糧草先行 - 士兵
2016-12-02

我係一個比較喜歡豬骨湯底拉麵嘅人，味噌湯底一向敬而遠之，因為試過好多次，食完只得一個字：鹹！仲要係好鹹(肯肯定鹹過川普)！直至食到札幌一粒庵，先知真正味噌湯底是甚麼一回事，原來我一直遇到嘅味噌拉麵師傅，都係鍾意鹹嘢。 一粒庵完全採用北海道產食材製作，湯底由豚骨+雞肉+白菜+生薑+大蔥+昆布，再配以熟成的米麴味噌而成，鹹度油膩度非常適中，加上一粒粒背脂，入口有厚度非常濃郁，味道極有層次絕不死鹹，可以Nonstop咁飲；麵條用北海道小麥製成，粗度屬於太麵類別，微微金黄色兼非常有嚼勁，索耐一點湯汁亦不過腍；叉燒厚身夠肉香，可惜得一片，要就住食；而放在叉燒旁邊嗰條蔥，係有北海道山菜の王樣之稱嘅「行者にんにく」，味道不太辛辣，帶點韭菜味道，非常特別；別以為炒蛋一定要配沙嗲牛麵，原來配拉麵仲好，我都係第一次食到呢個組合，半熟蛋汁流入味噌湯出奇地夾，好食到癲，呢碗麵賣千二円，冬天食完暖足幾粒鐘，非常超值。 地址：北海道札幌市中央区北四条西1丁目 ホクレンビル地下1階 狸小路：山嵐黑虎 喺味噌天下嘅札幌，一樣有好味嘅豚骨拉麵選擇。喺狸小路附近嘅山嵐黑虎，有齊赤(辣味)白(鹽味)黑(芝麻)海(魚介)四款選擇，作為蔥怪的我當然係揀白啦，鬼咁多蔥，湯底係重口味類別，半熟蛋夠流心，我俾八十分。 北海道札幌市中央区南三条西1-2-1 旭川拉麵：一藏 旭川一藏嘅元祖招牌拉麵，碗面鋪滿青蔥，湯底可以選擇鹽味、醬油或者味噌，配以豬骨湯底，材料簡單味道紮實；加上道產小麥製嘅拉麵(中至細麵)，掛湯一流，咁啱去開旭川不妨一吃。 旭川市3条通7丁目山田ビル1階 士兵~饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2016-11-04

以往去北海道，多數都係冬季去留壽都二世古滑雪，因為呢度粉雪出晒名，滑完最多留一兩日札幌，再玩盡啲就抽時間走一趟余市或小樽，未能完全感受北海道。所以今年秋天用了十天時間去道東覓食，發現這裡的農產品及海鮮，美味程度簡直超乎想像！   而我第一站，就係離札幌兩個零鐘頭車程嘅美瑛選果，cube形嘅設計加上落地玻璃，喺美瑛市嚟講非常顯眼，所以近年開始變成知名景點；而呢度主要分為兩部分，一邊係餐廳一邊係商店，商店「選果市場」主要售賣美瑛農產品，有男爵薯仔、金時豆、黑大豆、蜜瓜、洋蔥、南瓜及紅蘿蔔等等蔬果，仲有果汁、零食、米酒、牛奶，而當中最受歡迎嘅，一定係美瑛米，因為係用北海道大雪山十勝岳出產嘅名水種植，加上美瑛日夜溫差大，令米粒的澱粉質含量較高，種出嚟嘅米特別靚，入口香甜。自駕遊嚟到選果市場，不妨買包返去食；如果係坐廉航兼係坐火車的話，就要諗清楚先好買！   另一邊就係美芝蓮一星餐廳ASPERGES，食物以美瑛蔬菜為主，午餐價錢由2,600円至4,600円不等，高低分別在於主菜選用材料：最貴嘅set有七道菜，菜式多菜少肉，怕肥嘅女仔食都絕對適合享用，其中一道招牌田園沙律採用超過二十種美瑛時令蔬菜，直情將成個美瑛田園放咗上碟，一次過晒你冷，第度食唔番！而薯蓉湯入口非常幼滑，有奶香之餘亦帶有少少山葵味，3.6牛奶加男爵薯仔真係無敵配搭。主菜就係北海道產牛面頰，係唯一一度以肉為主嘅菜，用紅酒燉到又腍又入味，入口肉香陣陣，可惜portion比較細，男士食就未必夠喉，好彩跟主菜一齊的燉煮洋蔥夠焦夠甜，剛剛好！ 美瑛選果，由店舖至餐廳都係用最好的食材及農作物，將美瑛的真味帶給顧客，你會感受到一份堅持；點知返到香港，竟然看到有集團粵菜大廚用雞粉去追尋香港經典之味，仲要拍埋廣告推廣，將化學味隊俾你，你會感受到一份Sorry！  網址：http://bieisenka.jp/index.html地址：北海道上川郡美瑛町大町2丁目 ◆相關片段今天上載《am730》Facebook專頁。◆ 士兵~饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2016-09-15

