場內炒A、H股折讓，四川成渝(107)上海A股(編號：601107)相對香港H股，有近40%溢價，加埋憧憬俾阿媽湊大，長短打，都有得諗。 成渝A股折合約3.34港銀，比起香江H股現價2.47元，有達35%溢價。因為A、H股兩地唔同價，H股息率回報，達到4厘，比起A股2.9厘，仲吸引。 又成渝呢年嚟，積極外拓公路以外業務，包括同仁壽縣合作城市建設、房產同公路建設等等，總規模達到600億銀。上星期，成渝亦宣布發展投資基金業務。 咪講成渝不務正業，事實上，隨住阿爺對公路收費規管，成渝唔能夠再食老本，而係要透過新業務渠道支持未來業績。再講，國企行緊混合制，成渝對口係四川省委、省政府，亦憧憬成渝中線俾阿媽湊到高高大大。 家陣，場內有涉及公路以外其他業務嘅，江蘇寧滬(177)同浙江滬杭甬(576)，市場俾到佢哋嘅市盈率(PE)，達13倍，成渝現價貼近3年低位，家陣PE，得5.8倍。隨住上邊兩瓣因素釋放，成渝享受更高PE值，中線少少，同江蘇寧滬同滬杭甬睇齊，講緊係要翻一番樓上，到5蚊。 又東北電氣(042)同浙江世寶(1057)等炒A、H股折讓，再升穿4月頂位，創1年高位。短打博成渝穿頂升約20%，到2.95元，A股仲係比H股，有約13%溢價。 作者為中細價股專家
毅興行(1047)有半年靚仔業績打底，加埋本身新拓展產品線同地區，嚟緊2014年度(3月結)張成績單，應該可以煲吓盈喜。 毅興行主打著色劑、塑膠原料、混料等製銷同貿易。承接住2013年度純利大增15倍之勢，集團2014年上半年度純利，亦一支箭飆咗1.2倍到1,020萬銀。 毅興行年嚟開拓包括電子手錶、自動化機械設備同汽車零部件等產品戰線。而集團除咗喺上海新生產線投產，喺重慶新設辦事處又正式運作。以汽車行業為例，今年頭5個月，祖國汽車產、銷同比增加9%樓上，到992.8萬輛同983.8萬輛；而毅興行重慶辦事處，就正係韓國大孖沙「現代汽車」落戶祖國第三廠房嘅選址所在地。 唔單止環球經濟回暖，毅興行戰略性開發有潛質嘅產品同地區，再加埋集團免除中介人，直接同海外買家deal，省卻中間費，改善毛利，成績如虎添翼！ 家陣，毅興行兼同國際一線飲料品牌磋商，諗到係，國際品牌產品需求大，若果毅興行傾得掂，對日後keep住穩定訂單，有好大幫助。 咪扯咁遠，毅興行2014年每股純利係咁意增長30%，到7.8仙，預測市盈率(PE)跌到得7.4倍。 冷灶煲毅興行，以最新往績9.7倍PE做目標，毅興行要見0.76元，現價(0.58元)要升30%，市帳率仲喺1倍樓下，未有耐升過龍。 作者為中細價股專家
敦沛金融(812)賣盤俾祖國西南證券，場內細細粒嘅券商股，憧憬俾其他祖國行家睇中，炒到甩轆，咪甩漏世紀建業(079)！ 世建除咗主打港澳投資物業租賃，亦搞證券經紀業，而集團家陣總市值得1.4億銀，街貨市值更只得6,700萬銀咁大把。但咪睇世建細細件，集團手頭現金近2.5億銀，淨現金上近2,550萬銀，財政乾淨。又世建現價(0.465元)及市帳率(PB)得0.37倍。 呢期時富金融(510)股價放紙鳶，短短五個交易日大升咗70%，市值過6億銀晒士，係世建4.4倍，PB亦升到去1倍樓上，南華金融(619)PB，更貼近兩倍，市值亦係世建6倍。秤市值，世建平，秤PB，世建吸引。 