(TV) Drama Queen -
2016-05-26

本周《GoT》迷同聲一哭,Hodor今季沒甚出場機會,今集多點戲份,就蒙主寵召,狠心的編劇殺他不特止,連自小跟Bran一起長大的direwolf Summer也一併幹掉,以後找誰孭住Bran通山跑?看外國網站消息,寫死Hodor是作者George R.R. Martin首肯的,既然Hodor歷史任務已完,劇迷除了哭同哀悼,惟有苦中作樂,將Hodor變成貼紙,貼在電梯的開門掣上,永遠幫大家hold the door。   今集透露的信息量龐大,首先是Hodor的名字由來,他的一生使命就是hold the door,等Bran可以從White Walkers手中逃脫;而White Walkers這班雪地喪屍兵團,是因為Children of the Forest為了抵禦人類的侵略,運用魔法令到他們變成不死身;所以Westeros諸國念茲在茲的Winter is Coming,在北方建城牆The Wall,組織防禦軍The Night’s Watch,一切都原是人類作的孽。   Night’s King造型有氣勢 White Walkers大佬Night’s King今集雖然追殺Bran,導致Hodor及Summer魂歸天國,但Bran經已接棒成為新任Three-eyed Raven,能夠穿梭時空,不用擔心他的安危;反而我覺得Night’s King的造型好細緻,直頭型到掉渣,氣勢懾人到不得了,這樣才是《GoT》應有的big villain嘛。照這樣看來,Jon Snow率軍奪回Winterfell,Night’s Watch無大將,White Walkers將直搗Castle Black再南下,兩軍有可能會在Winterfell短兵相接,無論如何,為了做北方霸主,不惜弒父殺母的陰險小人Ramsay,死期不遠了。 上集浴火重生的龍媽Daenerys,今集著墨不多,只知遭她流放多次、忠心耿耿的Jorah,終於重新得到她的寬恕及重用;而南北兩大陣營對壘之勢已逐漸成形,Jon那邊有Ser Davos及Littlefinger,Daenerys則有Tyrion及Lord Varys獻計,兩者都有紅衣魔法女加持,我好期待Jon跟Daenerys的對手戲,一個是ice一個是fire,合成就是原著《A Song of Ice and Fire》了。 不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

2016-05-20

慢煮《Game of Thrones》(《GoT》)的第三集後,第六季第四集終於看到些少苗頭了,今集最大的驚喜當然係龍媽Daenerys,你以為Jon Snow死後復活已經係《GoT》眾多不思議中之一,龍媽浴火後重生(again),那一刻又叫觀眾我看得張口結舌,善忘的我霎時又忘了,Daenerys在第一季生龍B時經已火裡來火裡去,我以為最適合龍媽的職業不是皇后,而應該是消防員,literally speaking,她是真能拯救萬民於水深火熱當中,還要是千秋萬世嗰隻。   Daenerys今集又成功地從Dothraki 寡婦禁閉營中扭轉局面,將成班Kahls一鑊煮熟,Dothraki上千過萬的戰士及民眾又盡歸旗下,吐盡之前給Kahls羞辱的烏氣;作為她新任國事顧問的Tyrion亦沒閒著,以一貫出色的外交手段為她在Meereen收拾殘局,一個善戰、一個精於謀略,雙劍合璧,Westeros諸君真係有得震冇得瞓。   困境中成長 北方嚴寒的Castle Black難得吹來一陣暖風,千辛萬苦從Ramsay手中逃脫的Sansa,終於爬到去The Wall,跟只有一半血緣的哥哥Jon Snow重聚,查實Sansa未落難之前,全家最狗眼看人低的要算是她,一路跟Jon都很疏離,但歷經劫難後,Sansa長大了,不再是榮華富貴的freerider,二人重逢的一刻,千頭萬緒,一個緊緊擁抱,看得人同樣激動。Jon雖然厭戰,但得知幼弟Rickon又落入Ramsay手中,家園仍淪陷,拉攏Wildings聯線率軍攻打Winterfell之期不遠了。   最好的結局  估計我會講今季《GoT》好多次,甚至集集都會recap也不奇,因為那種距離end game的感覺愈來愈近了,在中土各國諸君各懷鬼胎,對Iron Throne虎視眈眈;Jon Snow死後復生被紅衣女Melisandre認定係he’s the one,將會一統天下;但下集紅衣女的同僚,另一位同樣擁有魔法的紅衣女Kinvara將會首次出現,並跟Tyrion結盟,皆因The Lord of Light認定Daenerys才是the chosen one,統領Westeros。千萬不要忘記還有The Wall後面的一班幽靈White Walkers伺機而動,Bran的通靈能力,會在這一方面產生好大作用。還有Arya終於重見光明,在我來講,Stark一家的血海深仇能否得報,比起Iron Throne寶座花落誰家,才是end中之end。 (TV) Drama Queen 不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

