曾經講過，環保電力有多瓣數替補，選擇多，但水資源好難搵嘢取代。場內中國水務(855)明年預測市盈率(PE)平過行家同本身過去十年平均值一大截，有得諗。 中國水務今個上半年，盈利增長近10%，到2.6億銀，雖然，當中有包括一次性非經營收益，但主打供水同污水處理兩瓣增長，係成績單靚仔主因。又中國水務經早輪一連串擴展併購，家陣喺廣東、江蘇、重慶等一線城市，或者GDP高速增長地區，再去到湖南、湖北河南同湖北等多個省市，都擁有供水項目，兼睇到成績。 場內專業評估，中國水務本年同明年度每股盈利(EPS)0.27元同0.32元，喺明年完全反映配股攤薄下，EPS仍然有近19%增長，明年度得11.7倍預測PE。行家北控水務(371)今、明兩年度預測20.9倍同17倍PE、創業環保(1065)19倍同16.4倍、祖國洪城水業(滬：600461)26.7倍同23.5倍、祖國行家平均41倍同34.9倍。 又中國水務最近10年平均17.8倍PE，集團明年預測PE，亦係比本身平均值平咗33%。仲未止，中國水務家陣市帳率(PB)1.3倍，市場俾到上邊北控水務2.9倍、創業環保1.7倍、又洪城水業2.8倍，香江近磅行家中滔環保(1363)5.8倍，中國水務PB更加平咗大大截。 煲中國水務，當明年度PE上番10年平均18倍水位，現價(3.77元)講緊要升54%到5.8元。 作者為中細價股專家
NASA整咗個全球霧霾地圖，祖國係受霧霾影響最勁地方之一，潔能瓣數唔只有concept，相信嚟緊日子，係有實實在在需求。呢瓣煲華電褔新(816)，明年得5倍預測市盈率(PE)。 華電褔新今個上半年，盈利增長近12%，到11.7億銀人仔，到9月尾頭9個月，盈利增長縮到1%唔夠，成為沽家大插插絕好理由。但咁睇，華電褔新今年4月見5蚊高位，當時PE講緊18倍，跟住一個唔該，直插到家陣，現價(2.23元)累跌咗50%過外，比起2012年上市價1.65元，高咗35%咁大把，而集團現水位嘅今年預測PE，得番7.3倍，股價再插有譜。 再講，到今時今日，祖國霧霾仲係咁嚴重，而空氣污染衍生極大嘅民生成本，唔係唔使找數，所以，阿爺必定加強環保國策，環保股中線實有運行。而華電褔新本身，係大孖沙華電集團嘅環保潔能旗艦，華電褔新亦唔只風電，家陣兼拓展到太陽能、水電，同其他潔能項目，環保瓣數又多元化，唔驚側埋一邊。 場內專業評估，華電褔新明年每股盈利0.39港銀，預測增長26%，係同級數行家中，增長至靚仔，預測PE得5.8倍，比起本身上市以嚟平均12倍PE，係大折讓咗近52%。 華電褔新再跌，質穿兩蚊，好收集，當中線翻一番到4蚊樓上，明年預測11.6倍PE，先至上番本身平均值。 作者為中細價股專家
新天綠色(956)喺燃氣瓣數當中，市帳率(PB)係至抵，啱上周五創埋上市以嚟新低，當博反彈，已經有得諗。 新天綠色啱上周五，股價創咗2010年上市以嚟新低，見1.07元，現價(1.18元)比起上市價3.68元，潛水68%，比起今年6月尾每股資產值2.5元，係大折讓52%，得0.48倍PB。 又呢轉燃氣瓣數俾資金狂掟，場內港華燃氣(1083)，由今年4月8.74元，累跌47%，創3年新低，0.87倍PB、中油燃氣(603)0.9倍、北控(392)1倍、華潤燃氣(1193)2.9倍，場內行家平均1.8倍PB，新天綠色PB平霸。 