2016年12月16日

 

浪漫月巴睇90s - 月巴氏
一追再追 但不可再追

2016年09月09日
  • 好多朋友為了一首《追》而買《寵愛》。

  • 「不如我哋由頭嚟過。」可惜好多事,不能由頭嚟過。

  • 《陪你倒數》專輯,收錄了經典《左右手》。

  • 《色情男女》的故事或許有點問題,但哥哥和舒淇的演出完全冇問題。

  • 《紅》,90年代極重要的廣東專輯。

  • 《錦鏽前程》的角色,對型慣的哥哥來說其實幾大挑戰。

   

 

有些人的離去是悲劇,有些人的存在也注定是悲劇。只是我們不能決定誰去誰留。
 
1.「我要自己獨唱一次,你哋唔好加把嘴。」聽得出同學嬲嬲哋。佢咁講,是因為佢剛才正在唱《追》,但好衰唔衰唱到副歌「一追再追」時,我忍唔住拎起支咪唱埋一份,同學可能嫌我把聲蓋過佢把聲,或我把聲衰過佢把聲……諸如此類啦。那是1995年,地點是沙田富豪花園商場內的前衛卡拉OK。我讀緊Year 2。
 
2.那年夏天張國榮推出了《寵愛》,以國語歌為主的專輯。這是他在1989年宣布退出樂壇後,事隔6年才推出的專輯。以我所知,有唔少同學朋友都只是為了一首《追》而去買《寵愛》。
 
3.我冇買。不是我不喜歡《追》(唔鍾意都唔會甘冒被鬧危險唱埋一份啦),而是《寵愛》給我的感覺——純粹將哥哥主演的電影主題曲湊埋一齊而已。我不滿足,我認為標誌著哥哥復出的專輯不止於此。
 
4.好彩,1996年哥哥推出了《紅》。我不知怎去形容這專輯給我的震撼,只知道我係咁Keep住聽,聽之餘仲Keep住睇那些MV——撇除那些電影主題曲《有心人》、《談情說愛》MV只是將碎濕濕電影片段剪埋一齊,其他的,都是專誠去拍,而且仲專誠拍成具有故事性,不是就咁影住哥哥行行企企就算——當然,哥哥行行企企絕對比那些阿豬阿狗行行企企好睇。
 
5.《紅》和《偷情》以上下集方式,說了一段秘而不宣其實大家心知肚明的「橫跨雙性兩男一女三角孽緣」;《怨男》則拍下一堆來自不同社會階層的男人,高矮肥瘦懶型甩漏乜都齊,但人同此心心同此理,大家內心深處原來都埋伏著無比妖艷。Yes,職業階層身形樣貌等等外在嘢,都不能掩飾你真實潛藏的內心,只爭在有冇機會釋放。
 
6.而我翻炒得最最最最最多的肯定是《怪你過份美麗》。MV角色,三個:哥哥飾演的唐寶明、馬詩慧的女上司、舒淇的Office Lady。場景,Office乙個。故事大致是這樣的:新入職的唐寶明,好快就俾女上司睇中,然後……你明啦。因唐寶明「表現」優秀,好快升職,仲威到有房坐,這時候遇上了新入職的Office Lady,荷爾蒙作祟,二人初則曖昧繼而(搞埋)一齊,點知好唔好彩地,被當日捧佢上天的女上司撞破,唐寶明惟有無奈辭職,大好前途就係咁,衰在兩個女人(及自己的荷爾蒙)手上。最後一幕,唐寶明滿腔憤怒,忍唔住對鏡頭舉中指(不過打咗厚格)。故事其實老土得不能再老土,但一改由哥哥和舒淇真身演繹,WOW,好睇到爆!
 
7.哥哥的80年代精彩,90年代繼續精彩,而在精彩的同時,他嘗試了一些新唱腔(你不妨細聽、比較《紅》和《側面》這兩張相隔7年的專輯),也透過歌詞和MV,開始訴說一些過去還有偶像包袱時不會及不敢說的東西。當大部分同行還在扮一個偽人時,哥哥不只是個純粹執行別人意思的表演者。
 
8.同時我們看到他演出了很多經典角色:《阿飛正傳》對鏡自憐自舞的旭仔、其實在《家有囍事》比起周星馳更好笑的常騷、把無窮妒意屈在心裡全程Keep住內斂的西毒(西毒比起《東邪西毒》其他角色都難演)、《色情男女》那個在三級片找回人生意義的潦倒導演阿星、《霸王別姬》為愛斷送一生的程蝶衣……
 
9.其實仲有一個角色是我極度佩服——《錦鏽前程》的林X榮,一個道義擺兩旁利字擺中間的市儈經紀,哥哥全程就在演一個著住西裝的斯文敗類,在錢與女人之中打滾沉溺,到最後一刻才冒出水面,醒覺。這是一齣OK少有的香港電影,用上好易淪為婆媽劇的故事,不幼稚而相當實際地訴說友誼的真實。
 
10.其實可以繼續寫落去,但冇位了。最後我想說的是:有些香港藝人,無論拍過幾多戲出過幾多碟攞過幾多獎,由始至終都只是討好大家的藝人,哥哥卻是一位將個人生命意志貫注表演之中的藝術家。如果2003年可以當乜都冇發生過,由頭嚟過,你話幾好。


90年代,可能是我們最後的快樂時代。
撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/

回首頁      列印

 

/104



C觀點

中原城市領先指數

廚神

旅遊