A Chick’s View on Menswear - Yumi Ng
2016-03-21

有位新相識朋友問我,信唔信KOL (Key Opinion Leader)所推介的東西,他有項新產品,不想只循傳統賣廣告的方式推廣,正在盤算該如何作宣傳;當時我答我自己不信,但肯定有不少人會信,或不抗拒這種宣傳手法,如果無用,點會有咁多牌子樂此不疲送衫送產品俾班KOL? 文:Yumi@iamyumi@gmail.com 上周美國Federal Trade Commission作出一項裁決,裁定百貨公司Lord & Taylor,去年就宣傳新季系列一事上蓄意隱瞞公眾,事緣L&T將當中一款裙子送給50位KOL,著她們同一時段內post上個人Instagram,而每位KOL都獲得1千至4千美元不等的報酬;同一時間,Lord & Taylor亦與時裝網站Nylon合作推廣,以Nylon編輯個人身份推介這個系列。整個宣傳階段,無論是品牌、牽涉的傳媒以致全部50位KOL,都無透露這是一個有酬的操作。FTC消費者權益總監Jessica Rich接受訪問時就明確表示,消費者獲取產品資訊同時,有權知道他們看的是不是一個廣告。   送禮試用的推介 以前品牌送產品給傳媒試用,現在就KOL及傳媒都一律送,其實是有必要的;我不是為自己撇清,好像化妝護膚品、手機,就算係一支洗潔精,無試過又如何能作推介?依家個問題不是免費試用,而係收咗錢而無披露這個事實,今次事件嘅黑與白當然好清楚,L&T以至Nylon雙方都無從抵賴;不過作為傳媒人,我只可以講灰色地帶係非常多,例如某個品牌係大客仔,每年都有一定數目的廣告費投放,咁品牌PR一次半次叫你幫幫手推一推某件產品,算唔算間接有酬?每日都有海量的新品推出,我話每一件都係真心推介,你都唔信喇。   媒體權力與責任  對於傳統媒體,還有編採內容是否獨立自主這條線可守,也有一定的專業操守要meet,因為傳媒乃第四權,乃公眾以至社會賦予嘅公權力,用以監察政府,有權在手就有濫權的可能,所以反過來接受番公眾對我哋嘅監察係好應該;但對於社交媒體上的KOL甚或everybody,有一個說法是,大家都係消費者,又無人逼你follow邊個或信邊個,要求KOL們喺post文時披露有冇收受利益,會否侵犯私隱?但我想講,當你有一定嘅社會影響力,表達嘅內容又set public的話,以私隱作理由來擋架,會唔會弱咗啲?   收錢推Post欠公信力 一開首我就答我朋友,我個人不信KOL,其他人信不信,我管不著。KOL們的影響力(或公信力),好大程度取決於他們每人的個別行為及操守,呢條線既然咁如虛似幻、似有還無,點信得落?正如L&T此案,涉案的其中兩位KOL喺事後接受電視台訪問都提到,雖然她們沒披露收受利益,但二人都堅稱,深信自己的followers都知她們收了報酬才推介,而且收錢推post已是公開的秘密,覺得沒甚大不了,言下之意,就係信嗰個先係傻仔。 A Chick’s View on Menswear 擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-03-14

