2016年12月16日

 

浪漫月巴睇90s - 月巴氏
永遠令我亢奮的女王!阿檎!

2016年08月26日
  • 1999年推出的專輯《無罪モラトリアム》。

  • 椎名林檎其實不想用《幸福論》作為自己出道的第一首歌。

  • 事隔多年,《歌舞伎町之女王》仲係咁好聽好睇。

   

 

里約奧運閉幕典禮上的一場交接儀式,睇到我興奮到呆——因為太驚豔,我興奮到霎時間反應不來。

1.到了知道儀式的音樂監督原來是椎名林檎,由興奮變成亢奮。
2.但那一刻我未必知道椎名林檎在儀式中所選用的歌曲有甚麼意涵,但總之一聽到佢個名,就自然亢奮起來。
3.她的名字總是令我聯想起好多,而通常是她的專輯封套、MV裡的形象——這些,都是亢奮之源。
4.她首次令我亢奮的是《歌舞伎町之女王》。單曲推出的年份,1998年,當時我已經把所有聽歌Quota,奉獻晒俾英美搖滾(Why會變成咁?請睇番上星期那一篇「浪漫月巴睇90s」),結果是:廣東歌,冇聽;J-Pop,都冇——而且印象中當年「小室系」(即由小室哲哉主導及構成的音樂風格)還在大行其道,但基於個人問題,我真的完全接受唔到呢種大量結合電子舞曲的流行音樂(我尤其驚TRF,點知一寫到呢三個英文字時,腦海就不期然浮起嗰隻《Boy Meets Girl》,夢魘吖!)。
 
5.但《歌舞伎町之女王》,是完全另一回事——不電子之餘,還有點刻意的舊——一種向過去日本靠攏的舊,但又不是在唱演歌甚或模仿演歌(也不是上世紀70年代承繼了演歌風格的那一種流行曲),而是相當現代地去重塑的舊。
6.有這種感覺,好大原因是我第一次聽《歌舞伎町之女王》,是透過MV。先撇開林檎那個誘人的造型扮相(以及那個Keep住郁嚟郁去,卻又總是有意無意Focus在佢胸前的鏡頭),集中睇其他嘢:拍到嚴重偏色的污糟日本小街,有細路在明目張膽屙尿,鏡頭一轉又有個著住和服的女人在餵奶,再配合那些間唔中閃現的詭異字款——成件事,令我立即諗起:江戶川亂步筆下的大正年代、丸尾末廣描繪的感官世界、荒木經惟鏡頭下的新宿街道……當中,完全不含有任何代表&象徵90年代日本的時尚事物,反而統統都在呈現一個消逝了、帶點詭異獵奇味道的舊日本。而林檎置身其中,竟然夾到核爆。
 
7.問題是,在那個「小室系」盛行的型格年代,又有幾多後生仔女仲會咁特立獨行情迷那個(有點詭異的)舊日本風格?Yes,這就是成個MV最冒險的部分,再配合埋首歌不正常的悲哀沉淪主題,塵世間又有邊個初出道歌手會咁做?偏偏,林檎就敢做,仲空前成功。
8.我們都知道《歌舞伎町之女王》是她的第二首單曲,(基於唱片公司的安全商業考慮下)第一首單曲是《幸福論》,由音樂到主題都「輕」得多,MV的處理也似乎較切合一個初出道創作歌手,只是她還是違和地穿上了一套校服,擘大喉嚨,以毫不清純甚至有點吵耳的方法高呼她的「幸福論」。我是先聽/睇《歌舞伎町之女王》,才去搵番《幸福論》聽/睇,更加肯定了一點:她一開始就在違和地,將好多本來擺明衝突的事物錯置在一起,但我們聽落望落,又會變得好融和。而這一點,也被她一直沿用下去,產生了大量「咁都俾妳諗到」的歌與形象。而我承認,我當初絕對是因為MV,才去留意她所寫所唱的歌。
 
9.睇番資料我們都知道,椎名林檎自小就想唱歌,但父母反對,她一意孤行;她往往用(唔係個個後生仔女都識的)詞語和典故入詞,因為佢鍾意,懶理你哋識唔識;她的型,除了形象,更主要是她忠於自己的特立獨行。由1998年至今,你從不覺得她在食老本,反而持續地令世人亢奮。這是她真正強勁的地方。
10.(最後。我一直覺得椎名林檎個樣有啲似——Sorry,係好似恬妞。我一直覺得恬妞好靚,所以呢,也變相覺得椎名林檎好靚。以上秘密我擺咗喺個心好耐,Yeah。)

撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: [email protected]
90年代,可能是我們最後的快樂時代。

 

回首頁      列印

 

/108



C觀點

中原城市領先指數

廚神

旅遊