2016年12月16日

 

談財經 - 胡孟青
賓架軟實力

2010年09月02日
   

 

人氣音樂人都話俾你知,今時今日識得彈鋼琴已經唔再係乜嘢專長,反而已經被視作基本技能,就好似中國人識得揸筷子夾餸一樣;所以好多爸爸媽媽猛咁催谷隻塞豆窿去學完一樣又一樣,究竟呢種社會現象係基於成年人鍾意攀比嘅意識形態問題,抑或係歸咎於群眾壓力嘅被動式羊群心態,其實幾值得深入探討。
曾經難得有一個唔使開工嘅周末,帶埋隻臭B與另一位同樣係來自本地音樂界嘅隱士High Tea,好奇地問及究竟幾多歲先至好俾臭B學彈鋼琴,皆因我見佢啲手指細細,有時連揸隻重些少嘅杯都未揸得穩,又何來力量去按琴鍵,咁細個學會唔會急咗啲,對方嘅答案就係5歲啦。
市場競爭大,假如沙紙文憑係屬於個人職業晉升必備嘅硬實力,咁高爾夫球紅酒知識就應該係軟實力。來自台灣嘅賓架話,依家在台灣要跟客戶打交道傾刁,高爾夫球打唔入100桿之內都唔使旨意有客會睬你;聽落有啲似彈鋼琴,形同唔彈到八級唔該唔好攞出嚟獻世;啲客要求咁高,賓架果然真係唔易做,人家唔止要你識,更加要你精,好波屎波,真係好難呃人。
其實打進100桿之內,即俗稱「破百」,只係屬於學習高爾夫球技巧的首個關卡,有啲人打咗好幾年都未可破,有啲人只係學咗唔到幾個月就成功破百,是否狗屎撞馬棍都要打多幾次才容易證明,因有人成功破百後,好快又打回原形,一切源於球技水平,還有勤力練習,Practice makes Perfect也。
在球場上,進攻策略也很重要,要經過慎密計算,用腦分析思考較用手揮桿打出所花時間往往肯定更長。想突破100桿所需花嘅功夫,明顯在每一桿開球成功率、上球道率、上果嶺率、下殺坑救球率及推桿成功率之上,還有不要忘記紀錄好受罰桿數,邊幾個洞受罰,罰多少桿、點解被罰、衰在邊支球桿、剩下多少碼等等,懂得自我診斷並解構出自己失敗之因,才會有針對性地對症下藥作出改善,咁先至叫做Pro。即使自問係業餘,也要表現出Pro嘅一面,從開球嘅穩定性先做起,做得好起碼可以減少失誤與罰桿。大力無用,只會把球唔係打遠咗就係打歪咗,重要係唔出界,穩定性同埋信心通通都會番晒嚟。
綜合以上種種連我自己都自愧未能成功通過考驗嘅打球小百科,領悟到謹慎計算與經驗累積,亦係成功賓架嘅特質,原來係可以從打高爾夫球中吸收番嚟。
高球場上可以見盡人生百態,更可以睇得到一個人有無品。克林頓出晒名鍾意打茅波;喬治布殊除咗成功連任呢樣嘢係叻過佢老竇之外,就無咩勁過佢伯爺,所以鍾意跟老竇鬥快;韓裔美籍人氣高球女神魏聖美有一次遭罰桿,目睹她以球桿拍打草地洩憤,被球評家認為無品,即係未夠修養,露出了好眉好貌背後不為人知的破綻。

逢周二、四刊出

回首頁      列印

 

/48



C觀點

中原城市領先指數

廚神

旅遊