人紅自然多是非。美國時裝網站JC Report主編Jason Campbell最近就提出質疑,對身兼Balenciaga及Vetements創作總監的Demna Gvasalia,這位被稱為掀起時裝革命的焦點紅人,於兩個牌子的16秋冬時裝騷中都起用全白人模特兒,認為Gvasalia與今日時裝界重視種族多元的現實脫節,令他很不安。 過份政治正確 美國人對種族膚色的敏感度,的確比其他國家的人高,但有時我會諗,這種政治正確,會唔會間中矯枉過正咗?近年時裝界在回應多元文化方面,都經已積極咗好多,基本上所有大牌都會起用不同種族膚色的模特兒(雖然仍以白人佔多數);也有學者(加拿大Ryerson University的Dr. Ben Barry)研究指出,時裝品牌起用不同膚色的模特兒,有助品牌業績增長,實例之一是因為黑人模特兒出現的比例較低,所以一旦品牌用上黑人model作廣告代言,黑人女性傾向消費該品牌的比例是白人女性的1.5倍,相反,白人女性對品牌起用甚麼膚色的模特兒,則無任何偏好。   不完美無障礙 除了種族多元,還有身形、年紀。法國時裝工會去年已禁止起用過瘦的模特兒,美國內衣牌子Aerie專登起用plus-size model,成功帶起話題;去年Celine的廣告文案,都分別起用黑人女模及年屆81歲的美國女作家Joan Didion,以示尊重多元文化的決心。今時今日,還進展到起用一些擺明不完美的模特兒,例如患有俗稱「白蝕症」的加拿大模特兒Winnie Harlow,旋風式進佔紐約及倫敦的天橋,而Yeezy Season 3的天橋上,亦出現一位全臉全身都是雀斑的男模Ralph Souffrant。   擁抱多元也是商機 這些都是時裝界對現今社會重視多元價值的回應,當然也有好些品牌仍然落後於形勢,近的有Dolce & Gabbana一對「奴隸」涼鞋的「關公」災難,遠的是Valentino、Prada等大牌子也常遭批評起用清一色白人模特兒(現在不會了);但擁抱多元價值除了是政治正確,也是商機。   品牌雙贏局面 幾年前,中國成為時裝界新興市場,中國臉孔如劉雯、孫菲菲變得炙手可熱;今日則是街頭型格入侵高級時裝界:Gvasalia被認為是顛覆時裝界領軍人物,紐約街牌Supreme進佔巴黎,adidas同Nike均業績亮麗平分秋色……起用不同種族、年齡、身形,甚至不完美的模特兒,都叫消費者,即係平凡人如你我,更容易與品牌起共鳴;我唔係想下下都咁cynical,但擁抱多元是大勢所趨,品牌順勢而行,既得美名,又有實利,簡直是win win,何樂而不為? 文:Yumi Ng@iamyumi@gmail.com A Chick’s View on Menswear 擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-03-07

時裝界好似集體感染咗一隻新型流感,呢隻流感叫Vetements。可能是人性使然,跟紅頂白是常態吧,這個近兩季爆紅的巴黎牌子,忽然間平地一聲雷,去年秋冬系列才是品牌第二季,但已給全世界的時尚名人、時裝編輯撞衫撞到暈,品牌背後的大腦Demna Gvasalia,又獲委任為Balenciaga創作總監,聲勢更是如虎添翼。但奇怪地,我係免疫嘅。文:Yumi Ng@iamyumi@gmail.com 一窩蜂趕潮流 對這個牌子不感冒,係因為最初認識這個牌子,係從排山倒海嘅時裝周街拍而來,明明時裝人最鍾意特立獨行,係要玩鶴立雞群的,點解一個二個都唔介意撞衫,一窩蜂咁係都要著呢個牌子?最怕千人一面呢期興一定要著呢樣或拎嗰樣,之前係女人都要拎個Chanel 2.55手袋,而家則不分男女都要搶到對Kanye West嘅Yeezy先安樂,對於呢啲hype,一早先入為主有戒心。 但當了解過Vetements創立嘅原意之後,覺得又幾值得buy喎,其實這個牌子並唔係一人品牌,是一個集體創作單位,主事人Demna Gvasalia同一班志同道合,都係喺時裝界工作嘅朋友,因為覺得自己份工唔好玩,創作上有這樣或那樣嘅限制,個人美學觀點無從發揮,與其屈屈埋埋,不如聚埋一齊做啲嘢,啲衫賣唔賣得係其次,最緊要自己開心。   時裝大發現 冇乜商業考慮下嘅作品,風格當然可以自由奔放好多,Vetements街頭披搭感強,衣服比例誇張,襯法凌亂不依章法,流行音樂等文化符號,都「冚把冷」混種變裝嵌入系列中,更加沒有明確性別分野,呢份反叛破格,難怪會給時裝界譽為大發現,甚至稱之為革命。 有話「男人不壞、女人不愛」,時裝界亦特別寵愛壞孩子,Gaultier、McQueen、Galliano等都係表表者,但Vetements實在有太多前人影子,最明顯當然係永遠嘅先行者Martin Margiela,Gvasalia喺Maison Martin Margiela工作過8年,佢話冇深受啟發你都唔信啦;嗰啲大墊膊、oversize怪裁恤衫乾濕褸,實在好難叫我唔聯想到「罵治」;至於鉸剪功力,Thom Browne啲cut亦犀飛利到不行。「罵治」一去,概念性時裝大軍就凋零?其實玲姐(Rei Kawakubo)仲喺度,不過跟紅頂白、貪新忘舊係人性,時裝不過係其中一塊放大鏡了罷。 A Chick’s View on Menswear Yumi Ng~擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-02-29

