AM730

全部專欄 , 依話直說

依話直說 - 依雯

車仔改善後防見成效

2016-10-25

真係接受唔到囉！紅藍大戰，曼聯竟兵敗如山倒，狂吞車路士4蛋！紅魔之前聯賽已經連和兩場，今次全失3分之餘，仲乜嘢面子、氣勢都輸晒。車仔擊敗曼聯之後，以19分升上第四，而頭5位嘅球隊，分數只相差1分，冠軍之爭預料會相當激烈，曼聯就繼續排第七，同榜首相差6分。今場頭兩個失波都係曼聯後防夢遊，下半場就繼續俾機會對手表演；相反車仔喺改善後防方面見成效，3-4-3陣式令球隊防守時，由馬高斯阿朗素、加利卡希爾、大衛雷斯、艾斯派古達及域陀摩西斯形成5人防線，成功守到零失球。今場曼聯射門次數有16次，但只得5次中龍，車仔喺前場不斷壓迫，亦搞到佢哋老鼠拉龜咁。

雙紅會觀後感

2016-10-20

「雙紅會」和氣收場，摩連奴賽後依然牙擦擦，話覺得利物浦其實踢得辛苦過曼聯，同埋氣勢上利記4連勝，以為勝算較高，但紅魔踢到佢嘅部署，仲有伊巴嘅黃金機會入咗的話，就會贏1比0。曼聯控球率只得35%，但摩帥就話，悶戰根源出於利記身上。防線方面真係做得唔錯，路爾斯華倫西亞瞻前顧後，下半場一次完美攔截，瓦解羅拔圖法明奴單刀機會；中場有安達靴里拉助攻助守，今仗佢傳球成功率達86%，仲攞埋賽事最佳球員。反而攻擊方面相對失色，拉舒褔特、艾殊利楊格、保羅普巴、伊巴同入替嘅朗尼，表現都未見突出。摩帥今仗算係保守得宜，但前線仍需加強，周末對車仔，希望唔好太保守啦！

基沙文頂替朗尼？

2016-10-18

摩連奴入主曼聯時話過，只要朗尼踢番正前鋒，就可以發揮出應有水準。可惜事與願違，依家朗尼變咗後備，唔單止咁，據悉摩帥經已計劃緊收購馬體會射手基沙文，成功嘅話，朗尼隨時會被叮走。朗尼雖然今季唔爭氣跌晒watt，但係佢話晒都係隊長同紅魔老大哥，換人都要搵個有番咁上下份量嘅球星，先至可以鎮得住班細嘅。基沙文個人能力的確出色，但係佢都幾倚賴隊友嘅配合，可能佢唔係體力化嘅球員，所以較少參與防守，只會集中火力進攻。咁都有好處嘅，因為佢把握力高，好難封死佢，但係要發揮得好，就預咗要先建立良好默契，呢樣絕非易事！

長青保方勝在穩定

2016-10-13

意大利國家隊門將保方壓倒美斯、C朗等人，獲得本屆金足獎。能夠保持住廿年都有咁高水平嘅表現，保方得獎絕對係實至名歸。意大利球壇特別多長青樹，包括托迪同東尼等，保方當然係其中之一。1995年，佢17歲就為帕爾馬踢意甲，兩年後起成為國家隊鋼門，贏過9次意甲同1次世界盃冠軍，仲有多項個人榮譽，成個職業生涯都處於巔峰。佢早前宣布2018年世界盃後會退役，希望佢收山之前，能夠效法意大利傳奇門將索夫咁，以40歲之齡助意大利捧盃。做人最緊要有目標，盡力做到最好就不枉此生，保方之所以令人佩服，唔係只係叻在神救，而係勁在佢嘅穩定性。有佢保住後方，球隊贏面真係大好多！

體育節目專業行先

2016-10-11

上星期香港體壇盛事多，賽車、拳擊同龍舟等，愈來愈多樣化，亦喚起大家對運動嘅熱情。對於未能親身去現場睇嘅市民嚟講，直播嘅需求相應增加，但有關本地體育嘅直播一向唔算多，而且僅有嘅節目質素亦差強人意。直播香港嘅體育賽事，永遠存在雞先定雞蛋先嘅問題：轉播機構可能會話香港市場受眾少、投資回報不成正比；但掉轉頭諗，做得好先會吸引到人睇，甚至引起其他國家關注。製作運動節目，有別於一般綜藝節目，講求專業而又不失趣味，但專業一定要係真專業，同埋唔好勉強娛樂化，否則只會不倫不類，產生反效果。

