糧草先行 - 士兵
2011-08-05

火鍋對於我來說,是晚飯選擇中不可或缺的,貪其食物選擇多兼入口永遠熱騰騰,加上坐多久也沒問題,三五知己最啱,十多年前幾乎一星期吃足四晚,體重亦隨之直線上升,一肥不可收拾;近年已開始收斂,抱著「食少啲食好啲」的心態,專向料靚的火鍋店進攻。 今次目的地係位於西環的英記火鍋,這火鍋老字號屹立西環超過三十年,在港島名字響噹噹,憑靚牛與海鮮迷倒一眾街坊與老饕,我亦是其中之一,每年天氣一凍就要殺入西環,當然唔係去中聯辦種花啦。 走進店內,感覺有點時光倒流,畢竟入舖至今已有十多年光景,裝修難免過時,但又不是食落肚,對我來說毫無問題,最重要食材優質新鮮;大門口設有一大排魚缸,所有海鮮明碼實價,旁邊亦有個大酒櫃,據說老闆誠哥&英姐很懂喝,兼且有靚杯供應,自攜美酒當然OK(設開瓶費)。 讚 1.用明火爐,食物快熟,較一般電爐好得多。 2.招呼殷勤,樓面阿叔個個話頭醒尾。 3.海鮮非常生猛,剔牙時一壼普洱相當好喝。 彈 1.要收開瓶費。 2.主打牛肉質素一般。   奄仔蟹$10両─滿身軟膏隻隻飽滿,蟹膏味道獨特,肉質味道鮮濃,必吃之選(中秋前後特別好吃)。 蘿蔔崩沙腩湯底$108─湯底味道適中,崩沙腩件數十足,入口軟腍。 桶蠔$98─大大隻,鮮甜無渣,蠔味濃郁,一入口就知是靚貨必吃之選X2。 韭黄$32─火鍋店較少見的蔬菜,用來打邊爐亦不俗。 牛頸脊$128─相對失色的一碟,牛味略淡,脂肪分布一般,失望。 肥牛粒$118─比牛頸脊出色得多,牛味濃有口趙頭,咬落肉汁四溢,好吃。 牛白肉$68─又名牛胸油,脂肪一樣的賣相,其實是牛胸骨與肚的一塊纖維組織,入口爽脆,牛味濃烈有油香,但又不覺肥膩,相當神奇,另一必吃之選X3。   英記火鍋海鮮酒家:西營盤德輔道西103-109號樂基商業中心1樓   士兵 饞咀,成日想食好嘢,卻一星期食足五日外賣飯盒嘅死肥仔。 電郵:springkwok@ am730.com.hk