灰姑娘飛上枝頭變鳳凰的故事,古今中外都多到數唔清,千億新抱徐子淇係萬千港女偶像(好似係),連電影都有套叫《嫁個有錢人》;咁嫁個有錢人係咪好盞我唔知,但著到似個有錢人就麻麻哋fashion forward嘞,都係嗰句,純粹個人意見,不喜勿插呀。 撰文:Yumi Ng@iamyumi@gmail.com 點解咁講?紐約一間專門針對奢侈品市場的市場研究公司Luxury Institute,每年都會發布奢侈品指數調查報告 Luxury Brands Status Index(LBSI),剛發表了2016年最新數據,當中42個品牌獲確認為高級時尚男裝品牌,愛馬仕、LV這些家傳戶曉名字固然入圍,一些向來被認為男裝好強的牌子,好似Thom Browne、Tom Ford等亦喺名單之中。   出名未必賣得 但最出名不等於最受歡迎。報告訪問咗3,900位來自七個國家(英、美、法、德、中國、日本及意大利)、年薪起碼過百萬嘅男士,佢哋買得最多嘅五大時裝品牌,依次為Calvin Klein、Ralph Lauren、Hugo Boss、Burberry及Giorgio Armani。我對統計學一竅不通,這個sampling size似乎就唔係好夠代表性;不過,聽古唔好駁古,就咁睇呢個結果,巴黎品牌五大不入,一向受時裝傳媒追捧嘅Saint Laurent、Givenchy等,原來唔係最sell得,連呢兩季風風火火嘅Gucci、Loewe亦冇份,都幾叫人意外。   「有米男」的品味 再睇睇品牌嘅成績表。我記憶中Saint Laurent、Gucci、Loewe等牌子,自從換咗創作總監後,品牌形象煥然一新,連業績都有可觀增長,Gucci去年更錄得三年來最強勁營業額升幅;如果喺「有米男」組別內,呢啲牌子唔係最受歡迎,咁幫襯佢哋嘅,即係消費力一般嘅市民大眾?純粹斷估,即係有錢人嘅時尚品味可能唔夠fashion forward,畢竟著到band仔咁、或喱士邊蝴蝶結女人型恤衫,唔係個個男人carry得起;但若果衰啲諗,有錢人又點會同我呢啲窮L一樣,追潮流趕時髦,或者佢哋心目中嘅luxury,係保時捷法拉利呢!(一定係,除非唔係) email: iamyumi@gmail.com A Chick’s View on Menswear 擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-02-22

