糧草先行 - 士兵
2010-11-12

先旨聲明，我係曼聯粉絲，die hard嗰隻，所以唔介紹一次曼聯餐廳點得！位於尖沙咀樂道嘅曼聯餐廳，係全球第九間分店，分上下兩層，地下賣球衣及紀念品，上層酒吧+餐廳，沒直播賽事的話，或會有live band表演，咦？乜同Hard Rock Café咁似，呢類主題餐廳都係跳唔出框框。 食物又點呢？七重天雞翼春卷，七件炸雞槌，外層為春卷皮，每件配一種醬汁，咬落又香又脆，個人較喜歡羅勒、芥末及沙律醬，其餘燒汁、茄汁及紅菜頭汁就好一般，gimmick嘢，OK嘅；大帝凱撒沙律配西班牙小魚(可另配辣雞或魷魚)，羅馬生菜爽脆鮮嫩，新鮮貨！小魚香口之餘略帶鹹香，同帶微酸嘅醬汁味道超夾，必吃！ 黑松露火箭菜比薩，簡簡單單嘅口味，薄批上鋪滿火箭菜，底層當然係芝士，加數塊黑松露，入口竟然有意想不到嘅清新感覺，餅底又夠脆，必吃X2！主菜係意大利烤乳豬配西班牙黑豬排，一次過食兩種豬，份量偏少，先講黑豬排，乾！硬！瘦！食咗一嚿停口，西班牙黑豬點會咁？烤乳豬又點？得三件，皮算脆，但肉無味，去灣仔再興斬半斤食無咁嬲！乳豬呢樣嘢，永遠係港式燒味做得最好食，以後喺西餐廳唔會再叫，反而伴碟嗰一小堆洋蔥野米最好味，荒謬。不吃X10！(編按：費sir都會入錯水貨，唔使咁嬲) 飲品又點呢？啤酒雞尾酒款式多到數唔晒， MU Glory、Sir Bobby、Scholes等等……全部用上特別名字，叫了Giggs同Park兩杯，Giggs成分係apple juice+Earl Grey，同普通Iced tea分別不大，加上近來受傷，唔好飲；Park都係apple juice+Sprite，即係飲雪碧囉，不過要五十幾蚊杯，對狼隊入兩粒喎，亞洲之光點都撐，好好飲！甜品叫了「夢劇院」，雪糕為主，碗內大約有八球，冇特別，但食完相當滿足。 總括食物好味雞尾酒好飲價錢好抵環境一流經常幫襯！ 先旨聲明：盲目！   士兵 饞咀，成日想食好嘢，卻一星期食足五日外賣飯盒嘅死肥仔。 電郵：[email protected] am730.com.hk

2010-10-15

標題三個字好敏感，保釣？不是！賞味版不談政治呢！只是秋風起，加上報章雜誌鋪天蓋地嘅打邊爐廣告，真係睇到流口水，令我好想去滾，一於採取行動！ 喺朋友大力推介下，選擇大角咀力奇火鍋食豬骨煲。舖內工廠飯堂格局，感覺較地踎，夥計只得幾個，落單後完全無人理會，想攞醬料碗筷的話要自己動手，服務零分！豬骨煲上桌，材料成座山咁高，除咗豬骨，仲有雞腳粟米番茄南瓜蘿蔔等配菜，湯底頗重胡椒味，豬骨約四至五件，豬手亦有多件，真材實料，起碼四五人先可以幹掉一煲！生蠔一碟約十隻，美國貨，屬於最大size類別，食落蠔味十足又鮮甜，美中不足係其中兩隻有少少渣，扣分！ 手打三丸，墨蝦鯪，只有蝦丸彈牙較可取，其餘兩款死死實實，唔新鮮！珊瑚蚌，雖然又爽又脆口，但微腥，要蘸豉油！炸魚皮、炸腐皮卷、菜肉餃、脆肉鯇，普通貨色，唔食無損失！美國肥牛，又係成座山咁？假的！因為機切關係令牛肉鬈起，加上大量生菜墊底 ，其實份量不多，都唔夠Lady Gaga鋪半個心口，二百元一碟，真係搶錢！最後鮑魚登場，原隻上，十分生猛，大約淥十零分鐘就食得，咬落鮮甜彈牙，充滿鮑魚香，必叫！至尾聲時，食客走了大半，卻無人執枱，杯盤狼藉？似廢墟多啲！夥計去晒邊呢？只要大叫一聲埋單就會出現！食了千多元，當然係免加一，服務零分仲敢收加一？ 除非你想執笠啦！地址：大角咀角祥街53號  營業時間：17:30-2:00 饞咀，成日想食好嘢，卻一星期食足五日外賣飯盒嘅死肥仔。 電郵：[email protected] am730.com.hk