2011-07-29

不喜勿插!早前娛樂新聞,不是霆鋒栢芝,就是泳豪思琦,離婚唔離婚有冇第三者分手唔分手,為甚麼要交代?其餘親朋戚友一干人等,亦不停爭相回應,因為日日有料爆,足足報道了成個月,其實離離合合本屬平常,藝人而已,說實話,關我鬼事。 不過,論最長壽的,非牛脷文與豬髀安莫屬,由91年合唱《其實你心裡有沒有我》開始撻著,發展地下情,互相消費正式展開;96年豬髀安首次個唱,牛脷文做嘉賓大唱冧歌;99年牛脷文個唱突然停電,豬髀安衝上台護花繼而合唱;02年的廚房宣言……04年分手……um………開始與食有關了,11年兩人竟然在太平館開餐時被記者「撞破」,其後的太平宣言還說「由攝影機和照相機突然闖入太平館一刻,太平沒有了」。 OMG!太平館可是有百多年歷史,晚晚幾乎坐無虛席,蔣介石周恩來魯迅白雪仙李小龍周星馳或我等市井,都會去吃的豉油西餐平民飯堂,會被「撞破」的機會達百分之99,不想給「撞破」可回家吃嘛,可是豬髀安要開個唱啊,um………明白的;還有那個姓SO的笑說,要太平館為他們推出「復合豬髀飯」,可否抽少次水?據說,不少市民遊客紛紛慕名而去太平館(最近一次晚市光顧,等位時間比早前更長),順道看看那個復合位置之餘,亦有機會品嘗太平館獨步天下、馥郁香甜的瑞士汁,從此香港多了一個旅遊景點,兼可推廣一下香港獨特飲食文化,總算是場功德。   烚鹹牛脷$98──新鮮靚貨,入口質地軟腍,邊位略有咬口,牛味超濃,鹹香有緻,絕對令人食過翻尋味;亦有另一款岑味(譯音Salmis)牛脷選擇,一種傳統法式醬汁,用珍肝及肉碎等調製。 粟米石斑飯$118──每次都吃乾炒牛河,想轉轉口味吃飯,首推粟米石斑飯,魚厚身炸漿薄、粟米汁夠杰身,配埋炒飯底,極速幹掉。 瑞士雞翼$138──招牌菜中的招牌菜,極具代表性,瑞士汁由頭抽、紹酒、冰糖和香料等混製而成,將雞翼生浸,用文火浸熟,皮爽肉嫩,咬落多汁,味道相當獨特,只此一家,其他食肆模仿不來。還有煙䱽魚、乳鴿、焗梳乎厘也是必吃。 太平館─九龍油麻地茂林街19至21號    士兵 饞咀,成日想食好嘢,卻一星期食足五日外賣飯盒嘅死肥仔。 電郵:springkwok@ am730.com.hk

2011-07-08

每隔一段時間,腦裡不自覺會浮現一些品賞過的美食,令人心思思想食多次,當中可以是一粒魚蛋,一杯奶茶或一塊豬扒,這種情況叫食過翻尋味吧! 鴨脷洲珠記的油鹽焗膏蟹,就是她令我有這種衝動,記得初次與她邂逅是十多年前,經好友介紹下老遠來幫襯,第一次入口真是驚為天人,感覺好似基哥食咗瀨尿牛丸般,披上絲巾在沙灘奔跑一樣,不能自拔。自此便經常光顧,久而久之變了熟客,亦認識了珠記的大家姐珍姐。 珠記由珠伯創立,從街邊大牌檔做起,之後搬往鴨脷洲市政大廈,生意愈做愈好,一個檔口養起成頭家,典型獅子山下故事;而珍姐自小輟學在父親身邊幫手,至今做了幾十年,真正由細做到大,故此對所有海鮮瞭如指掌,亦與魚販相當熟絡,好多靚海鮮都留給珠記,包括赤米、九節蝦、膏蟹、海魚等等,喺鴨脷洲邊個夠膽呃佢。當然,你可以學菜潺咁自攜海鮮幫襯,但我每次都交給珍姐發辦,舖前設有魚缸,靚貨喺晒度,揀好海鮮傾好煮法即成。 小貼士:1.夜晚經常爆場,最好打電話訂枱兼可預留海鮮。 2.除了海鮮,亦有家庭小菜供應。首推豉油雞和沙嗲牛肉炒芥蘭。 3.今日所介紹,在餐牌上是看不到的,弔詭吧!要食好嘢請跟我叫!   士兵 饞咀,成日想食好嘢,卻一星期食足五日外賣飯盒嘅死肥仔。 電郵:springkwok@ am730.com.hk

