真假政經 - 王慧麟
2015-11-20

星期二場波,真係睇到扣人心弦。有唔係球迷嘅面書朋友,(細聲)問,香港點解和波都咁開心。佢唔係球迷,當然要同佢解下困。我都一把年紀,做人做事,已經唔可以意氣用事,要睇好多因素。客觀上,香港隊的往績可見,實力上唔係強,響亞洲唔係一線球隊。換言之,單單計往績,香港隊唔可能會打得贏同組嘅卡塔爾同中國。   不過,踢波呢家嘢,真係好鬼邪。如果踢波單睇牌面,咁樣香港隊晨早出局啦。但係,足球呢?一日唔對賽,一日唔知結果。唔踢過九十分鐘,就會唔知賽果。實力懸殊就梗㗎啦,弱隊點樣創造奇蹟先至緊要。車仔摩連奴隊波踢到拿聯賽冠軍,今屆踢到就快要護級。同一班波,同一個教練,過咗暑假就會完全唔同晒。如果你係班主,你會點樣辦?   弱隊踢波,最緊要係個form,守得住就可以玩穩守突擊。上一年摩帥出晒名的泊大巴戰術,係激死全地球之球隊,因為人地點會估到,連強隊都玩泊大巴,即係將個防線縮後玩突擊之戰術,就好似泊架大巴響龍門口咁樣。不過,泊大巴戰術一樣有破綻。泊大巴戰術如果做得好,就真係滴水不漏。但有時候只要球隊有更多小組配合訓練,用幾種聲東擊西的策略,都可以拆散大巴。當然,就係要多啲訓練唔同陣式之破大巴戰術至得。   中國隊下半場趁我地弱勢時,曾經拆過一至兩次,有次中柱。對比起youtube教人拆大巴之戰術訓練方式,似乎中國隊唔似係有特訓地專登來拆你架大巴,似乎撞手神多啲。但點都好,香港唔失球已經係一個好的結局。睇北方網頁,一面倒地鬧方方面面之不濟事,不過,點都好,一隊球隊要贏波,係要方方面面做到最perfect先至得。睇直播時,見到北方球員似乎唔見有一團火。呢樣嘢就真係弊。轉個身想想,如果你係中國隊fans,見到自己球隊踢成咁,真係火都嚟,唔鬧唔得,因為恆大都可以響亞洲揚威之時,點解自己國家球隊真係搞唔掂呢?   下半場後半段,港隊有點疲態,真係有啲驚會重複以前嘅港隊下半場咁樣,「莫」晒氣之下連失幾球,於是口裡一直唸唸有詞,猛講「守住」。回望過去幾年,真係日日「守住」咁滯,守到疲於奔命。今日睇完場波,就感覺到,只要大家一齊「守住」,就可以頂住好多泰山壓頂之霸氣。因為每場波嘅天氣、球場、球員、陣式、球迷、球證都唔同,而且總會響最艱難嘅時候,就有媚姨同柱哥出嚟幫手擋下,咁樣捱捱下就會跨過去。踢波嘅朋友就會知道,每場波嘅形勢千變萬化,呢十分鐘唔「老嚟」,個勢唔到,就要「守住」,有時個勢好,又未必一定把握得到。對住一個呢幾年樣樣嘢都要霸住都要威嘅球隊,我地能夠守足兩場唔失波,就即係守得住,守得穩。勁揪!  

2015-11-13

上周五出席咗十九幾年前,當屆港大法律系舊同學聚會。我哋呢班同學,絕大多數好低調,有人做法官,有人響政府步步高陞,有人響私人執業搵大茶飯,有人晨早做了一個極有智慧的決定,就係移民加國。當然,亦有我呢類做來做去得個桔嘅打工仔。 問開點解唔同校友事務處講有呢個聚會,登下校友刊物都好,律師A碌大對眼望住我。呢個眼神,就係十九幾年前走堂走到飛起之後問佢借notes時聞風喪膽嘅空位NO眼神。呢種眼神,餘威猶在,問你怕未? 聽下聽下,老友A拉埋我一邊說話。佢話係有關嗰套火星科幻片嘅被cut片段,宇宙大奧秘,即係嗰啲震驚十三億人,睇完之後包無生痔瘡嘅秘聞喎。老友A話,十九幾年後,我哋就快去送殯多過返工嗰陣,聽講人類去火星殖民,好快就實現咗,而且嗰邊好食好住,好快趣就出現咗人滿之患,唔夠土地。 因為火星呢處地方,真係好大,但好多唔郁得,原因係因為呢啲大自然景觀,一直曬太陽,曬到大氣層極為稀薄,唔適合人住。但當然,作為火星殖民地嘅領袖,代號790嘅再造人,覺得好有問題。因為佢話晒都係再造人,不食人間煙火,只食火星空氣,覺得人定勝天,點可以唔去用盡方法去殖民呢?於是,佢召集咗一大堆管治高層開會,研究下點樣可以加快速度開拓土地。 790例牌聽完高層講土地唔夠用,太陽因子點樣影響火星等外部因素之後,就覺得,依家開發土地之時間相當冗長。而且,當初由美帝太空總署響地球搞嘅一套規劃程序,係應付盤古初開時期嘅開發模式,依家火星殖民都十九幾年,應該要改變。問題係,現行嘅制度,係所有火星土地開發都係由下面班官員拍板,拍晒板之後,先至交畀佢同790內閣睇,搞到呢度,即使佢係一個毫無感情嘅再造人,都十分火滾,因為都規劃晒所有嘢,改都改唔到啦。790希望,可唔可以日後,下面官員規劃拍版之前,交上嚟畀佢地拍板前,佢個人可以睇下先,等佢畀個專業意見,交畀下面官員考慮之後,綜合晒意見先至呈上畀地拍板。 高層聽完,第一句反應係,咁樣做要修改法例噃,即係要同火星殖民地嘅立法議員傾。呢班議員,佛口蛇心,是是但但,日日拉布,好難傾得成噃。790聽完呢班謀臣意見,真係無癮。於是就問下法務大臣,係未真係唔得?係未真係要修例,經過立法議員呢一關呢?法務大臣清一清個喉嚨話,其實都唔係唔得嘅,只要你睇完之後,唔落記錄就得啦。有高層話,唔落記錄,唔啱規矩喎,到時邊個睇咗邊個畀乜意見,有乜決定就冇人知,變成無頭公案,於法不合噃! 老友A話,唔好以為火星係一個夢幻樂園,你估真係睇嗰套火星電影,自我鑽研種薯仔咩?不過咁,有時現實嘅東西,仲可怕過睇火星電影㗎。