矢場とん 味噌豬扒 日本人一向善於處理炸物，大部分炸豬扒都非常好吃，去得名古屋搵食，豈可錯過三大名物之一的味噌豬扒丼。顧名思義，即係味噌醬淋喺炸豬扒上面，起初還以為會好鹹，外層炸漿又會受醬汁影響腍晒，點知放入口一咬，立即瞪大對眼大叫好食；炸漿保持脆口之餘又唔鹹兼略微有少少甜味，輕輕帶出肉香，肉質亦好軟腍，一口肉一口飯，瞬間碗底朝天！原來味噌醬係由紅味噌、鰹魚高湯和砂糖調製而成，令成件事充滿層次感，當然豬扒上的蔥(+50円)亦功不可沒，難怪咁受歡迎。另外特製燒豚(500円)亦係必叫，肥瘦相間，送啤酒最好。 ‧みそかつ丼(1,200円) 矢場とん：名古屋市中區栄3-16-1   松坂屋名古屋店南館10階   蓬萊軒 鰻魚飯 下午食完味噌豬扒，飽到褲頭鈕就爆，赫然發現隔籬舖就係喺名古屋最有名氣嘅鰻魚飯店蓬萊軒，立即決定是夜同鰻魚決戰，結果係好‧食‧到‧癲！由江戶時代經營至今嘅蓬萊軒，以炭燒鰻魚馳名(採用最高級別備長炭)，特別在於鰻魚切成小塊，以便一飯四吃； 食法：先將鰻魚飯分成四份 第一：將四分一放喺碗，原味品嘗。烤到微焦的鰻魚入口炭香味超級濃烈，入口即化。 第二：再將四分一加上蔥花wasabi紫菜。多重味道變得複雜，將鰻魚推向另一境界。 第三：重複第二加上高湯，變成鰻魚茶漬飯。其實食完第二碗開始有點膩，但加咗湯之後味道變得相當清爽，全無油膩感。 第四：你想點食就點食。 蓬萊軒鰻魚飯係我暫時吃過最佳，味道竟然比東京淺草鰻魚飯更好食，陣陣炭香令人回味無窮，所以我決定12月飛去名古屋食多次。 ‧ひつまぶし(3,600円) 蓬萊軒(分店)：松坂屋名古屋店南館10階 世界の山ちゃん 幻の手羽先 世界の山ちゃん，1981年喺名古屋開第一間店，憑著一味招牌菜幻の手羽先(即係雞翼)，大受歡迎，分店開完一間又一間(現時名古屋有37家)，周圍都見到佢嘅蹤影，為食嘅我當然要去本店朝聖一番，殊不知中了大伏。幻の手羽先，雞皮灑上一層調味粉，非常重口味，入口勁鹹，雞皮炸到死死實實肉又少，乾曾曾食到口都損，難食到一個點；而另一款黑手羽先，佢嘅味道係幻の手羽先乘大兩倍，簡直鹹到爆腎，要連飲兩杯啤酒先掂，食完慘變嬲嬲豬，麥記個脆香雞翼好食過佢十倍囉！奉勸各位千祈千祈千祈！記住記住記住！唔好喺世界の山ちゃん食雞翼。 ‧幻の手羽先(5隻430円)‧黑手羽先(3隻360円) 世界の山ちゃん本店：名古屋市中區栄4-9-6 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2016-07-22

隨著築地搬去豐洲日子愈來愈近，不捨心情亦愈來愈濃，有啲嘢拆咗就係拆咗，場內一啲老舖、人和事，仲有我喺度留低嘅腳毛亦會隨之消失；而我嘅腳毛，只在場內和食店かとう枱底留低，因為我去築地係唔會食壽司，晨早流流排幾粒鐘食十件八件生嘢，我情願花時間去原宿goro's排隊抽籤買毛好過。 記得幾年前，我同朋友A第一次到訪時，門口冇人龍，有兩個外國遊客早我哋一步入舖頭，舖面一位女大將大聲一呼：「no english menu !! no sushi!!」然後手指指向右邊！即係點？叫佢哋過主囉，兩個鬼佬冇癮離開，之後女大將再向我做一個交叉手勢：「打咩 !! 」見到咁嘅情況，心口涼了半截，好彩我一早準備好日文cap圖，用電話示意想食汁煮喜知次，女大將便招呼我哋坐低。 坐我隔籬一位婆婆，正正就係享用緊汁煮喜知次，枱面仲放咗支麒麟啤，見佢吃一口魚再呷啖啤酒，再細細聲：「美味い～～」然後向我微笑一下；而我朋友隔籬係一個似喺築地工作嘅男人，邊叼著一支煙邊睇報紙邊食生蠔汁，非常豪邁。かとう真係典型日本食堂feel，成個氣氛正到不得了，從此就愛上咗，之後每次來東京都要去食(總共食咗六次)。直至最近一次幫襯，女大將認得我，一入舖就向我揮手打招呼，嗰一刻真係非常感動，喺東京和食店由打咩變成熟客，咁大個仔，真係第一次。 難得係かとう唔會為咗做遊客生意，去改變自己放棄舊客人，唔似得香港一啲食肆為咗賺錢，餐牌變殘體字、味道變辣變重口味就晒大陸遊客。所以大家去かとう嗰陣記得準備好資料叫嘢食，唔好聲大大，斯文啲唔好失禮人，要尊重一個喺築地場內遊客比例最少嘅好地方。幸好，呢間我最愛嘅和食店，今年十一月鐵定會搬去豐洲，下次再去東京時必定拜訪。 地址：東京都中央區築地5-2-1築地市場8號館 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2016-06-10

