足智攻略 - 波神
2016-12-16

印尼去到明晚嘅今屆「東南錦」終章，無論贏或輸已經賺晒口碑，究竟破唔破到宿命，首次捧盃？撇開感情票，我仍會撐「紅白兵團」印尼到底。 足球大賽好睇皆因緊湊、驚喜較密集；入行見證92年丹麥、04年希臘神奇捧歐國盃，以至14年巴西令人驚嚇，主場竟然喺世界盃1比7輸畀德國，都睇到被看淡者，咬住啖氣一路衝，有時好有嗰種神奇力量。今屆「東南錦」好睇，入球多，多得神奇主角之一印尼。 決賽首回合鬥泰國，呢班「紅白兵」又喺主將傷出兼落後一球劣勢下，咬住啖氣反撲得手，兩大熱門越南同泰國竟然都輸過畀佢哋，事前無乜人估到；再鬥泰國復仇成功，我認為佢哋最大進步，係由隊長蘇路沙帶動到隊友，嗰股肯拚肯纏嘅戰術，一往無前嘅精神。印尼弱點係上次作客越南，喺尾段領先緊兼踢多個，反而畏手畏尾，要靠加時再突擊成功，入到決賽。 去到曼谷，慣被睇淡嘅印尼相信唔識，亦都唔會縮住踢保住勝局。反而決心衛冕、以獻給前泰王嘅「戰象」泰國唔只壓力大，可能有啲攰。佢哋自從上月中喺「世盃外」惡鬥澳洲後，呢30幾天要踢8場波，近仗所見唔係段段咁好力；而且睇番「戰象」近兩次入到決賽要作客都先輸，返主場都贏唔到，失掉呢個盃，似乎主隊球員壓力唔細。今場波一定係攻防戰，法定時間當然可繼續博印尼長開嘅入球大，但亦可考慮博「紅白兵」史上首次捧盃。 最後多謝am730讀者支持，有緣再見！ 貼士表 星期六7   冠軍   印尼(3.08) 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。

2016-12-14

一隊係爭第5度封王嘅奪標大熱、一隊係第5度打入決賽嘅神奇球隊，力爭初嘗冠軍滋味；照睇牌面有一段距離，不過印尼不斷製造驚喜，今次再博佢哋喺「東南錦」決賽首回合，坐和望贏。 自從印尼初登場，即能一度力逼泰國終輸2比4後，印象分大增；結果佢哋每次都喺驚濤駭浪下，一路成功闖關，應該係受惠心理壓力不多，輕裝上陣。印尼尤其上仗唔止頂到越南主場圍攻，更靠對手半烏龍波領先；只可惜大賽經驗較少，畀越南踢少個都追到兩球反勝，要戰至加時，客軍先再下一城晉級。 印尼今屆踢咗5場錄得2勝1和2負，當然唔及全勝嘅泰國；但正因「戰象」實力高半班，多休息一天嘅印尼先喺主場出擊，唔會太過保守。雖然主隊呢5場波未試過半場領先，亦預期今戰要先抵住泰國一輪搶攻；但相信印尼尾段會搶回主動，當中利尼柏利近戰越踢越好，會係印尼爭勝關鍵。 泰國一路走來，無風無浪，5戰中有4仗保住零失球。但要留意係，佢哋部份主力，包括王牌射手當達出現疲態；上仗鬥緬甸，喺大局已定下，半場已被教練換走。泰國近5屆4次入決賽得1次捧盃，每戰並一定有當中一個回合輸波；就算佢哋今屆捧盃被看高一線，都識得睇定嚟踢，未必要全力去盡，爭長勝虛名。 今場策略，博半場和局之餘，印尼讓球受讓，下盤當然值得重視。 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。 貼士表 星期三  讓球  印尼受讓半球/一球(1.85)