2016-05-13

因為睇咗《美國隊長3:英雄內戰》,勾番起條癮將擺埋一邊好耐嘅《Marvel’s Agent of S.H.I.E.L.D.》(AoS)拎番出嚟煲,因為喺Marvel改編嘅電視劇當中,我覺得跟MCU(Marvel Cinematic Universe)最有呼應嘅應該係呢套,雖然AoS喺咁多套Marvel電視劇中,算係拍得最平平無奇的一齣,但就人類對超人類那種恐懼及仇恨的描繪,卻最深刻及緊扣題旨。   《美3》中所謂內戰,其實是建基於人類面對超人類(enhanced people)的無助及無力感,從而想以全球制約嘅方式,將復仇者聯盟納入建制作出規管,由此衍生親建制(IronMan)及反建制(美國隊長)嘅對立,但電影卻始終將矛盾淡化成兄弟情義及個人私怨咁處理,IronMan同美國隊長打生打死,最終都好似只係為咗Bucky,將深層原因略過唔提。   對等陣營間的矛盾 反而拍到第三季嘅AoS,就寫到人類vs超人類之間嘅矛盾及對立愈來愈入肉,劇中稱呼班超人類做inhuman,相比電影中嘅enhanced people,明顯更帶貶義;S.H.I.E.L.D雖然得到美國總統嘅認同,係一隊人類同超人類對付外來侵略者(例如Hydra)嘅聯合陣線,但由於民眾對超人類嘅恐懼及不信任,由始至終都只能係black op,暗中行事;劇集亦發展到有人類仇視inhuman嘅hate group「Watchdog」,由網上嘅口誅筆伐,進展到武裝起義;呢一切都喺電視劇中描繪得更為深刻同立體。   左右翼思潮大戰 AoS有一幕我覺得好到肉,講到女主角Daisy面對Watchdog的進擊,想以暴易暴,以自己嘅超能力威逼對方供出同黨下落,但一班同僚對佢嘅行為十分反感,認為咁樣做即係認同以仇恨及暴力解決問題,落得跟敵人一樣嘅思維,就算打贏咗亦無意義;睇到呢一度我覺得非常大愛左膠,簡直同現今世界左右翼思潮大戰接軌,好似以Donald Trump為首嗰類族群仇恨及歧視言論嘅右派主張大有市場,歐洲排外嘅反難民浪潮,甚至香港本土派鼓吹建國嘅思維,都係under相同嘅脈絡,所以我話AoS相比電影版《美3》,跟現世更加relevant,唔係亂吹㗎! (TV) Drama Queen 不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