足料拉麵：らーめん二男坊 半熟蛋．五塊叉燒 980円 喺香港好少食拉麵，動輒過百元又唔好食，就算連我至愛嘅一蘭，都係思鄉病發才去食一碗，況且味道同日本始終差一截，食拉麵quota都係留番俾曾經攞過福岡拉麵總選舉第一名嘅らーめん二男坊。二男坊嘅豬骨湯底經過特別調校，味道濃郁沉穩厚實，但又不油不膩，唔死鹹亦冇惱人嘅豬臊味(所以較多女顧客幫襯)，配上吸湯力特強嘅博多細麵，十級好吃。另一主角叉燒亦非常出色，每片肥膏邊位都用火槍輕炙，提升香味，一碗5塊，啱晒食肉獸。$70有麵食有囡囡睇去邊度搵？香港啲拉麵？你食埋我嗰份。 地址：福岡市博多區博多駅前2-16-4 真.炭火串燒：信長本家 串燒盛合(廿二串) 3100円 人在福岡，好多人都會去中州屋台見識一下，雖然氣氛好好，但缺點就係太貴，點貴法？我試過食個麵+幾串串燒+兩支啤酒=近萬円(含淚埋單)！唔想荷包肝硬化，其實福岡大把平靚正選擇，位於博多站筑紫口附近嘅歷史老店信長本家，昭和40年開店至今，炭火串燒出晒名又平又好食，深受附近上班一族歡迎。而我每次都會叫串燒盛合，貪佢一碟有成廿二串兼有豚肉雞肉雞皮內臟乜都齊，仲只係賣3,100円，平均唔使$10串，喺香港食串魚蛋咁嘅價錢，就可以享受到老師傅嘅炭火串燒，真係蔗渣價錢，燒鵝味道。 地址：福岡市博多區博多駅中央街5-25(筑紫口出口右轉小路，万作家旁) 抵食海鮮丼：福魚食堂 鮭魚子丼．海膽 2000円 我喺褔岡其中一個指定動作，就係到長浜鮮魚市場會館嘅褔魚食堂吃早餐，因為呢度朝早6點就開門，方便魚市場工人醫肚，價錢仲平到你唔信，汁煮魚定食只係800円，而我最愛嘅兩款海鮮丼定食都只係千零二千円：1.極上海鮮丼+半板海膽(1,500円)，一碗有齊8款刺身，件件鮮甜無比，加埋半板海膽，都係一百蚊多啲，平到笑，Jacky Yu喺香港食碗車仔麵都百二蚊啦，你話幾荒謬；2.鮭魚子丼+一板海膽(2,000円)，鮭魚子舖滿飯面，粒粒爆油，海膽勁甜，純膽固醇定食只係賣百四蚊港紙，抵到爛！ 地址：福岡市中央區長浜3-11-3 市場會館1F 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2016-04-15