2015-11-06

大家可能會覺得,過往三年,捱得好辛苦,好多說好的改革,失了蹤,好多說好的政策,都不見推動。仲有兩個月,就係2016年,亦都係選舉年。大家對依家呢位領袖,仲有冇期望呢? 呢個人有冇得連任,成日睇我欄目都知,我係三年前,現屆領袖上莊,會用十年的時間,來預備自己,迎接未來的挑戰。所以,我唔係以佢有冇得連任為自己做「生涯規劃」,而係要做一個客觀的評估,萬一呢條友真係做足十年,我地又應該要點應變呢? 舊年政改一役睇到,香港人有幾硬淨都冇用,上面一於一意孤行,一於唔理硬闖立法會,撞到口腫鼻腫都在所不惜。所以,在情在理,上面既然要搵人同香港一半人口針鋒相對,即係要同民意過唔去,唔係個個人響咁嘅情勢下都可以響香江生存,只有某一個人,即係呢個人,係有能力隨著北京的步驟不斷地轉換身段而演出。所以,只要呢個人願意誓死效忠北方,緊隨政治路線,就一定有連任空間! 五中全會閉幕,提到香江一事,裡面連一國兩制、港人自港、高度自治都冇晒,似乎唔係為某一個有意參選兼依家響沙圈嗰度來熱身嘅各隻馬匹而設。問道於中國A,呢位長期觀察中國嘅老友。   中國A,素來睇淡派,記得佢三年前已經勸戒我,唔好用「保守vs溫和」之二分法來分析北京點樣睇香港,佢相信強硬派已經當道,仲叫我戴定頭盔,小心仆親。中國A呢個說法,同泛民嘅主流分析好唔同。三年嚟嘅發展可見,中國A之分析真係一語中的。 中國A叫我留意港澳政策一段。港澳嘅表述嘅前面仲係講緊一帶一路,即係話,成件事係香港要先搞好經濟,然後係民生,跟手就係民主,最終要達到乜嘢目的呢?就係和諧。 中國A教落,正面報告,負面解讀。港澳問題,都係經濟問題為主,因為澳門經濟係點樣,大家心中有數。至於香港呢?咁嘅表述可以睇到,上面對香港經濟表現有擔憂,亦擔心經濟搞唔起,民生唔得。既然港澳政策之表述,是緊扣住「一帶一路」,咁做得香江領袖嘅,響「一帶一路」呢方面真係識做啦。 但係,港澳政策之核心目的,都係「和諧」。呢個如果係目標的話,即係暗示上面覺得,香港局勢真係好差,響「和諧」方面做得唔夠。呢句嘢可圈可點。因為全宇宙都知,自從嗰位仁兄上台後,社會越來越對立。呢句話如果係用來勸勉依家香江嘅領導層,咁樣,依家嘅政府領導都仲可以安安定定做好呢一屆,但如果係批評的話,即係話北方出咗黃牌,仲有可能響袋裡面準備出紅牌。咁樣,大家要買多頂頭盔矣。 至於北方對香江之人事變動?中國A話,陸續有來。留意一位來自北方之王教授,應會轉變身份,但可能唔來香港。  

2015-10-30

其實香港人有幾多真係好理政治呢?政改嗰陣,成個社會高度政治化,你一言我一句,日日新聞都係政改,於是,街頭巷尾都講政治。但係,香港社會到底都係務實為主,六月政改收檔後,依家講嘅,已經係未樓市回落了。政治?哈哈!仲邊有人放響心上呢? 所以,響一個太平嘅時候,如果有人做民調,問下香港人支唔支持政治上有溫和同中間路線,如果我係受訪者,一定會答yes。不過,一個受訪者支持社會有溫和聲音,但係唔代表嗰個人,當佢做選民嘅時候,就會投票支持溫和嘅聲音。呢個情況,就係泛民裡面,由八十年代開始,走溫和路線的人士嘅頭痛問題。 其中一個解釋,就係因為香港立法會係一個反對型議會,權力有限,不可能出現立法會多數黨執政之可能。因此,香港泛民選民傾向在立法會選舉時,即使佢覺得自己係溫和派,都傾向揀一個硬淨些少,響建制派強大壓力下經得起考驗嘅候選人,去監察政府。呢個時候,佢地好多時就會傾向揀一啲,立場較為傾向激烈嘅人士。於是,響立法會選舉嗰陣,好難有所謂溫和嘅聲音被選上,一個起兩個止啦,大部分被選民揀出來嘅,都會響對北大人事務上,取態強硬。 政治講現實。能夠選上立法會,就有一票在手,就有政治能量,就有政治資本。沒有選上立法會的話,除非得到執政者之垂青,打一份政治任命嘅工作,否則真係好似日落嘅太陽。於是乎,議會內既然泛民都係硬淨者當道,在另一邊嘅建制派,就一樣梗係強硬當道,大家就日日硬碰硬,係未? 呢種對立氣氛,早早響九七年之前,肥彭大搞政改開始,已經出現。要解決呢樣嘢,一係就響制度上改革,改革到市民嘅一票,可以做老闆,可以選出真正嘅執政黨,咁樣,因為市民覺得佢地一票係重要嘅,佢地就未必會意識形態掛帥,要選個強硬派去搞爛個場。 另一個更重要的推力,就係要北大人願意搞大和解,主動走溫和路線,主動響政治上,多同泛民溫和派接觸及暗地裡響社會推動溫和氣氛,同埋響政治上大力扶持建制內之溫和派聲音,咁樣,就會好快響社會上形成一個溫和力量為主導嘅氛圍,自然亦會有利益團體或人士,西瓜偎大邊,一齊走向溫和。 問題係,後者係需要假設,北大人唔知點解忽然又突然走咗去搞溫和。過往十九幾年之經驗睇到,上面其實從來都冇真心推動過,響香港搞溫和政治。既然上面都唔搞,香港人自己搞溫和路線,又可以點樣搞呢?香港要搞溫和路線,仲要係成為主流的話,就要北方帶頭搞,而唔係香港政客瞎搞。北京唔帶個頭,乜嘢中間路線都冇用。好啦,北京又點解要帶頭呢?有冇需要呢?有乜原因北京要真係搞呢?我真係蠢,睇唔到有乜嘢理由囉!