祖國霧霾勁嚴重，阿爺鐵定環保國策，相信唔會變，更重要一點，喺綠色環保當中，風電、太陽能係有客觀天氣、技術限制，但燃氣瓣數無呢啲因素顧慮。再講，除咗工業用戶，新天綠色亦都好積極開拓居民用戶下游燃氣，家陣播種，經濟一Turnaround，新天綠色肯定受惠。 新天綠色今個上半年盈利近2.8億元人仔，近翻半番，而集團旗下附屬河北建投新能源，頭9個月盈利按年一枝箭增長540%，到9,716萬元人仔。照睇，新天綠色嚟緊全年成績單，輕鬆過關。 呢轉博新天綠色反彈，係咁意翻1/4番到1.49元計，先得0.6倍PB，未有耐追到上邊行家之餘，比起集團上市以嚟平均0.97倍PB，亦係差咗大大截。 作者為中細價股專家
世紀建業(079)繼9月話考慮標售上環酒店後，啱公布無耐，出售埋證券瓣數，多咗變現資產動作，要昅昅。 報載第一太平戴維斯話，家陣世建揸住上環酒店市值約3.6億元。搵資料，世建喺2009年中，以1億元購入呢項物業，家陣估價，比世建當年買入價，凸章2.6億元。就算以世建今年6月尾嘅投資物業總值3.1億元，兼當呢筆款額係全數反映酒店項目計，上邊市場估價，仍然凸章5,000萬元，兼大過世紀總市值2.6億元。 呢壇製作暫時未聞樓梯響，但睇到係酒店增值未完全反映晒之餘，喺世建奀豬市值底下，呢吓潛在變現機遇，變得好吸引。世建呢期啱落實以2,400萬元出售證券業務。 老老實實，賣殼活動被盯到實，憧憬細市值公司，俾大孖沙昅中再賣殼變身，極高難度，但成個picture係，世建呢期變現資產意欲多咗，而隨住資產變現，跟住有乜後續性，呢吓耐人尋味。 咪忘記，世紀建業掌舵曾昭武昆仲旗下Barsmark，之前將世建7%權益轉讓俾佢哋媽咪司徒玉蓮，隨住兩個PARTY理順，而股東司徒玉蓮又係叱吒濠江賭壇嘅勁人，世建有無機會再俾原有股東湊大？ 咪扯咁遠，博出售酒店製作成事，吼250日線0.77元輕輕一注，世建反映酒店增值部分，以家陣0.7倍市帳率計數，要見1蚊，潛在回報率近30%。 作者為中細價股專家
上海電氣(2727)剛獲阿媽注入資產無耐，同樣係上海系統嘅上實(363)，現價係五年底，市帳率(PB)貼住海嘯期水位，作為上海市旗艦，一樣有俾阿媽湊大機會，遲早瞓醒覺。 上實到今年6月尾每股資產值(NAV)近34蚊，現價(20.55元)0.59倍PB。上實1996年上市，上市以嚟平均1.4倍PB，又2008年金融海嘯期最低見過0.56倍PB，上實家陣PB，係貼近慘烈期水位。 場內上實系統，上實發展(600748)同期2.9倍PB、星洲上市嘅上實環境1.7倍，以6月NAV做單位，上實已經係繼上實城開(563)之後(家陣0.54倍PB)，同系統裡面，最平PB選擇。 又睇上實上年成績單，有三分一收益貢獻，嚟自內房瓣數。今年以嚟，內房回暖勢頭明顯，上實亦有條件增值。而場內專業預估，亦係咁估，集團明年同後年PB，會進一步調整到得0.54倍同0.5倍，係仲要低過海嘯期水位，兼且係全系至抵買！ 又大型央企、國企改革密鑼緊鼓，上實啱喺今年上半年成績單亦提過，「會借著國有企業改革的機遇，擇機進一步完善業務和資產結構」。上實係上海市政府窗口，一樣大有機會再發育，俾阿媽湊大。 呢轉吼上實，先買勁抵PB，以2017年預估NAV40蚊做準，上實PB收窄番到家陣0.62倍，講緊要升近20%到25蚊。 作者為中細價股專家