又近兩年嚟，由內房借殼上市，到電貿大孖沙、賭業大亨，再到呢期祖國券商搵殼，睇到係，殼仲有好大需求，但場內供應已愈嚟愈少，而世建質地一啲唔曳，係一隻靚殼，有變身潛質，問題係佢肯唔肯。 啱4月尾，世建向執董曾昭婉，授出一項認股權，可兌換世建303萬股。雖則，呢批認股權，唔係大堆頭，無乜微言大義，但世建現價，只係啱高過認股權換股價0.451元啲啲。現價買世建，同管理層兌換成本差無幾。 炒世建落後，上番半年橫行頂0.6元，要升近30%，PB仲係得0.5倍，博世建好似時富金融咁，PB上到1倍，係要大升1.7倍，到1蚊樓上。 作者為中細價股專家
五菱汽車(305)剛獲大股東以溢價行使可換股票據(CN)無耐，變相增持，環保電動車當中，五菱又至平至抵搞，冷灶煲一轉。 約喺三星期前，五菱大股東「五菱香港」兌換集團所發CN，本金額高達2億銀，唔係嘢小，每股兌換價，亦講緊0.58元，相對五菱現價(0.46元)，講緊溢價20%。 連埋呢板CN兌換，五菱香港變相增持集團已擴大股本近23%，總權益去到近70%。 大股東真金白銀兼高溢價增持五菱，對五菱信心加零一；而大股東揸咁大手貨，唔係博股本升值，唔通擺嚟煲醋？ 五菱係祖國生產電動小型貨車嘅合資格企業，已上市產品包括電動社區車、小貨車同觀光車。而電動車產業，亦會係集團重要戰略計劃。五菱有市場熱賣電動車concept。 再講，五菱市盈率(PE)得8.5倍，市帳率(PB)得0.74倍，場內熱打比亞迪(1211)，PE高達140倍，PB 3倍樓上。至於中聚電池(729)，PB高達10倍樓上，暫時無PE。 又就算計埋五菱兌換CN發新股，家陣市值都係得7億銀，街貨市值更只得2億銀。上邊中聚市值高達95億銀，係五菱嘅13倍。五菱PE、PB同市值，平咗大大截！ 雞仔注冷灶煲五菱，當上番CN兌換價0.58元，現價要升26%，上番1倍PB，見0.63元，講緊要升37%，但PB水位，未有耐追到行家。 作者為中細價股專家
重慶機電(2722)家陣得6倍市盈率(PE)，挨近6厘高息，而集團更鎖定明年銷售目標，係上年度收入6倍，嚟緊業績仲爆炸。加埋注資CONCEPT，重機係等爆升。 重機主打祖國多瓣數環保設備生產、汽車部件，同通用機械，全部都係食正城鎮化、環保國策同穩步增長嘅行業。經上年下半年一個turn around，重機由上半年度純利倒退，轉為全年度純利增長14%，到5.07億銀(人仔，下同)，靚仔到爆燈。但現價(1.1元)比2011年3蚊港銀大潛水！ 又重機基地重慶市，前排先通過2萬億銀市級投資，而中西部城鎮化1億落戶，再加埋阿爺支持環保國策，多重絕佳因素，重機今年繼續good fit，純利只係keep住上年14%增長，上到5.8億銀，PE得番5.5倍，再加保守6厘派息。又或者外國月亮份外圓，美國GE，今年預測PE上到16倍，重機平咗一大截。而重機亦將明年銷售額目標，定到上600億銀，再2020年，1,000億銀。首目標已經係上年營業額6.2倍！ 除咗上邊天時地利，重機講明，阿媽會向佢注入優質資產。諗到係，自然增長加注資，雙管齊下，重機明年純利大爆炸。嚟緊日子，仲有個注資CONCEPT可以炒。無謂白流口水，買重機，中線少少，博翻一番到2.2港銀，預測PE得11倍，仲未追到GE。 作者為中細價股專家