2011-06-17

  近年「食廈」大行其道,淨係聽個名已經夠晒潮,商廈環境高級,啱晒一眾喜歡食裝修食氣氛食靚杯食靚叉食靚碟食靚侍應的潮人,記住,唔去會OUT的啊!但係,我等市井之徒,心目中夠資格叫「食廈」的,其實是一眾街市大廈,樓下街市樓上食肆,基本上離不開一個食字!唔夠潮?北角市政大廈「東寶小館」一早賣Fusion菜,夠晒潮啦!不過今次推介不是它,而是在同一地點開的分店「店小二」。 「東寶」晚晚爆場人所共知,就連老外同蘿蔔頭也懂門路光顧,咁好生意開多間乃係明智之舉,誰不知這間分店賣的不是東寶菜,竟然以燒烤作主打(在分店亦可柯打東寶餸菜),尤其是燒烤食物質素十分之高,短短兩個月內我幫襯了四次,而每次味道幾近一樣,整個餐牌幾乎食勻。推介:燒烤有燒雞、牛扒、盲鰽、白鱔等;小菜有花雕蒸花甲、生菜包、鹹魚煎肉餅(配豬仔包)、黄金蝦等。 店內陳設以木枱為主,座位之間尚算闊落,與友人熱熱鬧鬧地大吃大喝實在一流,不過當你望到隔籬坐著一大班「極品」OL的話敬請小心,她們會肆無忌憚大講男人,拿著戰鬥碗不停劈劈劈,總有幾個變成關二哥一般,然後拿著手機不停拍拍拍,合照時還夾出career line+V字手勢,令我忍俊不禁,但總要體諒一下,此等行為在「食廈」 不能做嘛,很趕客的。 (攝影:陳肇康)   自家醃料燒雞$250─見到張相放咁大就知係推介菜,採用新鮮雞做,脂肪較少,極有雞味兼皮脆肉嫩,入口有一股獨特燒烤味道,別處難尋,連我隔籬飲食異典作者阿鼻(出晒名怕雞的),也狂吃數件,可想而知有幾好食,有厭食症的不妨諗諗(需預訂)。   黄金蝦(時價)─蝦新鮮,鹹蛋黄布滿整隻蝦,夠乾身,火候剛好。(東寶小館)   燒雞腎$58─用黑椒調味,粒粒又爽又彈,佐酒不二之選,最佳小吃。   燒盲鰽$108─魚皮外鋪滿粗鹽,肚裏塞滿香草,味道天然,魚肉滲出陣陣蒔蘿香味,實在好吃。   燒肉眼扒$158─質素比一般扒房更佳,生熟程度亦一流,牛味濃郁又Juicy,aftertaste相當長。     地址:北角渣華道99號渣華道市政大廈渣華道熟食中心2樓 CF1-2   士兵 饞咀,成日想食好嘢,卻一星期食足五日外賣飯盒嘅死肥仔。 電郵:springkwok@ am730.com.hk

2011-05-27

由早到晚吃了七間食肆,來到最終回,當然以葡國菜作結尾,澳門葡國餐廳多的是,點揀?其實多吃幾間自然有比較,不過我有幾間可以介紹給你,排名不分先後: 美心亨利─位於南灣民國大馬路,門口對正海旁,環境清幽。推介菜式:燒大蝦尤其出色,入口彈牙多汁,很神奇,燒雞亦不俗。 海灣餐廳─座落河邊新街媽閣廟附近,典型舊式傳統味道。 推介菜式:一道焗鴨飯鴨味十足,飯底布滿鴨肉,油香撲鼻,真係諗起就想食。 亞馬交─個人認為係氹仔官也街附近最好味葡菜之一,店子細細充滿私房味。推介菜式:葡國雞,真係好味到不能形容,唔識寫!總之食完翻尋味,信我!記得訂枱,愈早愈好,否則遭遇同我一樣──就係今次食唔到。 阿曼諾─今次Macau飯主角,位於氹仔舊城區飛能便度街,老闆為葡國人,菜式口味偏向傳統,店子不大,裝潢有些家庭Feel,牆上貼滿葡萄牙國家隊與及士砵亭足球隊海報,老闆與我閒聊時還大嚷:「哎吔,士砵亭今年麻麻地啦」,相當有趣。這裡啲燒乳豬、炒蜆、烚馬介休、烚椰菜均十分出色,但今次通通冇order,因朋友們想嘗試其他菜式。另外,餐廳裡經常有一大隻風乾火腿,每次例叫一客,記住指定要老闆切,大碟好多! 點解推介裡冇路環黑沙最出名嗰間法蘭度?因為難食呀!招牌菜燒乳豬完全唔掂,皮脆又點?肉質欠佳,應該係烚熟後再燒才會如此,其餘菜式………(下刪一百字),只得沙律好吃,因為新鮮!你仲會否慕名而去?   1.蒜蓉蝦$250─大大隻夠晒份量,汁料不會蓋過蝦味,合格,但整體其實冇乜特別。 2.燒羊扒$98─醃料怪怪的,香料像印度似的,全晚最差的一道菜,但伴碟的自家製薯片卻十分出色。 3.葡啤$50─味啖,入口較乾身,似日本啤酒,像Asahi。 4.燒沙甸魚$85─燒的時間剛好,魚皮香脆肉質嫩滑,吃時落些橄欖油和白醋,整體味道即時起了變化,橄欖油與魚油混合,更加鮮味。 5.葡萄牙風乾火腿$250─ 好味過巴馬火腿,夠油香冇渣,絕對食得過,以麵包伴之再加顆橄欖,很歐洲呢。 6.馬介休沙律$70─材料相當豐富,烚蛋+馬介休+薯仔+番茄+洋蔥等等,飽肚感十足,絕對不能睇小。   士兵 饞咀,成日想食好嘢,卻一星期食足五日外賣飯盒嘅死肥仔。 電郵:springkwok@ am730.com.hk