中外運(598)旗下嘅外運發展(滬：600270)，由7月8號港股大插插日到家陣，累升咗70%，中外運同期升咗26%咁大把，跑輸一條街，兼有嚟自外運發展肥仔股本增值，中外運有得諗。 外運發展最新報約33.7港銀，比本身每股資產值(NAV)10.6港銀嘅股本增值，每股講緊高達23蚊。中外運揸外運發展61%，外運發展升到呢一刻，已經額外為中外運增值12億元，或每股2.76元。連呢板增值計數，中外運嘅實際NAV6.85元，現價(4.5元)市帳率(PB)得0.65倍。 睇番海內外同中外運都係有級數嘅物流瓣數，聯合包裹(美：UPS)22倍PB、聯邦快遞(美：FedEX)2.9倍，又上邊外運發展兩倍樓上，中外運平咗一截。場內專業評估中外運今、明兩年每股盈利0.384港銀同0.42港銀，預測市盈率(PE)12倍同10.9倍，已比本身十年以嚟平均PE18倍，平咗截。 上邊UPS明年17.8倍預測PE、FedEX12.7倍，外運發展21倍。比最近磅嘅FedEX，中外運都平咗14%。就算唔計潛在注資concept，買中外運落後兼平靚正數據都有得諗。 當中外運上到高盛新鮮熱辣目標價6.3元，講緊要升40%，明年預測14.9倍PE，稍為高過FedEX，但比上邊其餘兩隻股份同本身十年平均值都仲算平。 作者為中細價股專家
周三推介金茂(817)，由9月7號1.73元到家陣，累升45%；場內另一隻央企內房旗艦五礦建設(230)，同期升咗17%咁大把，殘到痺。 五礦建設係五礦集團內房旗艦，同金茂一樣，對口係超級大央企。而家陣央企、國企進行緊重組改革，五礦建設又係系內唯一內房股，成系以至五礦建設，尤其係注資呢個point，一樣有concept。 但唔講呢個point，睇硬數據。五礦建設喺珠三角一線地區土儲近980萬方呎，而去到今年9月尾，集團頭9個月內房合約銷售近59億銀人仔，按年係升咗62%。食住內房回暖，五礦建設銷售成績靚仔，土儲增值潛力亦肥仔。但五礦建設現價(0.81元)潛喺近7年底，得27億銀市值，只得金茂269億銀市值嘅1/10，殘到爆！ 五礦建設家陣市帳率(PB)0.33倍，喺五大央企所屬內房當中，集團PB同保利置業(119)一樣，又係最抵。又成個五礦系，包括香江姐妹公司五礦資源(1208)在內，PB分別0.68倍到上10倍水位，五礦建設又係系內最平。 繼續長短打策略，一注喺0.7到0.83元橫行底炒上落，一注長線，博注資辣落後二線內房，同五礦系有無重組注資動作。呢注博翻一番到1.9元咁計，五礦建設市值先得54億銀，0.66倍PB，都只係啱追到系內最近磅嘅五礦資源，但仍然未追到金茂家陣0.7倍PB水位。 作者為中細價股專家
金茂(817)喺最近兩份大行報告度，同過千億銀嘅內房龍頭都係獲評點為「買入」嘅內房。趁呢轉個市調整，大行俾LIKE，金茂一跌要兜。 花旗最新內房報告，金茂獲納入買入評級，另一份外資行麥格理報告亦將金茂列為亞太區房產股首選名單，同市值過1,400億銀(金茂市值264億銀)嘅華潤置地(1109)並排。金茂係中化集團內房旗艦，食住內房回暖潮，集團今年頭十個月物業累計銷售額187億銀人仔，按年翻咗半番，保證到嚟緊日子成績單之餘，集團仲行快一步，升級做城市營運商。 再講，以金茂坐擁上3億方呎土儲，大部分亦集中喺一線城市，配合升級策略，對日後毛利同營銷，更加掂檔。亦唔怪得大行以金茂做首選房產股之一。 金茂今年中配股，所以，全年計數，有攤薄效應。