事安集團(378)貼實1年低位，相對大孖沙中信資產入主價，大幅潛水50%過外。又事安同中聚電池(729)，投資同一間電動車企業，但市帳率(PB)比中聚平咗九條街，同工唔同酬，事安有得諗。 事安前身金匯，2007年獲中信資產管理入主，佔當時72%權益，手貨係完全買斷晒，而中信每股入主價2.25元，事安現價(1.05元)潛咗水53%。 上年，事安買入「Agnita」41.5%，正式進軍祖國電動車行列。收購代價3.6億銀，其中，有以發2億股新股支付，每股1.25元，事安現價又係潛水16%。而承配人就包括喺商界人脈關係好勁嘅曹忠，揸咗事安1億股，曹生兼係中聚掌舵。 後邊中聚，亦揸咗Agnita58.5%權益，最新PB講緊16倍，而事安家陣PB，只係得0.68倍，比中聚PB，大幅折讓咗90%。若果市場認為Agnita有潛力，俾到中聚呢個PB，掉轉頭睇，事安就係唔合理低殘！ 又事安手頭淨現金高達4億銀，相當集團喺呢個殘價市值9.6億銀，近半水位。事安超級現金牛，再跌有譜；又銀彈咁多，亦有利集團拓展市場潛力勁大嘅電動車業務。 住事安，質落1蚊，就收集，博上番每股資產值1.4元，講緊要升40%。到時，事安PB仲係得1倍，未有耐追到中聚PB水位。 作者為中細價股專家
內房購限令鬆綁愈傳愈密，揀內房博反彈，買二線龍頭保利置業(119)。 保利係場內五大央企相關嘅內房旗艦之一，阿媽係國資委監管嘅保利集團，總資產值高達4,787億港銀，喺115家央企中，位列前30位，兼喺國資委重點房地產央企。所以，就算內房點橫風橫雨，保利有強勢「媽打」，贏咗半。 又保利市帳率(PB)0.44倍，其餘4隻央企內房：五礦建設(230)0.38倍PB、中國海外(688)1.47倍PB、方興地產(817)0.63倍，華潤置地(1109)18倍。而同保利同系嘅保利房地產(滬：600048)PB亦上到1倍。保利係繼五礦之後，PB最抵搞嘅內房央企。 保利上年收入286億銀，溢利亦上到32.4億銀，創晒5年新高。但集團現價(3.59元)相對2009年高位12.3元，累跌咗70%，家陣貼近5年低位浮浮沉沉，有無搞錯？！ 保利啱公布無耐今年頭4個月銷售，上到80億銀人仔。雖則銷售額比上年同期89億銀人仔，減咗10%，但今年嚟，內房市場因為阿爺調控，已經嗌晒救命，保利仲keep到咁大晒士銷售額，已經非常唔錯。 再講，今年頭4個月，祖國固定資產增速放緩，相信阿爺避免硬著陸，會放放手。買保利，當PB向上收窄到方興0.63倍水位 ，講緊要升44%，到5.2元。 作者為中細價股專家
冠軍科技(092)今年1月同2月，分別上到15億股成交，創晒8年嚟單月成交股數紀錄。冠軍喺呢個8年超殘低位，成交先嚟料，市帳率(PB)比同行大折讓，照計無咁短癮，住冠軍。 冠軍主打IT系統銷售，對上兩年，又開多瓣文化產品銷售。冠軍呢雙頭馬車，喺最新半年度，項目溢利分別上到3,800萬銀同4,732萬銀，大幅增長2.2倍同33%，靚仔到爆。 冠軍家陣主打其中歐洲市場，喺歐債危機後，地區政府要保增長，包括緊急通信等等公營開支唔少得。 又集團上半年嚟自祖國營收，上到21億銀，增加咗35%。嚟緊日子，食住祖國科技熱，地區keep住增長，無難度，冠軍全年成績單，可以輕鬆過關。 