2015-10-23

[陰謀論] 早幾日有朋友話好想聽下,用陰謀論分析公共政策。好呀,呢單嘢,非常適合用陰謀論去分析。   早幾日大家睇到有成千個醫生靜坐抗議,話點解佢地嘅底薪,冇跟公僕咁樣加百分之三,矛頭直指醫局班阿頭。大家見到,連民望高局長都要落場解畫,暗示,都幾乎明示,將會辦得到,但係佢係擔心,日後呢條數要點樣搞。   係呀,就係因為咁樣,醫局就要每年恒常開支加多兩億。老實,大嗱嗱高鐵都幾百億咁掉落海,兩億之嘛,每年使多兩億去維持醫生士氣,抵到爛啦!   但係,大家都會奇怪,點解兩億之數都拆唔掂,搞到要靜坐咁誇張呢?點解民望高講到好似好慘,好似保險公司廣告裡面個細路咁樣,谷到塊面紅晒,嚇到老竇老母要車佢去醫院睇醫生咁誇張呢?真係有難言之隱嘛!   回帶:舊年中,每六年一次嘅公僕薪酬水平調查公布,即係check吓公僕底薪同私人市場比較下,係未有差異。舊年一check,都唔算太大鑊,因為只有總薪級表45至49點之公僕係低過私人市場好多,咁樣,呢個薪級表裡面之公僕,就有底薪加,加3%左右。後來,因為拉布,搞到今年中至響立法會通過。   好啦,公務員有底薪加,咁醫局醫生呢?原來唔講唔知,佢地唔係跟公務員之薪級表去加百分之三,因為醫局有佢地嘅人工薪級表。佢地之底薪雖然係參照公僕嘅薪級表做,但係,就冇話公僕嗰幾級有底薪加,佢地就會跟住加。咁就真係頭痕啦!因為醫局有個緊箍咒,就係佢地之人工,要同公僕人工相若。言下之意,即係唔可以高過公僕啦。於是,十九幾年前,公僕要減薪,因為呢個緊箍咒,醫生就要跟住減。老實講,醫局即使想唔減,但係政府撥少咗錢畀你,你又點可以唔減呢?   但係,依家公僕響某幾個職級,底薪高過醫生,但係唔代表,政府會畀錢醫局加底薪喎。點解?因為減薪嗰陣,政府即刻減少撥款,迫你醫局就範,但要加呢,政府即刻話,法律上,醫局係要自己制訂一個薪酬機制,唔會同公僕睇齊,唔受公僕薪酬制度影響。即係話,減就齊齊減,加就你自己搞,咁嘅撥錢方法,真係龍門任你政府搬,係未?   你估今年七月,班公立醫生同醫局吵嘅時候,醫局唔知大鑊咩?你估醫局唔想畀2億去平息風波咩?你估民望高甚至嗰位睇國旗睇到遲到嘅領袖唔知大件事咩?但係,撥錢呢味嘢,有財政紀律嘛, 係有個人睇住,有個人阻住嘛。呢個人會大條道理話,喂!你醫局咁樣施壓,我就要畀多2億,咁樣其他資助機構,例如社工,有樣學樣咪好弊?   邊個人咁大權可以阻住兩億?點解佢要阻住?又係為咗乜嘢?係未2017年嘅選舉?   你話,陰謀論係未好好睇好有想像空間呢?哈哈!

2015-10-16

2007年,民進黨上下真係好愁。因為2008年之總統選舉,大家心中有數,馬英九若出選,贏硬。呢個時候,無時無刻都響競選狀態之阿扁總統,出招了。 點解話阿扁係處於24小時競選狀態呢?原因好簡單。佢嘅上位以及連位,好大程度上係靠操弄「本省vs外省」之族群矛盾,造成社會尖銳對立,令票源歸邊,然後趁對手國民黨唔團結,票源唔夠集中之下,偷雞而成嘅。加上國民黨控制立法院,響咁嘅情況下,阿扁搞乜嘢「實事」,鋪鋪都畀國民黨用「拉布」(拖延議程、拒絕審議等方法)拖死晒。於是,阿扁啲正常嘢冇政績,唯有不斷用競選mode之方式做嘢,就係不斷操弄族群矛盾嚟try to do something。日日搞意識形態論爭。 2007年最勁揪又最後勁蝦碌的事,就係郵政「正名」一事。 呢件事唔複雜。響2007年2月,忽然之間,唔知黐開邊條筋,阿扁政府公布,用開嘅「中華郵政」唔啱聽,要改名做「台灣郵政」。咁樣「正名」,真係掀起一場風暴。中華郵政係公司化嘅民營企業,響阿扁政府嘅強力背書下,董事會話咁快拍板通過,於是,呢間公司一夜之間,就已經「正名」咗,改咗名,揭咗新牌。吓! 後來就傳出,好多有「中國」或「中華」冠名之國營企業,都有機會成為「正名」之目標。呢件事,就梗係成為藍綠紮馬之目標啦。支持改名的綠營朋友,就會話「正名」來得太遲,由民進黨執政開始,國家要走向正常化,政黨輪替之後,就係要彰顯轉型正義,就有需要同舊有嘅東西同做法講拜拜,就要突顯台灣人民之主體性。要做到咁樣,就唔能夠繼續沿用前朝嘅做法。象徵前朝唔好嘅嘢,唔可以輕輕抹掉,改番個名,掉走咗就算。前朝嘅東西,就係要用最大嘅聲音,盡最大嘅力氣,搞場運動,話畀支持者聽,要敲之,打爛之,取替之,咁樣先至有正義。「正名」就係其中一樣要做嘅嘢。 細心一想,將個名改咗,真係「正名」之後,係未個機構一改名,打爛晒前朝之東西,掛咗一個新牌「台灣郵政」來遮住個舊嘅「中華郵政」,改埋郵筒之設計,正義就會到嚟臨呢?主體性就會滿瀉呢?行出街個尊嚴高咗偉大咗?我真係唔識答你。不過,呢啲「轉型正義」,響台獨佬眼中,相當受落。藍營就梗係激到紮紮跳。雙方陣營又響台北市紮晒馬對罵,又係咁樣,連郵政呢啲好民生嘅部門,照理同政治冇乜關係嘅部門,就上咗政治風眼,純粹係為咗一男子(即係阿扁)嘅一己私慾,搞到部門政治化。 不過,後來發現,「正名」要立法院通過至係合法。咁當然又唔會通過啦,總統選後,政權到咗馬英九手上,就用番「中華郵政」。搞來搞去得個桔,但就浪費咗社會資源搞政治,吹咩?

