糧草先行 - 士兵
築地かとう 由，打咩，變，成熟，客。
-
1.號稱魚中鵝肝嘅鮟鱇魚肝，喺日本見到就叫啦。
-
2.如果冇鮟鱇魚肝，鮟鱇魚汁亦係不錯嘅代替品。
-
3.寒鰤刺身，唔係成日有，通常冬天先有得食，因為野生關係，油脂唔算多，入口不腥而甘甜味慢慢滲出嚟，都係見到就叫啦。
-
4.食咗幾次汁煮，轉轉口味食鹽燒喜知次，雖然鹽燒會令魚油減少，但依然夠油香，仲皮脆肉嫩添，不過都係汁煮好食啲，因為鹽燒冇咗魚肝。
-
5.汁煮喜知次，每次嚟食嘅質素味道都差不多，全身脂肪，翅邊位有半透明膠質，入口又滑又香，加上微甜醬汁，真係好食到我想講粗口，豆腐隔籬嗰塊魚肝亦超好食。
-
6.由打咩變成熟客，有圖有真相。
-
7.かとう今年11月會搬去豐洲，可惜我最like嗰間咖啡店愛養決定結業，唉。
-
8.かとう門口唔會有長長人龍，去咁多次只係今年復活節嘅星期六朝早，有八個人排緊，其中六個係日本人。
隨著築地搬去豐洲日子愈來愈近，不捨心情亦愈來愈濃，有啲嘢拆咗就係拆咗，場內一啲老舖、人和事，仲有我喺度留低嘅腳毛亦會隨之消失；而我嘅腳毛，只在場內和食店かとう枱底留低，因為我去築地係唔會食壽司，晨早流流排幾粒鐘食十件八件生嘢，我情願花時間去原宿goro's排隊抽籤買毛好過。
記得幾年前，我同朋友A第一次到訪時，門口冇人龍，有兩個外國遊客早我哋一步入舖頭，舖面一位女大將大聲一呼：「no english menu !! no sushi!!」然後手指指向右邊！即係點？叫佢哋過主囉，兩個鬼佬冇癮離開，之後女大將再向我做一個交叉手勢：「打咩 !! 」見到咁嘅情況，心口涼了半截，好彩我一早準備好日文cap圖，用電話示意想食汁煮喜知次，女大將便招呼我哋坐低。
坐我隔籬一位婆婆，正正就係享用緊汁煮喜知次，枱面仲放咗支麒麟啤，見佢吃一口魚再呷啖啤酒，再細細聲：「美味い～～」然後向我微笑一下；而我朋友隔籬係一個似喺築地工作嘅男人，邊叼著一支煙邊睇報紙邊食生蠔汁，非常豪邁。かとう真係典型日本食堂feel，成個氣氛正到不得了，從此就愛上咗，之後每次來東京都要去食(總共食咗六次)。直至最近一次幫襯，女大將認得我，一入舖就向我揮手打招呼，嗰一刻真係非常感動，喺東京和食店由打咩變成熟客，咁大個仔，真係第一次。
難得係かとう唔會為咗做遊客生意，去改變自己放棄舊客人，唔似得香港一啲食肆為咗賺錢，餐牌變殘體字、味道變辣變重口味就晒大陸遊客。所以大家去かとう嗰陣記得準備好資料叫嘢食，唔好聲大大，斯文啲唔好失禮人，要尊重一個喺築地場內遊客比例最少嘅好地方。幸好，呢間我最愛嘅和食店，今年十一月鐵定會搬去豐洲，下次再去東京時必定拜訪。
地址：東京都中央區築地5-2-1築地市場8號館
饞咀，成日想食好嘢，卻一星期食足五日外賣飯盒嘅am730死肥仔創作總監。
電郵：[email protected]
列印