2016-12-08

泰國太超班，唔只已有兩隻「象腳」踏進決賽，而且斷唔會喺國人面前，古靈精怪。估計今晚一開波，便會撲擊大賽經驗唔多嘅緬甸，極可能係入球騷。 泰國除咗首仗鬥印尼，上半場見到真功夫後；其餘3場半嘅比賽，都好似未出盡全力，已錄得4連勝。「戰象」上次走到仰光鬥緬甸，全場仍佔大部份優勢，尤其喺身材方面，好似大人同細路踢波；但「屈機」嘅泰國，單係王牌射手當達已夠玩殘整條緬甸防線，踢得好輕鬆，主要外圍搓波為主，佔到6成半控球率外，仲有16射9次中框，比對手多近一倍嘅中框射門。 兩軍唔同班次，依家就要睇主隊有無心再炒對手一場。自從泰王普密蓬上月駕崩後，泰國近5戰錄得4勝1和，攻入10球失3球；國家隊一早誓言今屆要衛冕成功，撫慰國人嘅心靈。對上一次「戰象」喺今次曼谷同一場地，對澳洲已如狼似虎，幾乎爆大冷贏埋。雖然翻查近5屆準決賽，大利「入球細」，單係總入球0至2球，就佔咗8成比賽；但喺泰國王牌射手當達要博破紀錄，而且決賽去到下個禮拜中先舉行，唔存在留力嘅需要，到今晚嘅下半場再出高大後備殺手查東登場，真係怕緬甸段段都擋唔住。 緬甸入到4強交代有餘，由去年U20世界盃提升上嚟嘅前鋒科特，今屆叫做幾搶鏡；如果泰國喺大比數領先下，稍後鬆懈，或可造就客軍破蛋亦唔出奇。 貼士表 星期四2  入球大細 [2.5 /3]   泰國大(1.57) 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。

2016-12-07

印尼今屆喺「東南錦」嘅表現，冇雪到硬；難得勇取踢法，令佢哋只差一步就可以繼2010年後再入決賽。上次佢哋喺茂物場波，天殘地缺照贏；今場作客到越南河內，煞食嘅突擊踢法，一樣會搵到食。 爭霸常客越南，落後一球返主場，主攻一方，通常會主觀備受看好，賠率亦必傾斜；但上仗佢哋控球比率無疑佔優，傳送次數較對手多近80次，但實際威脅唔大，尤其幾位前鋒好手包括黎公榮同阮民決，喺禁區入面受制對手嚴密布防，發揮唔到擅長嘅小組互搓入楔。根據ESPN賽後統計，佢哋全場僅得3次中框攻門，比印尼少一半。呢粒早前3戰全勝嘅「金星」，去到準決賽，明顯唔同另一方嘅泰國，未見霸氣持續。 越南坐擁4萬人嘅主場嘅力量，又起碼要贏1比0先能夠率先晉級決賽，必有搶攻決心；但印尼兩位後防主力巴斯納同阿恩圖可以復出，上次串射中堅嘅高大佬柏蘭達入波兼表現唔錯，後防夠人守波。客軍前線唔駛講，王牌射手蘇路沙上次賽前嘔吐冇態依然唔錯，仲有佢最佳拍檔、上仗全場最佳嘅利尼柏利，二人聯手打突擊仲啱踢，要延續對上4仗作客入波(每仗皆入2球)，搶到作客入球不難。 同意老謀深算嘅印尼教練列度所講，越南背負球迷期望，壓力會係較大一方；翻查數據亦大大不利越南晉級，佢哋對上3次喺主場踢4強戰，只錄得2和1負，今場熱而不穩。 貼士表 星期三1  讓球主客和  印尼「+1」勝(2.15) 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。

