2016年12月16日

 

浪漫月巴睇90s - 月巴氏
吳岱融,你令大把小生面紅!

2016年10月21日
  • 《孽殺》和《殺兄》設定都是:何家駒是剝削者、鍾淑慧是被剝削者、吳岱融是復仇者。

  • 吳岱融在《原振俠》中是大奸角金石。

  • 首齣導演作品《奪命接觸》。

  • 《社團之撚位》,其實OK,我話嘅。

  • 《江湖告急》中的吳岱融。

   

 

 「買呢隻『燃位』呀!」——塵世間竟然有齣戲叫「燃位」咁生鬼?

1.拿來一看,友人睇錯,錯把「撚」睇作「燃」。成個戲名應該是——《社團之撚位》(以下一概以《撚位》代替)。吳岱融導演。
2.時值公元2000年,時間是某個超深夜,大概凌晨2時45分。我和友人習慣約在旺角「南豐」食消夜,貪嗰度食個茶餐就任坐唔嬲;坐夠了,便過條馬路到對面的「正」睇碟——這間舖頭真的單字一個「正」。店裡賣的港產VCD,我唔知正唔正,畢竟當年香港好多Direct to Video的戲,唔慌會有人覺得正。最經典一齣,首選同《半支煙》完全沒有劇情關係的《半支雪茄》。
3.但我倆就是鍾意半夜三更在「正」尋寶,精挑細選一隻VCD,再去友人位於旺角的家細意觀賞。那一夜正好揀中《撚位》。「X!成三十九蚊!」友人慨嘆。是的,這一類戲,盛惠$39絕對稱得上貴。或者你會疑惑,反正都貴,Why唔俾多幾草隆重其事買DVD?我只能說,這類Direct to Video的戲通常不會咁隆重其事推出DVD。
4.前往友人的家途中,他說他睇過吳岱融另一齣導演作品《死亡監獄》,並向我極力推介——問題是,佢冇碟喺手。

 
5.然後我說,我睇過吳岱融另一齣導演作品《奪命接觸》。一齣主題有關愛滋病的電影。「好唔好睇先?」友人問。其實我真係冇乜印象,唯一有印象是男主角由我OK憎的歐陽震華飾演。「齣戲出發點算係好嘅。」我答。
6.終於到了友人家,即Play《撚位》。除了開場和結尾,故事主要發生在一艘郵輪上(不過取景地點來來去去幾個位,感覺絕不豪華甚至有點寒酸),一班社團中人應邀上郵輪,互相不妥對方,點知輪流被隊冧,究竟誰是真兇?——喂大佬我不是睇緊江湖片嗎?Why會變成一齣沒有金田一的「寒酸郵輪連續殺人事件」(又或是一齣冇女的《奪命狂呼》)?But黃秋生、黃光亮、尹揚明、歐瑞偉都好認真交足戲啊,真的吸引到我和友人繼續睇到尾喎……睇完,我和友人望住對方不約而同講咗句:OK喎。
7.《撚位》是否真如我倆所講「OK喎」?不重要,重要是吳岱融在那個香港電影業衰到貼地直插地心的時候,用一筆肯定唔多(甚至勁少)的Budget,完成了一齣完整而又兼具追看性的戲,為我和友人帶來了一個難忘的觀影/睇VCD晚上。

 
8.但講堅,以前我唔算特別留意吳岱融——我當然知道有這位小生,在80年代也有睇過他主演的電視劇,但亦僅止於此;到了90年代,他突然走去拍《孽殺》&《殺兄》,這兩齣我睇過一次已覺十分夠皮的三級片(後來的《弱殺》甚至不忍睇落去),我不是衛道之士或超級道德撒亞人,但真的頂唔順箇中部分情節畫面,太離譜嘞,根本由始至終都在凸顯何家駒的剝削和鍾淑慧的被剝削——當然,沒有了這些剝削與被剝削的喪心病狂描寫,就不能激發(和合理化)吳岱融的復仇行為,而我們看在眼裡,亦可能冇咁痛快……
9.叫我難受是,這一對當年在電視台浮浮沉沉的男女,無奈地要去拍三級片,但無論幾認真去做,當年電影公司的宣傳焦點和多年後我們的回憶重點都只是:男露鳥,女剃毛。That’s all。直至「高天鷲」突然爆紅,好多人才醒覺,塵世原來一直存在著這麼一位好戲的吳岱融——偏偏令人覺得他好戲的主因是:鬧人係雞&殺人不眨眼&連養女都唔放過種種禽獸行為(當然他只是演繹者,而他又演繹到箇中的喪心病狂)……但至少,吳岱融唔覺意地、真真正正撚位了。吳岱融/高天鷲的爆紅,也凸顯了TBB旗下大部分男演員係幾咁不濟,或廢。吳岱融才是不可被取替。
10.最後想同吳岱融講聲:我真心覺得《撚位》OK,而且好想睇傳說中好OK的《死亡監獄》。仲有,希望你們一家三口生活愉快。

撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: [email protected]
90年代,可能是我們最後的快樂時代。

回首頁      列印

 

/56



C觀點

中原城市領先指數

廚神

旅遊