2015-10-09

執屋期間,居然畀我搵倒當年講「扁帽」嘅書。係㗎,阿扁第一次選總統之時,朋友們爭相飛去台灣睇睇,仲走去阿扁競選辦嘅專賣店買選戰紀念品,返來當手信,唔講都唔知。 俱往矣。呢條友上台之後嘅作為,真係唔對路。十九幾年前嘅香港,大多數人(包括香港青年)都係支持統一,用台灣嘅術語,相當深藍。有個綠營出嚟,係有期待嘅。既然佢四年任內都乏善足陳,而且政策又唔得,立法院內國民黨黨團抵制,基本上連正常之日常行政都唔得,點解仲要去連任呢? 之前講過,佢嘅連任策略,一方面掃低晒黨內反對意見,形成無人敢出來同佢爭,無奈由佢出選連任之格局。另一方面,就賴國民黨阻住地球轉,大打悲情牌,加上最後神奇子彈事件,令佢可以險勝。依家望番轉頭,反而係問,既然佢內政外交都唔得,點解仲要選呢? 依家回望,佢連任可能係時勢之唯一選擇。睇番同佢有關之貪腐案件,早響出任總統開始,已經出現咗數目唔清唔楚之秘密帳目事件。仲有,響依家審緊之案件睇到,佢任內被指收到嘅好處,有買賣土地、二次金改等,都係掠水之方式。啲有錢佬向佢「磅水」之後,佢就將錢透過家人匯出海外。 阿扁收水,仲要不斷咁收,最重要嘅係收開有條癮。而且,響佢參選連任之前,已經有國民黨人士指責佢收水貪腐,換言之,成條街都有傳言話佢收水做嘢。響呢個情況下,一為神功,二為弟子,成揪利益階層都響度系統性收水之時,如果佢唔出選連任,而且唔連任成功嘅話,佢不單可能會被收監,連跟佢搵食嘅人都可以連根拔起。連任成功嘅話,仲可以拖下拖下,而且,響連任期滿之後,下一水總統選舉,萬一又係綠營贏的話,佢咪可以貪盡海陸空,拖到唔知幾時為止。   因此,早在佢連任之時,相信佢已經了解得到,唔連任真係大家輸到渣都冇,仲可能在卸任之後畀人告貪腐添。所以,佢連任之後,仲要加大力度收水,同時又要博再下一屆民進黨可以打贏馬英九,咁樣,佢收水之事就可以輕輕放低啦! 講到呢度,我都開始明白,點解阿扁成日響唔適當之時候(純粹我嘅觀察),講埋啲非常無厘頭,非常台獨之言論,搞到成個社會反晒轉。即係話,明明個社會開始拋掉選舉激情,投入緊正常生活之時,點解阿扁硬係要搞社會撕裂及對立,搞到社會亂糟糟,日日藍綠對決呢?依家開始明白,如果社會因為台獨議題等造成撕裂,社會嘅注意力就會放響呢啲政治鬥爭上面,大家就會唔記得阿扁政府如此無能,同埋佢嘅利益團體就可以繼續搵水,加上只要係總統,就唔拉得收監。連任四年,搵多些錢,係未? 周五刊登  

2015-10-02

唔知點解,我好鍾意睇校友刊物。係呀,假假地讀過三間中學,兩間大學,單係收校友通訊,知道舊時啲同學去咗邊,係一件好事。通常我呢個年紀嘅校友,大部分都中年,大肚腩咁樣,點同以前得棚骨瀟瀟灑灑,成個David Sylvian咁嘅款呢? 上次響某新界大學嘅刊物,又係見到成功專業人士回饋母校,成立獎學金之事。呢啲happy新聞,都應該替學校高興嘅。不過,睇下睇下,呢間學校,期期都有一個專訪,都係嗰個界別之專業人士回饋母校成立獎學金咁得意嘅?於是,梗係去問下學界之前輩啦,係未? 學界前輩曰:即係咁,自從九七之後呢,好多專業人士,已經同英國或英聯邦斷絕咗專業資格互認啦,即係話,以前想響英國讀完大學兼考完專業試,響香港加入某個專業呢,幾乎已經斷晒。後遺症係點呢?如果你係家長,九七年生咗個仔,依家十八歲,響英國讀書都好多年,想入大學,繼承父母專業,又應該點選擇呢? 我話,我淨係識法律。如果響英國讀法律學位,咁就要響香港讀一個conversion programme,考過資格試,先至可以入PCLL。但係PCLL僧多粥少噃,聽講好難入。 學界前輩曰:係囉,咁你係家長,你會想個仔飛返嚟香港讀本地大學,係未?因為你都識講,考完英國專業試,返來香港考同一樣嘢,都可能肥佬㗎,而且競爭又大,不如響香港讀本科,一直升上去,攞埋專業資格,咁就唔使供個仔去英國讀書之後,驚佢返香港之後,又要再考專業試,係未?唔一定pass㗎嘛。 學界前輩細細聲說:唔知幾時開始,有專業界別啲人,為咗幫自己仔女鋪路,希望子女繼承父業,讀番同一個專業學科,於是就捐錢畀母校嘅畢業學院,希望日後該學院響收生方面,對佢地家族會有不同之睇法,有比較好嘅優勢。我地做學界就知,呢樣嘢係冇乜可能,因為咁樣係敗壞學術之integrity,唔應該接受,亦可能違反防止賄賂條例。但係唔知點解,有專業界別之人士,堅持,或者始終覺得,咁樣係正確嘅事,四圍打聽有冇方法,捐錢去母校嘅學院,有些仲話成立基金,多多都得。但係,佢地聲稱係回饋母校,但實際上又係為自己子女入大學鋪路,以為咁樣對自己仔女入學有優勢,呢啲思想得人驚。 我聽完都半信半疑,於是問學界前輩:咁唔多通噃,同世襲有乜分別呢?咁落去窮人點敢入去讀呢? 學界前輩曰:有啲專業人士家長好離譜㗎,佢地話要成立之獎學金,講明申請人之父或母,之前要係響嗰個學院之畢業生,咁咪即係自己人成立獎學金畀自己人?佢地之思維真係怪。單係咁樣,學校一定會ban啦?係未?香港中產為咗自己仔女,踩界事情做齊,試問下,佢地仲有乜嘢做唔出?

