2016年12月16日

 

浪漫月巴睇90s - 月巴氏
小新的純粹大人批判

2016年11月04日
  • 「雞飛狗跳莊」各式人等。

  • 左面隻豬是「不理不理左衛門」,不願行俠仗義只想好食懶飛。《蠟筆小新》不時出現的番外篇故事,超正。

   

 

有些喜好,我曾經以為永世都不變。例如睇漫畫。曾幾何時的我,每一日都要睇過漫畫先安樂先捨得去瞓;現在,我竟然可以成個月都唔睇半頁漫畫。我大個了。

1.唔睇還唔睇,有一些,還是有追睇。仲有追的其中幾本,都是在上世紀90年代開始連載——每逢主角出現必定死得人多的《金田一》、唔知個XX作者(XX係乜?自己估吧)幾時先捨得畫埋落去的《Hunter X Hunter》,以及曾被中學訓導主任斥為傷風敗德的校園禁書《蠟筆小新》。
2.諗番,也覺匪夷所思。但當《蠟筆小新》剛剛推出中文譯本時,好大件事,社會上不少肩負道德重擔的超級道德撒亞人,都鬧呢本書意識極度不良,不良在作者借一個天真無邪五歲細路哥的眼耳鼻舌身,展示、宣洩一些成年人才會擁有的性幻想。
 
3.我不知道臼井儀人係咪咁諗,但我中學時的訓練主任的確咁諗——他特登在早會時間,向全校宣稱呢本漫畫傷風敗德,絕對不適宜我們(公然或偷雞)觀看。
4.我作為一個經歷過會考、自命思想OK成熟的中六學生,睬佢都傻。《蠟筆小新》第一期出版當日,我就立即飛過去好運中心的龍城搶購(龍城,一間已結業的漫畫店,曾經滋養了無數沙田漫畫迷)——補充,我當時是身穿校服的。
 
5.我有點失望——錯,是極度失望。那些被渲染成嚴重破壞道德的所謂成人情節,好碎料咋噃……更重要是,望住臼井儀人筆下的那些火辣女郎,就算再鹹濕的人,相信都好難激起絲絲鹹意吧。
6.但我依然覺得好睇。好睇在臼井儀人太擅長描寫大人的衰嘢:虛偽扮晒嘢懶係勁恃老賣老(仲有好多衰嘢,不贅了),但在小新面前,這班成年人統統冇晒符——他們的衰嘢,原來只在大人與大人之間才管用,對住小新?小新自有他一套獨有思維,自行把這些大人衰嘢消解——當然更大可能是,小新的5歲腦袋根本盛載不了這些衰嘢(卻過早盛載水著女郎的美以及高叉泳衣的奧秘),根本不明白Why大人要咁鬼麻煩,永遠不能像他本人一樣,有嗰句講嗰句,咁.忠.誠.地.表.達.自.己。小新,原來是一道照妖鏡,照出大人的邪惡和陰濕。當時的我,就快18歲,好想快一點成為大人(以便光明正大公然行入戲院欣賞三級片),但同時又好驚變成大人,好驚變成臼井儀人筆下的那些衰大人。
 
7.當故事發展下去,臼井儀人塑造了另一班大人——他們都沒有甚麼獲社會認可的地位,當中包括考極大學都考唔入的失敗學生、為了達成開設人妖酒吧心願不惜放棄家庭的中年漢、表面惡死實則以惡死蓋掩孤獨的包租婆……小新卻在不自覺下,分別鼓勵了他們、滋潤了他們——他們之所以能跟小新互動、被小新(唔覺意)感動,是因為他們即使成為牛高馬大的大人了,但還是留著一顆赤子之心。我最最最喜愛的一part故事,「雞飛狗跳莊」篇,小新住嗰間屋因意外冧咗,在等新屋起好期間,搬入這幢名叫「雞飛狗跳莊」的公寓,公寓住了各式各樣的怪人。而怪,不等於壞。
8.或許臼井儀人的最初構思,真的只想畫一個借細路過橋的少少鹹多多趣漫畫,但愈畫下去,卻意外地畫了一幅成人風情畫,入肉地呈現出大人多種面向,好的壞的真誠的虛偽的堅強的軟弱的……而雲集晒卑鄙無恥下流與賤格的,是政客。連載咁多年,日本首相也換了好多個,出現在「小新Universe」的搞政治的人,冇個好人。
 
9.以前看著《蠟筆小新》那堆乞我憎的大人,我會同自己講:絕對不要令自己變成自己曾經討厭的嗰種大人。
10.如今,我已是個中坑。我好想捉住嗰個訓導主任問:露何B仔的小新傷風敗德?抑或嗰班被讚頌為齊心、著晒衫的議員更不適合兒童觀看?不過,個主任晨早移了民。


撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: [email protected]
90年代,可能是我們最後的快樂時代。

回首頁      列印

 

/108



C觀點

中原城市領先指數

廚神

旅遊