更吸引係，冠軍現價(0.182元)，相對2007年高位1.17元，累跌咗84%，PB得0.16倍，即係話，集團現價，得番每股資產值1.6折。 場內近磅兼同冠軍，係本土第一代IT或科技相關股，有品質國際(243)，家陣PB高達兩倍、權智(601)0.78倍PB、就算方正控股(418)，都講緊0.53倍。冠軍相對行家，亦起碼大折讓咗70%，殘到無理由！ 買冠軍，博上番07年高位1蚊，實在有難度，但中線博冠軍翻一番到0.37元，集團PB仍然得0.32倍，一啲唔過太，到時，冠軍PB未有耐追到上方正，更遑論其他的熱炒IT股。 作者為中細價股專家
寶勝(3813)今年頭4個月運動品零售銷售數據，靚仔到爆，炒turn around同時，炒埋嚟緊嘅世界盃concept。 寶勝主打祖國運動零售，上年度營業額17.8億銀，但講緊係美金，折合高達139億(港銀，下同)。場內中國動向(3818)上年營收約17.7億銀、李寧(2331)約73億銀。 寶勝呢個營收晒士，fight低晒所有祖國行家，但現價得0.42元，低過金融海嘯最低價0.53元，相對08年6月上市價3.05元，大跌80%。寶勝龍頭地位，但係豆泥價，一有利好消息，肯定似放手嘅彈弓，大彈。 該集團啱公布無耐今年頭4個月銷售淨額51.3億銀，同比增加9%，4月單月銷售淨額14.9億銀，更增加近12%。寶勝呢吓turnaround，靚仔。再講，寶勝新一季毛利率增加到近30%(上年同期27%)，集團銷售額咁大，毛利率輕輕改善，都啖啖肉。 靚仔數據，就係寶勝大反攻誘因，而嚟緊日子，仲緊接世界盃盛事，對寶盛全年度成績單 ，都係一支強心針。 又寶勝市帳率(PB)得0.33倍，上邊李寧PB，高達2.1倍，特步國際(1368)1.3倍。至於中國動向好少少，但PB都講緊0.7倍。又寶勝啱星期一，turn咗6,500萬股，係1年嚟最大成交日，聞到有味。炒寶勝，PB喺咁意收窄到0.5倍，幾乎翻半番，到0.65元，但PB未有耐追到行家。 作者為中細價股專家
中航工業(232)1年跌近40%，手頭10億銀淨現金，幾乎同市值睇齊，而集團又手執金蛋，增值隨時啖啖肉。 中航工業上年底現金10.8億銀，得4,038萬銀銀貸，淨現金高達10.4億銀，或每股0.234元，同現價(0.295元)差無幾。又集團跌到5年橫行密集底嘅市帳率(PB)0.6倍，又有唔錯PB墊底。 中航工業上年完成出售GIS服務商「天下圖數據」所佔權益俾天下圖(402，前身蒙古投資)，天下圖支付方式，包括一批本金額2.4億銀CB。中航工業若果行使(每股換股價0.25元)，可以換取天下圖9.7億股。即係話，中航工業仍然可以透過天下圖，享受出售項目潛在爆炸增長。 新經濟底下，航空遙感影像處理，到GIS軟件，由道路領航，到軍事、航天，城市建設，應用已經好密集廣泛。專業估計，到2015年，成個地理信息產業市場規模，超過3,000億銀人仔，係2012年翻一番！ 再講，電貿大佬騰訊控股(700)，呢期亦以15億港銀，入股中航系統內、同瓣數嘅「北京四維圖新」11.3%。電貿大哥亦中呢瓣項目。天下圖一個業績，一個俾大孖沙敲門，其中一瓣跑出，中航工業增值和味龍。 咪扯咁遠，先博中航工業彈番上1年橫行頂0.4元，講緊要升40%，PB仲喺1倍樓下。同系中航科工(2357)，家陣PB高達1.8倍。 作者為中細價股專家