2016-05-05

讀者們即管鬧我呃稿費吧,上篇才寫完《Game of Thrones》(GoT)回歸第一集,今個禮拜又來?!一日最衰都係作者George R. R. Martin,將Winterfell全族男丁整到死嘅死、跛嘅跛,連私生子都唔放過,我以為Jon Snow會「死」多幾集先讓佢重生,點知第二集就讓他翻生了,咁大件事,點忍得住唔寫?要罵我劇透,不如罵晒成個互聯網。   草草翻生息眾怒 硬係覺得HBO同R. R.係怕了全球視迷暴動,不得已急急在第二集就讓Jon翻生,仲要係推到全集最尾嗰刻先醒,我呢種冇水平嘅劇迷,第一時間就拍枱拍凳,又要人等足一個禮拜,你叫我忍住儲埋幾集先一次過煲咩?除非完全唔上網,否則俾全世界劇透到暈,根本冇可能等。   幼子幻象愛回家 查實我最喜愛的《GoT》角色,根本就唔係Jon Snow,但睇足5季,仲要係呢種位列仙班嘅劇集,就算是不討喜的角色都會grow on you,何況,衰衰哋佢都算係男主角,點樣都唔會想佢死;但今集我最開心係見到Winterfell幼子Bran喺佢自己的vision當中,返回家園見到仍是少年的爸爸Ned Stark,仲有一直照顧他的少年Hodor,幻象中的Bran已是「亭亭玉立」美少年,仲要好哋哋冇跛到,雖然明知是幻象,有得FF一下都好。而且呢條線拉回本劇最初,唔知會對日後劇情進展有何深意,如果可以回溯幾集,老爸Ned Stark同佢老婆Catelyn的戲分就好了,好懷念呢兩公婆呀。   各線平均發展 今集劇情各線都有發展,乞人憎的Ramsay弒父殺母,連初生細佬都不放過,基本上唔使等天收,係等睇作者同編劇點寫死佢,我認為佢會死得好慘,隨時慘過Joffrey而有之;Tyrion放生龍媽Daenerys兩隻龍仔,唔知係咪想靠佢哋搵番阿媽返嚟;Arya出現短短兩分鐘叫做check in咗交代下;仲有,另一家族Ironborn成季冇蒲過頭,今集出現番,應該是作為Theon回家的伏線。唔知下個禮拜仲會唔會寫《GoT》,應該會停一停啩,除非Jon Snow又「死」過嘅啫。 (TV) Drama Queen~不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

2016-04-29

 《GoT》第6季回歸,其實冇人會expect回歸第一集劇情就有大逆轉吧,Jon Snow依然死翹翹,心急如焚想睇他死過翻生的朋友仍然要等;Arya Stark上季盲了,今季依然盲,仲淪落街頭行乞,睇見心都傷,全劇我最愛的角色要算是她了;好在Sansa Stark仍然從賤人Ramsay手中逃脫;諗起Winterfell家族成員個個命途多舛,個心就好實。   看《GoT》看得很有心得的大有人在,我還是少在這裡班門弄斧,因為由第一季追到依家,我對各國諸侯地理位置同人物關係還是亂七八糟摸唔清,又「的」唔起心肝拿原著來「咪」,好在一直都忍住唔搵spoiler來睇,對於熟讀小說又追劇的劇迷,常常拿劇情跟小說不符的地方找碴子,兼看得一肚氣的情況,我就感受唔到;有時做個不明就裡的劇迷,對劇組一百巴仙的信任,也是一種福氣(為自己懶惰開脫)。   等待黑魔法紅衣女 今季終於拍到原著作者George R. R. Martin寫唔切,所以第六季打後就沒有原著小說可跟了,因此Jon Snow到底會否復生、點樣復生,就搞到全球《GoT》迷急到如熱鍋上的螞蟻,恨不得回歸第一集就要有個答案;其實大家都幾乎肯定他會死過翻生係必然的事,仲要有暗黑魔法嘅紅衣女Melisandre喺左近,就看她怎樣施展black magic將Jon Snow來回地獄又折返人間,呢點本應無誤。   美豔女角是婆婆 今集既然叫得做「The Red Woman」,焦點就在Melisandre身上,最後一幕她例牌一脫,《GoT》出晒名集集有肉睇,男女不拘燕瘦環肥,點知除下頸上紅寶石choker現真身,竟是又老又皺老嫗一名,叫劇迷大吃一驚,因為小說中從未透露過紅衣女來歷及其法力何來,第一集這個大揭秘,明顯會是打後其中一條主線,會怎play out,就看兩位編劇了。 不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

