合指數由今年6月高位5,176點，到家陣累跌41%，現價對應上證綜指，講緊係上年11月2,500點水位，銀證嘔凸！又同樣以上年尾NAV計數，場內內券西部證券(深：002673)同期7.26倍PB、長江(深：000783)2.7倍、廣發(深：000776)1.4倍、華泰(滬：601688)1.3倍，而內券平均2.4倍PB，銀證係最平選擇。場內專業評估，銀證資產表現，唔係想像中咁差，今、明兩年NAV，分別調升到6.8港銀同7.4港銀，預估0.86倍同0.79倍PB，亦係場內至抵搞內券之一。兜轉銀證博反彈，當上番平均1.57倍PB計，現價要翻1/4番到7.28元，銀證都未有耐追到上行家平均水位。而8月以嚟大行報告，大華繼顯同滙豐目標價最牛，睇銀證10.8元，係講緊現價翻一番！作者為中細價股專家

六孖二似開波

2015-10-02

場內細價嘢失驚無神開波，好似太平洋實業(767)，打咗近兩個月底，周二突然一棍，單日翻咗半番。場內有隻走勢同太實幾似樣，兼啱開波，就係威華達(622)。威華達由7月8號反彈後，再跌番近當日低位，跟住一路橫行。啱周三，集團以近30球成交股數，起咗第一棍。又同太實一樣，威華達原來又係股壇高高手，今年上半年盈利，就一枝箭升咗4倍，到16.8億銀，當中，金融資產增值收益，達到20.4億銀。下半年打後，港股大插插，唔多唔少，或者影響到包括威華達嘅證券投資表現。但咁睇，威華達到今年6月尾現金11.5億銀，Keep喺上年尾水位。即係話，威華達今年上半年時，應該無額外再撥錢落個Pool度，所以，投資大增值，唔係新增資金嘅結果。又威華達上年全年盈利，只係講緊5億銀，粗略計數，將集團今年上半年盈利打五折，亦已經超過上年全年水位。威華達到6月尾時每股資產值(NAV)0.85元，比上年尾0.61元，每股增值0.24元，或增加39%。同樣保守將呢撼增值打五折，到每股0.12元，威華達經調整後NAV0.73元，現價(0.395元)市帳率(PB)0.54倍。7月時火紅火綠期，威華達見1蚊時，PB係講緊1.6倍！呢轉威華達啱有鑊氣，短打博翻1/4番到0.49元，集團PB都係得0.67倍，兼未追到上邊太實0.75倍PB水位。作者為中細價股專家

廣南CASH RICH

2015-09-30

廣南(1203)喺成個粵海系裡面市帳率(PB)至抵，又食住養豬業回穩，應KEEP到高息，再插要(目及)實。廣南由6月高位2.23元累跌55%，現價(1.03元)喺1年底，市值9.35億元，最新6月尾淨現金講緊7億銀，廣南殘到爆。廣南呢個殘價嘅PB得0.38倍，其餘成員粵海投資(270)PB講緊2.1倍、粵海置地(124)0.58倍、粵海製革(1058)1.16倍，廣南平通全系。廣南除咗主打馬口鐵，亦藉聯營搞養豬業。今年第二季祖國豬價開始起動，3月以嚟活豬價翻咗半番。連埋養豬業在內鮮活業務喺上半年溢利增14%。諗到係鮮活食品係民生必需品，加埋豬價低迷好耐，呢轉大反彈，呢一瓣好景，照計可彌補馬口鐵潛在閃失兼穩定全年成績單，keep住有盈利。唔好計多，廣南上半年每股盈利6仙，預計全年每股盈利起個孖到0.12元，應可維持全年每股派息4.5仙，廣南喺呢個殘價預測息率，講緊近4.4厘。排除粵海系重組憧憬，睇硬數據，廣南有燒冷灶價值。廣南再跌，(目及)實2011年以嚟橫行鐵底0.88元兜轉，到時預測息率上到5厘，市值7.9億銀，幾乎同淨現金睇齊，防風力仲強。以廣南翻1/4番到1.1元計，PB得0.44倍，仲未追到最近磅嘅粵海置地PB水位。廣南下半年EPS只係keep住上半年6仙，全年EPS為0.12元，預測8.7倍PE，唔係過太，最起碼可keep到上年2.5仙末期息，全年預測息率上到4.3厘，吸引！廣南到6月尾淨現金7億元，cash rich亦俾集團相對充裕條件繼續派息。廣南現價幾乎落番2011年起步位，比過往10年歷史平均0.77倍PB平咗近半，挨近08年金融海嘯10月慘烈價0.33倍PB水位。作者為中細價股專家