首先利申,小女子並非美國公民,看著地球另一方這個民主國度的總統初選熱熱鬧鬧、沸沸揚揚,梗係又羨慕又妒忌;睇番自己香港嗰位縣官嘅所作所為,簡直人神共憤,但這裡係講時裝,小女亦不才,政評都係留番俾各位大大公論。 去年希拉莉宣布角逐美國總統,時裝同名人界排山倒海湧出來支持她,以時裝界來計,最大粒的支持者,當然係美版《Vogue》總編Anna Wintour,其次如Marc Jacobs、Lady Gaga及Katy Perry等唔在講,一句講晒,就係「星光熠熠耀希拉」。   名牌TEE催選票 剛結束的紐約時裝周,Marc Jacobs、Tory Burch同Public School這三個品牌就推出競選T恤幫希拉莉造勢,名模Kendall Jenner亦跟隨家姐Kim Kardashian的步伐,著住Marc件Hillary tee自拍放上自己的Instagram,單係Kendall一人已坐擁5千萬IG followers,就咁睇,如此龐大的名人效應,實在好難匹敵。    改變扶貧才是王道 但這個一面倒的勢頭,隨住Bernie Sanders以其社會民主主義理念,贏到好多年輕人的心(包括我呢位中女左膠),不少文化及演藝界人士陸續現身支持,當中以《Sports Illustrated》名模、裸露當食生菜的惹火尤物Emily Ratajkowski叫人最刮目相看。她於剛過去的New Hempshire初選中為Bernie站台,Emily話,曾經她也希望美國選出一位女總統,可以讓她對自己女兒說,「長大後妳也可以當上總統」,但這個屬於象徵意義多於一切,而人民需要的不是象徵,而是切切實實的改變(action to make change),Bernie讓她感受到從政非關資歷深淺、也不是人脈,更加同性別無關。  稍後她在接受《Marie Claire》追訪時的答案更精采,實在要原文照登,「I guess it’s just how I want to see this country run. I’m really sick of the “one percent” that is taking all the money from this country, draining the middle class, making it nonexistent. But aside from that, I also think that because Bernie is not tied up with any interests, whether private or corporate, that he is able to make changes that I’d really like to see, whereas Hillary is not.」(大意是她已厭倦國家由1%的富人把持,而Bernie完全沒有大財團背後支持/扯線,相信他有能力改變現狀,而希拉莉不會。)    時裝商人著眼利益 說到這裡,或者大家都意會到,為何時裝界沒有、或極少重量級人馬支持Bernie了吧?畢竟時裝這枚錢幣的兩面,一面是創作,另一面是生意,而且是multi-billion的大生意,要求時裝界也如政府一樣,要「of the people, by the people & for the people」,未免不切實際,但發夢的權利,則無人可剝奪。馬丁路德金當年的夢想,不是也成真了嗎? email: iamyumi@gmail.com A Chick’s View on Menswear Yumi Ng~擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-02-15