民生國際(938)呢兩日受盈喜消息刺激，交投及股價有番啲睇頭，但相信盈喜只係導火線，以民生老闆鄭松興，有份掌舵嘅另一隻華南城(1668)，獲電貿大佬騰訊控股(700)中前科，博民生係華南城翻版，呢個point先係大龍鳳。 民生啱啱今年2月，只係以1,730萬銀，加碼增持咗祖國諸暨珠寶城近3.9%，到65.85%。若果以項目總規劃1,290萬方呎面積參考，諗到係，地價幾乎係鹹豆價，民生日後嚟自呢個項目增值/獲利，會好肥仔。 又今年頭，鄭生另一間掌舵嘅華南城，成功引入騰訊。華南城最高升咗128%，到3月4.96元，而就算以華南城呢期調整咗股價計，都累升咗50%過外。 家陣民生珠寶城，坐落有珍珠之都嘅浙江諸暨山下湖，對外輻射全球六十幾個國家，成個物流網好靚仔。咁睇，電貿大佬霸地盤，尤其係對本身電貿業務有極大幫助嘅物流項目，青睞有加。再講，以鄭生脈絡，成功為華南城引入騰訊，呢吓嘢，對民生就好有遐想。 民生成間公司市值，得7.5億銀，街貨市值更只得2.7億銀，殼價唔止。買民生，首站目標先睇鄭老闆喺2012年時，增持民生(1.05億股)每股成本價1.02元，民生現價(0.59元)係講緊要升70%過外，到時，集團市帳率(PB)先啱睇齊華南城。 作者為中細價股專家
《兩件一周》喺《am730》見報三次，本月9日推介嘅威華達(622)，暫時跑出，噚日最高累升咗32%。場內中星集團(055)，同威華達好似，一樣係淨現金多，有「私家殼」、憧憬注資嘅質地，而中星現價仲殘過08金融海嘯價，抵博。 中星前稱中大印刷，2009年先改名，英文名改埋叫「Neway」，正係Neway卡拉OK掌舵薛嘉麟家族嘅上市旗艦。 中星現價(0.199元)，相對08年金融海嘯最低價0.3元，潛水33%，相對2011年高位4.95元(上年10合1)，大跌近96%，大股東所佔上市公司呢part嘅家底，跌剩7,287萬銀。 又中星淨現金1.96億銀，幾乎睇齊最新總市值2億銀，銀彈勁多同時，再證集團殘到不堪。老老實實，中星若要透過印刷業支持股價，升番上4蚊，可能性唔大。要大、小股東大享增值，兼有前景，其中最直接途徑，莫過於注資。 2007年，報載薛氏家族有意將私人卡拉OK業務上市，當時估值高達10億銀，係中星家陣市值5倍！ 而隨住夜場Magnum(2080)成功上市，條例亦開綠燈。數咁計，中星翻一番到0.4元，資產折讓仍然高達50%，而總市值先上到近4億銀，仲未對應到Neway卡拉OK當年10億銀估值。即係話，大股東一係唔搞注資，若果落實，中星股價，係會放紙鳶。 作者為中細價股專家
手機股逐隻彈，飛毛腿(1399)呢兩日變得生猛，而手機相關股中，飛毛腿市帳率(PB)又係平咗幾條街，等砌。 飛毛腿對上兩年整合產品，由傳統手機電池，轉型到智能手機電池，食正手機大熱，上年成功大幅虧轉盈，由2012年大出血1.62億銀(人仔，下同)轉為純利3,829萬銀。家陣祖國手機市場，鬥到七彩，毛利少不免會遭到蠶食。但成件事咁睇，飛毛腿主打客戶，係祖國熱爆小米及聯想(992)等等大牌子。 最新統計報告，小米今年第一季揮低蘋果，進佔祖國智能手機市場第三位，市佔率達到11%。報載小米計劃開海外市場呢條戰線。飛毛腿主打客戶，有好強競爭力，集團拍住好碼頭，透過「量」去cover毛利率可能縮減問題，一樣有運行，今年純利照keep到雙位數增長，無問題。 