重慶銀行平絕行家

2015-09-25

重慶銀行(1963)食住地區優勢，盈利增長跑贏絕大部分行家，預測市盈率(PE)行內至低，加埋密籠，再跌要兜底。重慶行今年上半年盈利18.4億銀人仔，升10%，場內同樣主打呢個地區嘅重慶農村商業銀行(3618)，同期增長8%，重慶行係繼盛京銀行(2066)之後(半年增長28%)，增長最靚仔嘅內銀。上周主打慶鈴汽車(1122)時提過，重慶今年上半年GDP增長11%，冠絕祖國，該省兼自行培育出十大戰略性新興產業。亦諗到係，新產業避免同其他地區惡性競爭，支持重慶地區高增長，亦激化資金需求，喺呢個優勢下，重慶行係長做長有。場內專業評估，重慶行未計攤薄前，今、明兩年每股盈利1.36港元同1.49港元，現價(5.43元)預測PE得3.9倍同3.6倍，而明年預測PE，亦平絕行家。重慶行已發行11.57億股H股，大新銀行(2356)揸咗4.58億股，或39.63%、另重慶力帆持有1.39億股或12%，真係街客貨量，唔夠五成，等值32億港銀咁大把。重慶行街貨市值細，又H股權益，相對其他內銀，密籠好多。重慶行6月協議配股，每股配股價7.65元，同重慶行最新每股資產值差無幾，重慶行應該唔會調低配股價，平價配股，但考慮埋個市時風時雨，低吸勝算更高。重慶行質穿5.4元就收集，當上番呢個配股價，起碼講緊要升40%，明年預測PE，5倍咁大把。作者為中細價股專家

中軟引資大孖沙

2015-09-23

中軟國際(354)喺軟件股當中，預測市盈率(PE)係最平選擇，而集團經6月以嚟大插插，股價質穿引資大孖沙入股成本價3.68元，。中軟今年5月，以每股3.68元向交通銀行(3328)配售5,000萬股，又以同一配股價，另配售5,000萬股俾人保(1339)、中國人壽信託，同中人壽富蘭克林資產。中軟今年6月2號創8年新高5.79元之後，一度大插插61%，到8月25號2.28元，就算以現價(3.01元)計，仍然累跌48%，比引資大孖沙配股價，仲係潛緊水！咁睇，上邊中軟新引入股東，全部唔係「等錢開飯」，但勝在實力雄厚，照計唔係短線客。再講，中軟亦可以借助交行，喺金融領域實力，拓展金融服務同潛在客戶，呢次引資，百分百有利。中軟今年上半年盈利增長近38%，到1.4億元人仔，每股盈利(EPS)8.7港仙。場內專業評估，中軟今、明兩年EPS0.17港元同0.21港元，由往績23.8倍PE，進一步調整到17.8倍同14.4倍。行家金蝶(268)今、明兩年28倍同23倍預測PE、金山軟件(3888)31.3倍同15.4倍PE、擎天軟件(1297)20倍同15.9倍，中軟平咗截。兜中軟，住呢兩個月小型平台2.64元，見調整挨近呢個水位兜轉，以上邊行家明年約15、16倍PE做目標，中軟要見3.4元，即係建議兜入價潛在升幅29%，短打都有魚有肉。作者為中細價股專家