相信大部分人都喜歡切蛋糕慶祝生日，不嗜甜的我，生日最憎就係切蛋糕；而作為一個牛魔，最喜歡切牛扒慶祝。所以每年踏入4月份，我生日指定動作就係劏！牛！而今年劏死牛嘅地點就係Morton’s of Chicago。 位於尖沙咀喜來登酒店4樓的Morton’s，裝修典雅燈光柔和舒適，枱與枱空間足夠，氣氛冇一般高級餐廳咁拘謹。本人是日生日，menu頂部特別印著「Happy Birthday, Spring！」Sweet！負責招呼的Waiter(佢叫Gordan)知我第一次嚟人生路不熟，成份menu逐隻字同我介紹，落單前又特意叫人拎咗成盤扒出嚟逐塊講解，對於唔知揀乜好嘅牛扒初哥，呢兩個step絕對有用(我呢個牛魔一早就對Bone in Ribeye虎視眈眈)，分量控制方面，Gordan亦會不時作出提點(美式扒房portion偏大)，服務絕對係好到加零一。 洋蔥包(免費)──包夠熱面夠脆，內裡非常軟熟，入口充滿洋蔥香，用手搣特別好食，沙煲咁大個包一陣間就消失咗，食完半飽，之後塊扒點算。 Jumbo Lump Crab Cake $195──以往食過嘅蟹餅，蟹肉少洋蔥多醬多兼煎到一劈嘢，Morton’s嘅蟹餅則完全相反，蟹肉多洋蔥少醬少兼煎到焦脆，入口啖啖肉，食到一半想叫多一件被朋友喝止(生日都冇情講)，呢件蟹餅暫時喺香港食過最好。 Morton’s Salad $150──食沙律最緊要係個汁，呢個汁充滿blue cheese，加上鯷魚，絕對重口味，食完齒頰留香。 Bone in Ribeye 22oz $740──是夜主角，表面烤得焦香，完全將肉汁緊鎖，火候控制恰到好處，medium肉帶粉紅非常juicy，肥膏位入口極邪惡，需知道帶骨肉眼比一般肉眼牛味更濃，加上係美國牛就濃上加濃，所以呢塊扒牛味極重，唔係一般餐廳可以食到，純講牛味的話真係好吃得沒活說，澳洲牛日本牛永遠輸喺牛味呢一點。 Jumbo Asparagus $115──燒露筍鮮嫩無渣又大條，香醋汁夠酸度，有助減去牛扒肥膩感。 Sauteed Spinach & Button Mushrooms $115──蘑菇超甜菠菜亦好吃，沒有過重的調味，是清味蕾的好side dish。 p.s. Morton’s of Chicago將會列入Spring飯堂之一。 地址：尖沙咀彌敦道20號香港喜來登酒店4樓 電話：2732 2343 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2016-03-04

(續2015.12.24為食到九州) 中午食完門司港咖喱飯睇完風景，當然要殺落小倉市中央商店街&彈過市場閒逛，兼一試小倉的九州前壽司。所謂九州前壽司，有別於一般江戶前壽司，後者以最簡單直接的魚+飯+師傅手藝刀功及醃漬等，不花巧味道紮實，前者會用上紫蘇、檸檬汁、蔥花、紫菜及濃厚醬汁去配搭，變化多端，味道複雜極有層次，比江戶前多一分創意，難怪近年九州前壽司人氣急升，喺小倉，名字以小倉天寿し與及Morita最響，長期排Tabelog頭三位。 今次拜會的，就是81歲的壽司職人Morita師傅森田徹，超過六十年經驗的他，沒有一般師傅那種Cool到爆的氣場而令人覺得拘謹，時常笑容滿面(笑起上嚟有啲似我老闆施永青)，感覺非常親切，森田太太及兒子與幾位員工亦很熱情友善，絕對係平易近人的壽司店；食物質素方面亦無容置疑，材料極新鮮，紫蘇、蔥花及醬汁等運用恰到好處，而每件都會灑上檸檬汁以突出魚材鮮味，所以師父放上壽司時都會溫馨提示我要唔要蘸豉油，慎防我亂蘸一通破壞味道；在旁的森田太太則拿出中英日紙牌，話我知食緊乜魚物魚，十分體貼。其實好吃壽司的背後，隱藏著日本人的禮儀，食高級壽司切忌扮勁扮識嘢，好多人用手定用筷子食都未搞清楚，謙虛啲唔明就問，記住：1.唔好豉油wasabi撈埋一「pat」；2.唔好高談闊論；3.訂咗位準時到達；4.筷子請打橫放前面；千祈唔好失禮香港人呢三個字，要失禮，留番比深圳河以北的人好了。 「十九貫」壽司(當日OMAKASE約一萬一千円(連啤酒))，件件出色，精選幾件講講： ‧雲丹─產自北九州藍島西吉，鮮甜無比，除咗甜之外我諗唔到其他形容詞。 ‧太刀魚─又名白帶魚，極多脂肪，森田用烤爐輕輕一烘，加上小蔥粒，入口化開，妙品。 ‧烏賊─絕對驚喜的一件，烏賊+小量海膽及魚籽仲有檸檬汁，味道豐富極有層次，食完唔捨得飲酒住。 ‧赤貝─鮮‧脆‧爽‧甜，喺香港絕對食唔到咁新鮮嘅赤貝。 ‧車海老─蝦身晶瑩剔透，肉質彈牙，嚼後隱隱滲出甜味，好想食多件。 ‧拖羅─入口即溶，魚油大爆發，好味到飛天，靚貨。 ‧番茄牛油果─作為結尾相當特別的一件，食完立即清晒個味蕾，完全唔俾我記住前面壽司的味道，擺明引我再去！ 森田徹，you are the best！我一定會再來！ (待續) もり田：福岡北九州市小倉北區魚町2-5-17 インクスポットビル 2F　坐位：8個 營業時間：11:30～15:00 16:30～21:00  電話：093-531-1058 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2015-12-24

