歐國盃決賽踢完，市面上湧現大批喪屍，哈哈！各位球迷捱眼瞓都誓必睇波，作為C朗粉絲仲要喊到眼都腫埋。喺咁關鍵嘅時刻，佢竟然傷出，不過佢依然拐下拐下咁喺場邊幫隊友打氣，直情好似做埋教練咁指揮。有人話葡萄牙捧盃係好波不如好運，不過贏咗就係贏咗，別葡萄！可能你未必鍾意C朗，嫌佢太鍾意show off又有啲造作，但有得show先得㗎！C朗18歲開始為葡萄牙上陣，過去13年成為歷來出場次數(133場)同入球(61球)最多嘅紀錄保持者，如今再斬獲首個國際大賽冠軍，話佢係史上最偉大嘅葡萄牙球員絕不為過！美斯：「說好的陪伴呢(心酸設計對白)？」
阿根廷一代球王馬勒當拿講嘢你要聽！佢出口幫拖叫美斯留低，話應該放眼2018世盃，更加叫美斯唔使理叫佢離隊嘅聲音。連阿根廷總統馬克里都親自打電話俾美斯，美斯冷靜過後，會唔會收回成命呢？問題係，阿根廷國家隊真係沒有最亂，只有更亂，依家連教練馬天奴都宣布辭職。距離奧運開幕得番一個月左右，但只有9名球員確認參加集訓，其餘嘅都因為所屬球會唔放人而無法參與。又有報道指，國家隊部分球員已經半年收唔到報酬。曾經贏過兩次奧運足球金牌嘅阿根廷，居然無法召集足夠球員集訓，有冇搞錯呀？究竟阿根廷嘅足球精神去咗邊？希望美斯可以企番出嚟，支持國家隊啦！
今屆歐國盃睇咗咁多場，暫時覺得最緊張都係德國對意大利嗰場。雖然意大利飲恨，但發揮得出色係有目共睹嘅，特別係防守方面，除咗有鋼門保方屢救險球之外，仲有費奧倫斯嘅精彩救空門。好波不妨一睇再睇，睇番慢鏡至清楚見到佢當時飛身用虎尾腳撐走個波，難度系數達9.999分，防守意識同身體意識真係配合得天衣無縫，真係型到O晒咀。德國嗰邊已經變陣，由4-2-3-1改為3-4-3，由曉姆斯、謝路美保定及賀維迪斯踢三中堅，但依然有漏洞，俾意大利製造咗幾次埋門。德國成功晉級，令路維破紀錄成為首位能連續5個大賽都殺入4強嘅主帥，但曉姆斯下場停賽，加上有傷兵，4強將遇上更大考驗。
我覺得緣份嘅嘢就係……既然遇上，就唔好輕易錯過不該錯過的，唔好造成人生有莫大嘅遺憾；相反亦唔應該死心眼捉實不該捉緊的，既然唔能夠幸福快樂，咁就豁達啲、瀟灑啲。對於美斯宣布退出阿根廷國家隊，係好突然，但係4次決賽都未能協助球隊奪冠，佢覺得緣份到此為止喇！今次美洲盃決賽重演同智利互射12碼，美斯宴客後喊到豬頭咁，贏盡球會同個人獎項嘅佢，實在好難接受自己失手同埋國際賽餐餐都做阿二。老大哥馬斯真蘭奴亦宣布退出，阿古路就話考慮緊，今次阿珍天娜大洗牌，冇咗美斯同其他主力球星，陣容將會翻天覆地大革新。距離世盃仲有兩年，夠唔夠時間重建呢？重建後又會點呢？
歐國盃已經踢咗一半，晉級形勢得意在大家熟悉嘅強隊都落咗下線，包括德國、西班牙、意大利、法國、英格蘭(截稿時仍未知葡萄牙戰果)，當中只有一隊可以殺入決賽。話咁快就即將上演強隊對決，英格蘭同西班牙本來好大機會可以首名出線，英軍同斯洛伐克打和，其實都佔盡上風，罕有地咁進取，全場有29次射門咁多，但依然粒顆無收，面對強勁防守都冇乜符弗可以出。西班牙輸俾克羅地亞失分，就更加令人更大跌眼鏡，仲要被終結歐國盃決賽周14場不敗紀錄。上仗輕取土耳其3球，西班牙仲獲大讚巧妙運用Tiki-taka，不過對住格仔兵團，左搓右搓都攻唔入，沙治奧拉莫斯仲主射12碼宴客，唉！