2011-05-13

4.在馬交除了禮記雪糕,另一人氣食店李康記(頤德行),超滑豆腐花亦出晒名,有別於一般豆品店,冇黃糖冇膠碗只有花奶+糖水,花奶令超滑豆腐花變得更滑,糖水微微滲出薑味,加上淡淡的豆香,噢,整件事很Match,真的滑不溜口,難怪日賣幾百碗!李康記前身為頤德行,賣米的,做了幾廿年,後來改賣超滑豆腐花先改名李康記,咦?我總共寫咗幾多個滑字? (新馬路新埗頭街19號D地下)   5.食完豆腐花,其中一條路線,就係殺入福隆新街,但每次途經營地大街,總見到鳳城珠記裡頭,有三四個阿嬸埋頭苦幹地包雲吞包水餃,動作快得驚人,唔食番碗點得,珠記最出名就係魚角,所謂魚角,其實係華麗版魚皮餃,皮薄但煙韌,餡料有豬肉蝦肉冬菇,隻隻脹卜卜,十零蚊碗,便宜到發笑,仲有得外賣做手信添。(新馬路營地大街127號地下)   6.蝦籽撈麵香港有好多,不過好吃的寥寥可數,想吃正宗蝦籽撈麵非到祥記不可,1.竹昇麵——彈牙有蛋香,冇鹼水味;2.蝦籽——分量多,加上略為烘乾,帶出鹹香;3.豬油+豉油——不要聽見豬油二字就怕得要命,豬油可是撈麵的靈魂,陣陣油香之餘麵條入口更滑,係好吃得要命!祥記炸米通鯪魚球亦一絕,很香脆,不過,蘸蜆芥醬吃的話,主角變成配角,像泰廸羅賓。(新馬路福隆新街68號下)   7.食完麵,必定過來三元吃碗手打肉丸粥+窩蛋,每碗粥即叫即做慢慢煮,要耐心等候,而每粒豬肉丸用匙挖成,雖然外表較粗糙,卻無損質感,入口鮮甜有肉汁又大大粒,粥底綿滑有米香,再加上豬肉同雞蛋汁的甜味,真係同崔世安啲國語一樣令人回味無窮。唉!點解喺香港食唔到?點解六千蚊仲未收到?(新馬路褔隆下街44號地下)   饞咀,成日想食好嘢,卻一星期食足五日外賣飯盒嘅死肥仔。 電郵:springkwok@ am730.com.hk