今時今日喺香港百物騰貴，食個下午茶餐動輒四五十蚊落樓(凍飲加兩蚊或以上)，貴之餘質素仲要係飼料級別(我知我咁講好衰，侮辱晒啲飼料)，啲豬牛雞扒入口一朕乸粉味，真係撈飯貓都唔食，所以我近年就好似吳得掂咁一得閒就飛去日本，因為日本食嘢好正㗎、真係好正，真係好多嘢食，我有一次去九州，食咗個咖喱飯，好正，可惜不是任食。 而呢個咁正嘅咖喱飯就係位於北九州門司港駅附近的Bear Fruits，話說有一次睇到個日本飲食節目，主持人連同Kis my ft2成員藤谷太輔介紹這裡的咖喱飯，並由店長森野高史親自製作，由咖喱+飯+洋蔥+青椒絲+生雞蛋+咖喱+芝士咁一層層組成，整個煮食過程睇得一清二楚，即叫即造熱辣辣，藤谷吃時大叫Umai~~~~，真係隔住個芒都聞到咖喱香，價錢仲只賣850円(約$54)！作為觀眾嘅我，除咗狂吞口水，就係下定決心飛過去食。結果沒令我失望，咖喱飯上桌時焗盤四邊氣泡不停噗噗噗地跳動，陣陣咖喱香氣四散，用匙羮在面層厚厚嘅芝士輕輕一畢，完全牽晒絲，喺中間再畢一羮，OMG！蛋漿傾瀉而出，高溫之下雞蛋竟然可以keep到咁嘅狀態，十分神奇，呢隻蛋絕對係靈魂之一。而主角咖喱亦十分香濃，沒有一般日式咖喱過甜的弊病，反而隱隱暗運辣勁，非常惹味。嗜辣者可以自加辣粉，個人覺得唔加最好，因為食到中段我開始有鼻水，要呷啖sapporo解解佢；呢個咖喱飯1,050円(加牛肉貴200円)比起香港啲飼料真係超值，食完仲可以欣賞門司港四周圍嘅建築，呢度冇拖喼冇搶奶粉冇排隊入名店人龍。 人龍，只有上戶彩都大讚的Bear Fruits才有，真係好正。 (待續) 地址：福岡縣北九州市門司區西海岸1-4-7   門司港センタービル１F 營業時間：11：00 ~ 23：00 交通：由博多站乘鹿兒島本線往小倉特急，再轉乘火車至門司港駅(千萬唔好坐各站停往門司港或小倉的火車，除非你想睇風景兼瞓個覺)，想快的話，可以由博多站坐山陽新幹線往小倉再轉乘火車至門司港，時間快好多，錢亦要俾得多。 士兵~饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2015-10-30

我有個朋友好喜歡食香腸，每次飯聚，一有機會就會叫香腸食，打邊爐燒嘢食時尤其瘋狂，廚師腸芝士腸小紅腸缺一不可；而呢位「香腸怪」近年更變本加厲，飯局只揀好德國嗰間Kxxx Lxxxxx(港九新界加埋食咗好好好多次)，就算佢食物質素明顯走下坡(香腸好鹹！豬手仲鹹皮又硬！live band又嘈)，但香腸怪仍然對他不離不棄。直到有一日：「喂下次食飯再去呢間冇friend做！」香腸怪才屈服，雖然我們的下一次依然食番德國嘢，但呢間德國嘢食物質素高出幾班(香腸好吃！豬手唔鹹皮勁脆！冇live band又唔嘈)，佢就係位於河內道嘅「Fass」。   附近酒吧林立兼且藏身於地庫之中的Fass，很容易走漏眼，不過經過了長長樓梯後就會被由木桶組成嘅卡位吸引住，特別嘅裝修增加了我對食物的期待；Fass的大廚Patrick三十出頭，原來已入行近十年，年紀輕輕已當上主廚的他絕對有實力：「德國嘢一向俾人感覺係大開大合又重味，我就加少少其他歐洲元素入去，令味道可以細緻啲、擺碟靚啲，客人相機食先放上Facebook都可以多啲like。」   Fass的食物果然沒令人失望，每道菜式都有其獨特性，坐在我對面的香腸怪亦食到變咗腰果眼，整碟Fass Combo Platter幾乎由佢一人K.O.，豬手亦個人獨取半隻：「喂士兵，冇介紹錯喎，我以後都嚟呢間，唔去嗰間。」   大家都以為「食好西」是漏了個「東」字；我估可能坤哥係想嚟食Fass、打漏咗個「德」字啫！ Roasted Pork Knuckle $198─ 記得有一次喺Kxxx Lxxxxx食嗰隻豬手，鹹到不得了，豬皮咬極都咬唔開，仲搞到我上顎損咗，嬲到龍顏大怒；但Fass呢隻豬手剛好相反，皮比超級脆更脆，肉質比超級嫩更嫩而不死鹹，Patrick解釋係因為先烚後焗減低鹹度，亦可縮短焗嘅時間，才會有此效果。豬手絕對係今餐靈魂，必吃item！ Green Salad$118─飛機貨，隨著時令改變，當晚吃到的叫做Red Chard，來自意大利，非常清新，配上微酸的醬汁，胃口立即大開。   Fass Combo Platter $268(Ring、Veal、Italian、Nurnberger sausage)─一次過試齊四款，味道各有特色，香腸怪最愛紐倫堡，而我就比較喜歡剝咗腸衣輕煎的Italian，帶點肉餅feel，很特別。   Pan+Fried Darade Fish$178/3pcs─鯛魚煎得金黄夠魚味，配上加了大蒜的白汁，一濃一淡非常匹配；另有$148/2pcs選擇，不過三條跑道好過兩條，兩條有事，三條就起作用；所以三條魚好過兩條魚，兩條唔飽，三條就起作用，識揀一定揀三條(利申：反對三跑)。   Grilled Rib Eye Steak $328─採用Prime Rib，牛味夠重，生熟度控制得非常好；最令我驚喜的，是放在牛扒上面啲炸大蒜絲，與牛扒同吃超級惹味。 地址： 尖沙咀河內道5號普基商業中心地庫 電話：2311 1906 士兵~饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2015-09-11