2016-12-02

兩支「東南錦」超班馬泰國及越南，將以小組首名分途出擊四強，相對嚟講，抖夠嘅泰國主力兵，對住主場嘅緬甸，會較易應付。 睇好「戰象」泰國禮拜日唔會因為先作客會踢得保守。首先，今屆「東南錦」係首設國際足協排名積分，每場贏波都係爭取提升世界排名嘅機會；見到泰國以佢哋仿效巴塞隆拿嘅地面短傳，而自己起名嘅tiki-tok踢法，贏晒3場分組賽，霸氣足之餘亦正實現教練施南望嘅目標，由現在世界排名嘅亞洲中列第19，一路爭入前10位。既然佢哋啱啱嗰場，幾乎全派副選照贏主隊菲律賓；一班主力抖咗成個幾禮拜，轉戰世界排名低佢哋幾十位嘅緬甸，優勢依然。 泰國連續兩場小勝新加坡同菲律賓，都係睇定嚟食，似乎係怕戰事太密令球員消耗太多；難得王牌射手當達及好波之人桑卡辛等有回氣機會，戰術上仲有高大前鋒查東備用，面對較矮細嘅緬甸防線，係最大嘅優勢。主場氣勢唔弱嘅緬甸分組賽輸過畀越南，但恰到馬來西亞同柬埔寨，唔意外但表現亦唔突出；但佢哋拿手嘅小組入滲要破近兩場冇失波嘅泰國，一啲唔易。 泰國近5屆4次出席到準決賽，並喺首回合錄得3勝1和嘅佳績，反映喺呢群嘅超班實力；佢哋要歷史性5度封王兼衛冕成功本賽，為早前駕崩嘅泰王，作最佳致敬，大患睇嚟似係另一邊鬥印尼嘅越南多啲。 貼士表 星期日8   主客和   泰國勝 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。

2016-11-25

估唔到A組咁激去到尾輪要3隊活一隊，今晚兩場波同步直播，個人就會傾向睇「新印」戰多啲；當中印尼「解凍」成功，會攻得起新加坡。 菲律賓貴為主隊連和兩場，有啲失望；最失望係入場觀眾唔多，主場威力稍遜。主隊第一場遇新加坡大巴陣攻極唔入；啱啱嗰場同印尼埋身肉搏，雙方合共炮製33次攻門18次中框言和，連電視台幾位著名評述員，包括前新加坡教練及泰國助教，都話場波好精彩，值得多啲人入場支持主隊。 主隊逼和印尼，睇到尾嗰幾分鐘，比對手心急博首勝；但喺今場鬥心意難明嘅泰國，唔認為泰國會留力。事關「戰象」篤定小組首名後，要隔成9天先有波打；反而擔心會係近期加埋和澳洲嗰場，班波搏得幾多。但泰兵小勝新加坡嗰場，係睇定嚟食，今場鬥以往格食格嘅菲律賓，打突擊會更有威脅，個人只能祝主隊好運。 印尼越踢越好，第一場中段一度反壓泰國，啱啱嗰場兩度領先主隊，由8號仔利尼柏利同7號仔兼隊長蘇路沙帶動，攻勢有紋有路，比起主隊菲律賓靠兩個死球入波，瀟洒得多。印尼自今年9月起6場波攻入咗11球，今晚要主攻博出線，班波被禁賽一年後，「解凍」後不怕勤拼；相反新加坡連續兩場泊大巴陣，上仗臨尾香，好洩氣，今晚要反客為主，唔容易。 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。 貼士表 星期五3    主客和    印尼勝(2.25 )

2016-11-23

睇過首輪比賽後，越南呢粒「金星」表現對辦；佢哋首仗能夠抵得住主隊緬甸嘅澎湃氣勢贏波，一啲都唔簡單，今天早場遇上屆喺4強踢佢哋出局嘅「馬來虎」馬來西亞，唔會留手。 大賽賽程緊湊，如果唔係為走線要估戰意，上仗參考指數極高；何況越南今場係仇人見面，份外眼紅。兩隊上仗一如外界預期贏波，但係大馬對住靠附加賽晉級嘅柬埔寨，贏得辛苦好多。喺炎熱天氣下踢日場，大馬後衛先甩鬚，裝越位失敗，任由對手單刀射入先開紀錄；結果防線一再犯錯下，最後靠單天保至尊嘅35歲射手安利，比賽後段連入兩球，做贏波英雄。 呢場波，除咗令「馬來虎」耗力甚巨，亦睇到早前「四老」包括正、副隊長沙菲克及埃迪爾查夫安退隊後，球隊問題浮現。新軍接連僅勝巴布亞新畿內亞及上仗的柬埔寨，實情未受考驗。 菲律賓那邊主場冷清，B組呢邊緬甸場內氣氛正得多，越南全場射門次數不及對手但質素好得多，進攻組織有紋有路，被扳平後能迅速靠反擊奠勝，抗壓力強；前鋒黎公榮卡士夠外，仲有位被礜為新世代嘅射手阮文決，火力十足。 「馬來虎」對上4次鬥「金星」越南，僅上屆準決賽作客大勝兼踢手出局，但其餘3仗全敗；今天越南肯有耐性，等對手下半場體力下降才加壓，要捋「虎」鬚不難。    貼士表 星期三2   主客和  越南勝(1.62) 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。