2011-05-06

在香港,貴為四大天王的粥粉麵飯,在物價飆升天價租金再加個最低工資下,食肆紛紛將貨就價,質素每況愈下,要不然就來個關門大吉,難為了一群老饕,要好吃的,唯有到澳門走走,因為那朕舊味道還在。   1.發展就是硬道理?起樓嘛,拆!所以在青洲的劉記於舊年底已結業,少了一個舊地,幸好另一間灶記仍然健在,作為第一站,先來個豬扒包+咖啡,豬扒黑椒味略重肉味不足,包夠脆熱烘烘,算OK!咖啡味淡不夠滑,很失望,同劉記比輸成條澳氹大橋,不過坐在矮凳上吃,風味搭夠。(灶記─青洲大馬路青洲小學側)   2.幾乎每次到澳門,都會到龍華歎茶,喜歡他沒空調,喜歡他天花掛著吊扇,喜歡他沒點心紙,喜歡他四周光猛整潔,喜歡他牆上的相片展覽,喜歡他的普洱茶,就是不喜歡他的點心,因為很 . 差 . 勁!但全店最精彩,就是他的蔥油雞,午飯時段幾乎每枱必叫,入口雞肉相當嫩滑兼雞味十足,雞皮又爽又彈,蔥油亦毫不吝嗇布滿全碟,蔥+薑+油+雞是絕配,來個白飯,停唔到口呀!食完和老闆閒聊幾句,看看相片,寫意。(龍華茶樓─筷子基提督市北街3號)   3.吃完鹹,總要些甜的調節一下,當然係到禮記食雪糕,店內無論裝修、雪櫃同雪糕包裝都充滿六七十年代味道。先來雪糕紅豆冰,紅豆煲到全部起沙,甜度適中,滿分!主打的三文治雪糕我認為幾近無敵(網上劣評不少),那個年代來路貨未普及,吃到的全是土炮生產,同現時生產的雪糕比較很不公平,因為製法完全不同,只要你狠狠咬一口,和小時候吃的味道完全一樣,腦裡回憶立即湧出,友人在旁大叫味道很秀茂坪,你話係咪無敵?失憶的你不妨多吃幾口,回憶總是美好的。(禮記─荷蘭園大馬路12號地下)   饞咀,成日想食好嘢,卻一星期食足五日外賣飯盒嘅死肥仔。 電郵:springkwok@ am730.com.hk    

2011-03-25

喜歡美國嗎?除咗電影+蘋果,其他一律麻麻,當然包括食物。簡單一點,八個字講晒:科技一流食物九流。以漢堡包熱狗Pizza炸薯條冬甩炸雞奶昔汽水雪糕等垃圾食物作主導,連俄羅斯總統梅德偉傑夫年前訪美時,與美國總統奧巴馬共晉午餐,都係請佢食漢堡包,哈!潛台詞即係「請你食垃圾」!傑夫,有點戥你可憐,因為我國主席訪美時,有國宴食啊!下次來中國時,不妨試試豬油撈飯,保證好味又有益。   美國人除了可樂當水飲,茄汁亦不可或缺,試過在連鎖快餐店,看見身旁的外籍人士正在吃熱狗,茄汁滿溢,枱上薯條亦然,可想而知,垃圾一蘸茄汁即變佳餚,果然是茄汁大國。 早前睇《黑天鵝》,順道去了Ruby Tuesday,夠美國吧。唓,九流你又去食?均衡飲食嘛,並不是營養師常常掛在嘴邊那個三低一高,而是食勻每個地方菜式,試過才有資格批評,何況同行友人係Junk Food之霸,啱晒,否則邊有稿交!餐廳當然以薯條漢堡包牛扒等做主打,亦有意粉等其他選擇,漢堡包少吃,牛扒在這種價錢上質素一般,所以只選擇薯條、沙律、燒排骨及烤薄餅,不過幾道菜大多數以煙肉蘑菇車打芝士做配料,味道感覺上差不多,始終係美國菜,好食極有限,幸好調味不算太濃,否則過鹹收場,唔通搶唔到鹽? 順帶一提,這裡的waiter(主要serve我嗰位),經常主動斟水,滿臉笑容服務好好,推介promotion時亦不覺煩,不得不讚。 Ruby Tuesday─九龍灣德福廣場一期P26號舖   饞咀,成日想食好嘢,卻一星期食足五日外賣飯盒嘅死肥仔。 電郵:springkwok@am730.com.hk

