2016年12月16日

 

美劇狂人Mi - Yumi Ng
秋季新劇短評 II

2016年09月30日
  • 《Better Things》三位女兒,大女Max、二女Frankie、幼女Duke,荷李活少年演員都相當強悍,個個有戲,單睇佢哋都值回票價。

  • Pamela Adlon同Louis C.K.已儼然是喜劇界金牌組合,有佢哋嘜頭已是信心保證。

  • 《Atlanta》劇照加晒filter,chok chok哋街頭味,睇此劇可深入了解黑人街頭文化,都係此劇加分位。

  • 《Atlanta》宣傳海報設計幾趣。

  • 《High Maintenance》男主角踩單車穿越橫街窄巷賣大麻,角色設定本身已有戲。

  • 《High Maintenance》創作人Ben Sinclair同Katja Blichfeld,Katja真人仲似星過Ben,我想睇佢演出多啲。

   

 

 繼續講多幾套秋季新劇,啱啱開季比較多喜劇,我最愛Louis C.K.,不期然會對他跟Pamela Adlon共同創作的《Better Things》比較偏心,期望這劇跑出,好在沒叫我這位小粉絲失望,寫40 something單親媽咪給工作、家庭扯開兩邊身心俱疲拍得好到肉。 

 
FX 《Better Things》

Pamela Adlon演步入中年的單親媽咪Sam Fox,本身是半紅不黑演員,喺演藝界載浮載沉,劇集一開始就寫她去casting跟其他後生女爭演出機會,一出場就有另一位實力派演員Constance Zimmer(《unREAL》)客串,兩個中女排排坐等見編劇,一邊恥笑劇本對白低能,一邊互相交換湊女經,講講吓門後Julie Bowen(《Modern Family》)一副勝利者姿態,跟劇組人員談笑風生步出,Pamela同Constance深知不妙,知道角色又落入他人手中。
短短兩三分鐘對手戲,就將中年女人,尤其是靠面孔搵食的女演員,於家庭及事業兩者間掙扎的苦況帶出,我相信好多女人都會馬上有共鳴。
這劇設定擺明講女人,女權這個話題點都會涉及到。這個單親家庭其餘三位成員都係女性,人物塑造都幾典型有代表性,大女Max係步入青春期的反叛少女;二女Frankie比較男仔頭,而且打爛砂盤問到篤,代表有獨立思考能力的book nerd,會挑戰母親權威;幼女Duke得幾歲最似一般細路,仍然會黐媽咪。
一個單親媽咪湊三件都已經夠斷氣,劇本仲安排單親媽咪個媽咪住喺對面街,時不時過來噓寒問暖旁敲側擊,成屋女人老中青齊晒問你死未,Louis同Pamela仲專登將母女角色清一色改中性名字,用意明顯不過,女性自主、主流父權社會等議題一定會陸續登場,都係開正二人瓣數。
 

FX 《Atlanta》
繼續都係FX。由Donald Glover(《Community》)擔正的新劇,《Community》是喜劇cult hit,勁多經典電影、音樂文化的cross reference,玩得極出色,一班演員都順帶紅埋,Donald今次升呢開發此劇身兼編演,講一個Altanta黑人窮小子,想喺當地Hip Hop圈發圍的故事,不過佢唔係做創作嗰個,而係做經理人,故事唔係單純想講窮小子發跡經過,而是想透過黑人音樂圈子帶出美國黑人處境,「How it feels to be black」,Hip Hop界的黑幫勢力、美國警方跟黑人緊張的關係、種族歧視呢啲大課題預咗會涉及到,明顯係呢位黑人年輕演員野心之作。睇咗頭兩集,拍得有紋有路,似劇情類多過喜劇,列入dramedy比較合適,我會繼續追。 


 HBO 《High Maintenance》
原先是個web series,創作人Ben Sinclair同Katja Blichfeld以男主角是紐約一個賣大麻的drug dealer,來帶出大城市眾生相,題材比較踩界,應該係做出口碑引來HBO吸納,小試牛刀做住一季六集迷你版睇反應。我睇咗首播集,有點冷冷抽離的黑色幽默感,無捧腹大笑位,但細節處理都見到用心,可以再觀望下。


美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

回首頁      列印

 

/96



C觀點

中原城市領先指數

廚神

旅遊