曼城首敗哥帥cut WiFi

2016-10-06

哥迪奧拿自上任曼城主帥以來，喺聯賽一帆風順，但上輪英超榜首大戰，去到熱刺主場就慘吞兩隻光蛋兼錄得首場敗仗。哥帥一直篤信傳球、控球同跑動嘅踢法，點知一山還有一山高，熱刺仲更加勤力同進取，瘋狂進逼搶截之下，搞到曼城後防陣腳大亂。冇得玩地面戰，唯有迫住踢高Q大棍長傳，攻力固然削弱晒啦！輸咗場波，既失分，又失士氣之外，更暴露埋球隊弱點。不過，哥帥經驗老到，一定有計仔見招拆招嘅！只要球隊上下一心夠團結，就乜問題都有得解決。為咗加強溝通，哥帥要求同球員一齊食早餐及午餐時cut WiFi，冇得上網，就可以專心啲相處啦！

2016-10-04

早前應邀出席一項足球電影活動，令我重新認識球王比利。老實講，我對以足球作為題材嘅電影並無抱太大期望，但今次真係好意外，由頭到尾都冇悶場，仲勁多笑位同大派洋蔥。留心啲睇，真正嘅比利都有份客串一個鏡頭添！更重要係，套戲帶出一個思考空間俾觀眾，好多對白都好有意思，亦非常勵志同激動人心。片中其中一個話題，係針對足球王國巴西嘅踢法，戰舞式森巴足球技巧被取笑為雜耍同落伍，反而追求學習歐洲式地面攻擊同組織踢法。其實，有自己民族嘅獨特踢法，絕對應該引以為傲。又不過，有時亦毋須太執著於保留傳統與否，畢竟現代足球講求靈活多變，睇餸食飯囉！

南韓美斯爭氣

2016-09-29

按照南韓兵役法規定，國家隊男運動員若然喺奧運會集體項目上獲得前三名，或者喺亞運會上奪得冠軍，將獲免除兩年兵役。可惜，孫興民就應該走唔甩喇！貴為亞洲足球史上轉會身價最高嘅球星，雖然喺英超首季未能發光發亮，不過近期就愈戰愈勇，今季為熱刺上陣5場，已經攻入5球加1次助攻，難怪有「南韓美斯」稱號。繼喺英超對米杜士堡梅開二度之後，佢喺歐聯對莫斯科中央陸軍中又攻入全場唯一入球，同上季上陣42場先至入到8球加5次助攻相比，簡直判若兩人。亦證明咗只要爭氣，凡事都有可能，事在人為嘛！

人生首場拳賽

2016-09-27

終於打完我人生中首場拳賽，阿媽，我得咗喇！仲符碌贏咗呀！上台前，本來諗住捱到3個回合仲企到喺度已經達標，因為胸骨痛到實在無法發力，基本上連呼吸都困難。不過，當聽到好多人喺台下嗌我嗰陣，我知道我唔單止要贏對手，更要戰勝自己，一定要憑意志力咬緊牙關盡力打。對手無論技術、體力等各方面都明顯高我幾班，重拳打到我暈陀陀，但真係好彩，佢一樣有傷在身，而我又捱到，結果最後一個回合，佢被讀秒，令我有機會獲勝。我只係初學兩個月，今次絕對係一個十分難得嘅經驗，距離Energy Fight星級盃仲有一個多月，訓練刻不容緩，但首先，係要療傷。

多蒙特門神有樣有實力

2016-09-22

不得了喇！驚為天人呀！一向少睇德甲，不過發現到多蒙特有位靚仔門將路文貝基之後，相信以後會多加留意。唔止女球迷見到流口水，男球迷都忍唔住要讚佢，因為喺多蒙特作客5比1大炒禾夫斯堡一仗，「背肌」喺電光火石之間化解對方一個實食冇黐牙嘅入球，嗰3下撲救，反應快到神級。身手不凡，身型都係鋼門級，高1.87米，擁有一排朱古力腹肌同人魚線，笑起上嚟仲甜到漏。佢曾經喺瑞士超保持659分鐘不失球，有型有款又有實力，依家先25歲，前途一片光明。上季有多間德甲球會向佢招手，但蜜蜂兵團成功搶到筍嘢，由降班馬弗賴堡簽入呢位瑞士國腳，轉會費450萬歐元，相信不久將來身價會爆升。

