2016年12月16日

 

浪漫月巴睇90s - 月巴氏
我愛過的90s日本Idol們,粒粒皆辛苦。

2016年09月23日
  • 酒井法子其中一本OK經典的寫真集。

  • 高橋由美子,(曾經)係幾咁活潑可愛。

  • 現在的高岡早紀,成熟美。

  • 新島彌生。唉。

  • 90年代的我每月都會買呢本《BOMB!》,貪佢細細本,帶返學校都方便。

   

 

塵世間有邊個唔辛苦?唔通下下都開PC喊俾人睇咩。
 
1.酒井法子辛苦嗎?我唔知因為佢冇講——看見她那批久違水著照,我戥佢辛苦。
2.1986年,15歲出道(你15歲時做緊乜?我應該是煩緊能否原校升讀中四),好快成為當紅Idol,但光芒,好快又被其他新冒起、更後生的女仔掩蓋;好彩,90年代中,在野島伸司力薦下先演出由佢編劇的《同一屋簷下》,再接拍《星之金幣》——估不到,在Idol的窮途末路,酒井法子憑藉賢淑的小雪和善良的倉本彩,突然攀上事業頂峰。而我最記得始終是:她主唱了《電影少女》主題曲《うれし涙》——我實在太鍾意《電影少女》,鍾意桂正和筆下的美女,鍾意桂正和那些直迫三級但又永遠停留在二級半邊緣的畫面……原來桂正和本人極愛酒井法子,天野愛子根本就是酒井法子的投射、化身。
3.然後酒井法子同嗰個乜鬼高相祐一奉子成婚,歸於平淡——直到2009年被揭發吸毒,過住辛苦建立的一切,乜都冇晒,甚至傳佢為了錢,要去拍AV。結果在出道30年後,45歲的她穿上(極似內衣的)水著,對鏡頭微笑著。我不知道她感受如何,而我只覺:張張皆辛苦。
 
4.不少日本Idol勉救事業的唯一方法:剝,分別是剝幾多。像三浦理惠子。她原本是CoCo(最靚嗰位)成員,在1991年便快人一步推出了Solo Album《Belong to You》,我有買,Well,實在談不上有唱功,但迷戀Idol,從來都不理會唱功,請你們明白(而我早就明白)。
5.我更加明白,Idol生命短暫也虛幻。當她到了29歲,她還是選擇把衫除下,推出寫真集。我冇買,亦冇睇。如果人生在世有所為有所不為,那麼也應該有所睇有所不睇。好多年之後,在某齣日劇瞥見她,做一個大配角。43歲的她,好美。
6.還有高岡早紀。1988年出道的她,沒有標準Idol美貌,卻有一種出塵味,可惜,再出塵,還是老早就要把胴體暴露於塵世……好彩,冇做Idol後,她的演技終被讚賞,像她和中山美穗合演、改編自山田詠美原著小說的話題日劇《賢者之愛》,我看見高岡早紀辛苦磨練出來的精準演技。
 
7.對比三浦理惠子和高岡早紀,新島彌生注定是場悲劇。1992年出道,17歲,以100%的清純吸引了大把人(包括我),但出了兩隻碟後就無以為繼銷聲匿跡直到1998年——我在信和赫然見到她推出了一本(標榜裸體的)寫真集,我崩潰,崩潰到忍唔住在人來人往的信和迴廊大吼一聲:「點解~~~!」冇人答我。不久之後,她全面退出,至今。她的存在,就只能像我那句(冇人答我的)「點解~~~!」,注定徹底消散。
8.如果你問我我在90年代最愛邊一位Idol?——高橋由美子。
 
9.我是第一眼望見她就立即愛上(唔好問點解,連我都唔知點解)。她的單曲《Step by Step》、《Fight!》、《元気!元気!元気!》,都是陪我辛苦捱過會考的打氣歌。在現實中我從未見過一個女仔是稱得上既活潑又可愛,高橋由美子就絕對配得上有餘。但活潑可愛都是期間限定的形容,當她由少女走到中年,伴隨她的就只有「劣化」——她Keep住被指樣貌劣化。直至去年,終憑一輯寫真挽回一點點聲勢;而在拍攝前,她甚至努力地健身。我不知道她要向世間證明甚麼,又或,只是想在人到中年時,同自己打吓氣而已。
10.回看以上多位日本Idol的半生緣,我是真的感到她們嗰份掙扎求存的辛苦、痛苦——即使她們從沒有特登同我講,也沒有哽咽、咇滴眼淚後轉身就走,就算一度走入歧路,依然堅強活著,在面對世人殘酷目光閒言閒語下堅強活著。祝妳們生活偷快。


月巴氏~90年代,可能是我們最後的快樂時代。
撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/

回首頁      列印

 

/108



C觀點

中原城市領先指數

廚神

旅遊