2015-09-25

本周之話題,固然係Left Ear Chen有關去殖化與去中國化的偉論。聽起來都幾好笑。香港有冇去殖化?根據decolonisation之經典理論,係形容英國響殖民地獨立之前,將權力轉移的政治過程。我唔知Left Ear Chen所指嘅究竟係邊部分?係指權力轉移、政治過程定係獨立呢? 究竟有無可能,無獨立而有去殖化呢?英國佬響依家碩果僅存之殖民地,真係除咗北極之外,全部都係有全民普選的議會及全面自治,英國佬叫做representative government,即係有代議政制。咁樣,英國佬真係除了軍隊及外交事務外,大抵唔會干涉內政。呢個算唔算去殖化呢?好難話係囉,因為佢哋法律上仲係叫做英國海外屬地(Overseas Territory),即係仲係殖民地,理論上,英國一個皇室文件(Statutory Instrument)或者國會直接針對該地立法,就可以收番晒所有權力。換言之,按英國普通法定義,去殖化之三大元素:政治過程、權力轉移同埋獨立係好緊要的。不過,依家學術詞語民粹化,亂講一通無後果,不存在任何理性討論空間矣。 ***************** Left Ear Chen之演辭,大家都將視線放響去殖化及去中國化。我反而關注佢公開支持「適度有為」政策。呢個至緊要。話晒自從呢排政府,大力宣傳「適度有為」之口號後,真係第一次聽到有中國中央級官員(退休都好),咁落力去撐現屆政府。Left Ear Chen之言,其實同曲線撐現屆政府領袖,有何分別? 一連兩個星期,分別有「超然論」及「去殖民化」言論,官員級數一個比一個高,睇落去唔似係吹水咁巧合,似乎有備而來,係有一種力量,想挑起一次至兩次的意識形態論爭,只要泛民肯附和高分貝回應,咁樣當然好睇,但就變咗鬥拋學術名詞,何必呢? 講來講去,對於某一些人士而言,將香港的管治失效(特別係過往三、五年),卸畀某一個貪腐的前領導,歸咎於唔聽話之AO,推畀立法會拉布之泛民,劍指社會存在抗中、仇中、反中、戀殖、崇英、獨立等意識,真係easy excuses,由九七前用來針對肥彭,到九七後用來針對泛民,用來用去都係呢啲理由,只要香港政治及社會形勢都係依家咁樣半死不活,呢堆easy excuses隨時可以用到2047年。 問題係,點解呢班人士仲要挑起社會對立,乜唔係話要講民生,乜唔係話北方同泛民搞緊大和解咩?我冇水晶球,唔知點解,不過,假如依家嘅北大人之大方向係要搞大和解,隨時會令到依家靠撕裂搞對立靠意識形態鬥爭之人士,失咗方向,無嘢做,無油水。佢哋依家高調大搞意識形態論爭,一來就測試下,北方係未真係想同泛民搞大和解,係大方向轉咗,定係一時糊塗呢?二來就可以睇北方有幾撐自己呢?同埋第三,借機將香港管治衰敗的責任,推畀社會上存在抗中、仇中、反中、戀殖、崇英、獨立等意識,唔關我事矣。 你估北京收唔收貨?睇下其他建制派如曾大主席之反應,大家心中有數矣!  

2015-09-18

呢幾日個社會居然討論三權分立,真係眼界大開。香港人幾時會得閒到去理解憲法學裡面。權力分立之原則呢? 憲法學素來係香港讀法律之票房毒藥,唔係因為特別難讀,而係因為畢業之後唔係可以搵到食。假如閣下想走憲法學條路線,而且好鬼有興趣,仲想響呢方面響學界搵食,除咗讀完博士之外又要等到戴教授退休,至有機會教到書,成一家之言……anyway, 權力分立(separation of powers)只係一個總嘅原則,各國權力點樣分立又有唔同,有國家如美帝係分開三權,又中華民國憲法係五權,香港的權力分立原則係三權,但就一定,一定,一定唔係美帝之三權分立之憲法原則。 港人素來對價值、原則、理論不求甚解,又深受殖民主義思想荼毒,成日以為美帝對三權分立之解釋就係宇宙真理,用美帝之憲法原則去審視其他國家。 咁就死得。英帝之權力分立,都係三權,但係就係國會至上論,用市井說法,即係國會大X晒,咁佢又唔係美帝嗰種三權分立之模式,如果用美帝之分析框架去套入去英帝之憲制安排,又係錯Q晒。 大家不求甚解,香港人樣樣都要即食兼懶人包,如果連權力分立同埋三權分立之原則都唔去仔細理解,都想好似谷阿莫(網路紅人)咁五分鐘搞掂,sorry,咪好容易畀北方之學者拋浪頭拋窒囉,明白未? *************** 上周講開泛民主流唔想選特首,F選委響咖啡廳分析畀我知,上次AV仁選後,照道理白鴿唔會出選啦,剩番就係大狀黨,但大狀黨傑哥選過之後,其他嘅又準備退下來,叫佢哋又出來選,難度極高。至於為工人服務嘅黨,一路都冇興趣。其他嘅,出來都壓不到場。 F選委話,佢覺得泛民應該有一個人去選,如果唔係,泛民選委就冇一個向心力,到時唔知選邊個,上屆都有人幾乎支持咗依家嘅香江最高領袖啦?聽完之後,個心都離一離,我同佢講,似乎班後生一代,唔單止唔應該去選特首,因為好似以前咁樣,派人參選,legitimise個選舉不特止,仲三年以來不斷受到打壓,今次派人去選,又再受多五年壓迫,玩嚟做乜?選前做餐死,選後畀人玩五年?循循環環,畀人擺布到2047? ************** 青年人勇氣可嘉,E青年準備去區選,一大陣炮灰feel,佢就話要專注選舉,最好唔好叫佢搞其他嘢,乜嘢特首選舉,嘥氣也。B青年事業上緊去,雖然都好熱衷政治,但以唔影響升職為主要考慮,落區都係集中做功能界別。J青年視野好強,佢地搞緊同2047有關之論述project,咁偉大之工程,其他事唔好打擾佢。數數手指,2030年,佢地四十幾歲,香江社會之中流砥柱,就係佢地。 F青年話,2017年,不如就求其響泛民搵班四十歲左右之人士,抽生死籌,抽中一個之後,就搵佢去選,齊齊搞局,唔使太認真,總之搞到2017年選舉醜醜怪怪,成為國際笑話,咁就好玩。我話,萬一抽中一個本土派,上面都幾頭痕也。