2016-11-22

英超摩連奴怕「大巴」陣，估唔到喺東南亞足球錦標賽首天嘅主隊菲律賓，都遇到同樣煩惱；不過今晚對住「未完全解凍」嘅印尼，可以信多主隊一次。 睇過A組首輪兩場直播後，主隊「流浪犬」無疑令人有啲失望；首先以為現場有大量主隊嘅捧場客，結果埋單計唔夠5千觀眾，氣氛略遜主場威力會減。場地方面，頭場泰國輕描淡寫大炒印尼時，雨勢已越落越密；結果尾場、多用地面進攻嘅主隊，遇上較爛嘅場地，兼對手早段因有球員動粗被逐，轉踢「大巴」陣下，進攻陷於困局。「流浪犬」全場錄得20次攻門5次中框，但嚴格講，成場波最搶鏡只喺有德國血統嘅17號仔舒洛克。 不過既然賽事中出現多項變數，可以多給菲律賓一次機會。一來信佢哋教練杜利調陣果敢，上仗半場已換入嘅邁基沙，幾乎喺補時絕殺對手立大功；二來「東南錦」一向大利主隊，過去3屆6支主隊，只有上屆嘅新加坡喺分組賽出局；主隊近3屆計，分組賽勝率高逾7成。 最重要，睇過印尼後衛上仗對泰國，好客氣咁不斷向對手狂送禮，相信同佢哋近年少踢國際賽，未完全「解凍」有關；既然客軍後防唔穩，但前面又有個好搶眼嘅7號仔兼隊長蘇路沙，呢場波，博菲律賓主勝開齋之餘，大手交易亦可以預見。  貼士表 星期二2 主客和 菲律賓勝(1.65) 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。

2016-11-18

好高興第一次有機會同am730嘅球迷，全程傾吓「東南錦」。長話短說，我會建議大家留意有「流浪狗」之稱嘅菲律賓，明天喺主場好大機會打響頭炮，喺2萬多球迷面前威番鋪。 唔好以為地區性嘅賽事唔好睇、重要性低；喺亞洲，呢類波不嬲好受注目，正如澳洲職業聯賽喺香港好受歡迎一樣。事關開波時間正，「東南錦」賽制特別，又全程有公仔箱直播，加埋競爭一向激烈，仲剛升格為國際A級賽事；難怪著名體育網站FOX SPORTS，剛評選呢個賽事重要過晒亞洲區內嘅東亞盃、南亞盃同海灣盃。 無真正睇過，唔敢講菲律賓有幾勁，但今屆睇頭會足；近年入咗一啲外來兵 (佢哋唔叫歸化，只叫雙重國籍)，近3屆呢個賽事都入到4強；對比以前頭21場輸足19場，已知成績明顯進步。中場有兩個德國出生嘅好手包括舒洛克及奧特孭重飛，世界盃外圍賽出唔到線但主場贏過北韓同巴林已唔講得笑；反而新加坡近期趺Watt，上屆2014年喺首圈出局，今年夏天起踢友賽不斷輸，包括作客香港吞兩蛋，只係啱啱最後一場熱身賽，1球氣走作客嘅柬埔寨，信唔過。 有「流浪狗」之稱嘅菲律賓，喺今屆唔會係下風波(underdogs)，個人估計好有機會陪球迷玩到下月中，歷史性殺入決賽也不奇。 貼士表 星期六8    主客和    菲律賓勝 個人簡介 資深體育傳媒人，曾任《蘋果日報》體育版主管十多年，擅於賽前搜集各大小球賽軍情，結合賠率分析及比賽數據，為球迷提供另一睇波視野。

/136



C觀點

中原城市領先指數

廚神

旅遊