又飛毛腿家陣PB得0.56倍。場內產銷手機或者主打手機周邊配套嘅，通達(698)1.7倍PB、富智康(2038)1倍，而酷派(2369)經噚日大升10%後，家陣PB高達2.5倍，飛毛腿PB平咗成截。 飛毛腿由3月到家陣盤整，整個組三角形，啱噚日先第一日破三角阻力，格局等砌。買飛毛腿，當翻半番計數，要見1.2元，到時，集團PB仲喺得0.88倍，仲未追到上邊其中一隻手機股。 作者為中細價股專家
上個月10號，他報主打威華達(622)喺呢轉跌市，集團仲守喺第二日(11號)嘅上升裂口之上，硬淨到爆。而噚日個市回暖，威華達配合大成交即彈，聞到飯香。 一講威華達，唔可以唔提集團大股東歐亞平。上年尾報載，歐生坐正成電貿大孖沙雙馬合組「眾安保險」嘅掌舵。呢期新聞，眾安保險開始出擊有搞作。講咁多嘢，似乎同威華達風馬牛不相及。但諗深層，威華達再無其他主業，依家主打嘅金融證券業，唔係話大龍鳳，但同上邊眾安保險，業務上就有少少近磅。威華達呢個近水樓台嘅link up，就好有遐想。 威華達淨現金高達16.6億銀，連揸住港華燃氣(1083)證券投資，等值淨現金高達18.5億銀，或每股0.26元，威華達現價(0.207元)仲係潛緊水。 好正常諗，威華達壯大業務，集團咁多銀彈，無問題。又假設咁講，威華達將絕大部分現金派出街，除息後，市值縮到得番1億幾千萬，然後再賣殼，相信亦大把人爭住要。 場內近磅例子，福源集團(1682)由上年7月醞釀賣盤，到落實出售，噚日復牌，累計大升1.8倍，兼計劃大派特別股息。買威華達，上番每股淨現金，講緊要升25%，中線少少，博其中一瓣可能落實，博威華達放紙鳶，係睇佢倍升到每股資產淨值約0.55元。 作者為中細價股專家
錢雋《兩件一周》首日喺《am730》同讀者見面，先嚟件超平超抵搞嘅中國自動化(569)。集團係全國最大鐵路信號供應商之一，受惠阿爺重啟兼加重鐵路投資，今年業績大翻身，預測PE跌到得5倍，絕對有權翻一番。 中自化係祖國石油化工，同鐵路行業嘅緊急及安全控制系統供應商，客戶包括中國石化(386)及中國石油(857)等等超級大孖沙，來頭唔細。而祖國媒體新鮮報道，中鐵總公司計劃今年上調鐵路投資11%，到8,000億銀人仔。大摩即發報告，推算鐵路投資增速，會由上年4.9%，加到今年20%。當中，鐵路設備嘅投資增速，更加達到34.9%(13年：14.7%)。 上年，阿爺整頓鐵道部，鐵路建設喺上半年處於停滯狀態。但隨住阿爺拍板重啟，兼加重投資金額，而當中，又以中自化主打瓣數投資增速最勁，中自化有運行。專業評估，中自化今年純利大幅增長近兩倍，到2.2億銀人仔，預測PE兼由家陣15.7倍，跌到得番5倍左右。 呢個預測純利水位，追越中自化2011年度純利1.95億銀人仔，但集團現價(1.37元)，相對當年高位7.07元，大跌80%，仲喺3年低位載浮載沉，PB得0.6倍，殘到痺。 買中自化，當翻一番到2.8元計數，明年PE得10倍咁大把。莫忘記，鐵路喺城鎮化中，重要基建一環，呢瓣投資is a long way，中自化長食長有，明年純利應仲有睇頭。 作者為中細價股專家
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