2015-09-11

白鴿同北方官員會面,身邊真係有朋友感到欣慰。堅㗎,因為社會就響相對平和嘅狀態下,大家咪專心搵食囉。   但係,相信泛民朋友表面上冇出聲,心裡面仲驚。因為過往北大人同泛民尖銳對立,無嘢講,無交流。咁樣對泛民最好,因為泛民對中國,基本上唔使有對策。既然上面樣樣都No No No,泛民就樂得清靜,只要不斷講:我地都想溝通㗎,我們支持溝通㗎,不過係北大人唔肯嘛……。簡直係膝蓋反應。所以,當北大人忽然做好人,大家頭都痕。我響本欄都提過,依家人地搵你做朋友,咁又點樣應變呢?   其實,上面搵你做朋友,係有前提嘅。光亞叔響5月31日的講話中,提及邊啲泛民有potential做朋友呢?前提就係,呢啲朋友要「三個認同」:認同中國憲法,認同基本法,認同一國兩制。咁樣,似乎白鴿黨之黨綱,唔係咁fit 「三個認同」,因為佢地講嘅係「兩個承認、一個支持」,佢地承認中華人民共和國憲法,承認基本法,支持一國兩制。你會問:有乜所謂啫?北京既然都肯同白鴿見面,又點會執著於乜「認同」同埋「承認」呢?泛民太敏感啫? 咁樣,大家就未必理解,乜嘢叫做「語言政治」。光亞叔用三個認同,潛台詞就係,願意同佢做朋友嘅,就要接受呢三個認同,同埋三個認同之下,所有官方有關憲法、基本法同埋一國兩制的論述。咁樣,過往呢三年,上面對此之相關定義,就一樣要食晒,例如白皮書呀,乜嘢三權合作呀,「一國」派生「兩制」呀之類。   白鴿嘅死亡之吻,唔止係同北方官員會面,而係sooner or later,當北大人同白鴿之交流越來越多,雙方互動越來越頻繁,泛民之同路人會質疑白鴿:喂,究竟你地嘅中國立場,係「兩個承認、一個支持」,定係「三個認同」先?依家白鴿係未準備走「三個認同」之路線呢?我相信白鴿會話,黨綱係「兩個承認、一個支持」,唔係「三個認同」,而且,白鴿反對一國兩制白皮書,片面解讀一國兩制云云。但當白鴿咁樣答嗰陣,北方人士就會用各種管道同白鴿講,喂!白鴿,如果你唔走三個認同之路,依家之溝通同交流,會斷晒噃?你地辛辛苦苦建立嘅理性溫和反對聲音,就會一鋪清袋,沉默大多數之選民捨你而去噃?你地部分黨友嘅乜嘢委員會嘅成員資格又冇晒噃?   跟手,白鴿裡面又唔知點解就有一班人好溫和咁樣講,其實「承認」同「認同」,差一個字啫,唔好咁執著啦,大家唔好意氣用事,要以香港社會大局著想,唔好再撕裂社會,兩地大家都係一家人,同坐一條船,有乜嘢點解唔可以傾呢?   北京用語言藝術套落去對手之做法,大把前車。台灣阿扁執政之時,就死都唔接受北大人講嘅,響九二年兩岸會議時有所謂「九二共識」。佢地知道,一接受「九二共識」,就要接受北京就呢樣嘢,有解釋權。到時阿扁就要同北京打泥漿摔角,不斷就九二共識之下有冇一中各表,一中係乜嘢一中?中華人民共和國?一個未來統一嘅中國?阿扁知道,一接受呢樣嘢,就會畀北京響兩岸政策上食住上,畀北京套死。不妨大家又睇睇,幾時白鴿有班溫和嘅黨員,突然會要求白鴿改黨綱,接受上面之三個認同?唔會依家,不過,有可能㗎,哈哈!   周五刊登  