就算係咁，場內專業評估金茂今年每股盈利(EPS)0.34元，預測市盈率(PE)都係得7.2倍，又隨住上邊利好因素反映，金茂明年就算反映晒攤薄，EPS達0.386元，已經重拾增長動力，預測6.4倍單位數。 呢轉吼實近三個月橫行底2.1元，金茂俾個市拖累調整，呢個位開始兜金茂，以大行俾3.88元目標價計，金茂係講緊要升80%。保守啲，打個五折，博升40%到2.94元，金茂明年預測7.5倍PE，都係比集團過去5年平均7倍PE，輕輕高少少。 作者為中細價股專家
IGG(799)最近5個交易日，整咗枝小型上升旗，配合埋單位數市盈率(PE)，IGG有得諗。IGG今個半年度盈利倒退24%到1.9億銀，但咁睇，集團呢半年收益，keep住增加13%，到8億銀，唔係收入減少，令純利倒退。 再講，IGG北美洲收入3.15億元，佔經營地區比重最大。據諮詢機構統計，北美用戶手遊平均用戶收入27.3美金(祖國13.1美金)，肯花費，兼穩定。有咗呢個基礎，IGG為手遊業進一步開拓亞洲市場同加強競爭，今年上半年分別喺韓國、日本同泰國設立分支機構，開發團隊同人力資源部請多咗人，總體行政開支增加，係盈利倒退原因。但IGG為未來鋪好條米路，短暫盈利倒退，唔成問題。加埋集團揸咗14億銀淨現金，有銀彈進行併購，又係優勢。 IGG上半年每股盈利(EPS)0.14元，場內專業評估，集團下半年好番，全年EPS 0.37元，穩住上年全年水位，而明年EPS 0.47元，增長26%，預測PE得7.6倍。睇番亞太區，祖國掌趣(深：300315)明年39倍PE、祖國行家平均28.3倍PE，又成熟體好似日本COLOPL同韓國WeMade Entertainment，明年14倍PE樓上，IGG平咗大截！ 兜轉IGG，當明年預測PE去番10倍咁大把，現價(3.56元)要升30%到4.7元，比起上邊任何行家，IGG嘅PE，都仲係好平。 作者為中細價股專家
北京建設(925)食住物流業強勁需求，加埋優厚拓展潛力，但現價仲喺3年橫行底載浮載沉，有得諗。 據國家郵政局估計，今年全國快遞總量，會達到200億件，又據諮詢機構艾瑞估計，去到2017年，電子商貿規模，會上到近22億萬銀人仔。又按北建年報資料，好似美國先進體嘅物流設施滲透率，人均5.06方米，而祖國只係得0.41方米。 睇到係隨住互聯網普及同科技發展，改變消費模式，加埋物流配套不足，仲有勁大發展空間，大勢配合晒。再睇北建。家陣搞緊嘅馬駒橋物流園，總面積逾360萬方呎，完工後物流園將成華北最大綜合物流設施。又北建終極母系係北控集團，北建喺攞用地起物流倉儲或財務support又有優勢。喺咁強背景底下，北建現價(0.58元)仲喺3年橫行底，得68億銀市值，市值同級數唔成對比。又北建呢個殘價市帳率(PB)0.87倍，場內專業預估集團明年同後年0.76倍同0.64倍PB。對應場內同樣講緊中資有級數物流瓣數，中外運(598)明年同後年1.1倍同1.03倍PB、深圳國際(152)1.15倍同1.06倍PB，北建PB平咗近半。 煲北建，博俾母系湊大成系內物流旗艦，中線博上到1蚊計，講緊要翻半番，預估PB先追貼上邊兩位行家，市值104億銀，都只係深圳國際一半市值水位。 作者為中細價股專家