月初時裝界最熱話題,肯定是Burberry同Tom Ford不約而同宣布將新季發布與發售周期同步,Burberry更將男女裝合併發布;終於有品牌行出這第一步,其實不算意外,身兼Burberry CEO及創作總監的Christopher Bailey去年就公開講過,2016年將是品牌作出重大改變及整合的一年,只差在幾時公布而已。 預覽不管用 雖云市場一早消化了,依然有其重大意味。以往品牌早半年齊集時裝周發布來季新作的慣例,容讓世界各地而來的時裝買手及傳媒預覽;隨著互聯網尤其是社交網絡的興起,這個發布系統經已不管用。Bailey接受《Business of Fashion》獨家專訪中就特別提到,時裝周發布期間累積的巨大能量,無法即時轉化為銷售數字,「忘了剛才這一切吧,這些東西還沒到店裏,再等5、6個月吧。那麼5、6個月之後,你又得再度造勢……你會質疑這究竟還有沒有意義。」   「早買早享受」 這個詰問,其實Bailey自己及不少品牌過往幾年經已嘗試回應,Burberry早於09年已開始將其時裝騷網上直播,又抽選部分新作即時作網上預訂,縮短時裝周發布及實際銷售期的差距;Moschino自從委任Jeremy Scott為創作總監,系列中最搶眼的單品,完騷後一兩日就會於店內買到,滿足一批消費力強橫的時裝人「早買早享受」之餘,又可即時帶來進帳,其實是一舉兩得。   供應鏈受壓 問題來了,同步之後,「早買早享受」引發的消費力一夜消失,生產及買入的一方卻面對即時的壓力,以往買手有時間考慮哪些款式較sell得而落訂,品牌亦可因應訂單多寡,而調整個別款式生產數量,這條供應鏈的運作其實是需要時間的;對於超級品牌如Burberry有直屬的銷售系統,包括分布全球的實體店及其官網,這個問題當然不難解決,但對於較細的品牌,又該如何應對?   男女同步意義更大 除了同步,將男女裝合併發布,亦引申出另一個問題,Bailey亦提到,「設計一個系列的整個過程中,其實最重要是這個系列要展現的精神,不會特別從性別角度去思考」,這點我十分同意;但如果其他品牌紛紛效法,這幾年因應男裝需求大增,而獨立出來的男裝時裝周,還有沒有存在的價值?沒有如Burberry這般超級品牌坐鎮的男裝時裝周,能否仍然得到全球媒體的關注,真的好成疑問。 但個人係樂見這個轉變的,畢竟一年兩度春夏/秋冬、男/女時裝周日程,再加上高級訂造服及pre-collection的發布,莫講話設計師,連媒體都疲於奔命;男女裝併合發布的轉變,可能較同步發布銷售,對創作與商業之間的平衡,更具重大意義。  擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。 

2016-02-01

這篇於Mashable的《Men's fashion magazines are crumbling because you never read them》文章,最初能吸到我眼球的原因,不是因為我係女,所以唔多睇男人時裝書,而係對一個時裝編輯而言,冇讀者應該是最大的夢魘;再籠統點講,無論從事任何形式的創作,當你生產的內容乏人問津,首當其衝當然是生計,但最致命的打擊,應該係對自己的能力產生懷疑這一點。撰文:Yumi Ng(iamyumi@gmail.com) 都是社交網絡的錯? 講到咁嚴重,但這篇文章完全俾唔到我一點insight,文章都係將傳統媒介(包括印刷及網上)的沒落,歸咎於社交網絡的興起,無論是針對男或女的時裝媒體都好,大家可以直接從Instagram、snapchat中follow某些KOL(key opinion leader),從而獲得海量的時裝資訊,根本唔需要睇時裝雜誌過濾、編輯過的內容,文章甚至透過被訪者口中講出,如今的時裝愛好者,根本唔需要透過消化文字去獲取資訊,睇吓啲KOL著乜就夠(最好就係自己做埋KOL),簡單地概括,就是一圖勝千言。   真心還是商機? 但事實上係咪咁呢?我自身經驗話俾我聽唔係囉,因為工作需要,我會follow大量的KOL,同一時間當某項新品發布不久,你會見到ABCDE以至N位KOL不約而同著/用/拎住該項新品,係衫褲鞋襪定化妝護膚品甚至食物都好,你會有乜感覺?我都係讀者、我都係受眾,感覺咪就係飽滯。老實講,Chiara Ferragni(IG follower 540萬),她著乜用乜食乜都係一盤生意來的,有誰會相信她的選擇是genuine,而不是品牌的endorsement? 或者這可以解釋到為何一些深入及嚴謹一點的時尚報道及媒體,如《Business of Fashion》或《紐約時報》的時尚及生活版,愈來愈得到重視;《BoF》最近一篇go viral的文章,就是探討NET-A-PORTER同Yoox合併以致創辦人Natalie Massenet突然辭任的偵查式報道,《BoF》亦會在下月初出版特刊,開宗明義探討《時裝世界新秩序》,「專注於解構『崩壞』的時裝體系」。   膚淺重複是死因 時尚網購SSENSE,亦都聘任《032c》這本位於柏林的獨立文化雜誌主編Joerg Koch,為整盤網購生意打骰。《032c》以fanzine起家,由小眾口味做到「打破了印刷媒體/雜誌無法像博客那麼迅速、緊跟潮流的觀點」(出名惹火的時裝記者Cathy Horyn所言);SSENSE規模或許不及NET-A-PORTER,但也是一家每月瀏覽量達2,200萬,以嚴選品牌而出名的時裝網購,搵一本仍算小眾又前衛的雜誌主編坐鎮,SSENSE創辦人兼CEO Rami Atallah就解釋:「內容從來不缺,但大多數內容往往膚淺重複,或僅是為了吸引人們點擊鏈結。我們沒興趣生產那些只報道時尚潮流的內容。我們相信,如果能製造具有吸引力、能為我們的讀者增加文化資本的內容,積極的商業影響也將隨之而來。」 或者這位CEO的看法,正正提供了「點解『某啲』時裝雜誌冇人睇?」的答案。 email: iamyumi@gmail.com A Chick’s View on Menswear Yumi Ng~擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-01-25