2015-09-04

我的一些吹水兄弟,近來仲發緊唔少春秋大夢,例如仲有人念茲在茲,響度用念力,日念夜念,都想嗰位領袖落台,所以近日西環大學嘅民調,話呢位領袖之得分跌到最低,佢開心到即刻響手機度分享畀我睇。 睇得我專欄比較耐之朋友,都知道我鍾意用「有感」來睇政局。對於呢位領袖有冇機會下台,我晨咁早已經話冇。No chance。我唔會因為個人主觀願望,而影響客觀分析,仲要有數據之支持。大佬呀,呢份西環大學之民調中,雖然領袖之評分創新低,但係仲有22%受訪者覺得,如果聽日選特首的話,都會揀佢,仲要係,呢個22%係比起上一次的結果多咗一個百分點。 誠然,一個百分點,算得係乜,至多係響數字上,佢嘅支持比率係冇大變。喂!大家唔覺得奇嘅咩?既然佢嘅評分跌咗,點解佢嘅支持比率又冇跌仲有些微進帳呢?咁樣係代表咩嘢呢?例如,你係泛民支持者,響超級區議會選舉之中,你好憎泛民嘅白鴿黨候選人,但係,唔通你走去選禮義廉政黨咩?於是,你係響無選擇底下,又唔想因為咁樣令立法會泛民失去三分之一的否決權,於是就含淚,響三個泛民候選人中揀一個。同樣道理,會唔會有一堆立場幾建制之朋友,雖然唔鍾意依家呢個政府,但係因為佢發覺,依家冇邊個人可以取代到依家呢位領袖執政,於是唯有含淚支持,因為佢無alternative option,即係一個可以替換的選擇。 咁樣,如果我係支持領袖連任之粉絲,我一定要想方法,幫自己偶像對付任何有可能之潛在威脅。而且,出招要快狠準,殺對手一個措手不及。例如,依家忽然之間,又話應該由公務員出任下屆香江領袖,唔係嘛,依家離開2017仲有兩年,使唔使咁早出來贈興呀? 如果我要幫偶像,我就覺得應該不失時機,有膽有識地將呢個貪曾案件,盡快結案,提出檢控。因為只有咁樣做,就可以將幾個人物用拮魚蛋之牙簽咁樣,串埋一起。即係話,由九七年新一頁開始,所謂香港良心,香港公僕典範之一姐,原來係收肥佬嘅捐助,仲同依家嗰堆佔中人物及組織黐埋一堆,跟手就係佢當年嘅副手貪曾,佢究竟有冇貪腐,依家仲查緊,但係佢嘅疑似貪腐行為,一定背後有一班龐大嘅政府官員同商界勾埋一齊,唔會淨係貪曾自己一個㗎?然後,就要將呢啲事情,株連埋習握手,再詰問習握手知唔知情呢?當社會上有好多聲音和應呢個說法之後,咁樣大家就會聯想到,下屆交番畀呢班高官搞,咪又係回復番貪曾年代嘅表面公道,內裡貪腐嘅烏煙瘴氣情況咩?一有呢啲聯想,市民就唔會咁輕易同意,由本地公僕出任下屆領袖,咁樣就可以幫到偶像手,至少減低咗一個對手之潛在威脅。 政治世界,爾虞我詐,各有盤算,私下互劈,相當正常。依家各有能之士,已經摩晒拳擦晒掌。假如我係支持領袖連任之粉絲,就期望佢用美帝之軍事戰略,迅雷不及掩耳之斬首行動,將對手盡快KO。否則,下年預算案唔派水,民望點會逆轉勝呢?

2015-08-28

因為我每日返工放工都會經過金鐘,望住藍色的天空,有點侷促的空氣,耳旁傳來「蓬蓬、蓬蓬」的重型車輛聲音,還有車站工程的噪音。好難想像,一年前的光景。是的,眨下眼已經一年。   我知道一些傳媒朋友最近在拍專輯,講緊一年前發生的事,同埋種種當時的「點解」,即係點解會有呢啲決策,點解會有嗰啲決策等等。當然,圈內的人會知道來龍去脈,肯唔肯就某些事情的決策過程,毫無保留地公開呢?抑或依家望番轉頭,會唔會再做好啲呢?相信如果呢些專輯出籠,就會令大家會有更多角度的思考,又或者會重新掀番原本埋好嘅傷口,大家慢慢睇啦!但係,一年過去,有個因素仲係響度未解決,而且情況就好似雪球咁樣,越滾越大,就係「中國因素」。呢樣嘢,正正就係未來青年要克服同解決嘅因素,亦係未來有志長期搞運動嘅朋友,點樣去處理嘅問題。   有某些老餅仲覺得,中國係一嚿你唔理佢,佢亦會嚟搞你嘅東西。一味講港中分隔,都相當superficial,幾雲端嘅思考。響依家西環總有人在你左近嘅情勢下,港人唔係話唔反抗,而係要認清自己同中國實力有懸殊,我地要爭取嘢嘅時候,就要顧及己方仲有乜嘢「渣拿」同佢講數,如果乜都冇剩,咁只能夠有幾多食幾多,而唔可以樣樣嘢都幻想可以拿盡。有呢種想法嘅朋友,喺一年前,同埋一年後相比,唔會有太大嘅分別,反而係呢一年來,更加睇到中國呢嚿嘢越來越大嚿,一年下來,港中之實力差距更遠,我地嘅籌碼更加少。   假如你係黃絲青年,睇完上面嗰兩段,的確會眼火爆,大罵有冇搞錯,依家上面殺到埋身,仲會喺廚房攞晒菜刀杯碟掟過嚟,未掟就先退讓一步,咁樣唔係對抗,而係投降,未戰先降,唔係好啱數。而且,人地實力係未真係咁強,定係少數強硬派喺度搞搞震呢?如果港人唔show下一啲muscle,即使係微弱,都可以頂住先,至多壯烈收場。而且,既然自己同對手實力有差距,更應該想辦法壯大自己實力,喺方方面面將加大自己嘅優勢,頂住上面嚟嘅北風,係未呢?   上面只係有兩種處理中國因素的態度,當然中間仲有好多variations,大家出去聽大概都離唔開呢啲。查實點都好,提出以上兩套唔同觀點之朋友,背後亦有對中國未來形勢判斷,有唔同嘅路向。假如你係一個,相信中國萬能論,中國點都唔會倒台,中國永續強大,中國經濟社會未來相對樂觀,對港態度只會緊不會寬,咁就會較為接受老餅朋友的分析,即係人地畀幾多,你就食幾多咯。   但如果比較傾向中國崩潰論的話,就會覺得既然上面好快會崩塌,係未都要有適當之手法,處理香港,做好一道超級防火牆,以備一旦上面出現有政黨倒台,我地自己呢邊先唔要自亂陣腳,而係有防範有準備底下,頂住呢個巨浪,然後就可以借自己優勢重新出發呢?咁樣,香港社會各界,係未ready for a change呢?   市場上有咁多對中國因素之研判,其實相當百花齊放,有時間大家可以細心咀嚼,借壹周年之際,想一想,好嗎?  