2016-04-22

係,家陣咁多有線(HBO、AMC)同網上串流(Netflix、Amazon)頻道,我仲竟然每周定時追看大台(ABC)電視劇,仲要唔只呢齣,仲有《Scandal》(五季)同做完冇耐嘅《How To Get Away With Murder》(兩季),共通點?都係Shonda Rhimes出品,但最服係《Grey’s Anatomy》(GA),拍到12季仍然有貨,相反另外兩齣,愈來愈亂東拉西扯,再咁拍落去不如見好就收。 《GA》最好睇嘅地方唔係一班醫生亂糟糟嘅感情線,而係當佢集中講單一議題,尤其是有關醫生同醫德嘅問題,嗰份矛盾張力就相當精采。   人命與醫德的抉擇 上周一連兩集講一單撞車意外,一家五口送院,父親重傷昏迷、懷孕的母親初時情況穩定、三名年幼子女只受輕傷無大礙;咁啱兒科那邊有位病童唔見咗,兒科醫生Alex擔心病童遭有躁狂傾向嘅爸爸擄走,堅持要啟動Code Pink,即係封鎖醫院各主要通道,唔俾躁狂爸走甩。Code Pink呢個機制,主要係針對失蹤病童而設,我未聽過亦唔知香港醫院有冇,但一啟動非同小可,因為唔只醫院各出入口被封,連醫院內各層上落的通道,包括電梯都要停,若有情況突然轉壞嘅病人要救,隨時困(車立),後果不堪設想。 呢一家五口嘅媽媽就喺此時出事,正由急症室送去婦產科作詳細檢查,本來穩定嘅情況突然變得hypertensive(孕婦高血壓好易突然死亡),但全院lockdown上又上唔到婦產科,落又落唔返急症室,當時只有實習醫生Ben同醫科學生DeLuca在場,喺無路可走嘅情況下,Ben惟有即時決定開肚,諗住救得一個得一個。 弊就弊在事後翻查閉路電視,喺Ben千鈞一髮落刀前嗰一秒,lockdown解除,部lift開番,但Ben仍然下刀將未足月嘅BB拎出嚟,最終導致一屍兩命。到底嗰一刻Ben只係一心想救人,定係對自己醫術太自負,想表現自己的能力?   專業操守與親情兩難全 呢兩集好睇在,除了涉及醫術及醫德的矛盾,還有人物關係錯綜複雜,Ben係醫院實習醫生,但同時係該院外科主任Bailey嘅老公,Bailey作為chief,一方面要秉公調查下屬有否違規,另一方面,自己枕邊人是否一個狂妄自大、有違醫德的人,對她的困擾更大。她指派一個由3位院內資深醫生成立的小組徹查,雖然小組結論是Ben沒違醫德,但Bailey最終以停職6個月作為懲處,Ben認為等於判他死刑,除了事業/學業無法追回,婚姻亦面臨破裂。這個半小時還有好多精采細節無法一一在此覆述,只係想講,一套劇可以拍到12季,仍然時不時有如此神來時刻;但同一位製作人旗下另外兩套作品,一個去到第五季、一個只是第二季,卻有後勁不繼情況,有時創作力量同幻想嗰種無定向法,點只嚇你一跳,簡直好難捉摸呀! (TV) Drama Queen 不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

2016-04-19

上周《The Walking》第六季完,緊接住就來《Fear The Walking Dead》第二季,下個禮拜《Game of Thrones》回歸,趁住呢個禮拜新劇少少哋,先看了這個Hulu推出的《The Path》,完全不知是甚麼來頭,但衝著有Aaron Paul(《Breaking Bad》)及Hugh Dancy(《Hannibal》)兩劇要角擔正,女主角Michelle Monaghan(《True Detective》、電影《Source Code》、《Gone Baby Gone》)的演技也出色,主要角色都係我鍾意嘅演員,斷估衰不到哪裡去吧,就睇開了個頭。 看了三集,這劇原來是講邪教的,男主角Eddie(Aaron Paul飾)跟女主角Sarah(Michelle Monaghan飾)是一對夫婦,二人均是一個名為Meyerist Movement組織的成員,最高領導人/教主Meyer於秘魯「靈修」,暫時就由Hugh Dancy飾演的Cal負責組織日常運作,這個組織認為透過釋放自己,讓自己走進光明(into the light),世界就會變得和平同美好。   裝出來的偽善宗教 所有宗教都話導人向善㗎啦,唔係咁講點昆你落疊,當Cal對傳媒強調Meyerist唔係宗教,而是運動,生怕給人標籤為邪教;個組織運作又不透明,將信徒分晒等級,例如L6的人不能知L7以上的訊息;Eddie私下開始對信仰產生懷疑,一次在新人分享會中,稍為有少少眼神遊離,就俾Cal「親切」慰問及「關注」;老婆Sarah仲妄想到以為Eddie有外遇,逼佢自閉14日,仲要由組織內高級的「神職」人員同佢做檢討;橫睇掂睇都唔似一個正常的宗教團體。講講吓係咪好似我哋鄰近大國一啲做法呢,被失蹤之後出番嚟仲要讚揚國家嘅開明同進步。   觀賞了 解盲從魔咒 其實宗教同政治真係有好多共通點,尤其對於狂熱分子而言,佢哋信奉嘅先係唯一真理,開住一張通往理想國度的期票,唔信嘅就係非我族類,排他性強到極點;正因為呢種盲從同狂熱遺禍深遠,更加要深入了解呢種宗教/政治狂熱組織的運作,先有可能拆解這種盲從的魔咒。我估繼續追看呢套劇的原動力,或多或少都有「他山之石、可以攻玉」這個理由啩! 不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