2010-09-10

一向較少幫襯日本餐廳，原因好簡單，大部分拉麵壽司鐵板燒爐端燒壽喜燒，充滿港式味道，唔正宗又冇日本風味，想食就去日本，但當你冇假冇錢冇伴，唯有喺香港搵間好嘅頂檔！點為之好？一定要多日本人幫襯，肯定差不到哪裡！ 位於銅鑼灣嘅和居和居，面積狹小，裝修頗舊，四周布滿清酒，又有BAR枱，正宗居酒屋格局，老闆Thomas為外國人，原居美國，在曼谷生活一段時間，及後到東京居住十多年，所以能操流利日語，故此超多日本人幫襯。 凌晨十二時到達，客人頗多，日語聲此起彼落；先來一瓶SAPPORO啤酒，杯子預先雪凍，細心！螢光魷魚沖漬，坊間並不常見，成條食，鹹香鮮味，內層微微帶苦，掂！凍番茄，夠凍之餘，芝麻醬亦中和番茄酸味，頗醒胃！原本想叫燒雞尾雞心等等……沽清，唯有叫雞肉蔥串代替，可惜味道一般！免治雞肉棒另加他媽哥(雞蛋)，先將蛋與醬汁撈勻再蘸來吃，入口嫩滑之餘，內裡充滿肉汁，咬落出奇地有種爽脆感，應該係內含雞軟骨作怪，再加上燒烤嘅香味，實在好吃！燒牛舌，表面撒滿黑椒，充滿油光，與洋蔥絲同吃，可減輕肥膩感，牛舌亦燒得外脆內軟，配啤酒一流！ 最後來兩個明太子飯團與燒飯團，前者中間釀有明太子，入口些許辛辣，飯粒頗軟熟；後者外表燒得金黄，吃下去脆口又不太乾；一次過試勻兩種食法，又夠晒飽肚！ 總括價錢唔平，但食物質素頗高，難怪咁多日本客人，以後喺銅鑼灣又多一個選擇。 小貼士： 1.請勿攝影！為何我又影到？相片質素又不俗？因為我用哎瘋科影囉！ 2.入口係趟門設計，出入請關門，否則面斥不雅。 3.餐牌有中英日對照，叫嘢食請放心！ 4.除咗老闆，有一位來自褔岡嘅店員，不諳廣東話，但識睇中文。 饞咀，成日想食好嘢，卻一星期食足五日外賣飯盒嘅死肥仔。 電郵：[email protected] am730.com.hk

2010-08-27

數年前，過江龍夏麵館在圓方開業，記得當時幫襯大排長龍，人氣爆燈，排隊企到腳軟，入座後叫了「名物」黄魚煨麵，點知麵腍魚湯味淡又唔夠熱魚又腥，一肚氣，自此不再光顧，說明貪新鮮都係中招居多。 近年夏麵館竟然在香港連開五間分店，咁難食都掂？令人摸不著頭腦，唯有四圍搵資料查個明白，原來圓方係加盟店，其他店係由夏麵館創辦人由上海直接投資，即係所謂直營店，師傅亦從上海調來，確保味道不變。好！俾多次機會你。 今次選擇荷里活廣場分店，下午店內食客不多；先來前菜夏味燻蛋，賣相不錯，入口糖芯頗黏口，煙燻味不太重，剛好！ 小籠包一籠四隻，湯汁超多，一夾起成個水袋咁，要小心放入口以免燙傷，不過食落無驚喜，肉味淡，湯粒(即由上湯冷藏而成的固體)亦太多，所以皮不能太薄，否則好易穿，整體一般！排骨擔擔麵，排骨分開上以免浸腍，湯底出奇地淡，又唔辣，排骨炸粉頗多，咬落冇肉味又嚡口又唔夠肥，仲隱約滲出鬆肉粉味，唉……令人失望，唯一可取麵質OK！再叫「名物」黄魚煨麵，一放下已聞到香味，先喝一口湯，嘩！夠熱之餘湯底魚味濃郁鮮甜色澤奶白又唔腥，魚肉份量多，肉質嫩滑冇骨，口腔充滿魚油香味，麵條盡吸魚湯後變得更好吃，最後成碗魚湯飲光，與數年前食嗰碗簡直天淵之別，喜歡吃魚麵喝魚湯必叫！ 一碗魚湯麵反映了直營店同加盟店嘅分別，新港中心鼎泰豐，黄埔鼎泰豐(已結業)就係一個好例子，加盟店還是少吃為妙。   士兵 饞咀，成日想食好嘢，卻一星期食足五日外賣飯盒嘅死肥仔。 電郵：[email protected] am730.com.hk

/136



C觀點

中原城市領先指數

廚神

旅遊