我小時候很喜歡食月餅，每逢中秋節見到屋企有月餅，都會盡快食晒佢，然後夜晚拎個月餅盒落公園煲蠟，對於月餅味道，仲停留喺二三十年前的傳統，不過隨著政府部門嚴打煲蠟之後(其實咁大個仔仲煲蠟點媾女)，加上月餅慢慢脫離傳統(又冰皮又雪糕又榴槤乜乜乜)，我就開始對月餅失去興趣，幸好今年大師姐推出傳統月餅，令我尋回兒時之味，冇得煲蠟都仲有得懷舊一下。   古法三黃欖仁蓮蓉月餅$338/盒─古法製作，是根據清代袁枚《隨園食單》中所形容的「豬油作餡，食之不覺甜而香鬆柔膩，迥異尋常」，其精髓在於蓮蓉+豬油搓成的餡，加上三隻鹹蛋黃，味濃軟滑；大師姐選用材料亦一絲不苟，用上優質荷蘭豬油、湖南「寸三蓮」湘蓮做成黃蓮蓉、隻隻油分十足的越南一級鴨蛋、還有此月餅靈魂——焗香了的西山橄仁；蓮蓉及橄仁的天然甜味，結合了豬油及蛋黄的油香，味道層次豐富，入口又香又滑又鬆化，「迥異尋常」原來是咁的！(限量供應500盒，手快有手慢冇。)   原味奶黄月餅$228/盒(6個)─絕無添加的奶黄月，冇化學劑冇香精冇人造色素冇吉士粉冇椰子香油，但係有天然雲呢拿有法國忌廉有法國牛油有新鮮椰汁有新鮮雞蛋，入口奶黄椰香甜度平衡細緻，並不是一般坊間的整色整水奶黄月可比擬，一吃便知。 介紹番先：麥麗敏(圖)，綽號大師姐，60年代第一代香港IT人，曾在會德豐做programmer，及後往英國受訓，52歲離開Global Source，其後又有公司請她搞e-commerce，2007年放棄上市公司資訊技術總監一職退休去也，真係玩電腦嗰陣我都未出世！不過兩年後再創業推出大師姐品牌，全因她醉心廚藝，在上世紀七十年代開始拜師，研究粵菜數十年，是著名食家江獻珠(廣州著名食家江太史孫女、烹飪名家)首徒，據說江獻珠在香港僅承認3個學生，名副其實的大師姐，而廚藝非常了得的她要求極高，所有產品一律不用防腐劑、香精及味精等，所以深受食客歡迎。 古法三黃欖仁蓮蓉月餅 售賣點：City'super (IFC、海港城、時代廣場、沙田新城市)、SOGO www.dashijie.com.hk   饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2015-07-17