2015-08-21

早幾日同一班建制人士交流。係呀,仲有人原來係依家最高領袖之粉絲,支持咗佢二十幾年,仲猛話最高領袖其實係有心人云云。所以,泛民朋友唔好成日一廂情願,返去立會成日見大主席,就以為最高領袖冇乜朋友。傻啦!正如我後生時,個個鍾意Spandau Ballet ,我就鍾意Cocteau Twins。大學嗰陣人人鍾意小澤圓,我like冰高小夜,每個人都有特殊偏好嘛。 言歸正傳,既然有人話成日睇我專欄,有兩條問題又因為時間唔夠又答得唔好,依家正好將我嘅想法,比較有系統地講出嚟,反正好多觀點我都喺媒體講過。 第一條係關於呢位最高領袖係咪會連任。我冇水晶球,唔識預計將來。但係,最高領袖好想做多一屆,大家都清楚。我素來係以呢位大哥會做足十年來推測局勢發展。點解咁講呢?一來,點都好,今年以來,最高領袖之平均支持度有25%左右。佢係有一定之支持,但係唔代表,佢依家好穩陣。最高領袖咁多能人異士幫佢,自然會有人幫佢打點部署連任啦。要連任,第一件事就要入閘。上屆佢扮晒嘢咁樣四圍乞票入閘,依家大家想番轉頭,係咪真嘅呢?相信佢喺下年,佢嘅支持者,必然用盡方法,掠夠至少三百張鐵票可以入閘,四百票應該唔困難,五百票就難啲,但入閘應冇難度。如果係咁,下年佢老人家之粉絲,好自然會喺各界別打好椿,結晒幫。有票在手,同北京討價還價時至有籌碼。 然後最高領袖之粉絲就要想方法谷高民望。參考外國經驗,以及香港人大部分精甩尾又短視務實,派水就係最好方法。要派餅派到似層層有理論基礎,依家就要製造一個公共財政之政策矛盾,即係適度有為vs積極不干預,夾到財爺願意喺方方面面,不失時機地派錢,如果撞正下年中國經濟唔得,仲可以大條道理派三糧四糧,各行各業打工仔不單紓困,仲有錢派,派到大家見牙唔見眼,香港人又點可能唔投桃報李,支持下佢呢?所以,最高領袖要連任,派水係方法,另外就當然係有一班最高領袖之粉絲,放料放消息護主,打倒任何潛在對手。 第二條就係如果呢個人連任不成,邊個可以做呢個位?我聽完真係想笑出嚟。因為自2003年開始,北京高度介入香港各行各業,大小商會專業會同鄉會街坊組織NGO乜鬼都有,幾乎支配晒各行各業。北京基本上已操控晒絕大部分關節位,喺香港社會及經濟民生方面,北京有信心一撳掣,個個都會聽話。 相信北京唯一唔係有太大掌握嘅,就係香港金融市場。響呢方面,上面仲要靠香港之專家。從呢個角度講,香港之最高領袖,乜人都可以,只要佢可以幫上面處理好香港之金融安全及穩定。 上面做嘢好依慣例。習大大上面同鬍鬚曾握手,其實就係同當年老江握老董手一樣,即係話畀相關人士聽,佢有自己心頭好。至於要撥亂反正,上一次就係將老董提早收工,找個懂管理嘅人上台頂住先。上次就搵咗個AO,即係貪曾頂住一陣。  今次如果有人唔連任,或連任不成,又會唔會搵AO呢?唔知囉!

2015-08-14

身邊朋友問,點解要睇工黨嘅選領袖爭霸戰呢?點解咁重要呢?左膠選領袖,關我地乜事呢? 其實都真係唔關我地事。香江最高領袖之粉絲,家下同有鬍鬚嘅握手哥開拖,今日射兩嘢暗箭,聽日又講兩句,唔通又關你同我嘅事咩?我地大部分人響下年嘅特首選舉都只係有得睇冇得投,食花生等人連任啦,係咪?  不過,我地要觀察。要睇下人地英國工黨響選戰輸咗俾保守黨之後,家下要變,究竟應該點樣變呢?既然係咁,佢地又開始一輪極為重要嘅,尋找路線之旅。有四個人角逐寶座。 四個人,政治光譜上最左嘅,係Jeremy Corbyn,呢位大哥可謂大左膠,相信要搞更多公共開支同埋福利,以至要加大工會力量,打冧資本主義咁滯,然後又有最右嘅Liz Kendall,即係一位工黨之右派,貝理雅主義之信徒,有人仲懷疑佢係未入錯黨,應該去保守黨㖭!當然,仲有Andy Burnham(部分民調之中領先)以及Yvette Copper。 Kendall資歷淺,照理唔係主力,仲應該係陪跑居多。問題係,點解今次選黨領導,個個都好高調呢?因為今次工黨選黨魁係由工黨黨員及支持者一人一票選出來,以英國幅員咁大,其實咁樣選黨領袖同普選冇分別,所以英國傳媒相當重視今次選舉,以窺探英國工黨支持者點樣去睇未來五年,左膠面對社會問題重要政策走向。 然而,形勢有啲奇怪。英國政治係有政黨輪替㗎,真係有工黨保守黨同N咁多個黨一齊出來爭執政㗎,照道理,工黨黨員要考慮嘅,應該係下屆大選之勝算如何,邊個領導可以贏到大選先係最重要,所以,就應該選一個可以贏嘅領導。既然係咁,呢位領導亦必然應該係向中間靠攏,闡述政治理念亦相信係中間偏左,希望可以撬走中間選民(即係比較中產)選票嘛。 但係,上月中之民調就居然試過,屬於大左膠之Jeremy Corbyn處於領先之局。呢個民調真係跌咗好多人眼鏡。睇番報道呢啲新聞之網民留言,佢地支持Corbyn之原因,就係因為佢可以捍衛傳統工黨之社會主義核心價值,立場相當堅定,唔會左搖右擺,唔係因為為咗贏得大選就做變色龍。有人提過,工黨響蘇格蘭輸晒,統獨爭議固然重要,但係亦都反映咗蘇記裡面之傳統支持者(係非常左膠之人),覺得工黨已經變成英格蘭黨,冇咗對社會公平及正義之核心價值。所以,Corbyn贏的話,有助重奪蘇記選民支持。 不過,貝理雅執政時代嘅「白宮發言人」Alastir Campbell近日寫blog沉痛呼籲,Anyone but Corbyn,叫工黨同寅唔好支持Corbyn,因為咁樣只會帶來災難,令工黨變番party of protest,即係逢乜必反,咁樣點贏大選呢?如果我係保守黨,就真係好想Corbyn做黨魁,因為佢咁左膠,脫離「現實」,五年後保守黨必勝無疑,真係獨孤求敗。

/136



C觀點

中原城市領先指數

廚神

旅遊