2016年12月16日

 

美劇狂人Mi - Yumi Ng
秋季新劇短評

2016年09月27日
  • 《Fleabag》女主角兼創作者Phoebe Waller-Bridge。

  • 《Fleabag》做女主角後母的Oliver Colman,超級好戲,佢同女主角好多場對手戲都cracked me up。

  • 《This is Us》,雖然tagline都幾老套,但冇點你,睇過就知唔係販賣溫情。

  • 乜都幫你安排好晒係咪就係好地方?《The Good Place》呢個前設本身就充滿可塑性。

   

 

本來想講少少「艾美獎」賽果,成班評審睇劇有delay,最好的經已過去,家陣如夢初醒先識得頒,好似《Game of Thrones》最精采一定唔係今季,但連奪三大獎 (最佳劇集、劇本及執導);最佳女主角《Orphan Black》Tatiana Maslany早就應該攞;《The Americans》接連落空最佳劇集、男女主角,得個吉;睇到我一肚子氣,好在開季新劇相當精采,今日講住三套先,希望下年「艾美獎」諸君睇得切,唔好再浮沉喺第個平行時空啦。


1. Amazon 《Fleabag》
呢套BBC喜劇唔算新,第一季六集經已出晒,家陣搬到Amazon Prime播出,好在冇miss到,英式幽默真係非同小可。女主角Phoebe Waller-Bridge同時是劇集創作人,名字就叫Fleabag,一個twenty-something英國女子面對事業、感情、家庭關係都一敗塗地,開一間拍烏蠅cafe,男友又廢溝通唔到,有個超級condescending後母,家姐係over-achiever……完全loser格局,笑位勁dark勁mean但好到肉,有好多如《House of Cards》Kevin Spacey直望觀眾的narrative,真實情況同心聲對照,笑到我碌地,笑話最高境界應是自嘲吧,呢套好多,又好笑又honest,推介。
 

2. NBC 《This is Us》
估唔到大台都有好嘢,本身條大橋都已經吸引,一開始講四個主角都係同月同日生,於36歲生日當日發生的事:Jack老婆懷了三胞胎臨盆在即;癡肥女子Kate飽受體重困擾感懷身世;Kevin係電視台星仔、薄有名氣但專演冇腦角色苦無出路;Randall事業有成家庭美滿,但一直無法忘懷遭生父遺棄的過去……就咁睇好似好cliché,但其實這四人遭遇都好易生共鳴,誰沒有事業面對過樽頸、又或者懷疑過自己?拍得不慍不火唔濫情,最正係首播集就經已有個大twist,講咗這四人sort of connected,其實都唔係sort of啦,條橋的確幾正,唔穿得,自己睇啦。
 

3. NBC 《The Good Place》
再估唔到又係NBC,我會一連推介兩套大台作品,《The Good Place》創作人前作有《Parks & Recreation》及《Office》墊底,基本上已有口碑,女主角Kristen Bell係美國甜心,好多人鍾意,我就麻麻,但此劇又係食橋作,一開始女主角就死咗,去咗個叫The Good Place的地方,有good自然有bad,呢個且按下不表,去得Good Place的,當然生前要係大善人,死後去到Good Place享福,仲會按規劃分配一個soulmate俾你,屋企又會按照你生前喜好安排得妥妥當當,每個人都充滿喜樂,社區樂也融融咁……一路睇一路覺得好恐怖,真係咁好我移民去新加坡啦,又或者鄰近國家囉,都係呢類propaganda啫,使乜去天國呀。編劇探討的話題其實好嚴肅,講善惡講人性,處理手法卻輕鬆有趣,睇得過。


Yumi Ng~美劇狂迷,劇齡超過十年,熱愛電影,發現美劇有更大空間原原本本說故事,從此影視齊追,泥足深陷。

回首頁      列印

 

/44



C觀點

中原城市領先指數

廚神

旅遊