2011-03-11

小時候在家中打邊爐是燒炭的,一家人冬天圍爐暖笠笠!所以對炭爐有一種特別感覺,因為內裡充滿對老媽的回憶;但是,香港炭爐火鍋店極少,土瓜灣「鴻福」、旺角咸美頓街「和味」、長旺道珠婆的「聯發」到「永豐」(以上兩間均已結業)我都幫襯過,為的是要買回這種感覺。   一雞死一雞鳴,近年有生力軍加入,位於沙田崗背街廣東人小廚,日頭做茶餐廳,入夜後變身炭爐火鍋,枱凳放滿整條橫街,人聲鼎沸。他做的是火鍋+燒烤,除了火鍋生料,還有肉類串燒海鮮供應,淥又得燒又得,即是土瓜灣「鴻福」的COPYCAT,玩法大致相同!抄得人,就要改善別人缺點,「鴻福」枱太高,這裡比較矮,無需「立食」,GOOD,爐架設計一絕,剛好放三嚿炭,火鍋放在旁邊,其餘位置用來燒烤,十分方便!加上老闆選用棕櫚樹炭,火力均勻煙又少,所以衣物上的炭屎餘韻減到最低,滾完返屋企都無人知呢! 當晚光顧時,食環署職員正在執行職務,附近一帶食肆,無一夠膽在店外放枱多做生意,即係無位囉,要我罰企半個鐘兼食西北風!當然破口大駡兼發表偉論:「做生意啫,又唔係殺人放火,趕到咁盡做乜,當年珠婆都係咁,搞到唔夠生意要執笠,又少一間炭爐啦,風味嚟嘛,全部開晒大家樂大快活吖笨!咁我啲回憶點算?再咁落去,香港玩完………下刪萬字!」老闆見我臉紅耳赤立即安撫說:「唔好嬲,好快有位,陣間送兩隻瀨尿蝦你食!」事後當然冇走數啦,仲好生猛添,抵讚!   饞咀,成日想食好嘢,卻一星期食足五日外賣飯盒嘅死肥仔。 電郵:springkwok@am730.com.hk

2010-12-10

香港地舖租貴到嘔,做飲食,除咗大集團,其餘小本經營嘅,好多賺埋唔夠交租,香港人食腦嘛,豬扒薄切凍飲多冰例湯溝水叉燒斬少嚿,慳慳埋埋仲頂得住,但一定冇客返轉頭,等執笠!   都話香港人食腦嘛,樓上舖租平,可以將慳番舖租嘅資源用嚟提升食物質素,一樣掂!位於銅鑼灣禮頓道2A號2樓嘅連粵日居酒屋就係一例,容納廿人左右嘅小店格局,主打的骰fusion粵菜配日本清酒,有賣點!打開餐牌,款式唔多,所有食物都係數十元(設最低消費每位$180),老闆Jareth原本係廣告人,喜歡煮,每日到街市買食材,然後同廚師一齊喺個超細嘅廚房用電爐煮,咁逼狹都煮得出十幾款菜式,算係有心。 小插曲:話說當日,某飲食周刊的兩億食評家剛啱介紹連粵日,批評食物普通,力數老闆唔識做生意好唔掂,當然冇減低我幫襯意欲,但係八卦㗎嘛,所以埋單時問老闆篇稿有冇影響生意,佢話即晚就有幾枱客打電話嚟取消訂位,都幾大影響,生意難做。以兩億食評家嘅金口妙筆,將你捧上天唔難,要你執笠更容易,但為踩而踩,死嘅人好冤枉喔!難道踩死人哋自己就會賣多兩張飛? 作為食客,我只關心好吃不好吃,人哋點做生意月蝕幾多,關我鬼事!   饞咀,成日想食好嘢,卻一星期食足五日外賣飯盒嘅死肥仔。 電郵:springkwok@am730.com.hk

/136



C觀點

中原城市領先指數

廚神

旅遊