2016年12月16日

 

談財經 - 胡孟青
博士的新衣

2010年09月09日
   

 

兩個星期前,出席完一個講座活動之後,有位男觀眾一路追上嚟,先是欲言又止,後而欲語還休,放心,佢唔係示愛,況且我哋呢類結婚之前已經玩夠嘅癲夠一族,婚後專心事業有寄託,自然就百毒不侵,唔需要搞乜嘢花臣,美其名減壓、平衡,來製造為自己開脫嘅藉口。
要玩,每人每天都會遇上許多相逢恨晚,邊度玩得咁多呢,玩物喪志嘅就反而見好多。有感而發,係因為啱啱勸緊肥仔孫柏文,想玩就結婚之前玩夠佢嘞,一日未結婚、一日都係自由身,結咗婚再玩就好肉酸,尤其係佢依家有頭有面食住面口飯,斷正俾人寫,咪間接幫人家製造茶餘飯後話題,最大問題係,佢會被打落成違約者,連婚姻合約都唔尊重,邊個仲敢信你個人嘅「廢噏」呢?
咁究竟頭先講嘅男觀眾係乜水,原來只係一位50來歲嘅阿叔,佢其實係想問一個冧巴啫,呢期潮流時興能源股,好好醜醜唔少細價炒股都乘機開呢瓣,仲要搵齊有銜頭嘅高人專家肯定呢家公司嘅存在價值,大賣廣告大造訪談兼參加講座,全方位直線曲線推銷,阿叔不虞有詐,結果中咗招;最慘情嘅係,佢唔係信咗邊位高人,而係參加擺明標榜有冧巴俾你、變相幫你賺番學費嘅投資班。
多得香港政府嘅50億元資助,幫坊間唔少行家賺個盤滿砵滿;我問阿叔點解唔睇下,間公司一直都係話鑽探緊而未見出石油,但咁都信,佢就話係阿股評人俾嘅,再問咁點解你對佢咁有信心,佢只係答咗我一句,話因為佢係博士;至此,我終於茅塞頓開,原來一個博士銜頭真係咁好使好用,無往而不利,簡直就係活動人肉生招牌,早知就讀多啲書啦!終於明白咩叫書到用時方恨少,其實係銜頭到用時方恨少。
博士學位有價,市場又有大把可助你不勞而獲嘅機會,有節目名主持話,佢早排就收過唔少某國家嘅甚麼不知名大學頒授俾佢榮譽博士嘅邀請信,睇真啲,原來係募捐信,你肯捐番最少幾十萬元,個榮譽博士銜頭就係你嘅,咁樣同買個學位番嚟又有咩分別?讀都唔使讀,明碼實價齋買,感覺上跟內地唔少人俾錢買假文憑呃老闆兼自欺欺人的,又有乜分別?
有自信嘅人係唔需要咁多包裝嘅,就正如唔少暴發戶要用名牌由頭包到落腳,去肯定自己嘅存在價值,只會被視為膚淺浮誇。
眼見86歲高齡嘅查良鏞先生本著求學問終身學習的一份毅力與精神,用咗5年時間負笈劍橋,修讀完碩士再完成歷史學博士學位,益發覺得,學海真是無涯,值得許多妄想沽名釣譽者反思,尤其是讀書求學問,需要一份知不足嘅謙卑,千萬不要把學位當作是一種個人嘅包裝,尤其是連唔屬於會計法律等需要領牌專業嘅普通學士碩士學位,唔該唔好再擺在卡片上引人發笑。

逢周二、四刊出

回首頁      列印

 

/52



C觀點

中原城市領先指數

廚神

旅遊