還說香港沒冬天,這幾天寒潮風暴就殺大家一個措手不及,話時話,以前一路聽都是寒流多,今勻叫寒潮是要凸顯其冷鋒程度升級?聽落真的有點不慣。 但這幾天應該是時裝精最喜愛的日子,因為待在衣櫃坐足成年冷板凳的厚衫大衣頸巾手套氈帽統統解凍,可以出來見人了,而且仲唔使左度右度,著得西裝又要放棄件皮褸;凍成咁,絕對可以「冚把冷」著晒上身,鍾意tone-on-tone定玩contrast悉隨尊便,Gentlemen,welcome to the fight club,街頭就是大家一顯身手的擂台。   Runway Vs Realway 1月係男裝時裝周季節,由倫敦Men's Collection開始、到佛羅倫斯的Pitti Uomo、然後是米蘭及巴黎,天橋上的設計師新作是主菜,但以一個平常人的角度,作為甜品的街拍,其觀賞及偷師的價值,隨時勝過一套套品牌的total look。好似前幾年當Rick Owens的都市游牧look大熱,街頭個個黑灰nomad披披搭搭出現,腳下一對Rick記波鞋好似當返學鞋般咁著,而家睇番覺得好奄悶;穿戴的樂趣就是鍾意著乜就著乜,亂襯錯著咪從錯誤中學習囉,甚至錯有錯著,我們不是時裝設計師,但自己就是自己個人風格的總設計師,be creative。 1.今年Pitti Uomo街頭的型男,打扮一絲不苟,每個位都襯過,領帶袋巾帽子手套眼鏡齊備,條子圓點格仔腰果花出齊,我沒有覺得他們trying too hard,因為Pitti Uomo是一年一度男裝時尚業界盛會,著成咁是尊重又專業的表現。 2.情侶裝是天下間最scary的一件事之一,但這孖咁stylish的情侶(?),看到也不忍深責吧? 3.右邊那一位biker配西裝背心領帶的仁兄really pull that off,雖然兩位友人穿得也好看,但論吸睛度,係咪贏晒先? 4.全身一隻深藍看似悶悶哋,但腳下那對暗姣的電藍(看似Raf Simons的Stan Smith),就將整個look提升了。 5.恤衫針織西裝褸chino褲,男生衣櫃的日常,穿得這麼日常也能吸到鏡頭,就是配搭的功力。 6.我好喜歡這種隨意披搭,恤衫外仲著一件V領top,bomber jacket襯西裝褸,肯肯定有襯過先出門口,但就是呢種出過力的effortless,好值得欣賞。 7.芥黃磚紅電藍,灰濛濛的冬日見到一幀如此色彩拼貼,係咪賞心悅目先? 8.全身沒一件衫你認得出牌子,左邊那位甚至可以說有點「呢啡」,中間運動拉鏈外套襯大褸,右邊一條彩藍花巾食胡,一般來說,dress up容易吸睛,但dress down得來也好看,這才是高手呀! 圖片來源:http://www.gq-magazine.co.uk/ Yumi Ng A Chick’s View on Menswear 擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-01-18

