2016年12月16日

 

美劇狂人Mi - Yumi Ng
新劇停不了

2016年10月18日
  • 《Marvel’s Luke Cage》

  • 《Inserure》

  • 《Divorce》

  • 《Crisis in Six Scenes》

  • 《Easy》

   

 

今年秋季新劇真係多到冇朋友,9月開季到現在約莫都簡介了十多套,仍然睇唔晒,以往我都會將精力先放在HBO、AMC和FX呢類招牌已省靚的有線網絡上面;今年加入Netflix及Amazon這些網上串流平台,要看的劇集數量已經翻幾番;面對激烈競爭,連大台也發力追,ABC、NBC等推出的新劇都有睇頭,講真,真係瀕臨爆煲邊緣,唯有隨緣睇到邊推介到邊,繼續我的秋劇短評系列,話唔埋到季尾,仍然處於短評階段,回歸劇集都唔知幾時開到波,死未。
 
 
Black-ish
美劇製作水平高唔使再講,但我覺得最重要係編劇方針好多時能回應時代呼喚,反映當下美國社會現況,好像今季不少新劇就有好幾套都相當「黑」,黑人的生活處境窘迫,鋌而走險作奸犯科便無可避免,就算沒有黑幫犯罪元素,都從日常生活處境帶出美國社會種族歧視仍然嚴重,Netflix今季重頭劇《Marvel’s Luke Cage》固然如是,雖然仍然脫不了超級英雄類型片感覺,但至少視野比較廣。HBO新喜劇《INSECURE》講兩個非洲裔美國女人之間的友情,帶出日常生活面對一連串不快的處境;FX《Atlanta 》也是講黑人低下層年輕人,如何在黑幫陰影籠罩下的音樂界奮力向上游。你可以說這反映黑人這demographic佔市場好大位置,為吸納這部分觀眾,當然要迎合黑人口味,但也說明何以美劇在如今咁多消閒方式的網絡世代,仍未被廣大觀眾遺棄,唔似得本地大台咁甩晒beat,淪為提都費事。

 
Dark Comedy
今季好多率先跑出新劇都係喜劇類,而且不是糖衣包裝,反而相當夭心夭肺,HBO《Divorce》有Sarah Jessica Parker從《色慾都市》的happily ever after童話結局回到現實,人到中年婚姻淡而無味,青春期子女又唔聽話,要同老公鬧離婚,大橋就咁聽係老套大路,成班中年女人坐埋一枱呻青春不再、說老公不是,但首集尾已經來個twist,追看指數立即大升,雖然SJP仍然係SJP,在我來說《色》最好看的角色從來不是Carrie,但睇一班中年中產階級食飽飯無憂米,如何在感情(性?)慾求不滿中仆街,都有一份guilty pleasure嘅。 

 
Skippable 
之前簡介過幾套新劇,終於睇咗首播或幾集,以下呢兩套可以同大家講慳番,無謂嘥時間。
活地亞倫首執劇演筒的《Crisis in Six Scenes》(Amazon)可謂大letdown,睇得Woody Allen都深知他的喋喋不休,只期望維持他本色已收貨,但今勻真係毫無神釆,對白也不精警深刻,反而Miley Cyrus尚可忍受。
《Easy》(Netflix)每集獨立故事,我睇咗第一、二集,分別係結婚多年夫婦想重燃激情,及年輕女同志相識相戀故事,無新觀點平鋪直敍,看後水過鴨背,可以skip。據IndieWire講都有一兩集比較出色,既然係獨立故事,可以揀來睇,但目下咁多劇未開,我估此劇都係茫茫劇海的一顆遺珠了。

Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

回首頁      列印

 

/64



C觀點

中原城市領先指數

廚神

旅遊