自助餐對於我來說，從來都是蝕本交易，因為自從成為中佬之後，胃口開始慢慢減少，加上大部分自助餐或者Brunch都有一個共通點，就係有大量家庭客，當中通常有兩個化骨龍，通常咁啱係一個會喊一個會喺你攞嘢食時四圍跑，最討厭(喊嗰啲&甩繩馬騮嗰啲)細路的我見到就煩，試問仲點大快朵頤？ 以上問題，Ritz Carlton118樓的Ozone一次過幫我解決晒。定價$1,180的Sunday brunch，當中包括任飲2005 Dom Pérignon，無論你飲唔飲酒，大人定細路，一律劃一收費，如果一家四口就要五千蚊落樓，不太划算吧；試問，當我一邊飲Dom Pérignon，一邊欣賞ICC最出名的靚景，忽然傳來細路大喊聲，而阿媽又不停鬧「嗱我數三下你同我收聲！」之際，另一個細路又不停周圍走的話，我杯香檳點算？我個維港靚景點算？ 食物方面，貴精不貴多，款式以前菜及甜品為主，大部分同香檳非常合拍，包括火腿、芝士、沙律及甜品等，主菜用料亦屬頂級，重質不重量，不會大大件填飽你個肚，所以Ozone無論在食物飲品同環境設定實在出色，$1,180能夠令我寧靜地享受美酒佳餚，實在物有所值。 ‧沙律蝦/壽司─沙律蝦非常爽彈，醬汁味道清新，我前後拎咗四次，好吃！壽司件件手握，魚生與飯比例一流，多吃幾件亦不覺飽肚。 ‧風乾火腿/芝士盤─西班牙iberico火腿，看色澤已知好吃，入口油分充足，吃一片呷啖酒，美妙；熟成芝士有西班牙的idiazabal、法國comte及數款羊奶芝士，當中有一款羊奶芝士羶味非常濃烈，好似十隻羊約埋一齊衝入你味蕾咁，厲害。 ‧松露班尼迪蛋鬆餅─鬆餅底加半生蛋，微微熱力逼出松露香氣，配上菠菜簡直完美配搭，可惜友人略嫌松露唔夠香，扣少少分。 ‧神戶牛鵝肝漢堡─神戶牛+鵝肝=好食。呢個係定律嚟。配搭絕對重口味，當你有杯酸度非常Balance的Dom Pérignon在手，食多個都仲得。 2005 Dom Pérignon 2005對於Dom Pérignon來說可是艱難嘅一年，天氣溫暖，雨水又少，充滿暗湧，雖知道香檳區的氣候最為嚴寒，需要極大溫差造就的香檳，眼看著一年收穫將被報銷，慶幸9月中天氣開始好轉，才得以釀造出產量較少的2005 Dom Pérignon；而2005 Dom Pérignon為了控制酵母發酵情況，產生更多氣泡，用了9年時間窖藏。 士兵酒評：noise有乾果香、烤麵包、奶油等等；入口泡沫極幼細滑順，帶有礦物氣息的清爽感，結構及酸度平衡，回味ok，喝得非常舒暢！雖然沒有02或者04年般極具潛力，但05嘅Dom仍然滿載著香檳應有風格以及華麗感，所謂早喝早享受，我最後還是到酒舖買了兩瓶自用。 地址：尖沙咀ICC香港麗思卡爾頓酒店118樓Ozone 價錢：$1,180/位（無限量添飲Dom Pérignon香檳) 供應時間：星期日12nn-3pm     電話：2263 2270 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2015-06-05