上周最叫人難過的消息固然是David Bowie這位「The Man Who Fell to Earth」離開我們,返回他的星球去,但地球真的很危險,還是能逃的速逃,至少對動物而言;你我家中的毛孩應該是幸福的,但不用說到去Shell是否惡貫滿盈與Greenpeace那幀瘦骨嶙峋的北極熊相片,那麼驚心動魄,接連開騷的倫敦及米蘭男裝周,不少大牌還是大刺刺地整件毛皮披上身,對於品牌或是設計師本身仍然那麼insensitive,說大惑不解應該是夠客氣了。 好了,當我疑中留情吧,看的是相片,有可能品牌用faux fur呢,人造毛皮我係接受的,因為本身都好愛毛茸茸的質感,好些動保分子說連人造毛皮也不應鼓勵,認為始終會間接認受穿毛皮的正當性;我的底線沒定得那麼高,也覺得若然品牌放棄用真毛、起用人造毛皮造衫,某一程度也在宣揚動物保護的訊息,理應肯定。   選Heattech.棄皮草 回到大惑不解這點,有求有供是市場定律我明,地球暖化帶來極端天氣我也明,香港沒冬天,但歐美國家的冬天仍然可以極寒冷,足證皮草在世界各國仍然有市場,不然品牌也不會冒天下的大不諱繼續做皮草。但明明現今科技那麼發達,好些專業戶外牌子研發的保暖質料,那些專業名稱我記不住,但足以讓攀山專家挑戰雪嶺險峰;layman一點,自從有咗Heattech呢件保暖底衫(不是幫Uniqlo賣廣告),我成個冬天基本上連冷衫都慳番,有一年帶著幾件Heattech出發到紐約時裝周。   面皮更厚 2月的紐約落完雪又落雨,凍到死,係Heattech保我平安,然而一班歐美時尚潮人,仍然祼著雙腿腳踩4吋斗零踭去看騷,上身卻披著不用摸,也知貨真價實的皮草,或者她們想告訴大家時尚的世界,是可以如此playful又對比強烈,但我只知她們可以那麼抵得冷,卻仍然成件毛皮披上身面不改容,不只腳皮厚,面皮也一定更厚。 Yumi Ng~A Chick’s View on Menswear 擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  

2016-01-11

新年伊始,係咁意講吓潮流走勢少不免,看見Mashable一篇報道好有趣,他們趁倫敦時裝周舉行期間,專登落街周圍問倫敦的時裝人,點睇以下幾項男士潮流,我以為以倫敦的fashion forward,梗係包容度大到冇limit,實情唔係喎!有啲位以我呢個住在一個急速倒退的城市的一個小編輯都接受到,但倫敦潮男就係接受唔到,都話靚係好主觀一回事㗎啦! Floral Suit,Yes! One Direction的Harry Styles將Gucci的花花西裝著勻咁滯,亦sort of掀起熱潮,女裝total look花套裝我都好受落,無理由只是女性專利,男人咁著都OK吖,不過點睇都係天橋上的男模carry得好啲。 Sandals with Socks,Yes & No 我成個夏天(其實到依家都係)都狂著涼鞋襯襪,尤其係對Birkenstock仲未捨得換,但呢個潮流伸延到著拖鞋都襯襪,特別係Nike運動拖鞋,我就不太有感,女仔著還可當play down,男士咁著隨時以為你通頂打機肚餓落街買早餐,No no。 Glitter Beard,No 應該係呢對來自美國俄勒岡州的組合The Gay Beards引發的熱潮,佢哋仲有YouTube教學教大家點樣整閃粉鬍,跟住仲衍生出不同版本,原意趁大時大節玩盡啲,真係去party玩得癲啲係無相干,但平日無情情咁搞一大餐,唔好講食嘢,單係講嘢時不斷跌閃粉呢下都夠煩啦。 Top Knot,Yes! 由Man Bun進化到Top Knot,男士束髻潮2.0跟不少男士的髮線一樣,都係愈行愈上,荷李活唔少一線男星都喜歡束髻示人,但就未去到頭頂咁誇;我就覺得束髻係同不修篇幅遊牧味道夾啲,束髻留鬚係一個package,塊面太乾淨企理單單一支擘天柱的髮髻,真係連computer都says no呀! Stretch Skinny Jeans,Hell no ! 女士都識得偷男朋友條牛仔褲著,仲成為不死潮流Boyfriend's Jeans,Boyfriend乜Boyfriend物應運而生,但有啲trend我覺得係男人禁區,千祈千祈千祈唔好掂,其一就是有彈性貼到實一實的skinny jeans,even連女人著我都覺得核突,何況男人?理由?唔使解釋下話。   A Chick’s View on Menswear 擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。  email: iamyumi@gmail.com