中渝置地(1224)唔經唔覺，又升到近1年高位，揸咗中渝嘅渝港(613)，享受中渝嘅股本增值，冷灶有得諗吓。 對上幾年，內房講都無人吼，包括中渝在內，無反應。但今年以嚟，百城指數數據講俾市場聽，內房回暖速度，比想像中好。好似啱公布無耐，祖國10月百城指數住宅平均價格，環比升咗0.3%，住宅均價兼連續6個月環比上升。 中渝累計今年頭10個月，合約銷售金額按年增加升7%，到48.4億銀人仔，係實實在在有改善。而呢家內房1年累計，亦升咗近60%，兼有勢再試1年新高。 講番渝港，家陣揸咗中渝2.6億股或10%，中渝經呢一年上升，為渝港帶嚟近2.2億銀股本增值，總計所揸中渝權益，等值5.8億銀。 嚟緊日子，阿爺要刺激經濟，相信會keep住寬鬆樓市政策同雙降，內房食住個勢，應該繼續向好，渝港嚟自中渝增值，家底水漲船高。 又2007年瘋牛期，中渝係曾經炒到上18蚊樓上，呢1年區區升幅，亦唔算係乜。渝港現價(0.115元)，1年計數，無升幅，又連埋中渝暫時股本增值，每股資產值上到0.34元，現價市帳率(PB)0.33倍，有唔錯折讓墊底。 趁渝港仲未郁，冷灶煲一煲，博同氣連枝，上番7月尾個橫行頂0.14元，渝港貼近1/4番，到時，集團PB先得0.4倍，未有耐炒過龍。 作者為中細價股專家
威靈控股(382)有個上千億銀市值勁抽母系，威靈家陣先得38億銀市值，威靈奀得可憐。威靈終極控股係深圳上市美的集團(深：000333)，家陣市值1,237億銀人仔，約1,490億港銀，係威靈市值39倍。 後邊美的，家陣已經進行產業結構升級，除咗智能家電瓣數，兼進運機器人產業。而據業界預測，到2020年，智能家居產業規模，上到2萬億銀人仔，至於祖國工業機器人，未來總需求上126萬至339萬台，講緊千億銀size。 諗到係，美的戰略升級，產品value added，而今年頭9個月，美的盈利就增長23%，到110億銀人仔。母系好景，對威靈主打白色家電電機瓣數，都有著數。 威靈到今年6月尾，揸淨現金17億銀，幾乎等於威靈總市值近半水位，同集團街貨市值12.9億元嘅1.3倍。威靈若遇有新搞作，勁厚銀彈就係優勢。威靈家陣0.9倍市帳率(PB)，同系主打家電產銷嘅小天鵝(深：000418)，家陣2.8倍PB。又同樣係家電巨無霸海爾電器(1169)，同系統有前身龍昌嘅海爾智能健康(348)，家陣則等緊母系海爾湊大，而PB係講緊3.75倍。威靈PB平咗一大截。 呢轉吼住近半年橫行底1.13元水位，冷灶煲威靈，係咁意以1倍PB做目標，威靈要升30%到1.5元，PB未有耐追到上邊兩隻股，市值都係得50億銀咁大把。 作者為中細價股專家
中糧包裝(906)係系內第一隻彈出進行改革(混改)嘅中糧系股份，同系中糧油(606)長潛8年底，博重組改革，仲抵博。 中糧油現價(3.15元)，係2008年金嘯海嘯慘烈價1.55元之後，另一個8年底部水平。中糧油上年勁蝕7.8億銀，今個上半年，虧損雖然收窄，但仍然出血2.7億銀，股價長潛海底，理解。 但咁睇，上邊中糧包裝行出系內改革第一步，相信隨後系內其他股份，會跟手進行重組改革。又中糧油成績單出血，喺進行改革時，斷估唔會單單好似上邊中糧包裝，只係進行混改，母系點樣為中糧油進行業務壯大，止血甚至翻身，相信會係考慮要點。所以，重組嚟講，係憧憬中糧油變得更好。 中糧油處係呢個殘位，現價市帳率(PB)得0.58倍，比起2008年金融海嘯期0.77倍，仲要低。咪忘記，集團經歷咗年半出血，資產值縮咗水之下，PB仲要咁平，係殘上加殘。 又北水透過滬港通買中糧油，最新紀錄去到11號(周三)，總持倉上到1.49億股，或2.84%，比起今年5、6月時，中港股市瘋狂期，北水喺集團持倉6,000萬股仲要多！老老實實，家陣嘅北水，同樣識計數。 呢轉同北水齊齊煲中糧油，中線少少，博重組落實，中糧油去番08年PB水位，講緊要升27%到4蚊，呢個目標PB，都仲未去到今年中，集團喺5蚊邊位所對應近1倍PB水平。 作者為中細價股專家
