2016年12月16日

 

美劇狂人Mi - Yumi Ng
行屍、年輕教宗及西部世界

2016年11月04日
  • 《The Walking Dead》

  • 《The Young Pope》

  • 《Westworld》

   

 

好多人已經估《Westworld》其實有好多條時間線同時存在,不算劇透,因為大家暫時都係估估吓,作為今季的美劇迷,亦同時活在多個平行宇宙,有新有舊,睇到我頭暈轉向,樣樣知啲唔知啲,我開始明白堅持等一季出晒才煲的心態,就是避免這份如墮五里霧中的煎熬。 


永劫輪迥《The Walking Dead》
第七季回歸第一集睇到我想死,真係有「」凳的衝動,不是因為編劇將XX及XX賜死,而是那種拖沓,以及推super villain出來的方式,擺明又要一次又一次的打大佬,而且一個比一個不堪及低莊,我已經有永劫輪迴的感覺,無論是生人或行屍,其實都係live like hell。
第二集又再玩一次Carol出走的把戲,又有一班白武士為Morgan及Carol解窘,安置在一處似乎寧靜的小社區稍作歇息,似曾相識,無論是之前幾季Herschel的農場、監獄、Alexandria,到今季這個新社區Kingdom,不僅命名浮誇,今次連這個地方的領袖也自封為王——King Ezekiel,都走不出重複的套路,好在這位King有點詼諧,加上一隻CGI的老虎作伴,今季行屍走肉的旅程,希望有一線生機吧,正如編劇不斷pan過Kingdom內牆上的字句:「Hope is the North Star, Let it guide you」。

 
 荒誕教廷《The Young Pope》
HBO、Canal+及Sky三方聯合製作的迷你劇,卡士有Jude Law做史上最年輕首位美國教宗,仲有首次演電視的Diane Keaton、一班意大利及法國演員如Silvio Orlando及Ludivine Sagnier,導演係拍過《Youth》、《The Great Beauty》的Paolo Sorrentino,可以想像係幾咁燒錢的大製作,我以為自己會睇一套如《Rome》般的史詩式連續劇,睇完首播集就經已一地眼鏡碎。
呢位年輕教宗,煙不離手,對教廷的架床疊屋一概不屑及無視,對信仰充滿懷疑,單係呢分離經叛道經已足以勾實觀眾,加上背景華麗堂皇,配樂破格大量電子音樂,整個調子係off beat到無倫,完全脫離類型的想像,我真係好想知,導演想玩邊科,呢種出乎意料,才有觀影樂趣呀。

 
平行宇宙《Westworld》
唔係劇透,雖然有好多迹象顯示,這個西部世界應該有多條時間線同時發生,劇中樂園工作人員一早講咗,同一時間內有多個故事在樂園進行中,既然故事可以multiple,時間線也多條重疊又有何不可?基本上放長線釣大魚,編劇家陣講乜都得嘅,作為觀眾,其實最side with應該係一班機械人角色,因為我都有女主角Dolores的感受,實情我們是否真係擁有選擇,抑或只是任由命運/編劇的擺布?編劇鋪墊得這麼充分這麼elaborate,如果答案是雷聲大雨點小,觀眾又能否狠下心腸罷睇?應該幾難了,如今單係睇Dolores一個,已經叫我欲罷不能了。


Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

回首頁      列印

 

/108



C觀點

中原城市領先指數

廚神

旅遊