朗尼夢遊球場

2016-09-20

曼聯到底咩事呀？連輸3場，仲要30年來首次不敵屈福特呢支中游球隊，如果真係要問點解，首先要問下朗尼大隊長、天價嘅保羅普巴同埋摩連奴搞邊科。網上瘋狂些牙朗尼嘅連串失誤精華短片，可以清楚睇到佢點樣夢遊球場，多次無壓力下犯低級錯誤，全場只有6次向前傳球到位，即係平均15分鐘先有1球！眼見朗尼不在狀態，摩帥依然冇換走佢，其實上場對曼城時已經有需要換走佢；普巴同朗尼一樣慢半拍，拖到成隊波嘅進攻節奏慢吞吞。當初摩帥話朗尼踢番正前鋒就會生猛晒，但要重金買入普巴嘅又係佢，唔通咁快趣話佢哋唔掂咩？咁咪搞到自己兩頭唔到岸，輸波賴冇運，有啲球員又苦無上陣機會囉！

慕遜加柏出門遇貴人

2016-09-15

眾所周知，曼城有大水喉射住，增兵出手闊綽，今季就動用咗2億英鎊收購多名新將。不過，日前歐聯首輪分組賽曼城主場對慕遜加柏，就因為曼徹斯特落傾盆大雨要延期。今次天公大水喉就真係開得太大，開場前半粒鐘，觀眾席全吉，可想而知天氣有幾惡劣，球場慘變水池，場波被迫叫停。雖然賽事延期一天，但係慕遜加柏可謂出門遇貴人，得到曼城嘅同市死敵曼聯相助，借出舊訓練基地俾佢哋練習。慕遜加柏又點會唔明紅魔心意，賽前仲喺社交網站出post多謝曼聯，表示會喺比賽好好咁「報答」佢哋，真係搞鬼！

巴禾首戰幾乎孭鑊

2016-09-13

哥迪奧拿放棄赫特，取而代之嘅前巴塞門神哥迪奧巴禾首度亮相，就已經身負重任出戰曼市打吡。巴禾嘅「精湛」演出，應該嚇到哥帥標晒汗。朗尼喺42分鐘大腳開罰球入禁區，巴禾叻唔切衝咗出去，但接唔實個波，伊巴謙莫域把握機會為曼聯追番球，真係多得巴禾送大禮！跟住接二連三嘅唔知想點同模稜兩可，接連失誤，完美展現出頂級門將嘅反面教材，好彩最終曼城都能夠險勝紅魔，否則孭硬黑鑊。今仗過後，已經有球迷喺網上聲稱「還我赫特」，不過咁快就判巴禾死刑，又有啲唔公道，始終過江龍都要時間適應下。

曼聯失人情味

2016-09-08

有時球會愈大愈出名，反而更利字當頭，連人情味都冇埋！雖然我係曼聯粉絲，但係都對最近一啲事睇唔過眼——移除傳奇領隊畢樹比爵士喺奧脫福包廂嘅座位牌匾，佢嘅家人要由坐包廂改為持有普通門票，因為包廂可以賺錢嘛！對於一個市值7.5億英鎊嘅歐洲頂級球會嚟講，零頭散銀都唔算啦！仲有，今季開始，球會下令停止紅魔球員賽後交換波衫，因為咁又可以慳返筆！如果全隊都交換球衣，每場需花費超過600英鎊，小數怕長計？仲未講完呀，球迷去奧脫福自費參加球場導賞團，都係想更了解曼聯啫，但為咗做多幾團，不惜趕鴨咁趕。球會搞到冇晒人情味，淨係識一味講錢，真係令粉絲失望！

2016-09-06

成功基因可以複製嗎？保羅普巴係一位攻守兼備嘅全能中場球員，身材高大強壯但不失靈活，有腳法又有遠射腳頭，因此成為世界球壇史上轉會費最高球員。咁佢嘅兩位胞兄又如何？原來佢兩個哥哥係雙胞胎，同普巴生得好似樣，不過就再大隻啲，同樣係職業足球員。現年26歲嘅馬迪亞普巴本來効力蘇超巴特里，不過球會冇同佢續約，所以造就荷甲升班馬鹿特丹斯巴達免費簽咗佢。曼聯嘅普巴就天價，佢呢位哥哥就一蚊都唔使，的確係天淵之別；至於另一位哥哥叫費倫丁普巴，現時効力法甲聖伊天。雖然成就各異，但話晒都係足球世家，一定有運動員嘅優良基因，但職業生涯有時都要講天時地利人和！

<
1
2
3
4
5
...
41
>

/136

新聞搜尋



	至

C觀點