H股醫藥股當中，有喺深圳A股嘅，得新華製藥(719)同麗珠醫藥(1513)，加埋已經納入滬港通，有對應A、H醫藥股，新華製藥A、H股折讓，都係至吸引，市帳率(PB)至抵搞，儲定新華，博深港就快通。 新華製藥H股現價(5.08元)比深圳A股(000756，折約14.1港銀)大折讓64%，上邊麗珠，深A、H股折讓，得40%。又家陣已經滬港通嘅白雲山(874)，H股比A股折讓42%、復星醫藥(2196)19%、上海醫藥(2607)26%。講A、H股折讓，新華製藥最吸引。 新華製藥家陣1.05倍PB，上邊股份1.4倍至3倍PB不等。其餘3隻無對應A股，但喺滬港通嘅醫藥股，國藥(1099)2.5倍、三生製藥(1530)3.4倍，綠葉製藥(2186)4倍PB。新華製藥PB，又係至平！ 新華製藥今年頭9個月盈利6,180萬元人仔，增長28%，頭3個月有靚仔業績墊底，照計全年順利過關，業績唔成問題。 又新華製藥成交一向靜到甩轆，但上周三場內傳深港通，新華製藥單日成交近370萬股，係近3個月最高單日成交，俾到反應。再講，新華製藥得1.5億股H股，等值7.6億元咁大把，亦諗到，深港一通，北水一樣可以掃到佢甩轆。 數咁計，新華製藥追到最近磅嘅上藥1.4倍PB，講緊要升33%，到6.8元；當追上最近磅嘅麗珠A、H股40%折讓水位，新華製藥係要升60%過外，到8.4元。 作者為中細價股專家
滬指創咗8月26號以嚟高位，隻隻內券有反應，光大控股(165)揸咗33%嘅光大證券(滬：601788)創同期高位之餘，兼嘜到上day high收，光控仲玩慢四步，落後到爆。 呢期A股好景，到周三為止，祖國融資餘額去到1.05萬億銀人仔，連埋滬指在內，齊齊創兩個月高位。內券股俾足反應，光大證券由同期低位14.36元人仔，到家陣累升咗54%，光控同期升咗45%咁多。又由周三再傳深港通，內券股著晒火，中信證券(6030)、銀河證券(6881)等，累升10%樓上，光控兩日累計，又係單位數升幅。 咪睇少光控揸光大證券33%咁少比重，呢家券商家陣市值，係上到1,050億港銀，以光控所佔權益，等值346億銀，係超過光控本身總市值330億銀。再講，光控早喺1999年時，以12.3億銀買入當時所佔光大證券49%權益。 睇到係，光大證券市值暴漲，為光控帶嚟勁肥仔嘅股本增值；而A股翻生，光大證券好景，光控都母憑子貴。但光控比較有character，玩落後。 場內專業預估，就算唔計上邊嚟自光大證券股本增值，光控受惠資產升值，今、明兩年預估市帳率(PB)，得0.87倍同0.81倍，比起本身過往十年平均1.3倍，又係平咗大截。 煲光控，當明年PB，追番上呢個平均值，光控係要升61%，到31蚊樓上。 作者為中細價股專家
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