睇葡萄牙對奧地利場歐國盃，真係頭頂冒煙，都已經大大嚿肥豬肉放到埋口邊都食唔到呀！C朗操刀射12碼，小窒步已令龍門估錯邊，坐定粒六諗住「依斯執」啦，點知佢竟然仲想趟死角，結果中柱彈出，白白浪費咗個黃金領先良機。生死關頭，仲玩乜鬼死角呀，大賽梗係以大局為重，收起個人主義啦！當然，我都明白葡萄牙唔係靠佢一個就可以踢到曉飛咁，不過一有機會個人表演，佢又嚟料，幾時先肯學乖啲呢？ 有啲球迷亦仲未肯乖，喺捷克對克羅地亞嘅賽事，有克羅地亞球迷扔點著咗嘅煙花落球場，真係離譜得過分。當時克羅地亞領先緊2比1，但因為南部同北部克羅地亞球迷內部不和而引起騷亂，結果克羅地亞班球員唔知係咪嚇窒咗，俾對手追平。
半夜睇直播時，有朋友留言話C朗唔fit，我忍唔住回番句「唔准講C朗壞話！」不過，我絕對係理性而唔係盲撐嘅，喺葡萄牙被冰島逼和嘅賽事，C朗嘅表現確實令人失望。基本上支持咗C朗9年，一直都好信任佢嘅能力，但有時都頂唔順佢啲劣根性。佢完場後寸冰島「以為佢哋已經贏咗歐國盃」，原來係嬲冰島一味龜縮。咁講嘢，梗係惹來全城圍插啦，咁做咪唔夠大將之風囉！ 對手點踢法始終唔到你管，人哋成功逼和強隊梗係開心啦。每人嘅快樂都唔一樣，C朗咁樣真係自我中心得滯，作為球星，球場內外都要有品至得。我希望睇到你場上入波嗰種霸氣，而唔係呢種小家霸道呀！
球迷近排又要戴住對黑眼圈喇！歐國盃踢得如火如荼，不過最怕就係樂極生悲。英格蘭對俄羅斯1比1打成平手之後，俄羅斯球迷越過保安同圍欄，由南看台走過去襲擊英格蘭球迷。歐洲足協都好快作出反應，強調唔會容忍任何暴力事件，表示已警告兩支代表隊，若再發生同類事件，將會被取消參賽資格。表面上係俄羅斯球迷生事先，但其實賽前英格蘭球迷連日挑釁，最終導致大爆發。另外，比賽期間仲有俄羅斯球迷放煙花，到底係點帶到入場嘅呢？今次事件反映到法國球場警力不足，只希望球迷能夠和平啲、自律啲，歐國盃仲有排踢㗎！
球季一完，不論巨星級球員或領隊都要忙官司。美斯早前喺對洪都拉斯嘅熱身賽整傷背部，本來預計可趕及喺美洲盃首仗對智利上陣，但佢因為要趕返巴塞隆拿出席瞞稅案件嘅聆訊，舟車勞頓下未回復狀態，最終只可以做觀眾。 另一方面，摩連奴風騷接掌曼聯，為FIFA 17遊戲做宣傳之餘，更忙於準備新球季，但佢仲有啲蘇州屎要處理，因為之前佢喺車路士嗰陣同女隊醫伊娃有牙齒印，伊娃依家告車仔無理解僱，同埋摩連奴對佢性別歧視兼侮辱。雖然球會剛同伊娃達成和解，但唔知摩帥仲有冇手尾跟。
走咗個雲高爾，又嚟個摩連奴，苦無機會更上一層樓嘅傑斯，梗係心裡不是味兒啦！一於去個旅行散下心先再算啦，點知又有消息指摩帥想邀請里奧費迪南加入教練團隊。雖然里奧唔係紅魔鬼青訓產品，但都効力過曼聯12個年頭，立過唔少汗馬功勞。摩連奴可能心諗，傑斯你咪即管吊高嚟賣囉，里奧幫到手，又肯埋堆，而且一樣得人心，只係教練資歷尚待磨練。不過，里奧又的確好識do，公開力撐摩帥，呢啲咪叫團隊精神囉！傑斯唔甘心做副手絕對可以理解，但只可以二選一，如果選擇留低就咬實牙根再等天時地利人和，否則就係向外闖出自己一片天，用實力證明自己嘅足球理念係work嘅，可能終有一日都會返嚟接掌帥印呢！波係圓嘅，世界都係圓嘅！