一星期食足五晚外賣的我，久而久之會對食物胡思亂想，面對如飼料般的飯盒，不期然諗起牛肉麵、豬腳、滷肉飯、夜市、酒吧及文青的味道。碰巧佛誕有數天假期，是時候到台灣走一趟，去找一啲喺香港食十次程班長、飲廿杯貢茶也永遠找不到的味道！點解嘅？佢哋已經好有台灣風味喎？因為土地供應不足啩。講完。 富霸王 係，我係戀腳嘅，除咗辣妹腳，就係豬腳，尤其係滷水。富霸王嘅豬腳係我至愛，全因他的豬腳滷得非常入味，帶微甜而不死鹹，隻隻腿節晶瑩剔透，皮夠腍筋膜爽彈兼且沒有惱人的豬臊味，吃完咀邊黐漉漉充滿膠質，多吃幾件，過兩日皮膚充滿彈性，好過你飲collagen drink。富霸王另一名物就係滷肉飯，飯面上是滷得Q彈的豬皮+肥肉，即係豬油撈飯變奏版囉，細細碗少吃多滋味，妙品；胃納夠的話，筍絲+燙青菜亦是必吃item，青菜嫩綠爽脆鮮甜，好食到癲。PS：定價平，可以唔使睇價錢盡情吃。 地址：台北市南京東路二段115巷20號 電話：886 2 2507 1918 營業時間：11am~8pm                   (Mon-Sat) 牛店 究竟台北有幾多間牛肉麵店？我諗連市長柯P都答唔到。但有邊間值得一試？當然係西門町人龍店「牛店」，事關牛店剛當選第一屆網路牛肉麵節十大之一，實力當然有番咁上下；最令我著迷的就是一碗賣過百港紙的極品紅燒牛肉麵，呢碗麵威力十足，層次豐富，有齊三種食法：1.清燉：清徹的湯頭滲著牛肉清香，配上爽彈麵條，味道清純。2.紅燒：招牌厚切牛展，成嚿牛扒咁厚，入口嫩到不行，一咬即化牛味超濃，配上微辣的紅燒湯頭，連麵一齊吃極之惹味，好吃得沒話說。3.乾撈：吉碗放上麵條加上自行添加的酸菜，倒些牛肉汁，下麵即成。極品紅燒限量供應，要食趁早去。PS：選用澳洲牛不是台牛，唯一瑕疵。 地址：台北市萬華區昆明街91號 電話：886 2 2389 5577 營業時間 : 1130am~3pm  5pm~830pm                   (Tue-Sun) 後院 作為酒鬼，每次去旅行，總要蒲下酒吧，感受一下當地飲酒文化。而在台北，有威士忌博物館之稱的後院，絕對係愛威者天堂，只要一踏入門口，就會被吧台後的威士忌牆吸引著，保守估計超過400支，而幾位侍酒師除咗靚仔，從佢哋整齊嘅制服、友善嘅眼神，我完全感受到嗰分誠意，同埋……品酒精神。侍酒師Peter一眼就看穿我咀刁性格，推介一支我無法抗拒的威士忌Glenfarclas 1971，nose係澎湃的橡木、果醬香氣，入口辛辣+水果極有層次感，收結再來蜜糖+甘草，厲害！當山崎50年賣25萬元一支嘅時候，$800飲一杯四十幾歲的Glenfarclas 1971 Family Cask，算不上甚麼。 PS：侍酒師即場鑿圓冰，手法純熟，讚！ 地址：台北市安和路二段23巷4號 電話：886 2 2704 7818 營業時間 : 7pm~3am (Sun-Thu) 7pm~4am (Fri-Sat) 士兵 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

2015-04-10

除咗傷荷包，円跌對香港人最傷係邊度？個肝。 身邊一向唔飲烈酒的親朋戚友同事，近年去得日本一定買免稅威士忌回來；最近喺北海道新千歲機場，我更親歷蝗蟲過境的盛況：兩團港人幾分鐘內將整個貨架的竹鶴21年(6,000円)掃光(Single Malt嘅余市又唔見佢哋買)，恐怖程度絕不下於大陸人搶廁所板。怪不得Suntory三月尾開始收起晒所有標準款而改賣貴幾倍的特別版，真係錢就我嘅，肝硬化就你嘅，日本人！醒！ 身為酒鬼兼Single Malt支持者的我，趁三月喺留壽都滑完雪，匆匆抽半天到了由「日本威士忌之父」竹鶴政孝創立、已被列入文化遺產的余市蒸餾所見識見識。行完蒸餾所，別因掛住去試飲場鯨飲而miss了它的博物館。博物館內有一酒吧，酒架上的余市原酒威士忌，是整個見學旅程的精華所在。在這裡試飲原酒需要逐杯俾錢而且唔平，當日停低試飲嘅人連埋我只得五個，其他人都直奔無料試飲場──識貨嘅人較少，係好正常。 原酒(Single Cask)是指將單一酒桶的麥芽原酒，經陳釀後直接入樽，沒有與其他酒桶調和，極具單一麥芽的強烈風格，加上余市一帶的河道水質優良，可以嘗到余市威士忌最原始的味道。 Single Malt 余市1990's (1990~1999年原酒使用/每杯700円約15cc) 採用雪莉桶釀製，香氣複雜，帶點乾果甘甜味道，帶微嗆酒精氣息，55度酒精可不是說笑，但入口頗滑身，收結有可可的芬芳，餘韻不俗。 Single Malt 余市1980's (1980~1989年原酒使用/每杯1,500円約15cc) 香氣華麗，有穩定及厚身的熟成香味，53度酒精，入口圓潤厚實，可嘗到微微朱古力及曲奇甜味，而淡雅的泥煤鹽味慢慢從鼻腔散發，酒體溫醇順喉，餘韻極長，十分舒適。 ‧蒸餾所內設無料試飲場，一杯杯余市12年&竹鶴17年斟好擺喺度任飲，醉到以為余市町係浸大宿舍門口都得。另有茶水果汁小吃提供。 ‧商店有出售1980、1990、2000三款蒸餾所限定原酒；另有標準款余市及竹鶴威士忌發售。 地址：北海道余市町黑川町7-6　電話：0135-23-3131 交通：札幌駅乘JR往小樽駅，轉乘JR函館本線至余市駅，徒步3分鐘 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：[email protected]

/136



C觀點

中原城市領先指數

廚神

旅遊