2016-04-08

本來想寫個新劇《The Path》,但周日晚第六季大結局的《The Walking Dead》(《TWD》)實在太TMD了,用上拖字訣,將本來15分鐘講得完的情節,拖夠足足1小時有多,今季要打嘅大佬Negan,仲要到最後5、6分鐘先現身,得嗰幾分鐘airtime都可以叫人覺得佢講嘢又長又噚,好哋哋原本精采的一季就給這個結局破壞殆盡,都算係TMD了不起,過咗兩日諗番都仍然㷫㷫哋。   呢集雙線發展,Carol又發癲唔想再殺戮,再一次出走,武憎Morgan自告奮勇去搵佢返嚟,以為呢條線經已噚到唔想睇;Rick因為Maggie胎動痛不欲生,惟有冒險都要出動去Hilltop搵碩果僅存嗰位醫生,途中幾條可行路線都俾Saviors攔截,三番四次無功而退,編劇好似想慢慢堆砌最後對決嗰下爆發劇力,但睇到第三轉我經已奄悶到想熄咗個電視機,仲有十幾分鐘,季尾大結局唔通唔睇埋佢咩,明知呢集係伏到不堪都無計。    敵人戰鬥力臨尾升呢 Saviors呢幫敵人明明喺季中都仲係小菜一碟,無情情唔知點解喺最尾一集又疊友、又多軍火、又有計謀,將戰鬥力強橫的Daryl、Michonne同Glenn等都生擒,最後連阿Rick和Abraham等都一網打盡,搞到Rick眾人一個二個跪地面臨犬決咁滯,點解敵人勁咗咁多,由季中到季尾都毫無鋪墊,突然間光速升呢,衰啲講句,連觀眾都好似俾編劇過咗一棟咁樣,邊有說服力呀!    欠深刻描述的煩膠角色 再講《TWD》季季都總有一個邪惡大佬要打,今季這個endgame簡直係揼波鐘,呢位big villain Negan(Jeffrey Dean Morgan飾)搞到最尾幾分鐘先出現,見到Jeffrey現身我就心感不妙,呢位演員演技唔係唔好,但佢算係荷李活大串星,嗰頭喺《The Good Wife》做女主角嘅love interest,呢頭就喺《TWD》出現,感覺選角方面有點例牌。但佢演出係恰如其份嘅,可惜編劇寫俾佢嘅對白就相當膚淺,係嗰種一朝得志水鬼升城隍嘅小混混層次,一啲都無嗰種喜怒不形於色的心狠手辣,見佢用盡幾分鐘去奚落嘲笑Rick等人,我冇寒意只有不耐煩,直情想起《西遊記》中飾演唐三藏嘅羅家英咁,想大巴大巴咁星埋去。    結尾例牌留白鋪伏線 至於最後Negan會揀咗邊位來兜槌揼死,原著漫畫經已寫咗,編劇會唔會跟足暫時冇人知,呢集大結局專登留番呢條尾,擺明想劇迷講足半年keep住個勢,呢種stalling tactic實在叫人厭倦,講真又唔係頭一兩季,會睇嘅始終會睇,仲搞呢啲噱頭手段,當劇迷智障呀! (TV) Drama Queen 不學無術以看電影電視為樂,第一套煲的美劇係《Friends》,以有涯之生逐無涯煲劇之路,一去無回頭,從此跟CCTVB師奶婆媽劇講再見。  FB:www.facebook.com/tvdramaqueen Email: tvdramaqueen2016@gmail.com

/136



C觀點

中原城市領先指數

廚神

旅遊