有「大賽敗家仔」之稱嘅希古恩，喺聯賽就做咗生神仙，今季為拿玻里上陣35場入36球，協助球隊取得意甲亞軍，佢亦打破前AC米蘭射手諾達爾66年前嘅35球舊紀錄，成為意甲神射手。希古恩對拿玻里可以重返歐聯而感到好開心，但有傳佢打算轉戰英超尋求新挑戰，先後同曼聯、阿仙奴同利物浦傳出「緋聞」，但以紅軍可能性最大。雖然利記未獲來屆歐聯資格，但由主帥高洛普帶領，係吸引佢嘅原因。咁到底踢歐聯定英超吸引啲呢？希古恩以前同C朗一齊踢皇馬嗰陣有同一弊病，就係每逢大賽表現就相對失色，C朗後來有改善，但希古恩就「依然故我」。代表拿玻里踢歐聯，隨時又為人詬病，不如走為上著！
摩連奴入主曼聯成為球壇熱話，個個爭住評價，睇到有啲煩。我冇話特別鍾意或者唔鍾意佢，其實米已成炊，合唔合適都係要睇過至知。不如轉睇本地足球refresh下啦！周日喺麥花臣球場會舉行「無家者世界盃香港區籌款賽」，由朝早9點踢到下午5點。多年嚟，香港足球評述員協會都係無家者世界盃同香港街頭足球嘅支持機構，今年當然繼續出力。過去協會派隊參賽，成績都唔錯，今年更會以我哋嘅專長去支持——當然係講波啦！除咗現場評述之外，仲有網上直播。話時話，我都好耐冇講過波，仲要喺戶外，心情都有啲「剪張」，不過有咁多講波佬傍住就掂晒啦！咁有意義嘅活動，各位球迷點可以唔支持？
睇住英足總盃決賽直播，真係唔多鍾意曼聯踢得咁保守，直至水晶宮先開紀錄，紅魔先至如夢初醒，最終連入兩球反勝，捧番個盃再次感受勝利嘅激動。曼聯對上一次贏得足總盃，已經係2003至04年球季，朗尼喺翌季加盟後，12年嚟曾兩次殺入足總盃決賽，但分別衰喺阿仙奴同車路士腳下。贏過英超、歐聯、世冠盃同聯賽盃多項錦標嘅朗尼，今次終於捧埋足總盃，唔知係咪太興奮，佢高舉獎盃時，連獎盃個蓋都chok甩埋，唔知飛咗去邊。今場勝仗亦令雲高爾可以華麗落台，摩連奴將會大動作收購同大清洗，一場腥風血雨即將打到嚟！
曼聯3比1挫般尼茅夫，以勝利謝幕，不過就真係戥迪基亞唔抵，如果今場冇失波，就係全季第16場保持不失，可以同施治平分英超金手套獎。可惜佢今場失個烏龍波，仲要去到93分鐘補時臨尾香，真係多得「屎波寧」唔少！完場後雲高爾對住半滿嘅奧脫福發表感謝辭，不過就噓聲四起，仲有同佢講再見嘅橫額。佢嗰頭多謝完球迷支持，轉個頭就話球迷期望太高，唔怪得有傳迪基亞就算喺曼聯踢得好開心，只要雲高爾一日仲喺度，佢就唔想留低。另外，卡域克亦係去意已決，但最應該走嘅其實都係雲高爾，佢走咗應該可以化解好多問題。
曼聯主場對般尼茅夫嘅煞科戰，因為奧脫福球場發現可疑爆炸裝置，要全場疏散兼取消賽事，好彩最終證實只係虛驚一場，成個疏散過程亦處理得宜，球會強調，一直將球迷嘅安全放首位，又感謝警方支援同兩隊球迷配合。如果今次涉及人為疏忽，就真係令人費解，去過奧脫福朝聖嘅話，都會覺得球場保安設防戒備森嚴，不論係VIP定普通球迷，進出都要檢查隨身物品同身體探測，而且真係去到邊都有人睇實。 至於場補賽，曼聯就算順利全取3分，都只能夠同曼城同分，計得失球差18球咁多，你估真係會有少林足球咁戲劇性咩？紅魔無緣下季歐聯資格，唯有專心踢歐霸啦！
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 /136
至
/136 