2016-01-04

編輯大大話開個新專欄給我寫寫,想我以女性時裝編輯角度寫男裝,老老實實,雖云從事時裝雜誌工作多年(實際幾多唔講啦),年資同年齡係成正比,我又的的確確是個女兒身;但時裝對我來講,性別的分野不是太重要,即係咁,正常來講,底衫當然男女最好唔好撈亂著,我唔會鼓吹男人戴bra(多餘),然而時裝好玩之處在於,打破一些墨守成規,帶來一些觀感上的新意或衝擊,像玲姐(COMME des GARCONS)做裙俾男人著,或前幾季J.W. Anderson刻意將女裝元素帶入男裝系列,一般男士未必carry到,但從一個時裝編輯的角度睇,就會覺得好玩,亦希望見到多些如此這般敢於挑戰約定俗成的設計。   Baumlist 20 Things a Gentleman should never do 為了新欄目需要,美其名要做少少資料搜集,其實即係上網刮料啦,網上很多那些今季必讀的潮流資訊,例如不可不知的十大XX潮流、教女士如何駕馭高腰褲、blah blah blah……不勝枚舉;想不到類似但針對男士市場的也有好多,我找到一篇Baumlist的「紳士永不可做的20件事」,部分我同意,例如不應講大話、不可食言等等,同意不是因為那是紳士不應做的事,而是因為這根本是做人的基本原則嘛,關甚麼紳士不紳士。 就拿幾項跟大家分享一下: 1. 紋身穿環 文章說後生反叛鍾意做乜都得,但這些玩意停留在那些輕狂歲月就好;恕我理解不到,難道碧咸不是一個gentleman? 2. 某些特定裝扮 例如戴副geek眼鏡扮毒L、著八十年代復刻運動衫、夏威夷花花恤等,又唔係日日叫你返工咁著,尤其geek geek地的眼鏡look,實情都幾啱返工的,有辦你睇:Alessandro Michele接手後的Gucci。 3. 繞腳坐 若果因為健康理由而戒繞腳我同意,但一個男人能不能成為紳士,跟他繞腳不繞腳有甚麼關係呢請問? 類似這樣的文章在網路上多如恆河沙數,要駁的話可以駁到地老天荒,駁到也沒有甚麼意思,反而,有求才有供,為甚麼眾生的我們,無論男女,都如此逼切尋求呢類即食model answer,這個why,才值得我們思考。我希望這個專欄(如果編輯大大唔會即刻喊停),無論是有關男裝好、女裝好,都不會提供模範答案。  是為序。 A Chick’s View on Menswear 擺明偷橋(著名部落格A Shaded View on Fashion),以女人身男人心時裝雜誌/雜工角度看男裝。 Yumi Ng  

/136



C觀點

中原城市領先指數

廚神

旅遊