慶鈴8厘高息

2015-09-18

慶鈴(1122)食住地區性優勢，半年成績單有增長之餘，亦跑贏場內行家，現價保守8厘高息，係唔錯冷吼選擇。慶鈴今年上半年盈利，增長11%到2.65億銀人仔，集團唔係跟大潮流，sell環保車，或者做高檔次，穩穩陣陣，憑住商用車，支持業績增長。而集團呢瓣項目，上半年溢利翻半番到1.479億銀人仔。同期，祖國總體商用車產、銷量，分別係176.72萬輛和175.47萬輛，較去年同期分別下跌14.9%和14.4%。慶鈴跑贏呢瓣行家，實情彈咗出嚟。咁睇，慶鈴主打基地重慶市，唔一味食舊路，近年致力發展新瓣數，已培育出十大戰略性新興支柱產業，重慶市兼為呢批產業，成立股權投資基金800億銀人仔。重慶市喺上半年GDP增幅，脫穎而出，排No.1，去到11%。喺咁嘅環境底下，慶鈴食住地區高速增長，支持到主打商用車瓣數，業績省鏡。嚟緊日子，呢個優勢keep on，慶鈴全年盈利，係咁意維持半年度11%雙位數增長，無難度！仲吸引係，往績紀錄，慶鈴鍾意派高息回饋股東，以上邊保守預測，慶鈴今年亦應該keep到每股派息0.2港銀，現價(2.56元)息率回報，係講緊8厘。又係嗰句，美國加息，紅簿仔幾時得嚟8厘存款高息？當慶鈴番上今年4月頂位3.2元咁計，現價升幅27%，到時，集團預測息率仲講緊高達6.3厘，實情仲係好吸引。作者為中細價股專家

2015-09-16

珀麗酒店(1189)呢期跟中港大插插，兩個半月跌咗近60%，最新手頭淨現金，係總市值近3倍，超級現金牛，係佢賣點。珀麗現價(0.495元)去番1年半起步位，兼質穿今年6月頭配股價0.89元，總市值得3.95億元，殼價不如。珀麗市值細奀，但隨住集團6月配股，大股東錦興(275)權益，由配股前近22.6%，進一步攤薄到得18.8%，無極大股權喺手。所以，憧憬珀麗將手頭現金派晒出街，再賣盤，呢個可能性唔係咁大。但咁睇，珀麗連埋今年6月頭配股集資1.1億元，到6月尾止，集團手頭現金11.6億元，減埋同期1,000萬元借款，淨現金係高達11.5億元，兼且係家陣低殘市值嘅2.9倍，或現價比每股淨現金1.46元，大折讓66%！又淡靜市道下，嚟緊日子，提供大把執筍嘢機會。又珀麗若果透過適度槓桿，進行借貸，亦可以進一步提升現金水平，超級銀彈，就係優勢。珀麗連埋呢期配股攤薄，每股資產值3蚊，集團呢個殘價嘅折讓，高達84%，珀麗折讓，場內酒店股數一數二。又上邊錦興，講緊0.22倍PB，珀麗比錦興仲要殘。呢幾日，細價嘢又癲鳳鬥狂龍，珀麗啱上周五，起第一棍陽燭，煲冷灶，當翻1/4番到0.63元，未有耐上到每股淨現金。唯一考慮，錦興啱有供股前科，有興趣珀麗，小注怡情就算。作者為中細價股專家

2015-09-11

內房有持續回暖勢頭，場內份屬央企嘅五礦建設(230)，食住市場turnaround，加埋注資concept，股價仲係五年海底價，殘到爆。 8月份，新鮮熱辣祖國百城住宅價格指數，新建住宅每方米平均價1.07萬元人仔，同比止跌回升0.15%，環比上升0.95%。咪睇小呢區區升幅，7月A股大插插，之後一路底橫行，成個投資氣氛大逆轉，但整體內房8月數據keep住有進帳，兼係16個月以嚟，第一次出現同比、環比上升。經過阿爺上年以嚟減息同放寬限購等措施，開始發揮效力，內房似係有勢翻身。再睇五礦建設，現價(0.74元)潛喺2010年以嚟低位，市帳率(PB)跌到得0.3倍，過去10年平均歷史PB，都講0.82倍。而五礦建設呢個PB水位，亦係2008年金融海嘯價PB，殘到不得了。五礦建設今年上半年，盈利增長36%到2.4億銀，而投資物業增值收益就翻一番到1億銀，係盈利增長主要動力。但咁睇，集團今年上半年簽約銷售額33億銀人仔，同比增加28%，食住祖國房產整體回暖，銷售成績keep得到，五礦建設嚟緊日子嘅成績單，實淨之餘，兼可以turnaround。唔計央、國企大型重組注資可能性，齋睇硬數據，五礦建設吸引到痺。又五礦建設08年金融海嘯價0.27元，呢轉集團再跌，質穿7月低位0.64元收集，風險有限數，中線博上番0.5倍PB計，都講緊要翻一番到1.2元。作者為中細價股專家

<
1
2
3
4
5
...
11
>

/136

新聞搜尋



	至

C觀點